Magdiretso sa kaundan

Magdiretso sa listahan sang kaundan

 Sugilanon sang Kabuhi

Setenta ka Tuig nga Nagabuyot sa Sidsid sang Isa ka Judiyo

Setenta ka Tuig nga Nagabuyot sa Sidsid sang Isa ka Judiyo

Panugiron ni Leonard Smith

Sang tin-edyer pa lang ako, duha ka teksto sa Biblia ang nanamian ko gid. Pagligad sang sobra 70 ka tuig, madumduman ko pa ang tion nga nahangpan ko ang kahulugan sang Zacarias 8:23, parte sa “napulo ka tawo” nga nagabuyot sa “sidsid sang isa ka [Judiyo].” Ginsilingan nila ang Judiyo: “Magaupud kami sa inyo, kay nabatian namon nga ang Dios nagaupud sa inyo.”

GINASIMBULO sang Judiyo ang hinaplas nga mga Cristiano, kag ang “napulo ka tawo” nagarepresentar sa “iban nga mga karnero,” ukon mga “Jonadab,” subong sang pagtawag sa ila sadto. * (Juan 10:16) Sang nahangpan ko ini, narealisar ko nga agod maagom ang kabuhi nga wala sing katapusan dapat ko sakdagon sing mainunungon ang mga hinaplas.

Nanamian man ako sang ilustrasyon ni Jesus parte sa “mga karnero” kag “mga kanding,” sa Mateo 25:31-46. Ang “mga karnero” nagapatuhoy sa mga maluwas sa paghukom sa tion sang katapusan, kay naghimo sila sang maayo sa mga hinaplas nga kauturan sang Cristo nga yari pa diri sa duta. Subong isa ka pamatan-on nga Jonadab, ginsilingan ko ang akon kaugalingon, ‘Len, kon gusto mo nga tamdon ka sang Cristo nga karnero, dapat mo suportahan ang iya hinaplas nga mga utod, magpasakop ka sa ila kay kaupod nila ang Dios.’ Ini nga paghangop ang naggiya sa akon sa sulod sang sobra 70 ka tuig.

‘ANO ANG AKON PAPEL?’

Sang 1925, ginbawtismuhan si Nanay sa duog tilipunan malapit sa Bethel nga ginatawag London Tabernacle nga ginatipunan sang mga kauturan sa sini nga lugar. Natawo ako sang Oktubre 15, 1926. Sang Marso 1940, nagpabawtismo ako sa asembleya sa Dover sa baybayon sang England. Nagdaku ako nga ginahigugma ang kamatuoran sa Biblia. Si Nanay hinaplas, gani masiling nga ang una nga ‘sidsid sang Judiyo’ nga akon ginbuyutan, amo ang iya ni Nanay. Sini nga tion, si Tatay kag si Manang wala nagaalagad kay Jehova. Sa Gillingham ang amon kongregasyon sa bagatnan-sidlangan sang England, kag halos mga hinaplas ang mga kauturan diri. Kag si Nanay maayo gid nga halimbawa sang kakugi sa pagbantala.

Sang Septiembre 1941, sa kombension sa siudad sang Leicester, ang pamulongpulong nga “Integridad” nagbinagbinag sang isyu parte sa paggahom sa bug-os nga uniberso. Didto ko lang nahangpan nga nadalahig kita sa isyu sa tunga ni Jehova kag ni Satanas. Gani, dapat kita manindugan kag huptan ang aton integridad kay Jehova subong ang Soberano sang Uniberso.

Sa sini nga kombension, ginpadaku gid ang pagpayunir, kag ginpalig-on ang mga pamatan-on nga himuon ini nga tulumuron. Bangod sa pamulongpulong  nga “Ang Papel sang mga Payunir sa Organisasyon” namensar ako, ‘Ti, ano ya ang akon papel?’ Nangin kumbinsido ako nga obligasyon ko subong isa ka Jonadab nga buligan ang mga hinaplas sa pagbantala sa bug-os ko nga masarangan. Didto mismo sa Leicester, nag-aplay ako nga magpayunir.

