Magdiretso sa kaundan

Magdiretso sa listahan sang kaundan

 Halin sa Amon Archive

Pagtipig sang mga Hiyas Halin sa Aton Maragtas

Pagtipig sang mga Hiyas Halin sa Aton Maragtas

ANG katawhan ni Jehova may bugana nga espirituwal nga palanublion. Ang makawiwili nga rekord sini nga palanublion matun-an naton indi lamang sa mga publikasyon kundi paagi man sa mga piktyur, sulat, panaysayon, kag iban pa nga may labot sa aton pagsimba, pagbantala, kag maragtas. Ano ang benepisyo sa pagpreserbar sini nga mga butang kag pagkutkot sang aton nagligad? Ti, sa Israel sadto, dapat ipahibalo sang mga ulo sang pamilya sa ila kabataan ang mga kasuguan kag ang makatilingala nga mga buhat ni Jehova agod “mapahamtang nila sa Dios ang ila paglaum.”—Sal. 78:1-7.

Halin sang una, ang mga impormasyon sa archive may importante nga papel sa katumanan sang katuyuan ni Jehova. Halimbawa, sang gintinguhaan sang mga manugpamatok nga pauntaton ang pagtukod sang templo sa Jerusalem, nakita sa opisyal nga mga rekord sa archive sang Ecbatana nga kapital sang Media, ang isa ka dokumento nga ginhimo ni Hari Ciro nga nagpahanugot sang pagtukod. (Esd. 6:1-4, 12) Gani, natukod liwat ang templo suno sa kabubut-on sang Dios. Gingamit man sang manunulat sang Ebanghelyo nga si Lucas ang archive sa ‘pag-usisa sing sibu sang tanan nga butang halin sa ginsuguran.’—Luc. 1:1-4.

Interesado gid ang Nagadumala nga Hubon sa kasaysayan sang mga Saksi ni Jehova. Ang isa ka  katapo sang Nagadumala nga Hubon nagkomento kon ngaa dapat ipreserbar, himuon nga dokumento, kag ipaalinton ang aton espirituwal nga palanublion. Sia nagsiling: “Agod mahibaluan naton kon diin kita nagapadulong, dapat mahibaluan naton ang aton nagligad.” Gani sining karon lang, ang ulong talatapan sa Brooklyn, New York naghimo sing isa ka departamento nga ginatawag Writing Archives, kag ginatatap ini sang Writing Committee.

ANG ATON “FAMILY ALBUM” KAG MGA “HEIRLOOM”

Samtang nagaligad ang tion, ang kalabanan nanugon gid kay wala sila sing kompleto nga rekord sang mga impormasyon parte sa ila pamilya. Gani, sa Writing Archives ginatinguhaan nga mapreserbar kag mahimuan sing mga dokumento ang aton pag-uswag kag makawiwili nga maragtas. Ang mga piktyur nga ginatipigan sa Archive makabig naton nga “family album.” Ang mga publikasyon naton sang una, ang makakulunyag nga mga eksperiensia, kag hamili nga mga pagkabutang nalakip sa mga hiyas nga ginatipigan sa aton Archive. Ini nga mga hiyas mga “heirloom” nga magapaathag sang aton teokratikong palanublion kag makabulig sa aton nga magsalig sa palaabuton sang aton espirituwal nga pamilya.

Ginaagda namon kamo nga usisaon ang Writing Archives paagi sa sining bag-o nga bahin sang magasin nga “Halin sa Amon Archive.” Magagua ini sa tulun-an nga edisyon sang Ang Lalantawan. Sa masunod nga gua, plano namon nga magbalhag sang artikulo nga may mga piktyur para masabat ang mga pamangkot nga: Ano ang Dawn Mobile? Sin-o ang naggamit sini? San-o ini gingamit, kag para ini sa ano?

Kaangay sang family album, madamo kita sing matun-an sa Archive parte sa aton kag sa aton mga katigulangan sa espirituwal—ang pagtuo kag kaisog sang mga nauna sa aton, ang kalipay kag mga hangkat sa pag-alagad sa aton mahigugmaon nga langitnon nga Amay, kag ang panuytoy kag wala nagakapaslawan nga pagsakdag sang Dios sa iya katawhan. (Deut. 33:27) Nagasalig kami nga pakamaayuhon ni Jehova ining mga panikasog nga mapreserbar ang aton espirituwal nga maragtas agod mahiusa pa gid kita kag mapalig-on sa pagtuman sang iya kabubut-on.

[Kahon/Retrato sa pahina 31]

Pag-usisa sing Maayo

Sa paghanda sang Cristianong literatura, mga DVD, kag iban pa nga materyal pasad sa Biblia, ginagamit sang aton mga manunulat, artist, researcher, kag iban pa ang mga impormasyon sa archive. Gani ang Writing Archives mahalungon gid kag may praktikal nga mga paagi sa pagtipon kag pagpreserbar sang nanuhaytuhay nga mga materyal sang maragtas halin sa mga sanga talatapan, departamento sa Bethel, kongregasyon, indibiduwal, kag mga sekular nga institusyon. Binagbinaga ang sumaryo sini nga hilikuton:

Pagtipon kag Pag-analisar: Padayon nga ginadugang sa Archive ang pinasahi nga mga butang. Madamo sini ang ginadonar ukon ginapahulam sang mga indibiduwal nga ang pamilya madugay na nga nagaalagad sing matutom kay Jehova. Ang pag-analisar kag pagkumparar sining mga materyal makabulig agod