PAGPAYUNIR SA TION SANG INAWAY

Sang Disiembre 1, 1941, nangin espesyal payunir ako sa edad nga 15. Si Nanay ang akon una nga partner, pero pagligad sang isa ka tuig, nag-untat sia sa pagpayunir kay nagmasakit sia. Gani, ginpapartner sa akon sang sanga talatapan sang London si Ron Parkin, nga miembro na sang Komite sang Sanga sa Puerto Rico subong.

Ginpadala kami sa mga banwa sa baybayon sang Broadstairs kag Ramsgate sa probinsia sang Kent, kag nag-arkila lang kami sang kuarto. Mga $8 (U.S.) lang kada bulan ang allowance sang mga espesyal payunir sadto. Gani, igoigo lang ini sa arkila, kag diutay na lang ang mabilin, amo nga sa masami wala kami kahibalo kon diin makuha sang masunod namon nga kaunon. Pero, wala gid kami ginpabay-an ni Jehova.

Nagabisikleta lang kami, kag indi ini mahapos kay mabug-at ang amon dala kag sugata namon ang mabaskog nga hangin halin sa North Sea. Naeksperiensiahan man namon nga magpanago agod indi maigo sang mga bomba kag nakita gid namon ang mga German V-1 misil nga nagalupad sing manubo sa Kent pakadto sa London. Nakaagi man ako nga naglumpat sa bisikleta pakadto sa tulugban kay may bomba nga nagsurip sa ibabaw sang akon ulo kag naglupok sa unhan lang. Pero bisan pa sini, makalilipay gid ang amon pagpayunir sa Kent.

NANGIN BETHELITE AKO

Nanamian gid si Nanay sang Bethel kag pirme gid niya ini ginaistorya. “Gusto ko gid nga tani ma-Bethelite ka man,” hambal niya. Daku gid ang akon kalipay sang wala ko ginapaabot nga makabaton sang sulat halin sa Bethel sa London sang Enero 1946. Ginaagda ako nga magbulig didto sa sulod sang tatlo ka semana. Sang matapos ini, ginpangabay ako sang alagad sang sanga nga si Pryce Hughes, nga magpabilin sa Bethel. Ang paghanas nga natun-an ko didto nakabulig gid sa akon kabuhi.

Mga 30 lang ang miembro sang pamilya Bethel sa London sadto. Ang kalabanan singgol nga brother kag mga hinaplas lakip sanday Pryce Hughes, Edgar Clay, kag Jack Barr, nga nangin miembro sang Nagadumala nga Hubon. Pribilehiyo gid nga sakdagon ang mga utod sang Cristo paagi sa pag-alagad sa Bethel subong isa ka pamatan-on, kag magpasakop sa espirituwal nga pagdumala sining “mga haligi”!—Gal. 2:9.

Isa ka adlaw sa Bethel, ginsilingan ako sang isa ka utod nga may sister nga nagapangita sa akon. Si Nanay gali, kag may dala sia. Nagsiling sia nga indi niya gusto nga maawat ang akon obra, gani ginduhol lang niya ang iya dala sa akon kag naglakat. Isa ka madamol kag malaba nga dyaket ang unod sini. Bangod sining mapinalanggaon nga buhat, nadumduman ko si Ana nga nagdala kay Samuel sang wala sing pako nga panapton sang nagaalagad ini sa tabernakulo.—1 Sam. 2:18, 19.

GILEAD—INDI GID MALIPATAN NGA EKSPERIENSIA

Sang 1947, ang lima sa amon sa Bethel gin-agda sa Gilead School sa Estados Unidos, kag nag-eskwela kami pagkasunod nga tuig sa ika-11 nga klase. Pag-abot  namon didto, grabe gid katugnaw sa aminhan sang New York, diin nahamtang ang amon eskwelahan. Maayo lang kay gindal-an ako ni Nanay sang dyaket!

Indi ko gid malipatan ang anom ka bulan ko sa Gilead. Ang akon mga klasmeyt halin sa 16 ka pungsod kag madamo ako sing natun-an sa ila. Magluwas sa espirituwal nga panudlo, nakabenepisyo gid ako sa pagpakig-upod sa hamtong nga mga Cristiano. Ang klasmeyt ko nga si Lloyd Barry; ang isa sa mga instruktor ko nga si Albert Schroeder; kag si John Booth nga amo ang manugdumala sang Kingdom Farm (diin nahamtang ang Gilead School sadto) nangin miembro tanan sang Nagadumala nga Hubon. Ginaapresyar ko gid ang mahigugmaon nga laygay sini nga mga utod kag ang ila maayo nga halimbawa sang pagkamainunungon kay Jehova kag sa iya organisasyon.

PAGLAKBAY NGA HILIKUTON KAG PAGBALIK SA BETHEL

Pagkatapos sa Gilead, gin-asayn ako nga mag-C.O. sa Ohio, U.S.A. Beinte-uno anyos pa lang ako sadto, pero mahigugmaon ako nga ginbaton sang mga kauturan. Madamo ako sing natun-an sa eksperiensiado nga mga utod sina nga sirkito.

Pagligad sang pila ka bulan, ginpabalik ako sa Bethel sa Brooklyn para hanason pa gid. Nakilala ko ang mga haligi subong nanday Milton Henschel, Karl Klein, Nathan Knorr, T. J. (Bud) Sullivan, kag Lyman Swingle, kag tanan sila nangin miembro sang ulihi sang Nagadumala nga Hubon. Makalilipay gid nga makita sila nga nagatrabaho kag masaksihan ang ila Cristianong paggawi. Nagpabakod gid ini sang akon pagsalig sa organisasyon ni Jehova. Dayon, ginpabalik ako sa Europa agod padayunon didto ang akon ministeryo.

Napatay si Nanay sang Pebrero 1950. Pagkatapos sang lubong, ginprangka ko si Tatay kag si Manang Dora. Ginpamangkot ko sila kon ano ang ila plano parte sa kamatuoran kay wala na si Nanay kag nagbiya naman ako sa balay. Kilala nila kag ginatahod ang isa ka hinaplas nga gulang nga si Harry Browning, kag nagpasugot sila nga magpa-Bible study sa iya. Pagligad sang isa ka tuig, nabawtismuhan sila. Sang ulihi, gintangdo si Tatay nga mangin servant (ministeryal nga alagad subong) sa Gillingham Congregation. Sang napatay sia, ginpangasawa si Manang sang isa ka matutom nga gulang nga si Roy Moreton. Nag-alagad si Manang sing matutom kay Jehova asta nga napatay sia sang 2010.

PAGBULIG SA PRANSIA

Sang nagaeskwela pa ako, natun-an ko ang Pranses, Aleman, kag Latin, kag sa sini tanan Pranses ang nabudlayan ko gid. Gani, sang ginpangabay ako nga magbulig sa Paris Bethel sa Pransia, indi ko maintiendihan ang akon ginabatyag. Didto, nakapribilehiyo ako nga mag-obra upod sa alagad sang sanga nga si Henri Geiger, isa ka tigulang nga hinaplas. Indi pirme mahapos ang akon asaynment amo nga madamo ako sang sayop, pero madamo ako sing natun-an parte sa pagpakig-angot sa iban.

Ang una nga internasyonal nga kombension sa Paris pagkatapos sang inaway ginplano nga hiwaton sang 1951, kag lakip ako sa mga nag-organisar sini. Si Léopold Jontès nga isa ka bataon pa nga nagalakbay nga manugtatap, nagpa-Bethel agod buligan ako. Sang ulihi, gintangdo sia subong manugtatap sang sanga. Ginhiwat ang kombension sa Palais des sports, malapit sa Eiffel Tower. Ang mga delegado naghalin sa 28 ka pungsod. Sa katapusan nga adlaw, 10,456 ang nagtambong gani nalipay gid ang 6,000 ka Pranses nga kauturan.

 Sang nag-abot ako sa Pransia, diutay gid lang ang akon nabal-an nga Pranses. Ang malain pa gid kay nagahambal lang ako kon sigurado ako nga husto ang akon pagmitlang. Pero indi gali ini makabulig kay kon indi nila mabatian ang imo sayop nga pagmitlang, indi ka nila matudluan kag indi ka gid mag-uswag.

Gani agod makatuon, nagpaenrol ako sa eskwelahan nga nagatudlo sang Pranses sa mga dumuluong. Nagaeskwela ako sa gab-i basta wala sang miting. Natun-an ko nga higugmaon ang Pranses nga lenguahe, kag sa pagligad sang tion labi ko ini nga naapresyar. Nagamit ko gid ini tungod nakabulig ako sa translation sa sanga sang Pransia. Sang ulihi, nangin translator ako mismo sang Ingles pakadto sa Pranses. Pribilehiyo gid nga makabulig para mapalab-ot sa mga kauturan nga nagahambal sang Pranses sa bilog nga kalibutan ang bugana nga espirituwal nga pagkaon halin sa ulipon nga klase.—Matt. 24:45-47.

PAGPANGASAWA KAG IBAN PA NGA PRIBILEHIYO

Sang 1956, ginpangasawa ko si Esther, isa ka Swiss nga payunir nga pila ka tuig ko na nga kilala. Ginkasal kami sa Kingdom Hall malapit sa London Bethel (ang London Tabernacle anay, diin ginbawtismuhan si Nanay). Si Utod Hughes ang namulongpulong. Yara man ang iloy ni Esther nga may langitnon nga paglaum. Wala lamang ako nakatigayon sang isa ka matahom kag mainunungon nga asawa, kundi nakaupod ko pa pirme ang akon mabuot kag mahunahunaon sa espirituwal nga ugangan asta nga natapos niya ang iya dutan-on nga kabuhi sang tuig 2000.

Sa tapos sang amon kasal, wala na kami nag-istar sa Bethel. Nagpadayon ako sa pag-translate sa Bethel samtang si Esther nangin espesyal payunir sa mga lugar sa gua sang Paris. Madamo sia sing nabuligan nga mangin alagad ni Jehova. Sang 1964, ginpabalik kami sa Bethel. Dayon sang 1976, sang ginporma ang Komite sang Sanga, gintangdo ako nga miembro sini. Mahigugmaon gid ako nga ginasuportahan ni Esther asta subong.

“AKO INDI NINYO KAUPOD PIRME”

Nangin pribilehiyo ko man nga makakadto pirme sa headquarters sa New York. Gani nakabaton ako sang maayo nga mga laygay halin sa mga miembro sang Nagadumala nga Hubon. Halimbawa, sang isa ka bes nga nabalaka gid ako kay basi indi namon matapos ang amon obra, si Utod Knorr nagyuhom kag nagsiling: “Indi ka magkabalaka. Ubraha lang.” Halin sadto, kon nagatumpok ang akon obra, imbes nga magsalasala, ginaumpisahan ko lang ini kag nagakatapos man ini sa husto gid nga tion.

Antes napatay si Jesus, ginsilingan niya ang iya mga disipulo: “Ako indi ninyo kaupod pirme.” (Mat. 26:11) Nahibaluan sang iban nga mga karnero nga indi sa tanan nga tion yari diri sa duta ang mga hinaplas nga utod sang Cristo. Gani, ginakabig ko nga isa ka pribilehiyo nga makapakig-angot sing suod sa madamo nga hinaplas sa sulod sang sobra 70 ka tuig kag malipayon nga nagabuyot sa sidsid sang isa ka Judiyo.

[Nota]

^ par. 5 Ang termino nga “Jonadab,” ginapaathag sa Jehovah’s Witnesses—Proclaimers of God’s Kingdom, pahina 83, 165, 166.

[Blurb sa pahina 21]

Si Utod Knorr nagyuhom kag nagsiling: “Indi ka magkabalaka. Ubraha lang.”

[Mga Retrato sa pahina 19]

(Sa wala) Si Nanay kag si Tatay

(Sa tuo) Sa campus sang Gilead sang 1948, ginasuksok ko ang dyaket nga ginhatag ni Nanay

[Retrato sa pahina 20]

Sang 1997, samtang naga-interpret ako para kay Utod Lloyd Barry sa dedikasyon sang sanga talatapan sa Pransia

[Mga Retrato sa pahina 21]

(Sa wala) Sang kasal namon ni Esther

(Sa tuo) Updanay kami nga nagapanaksi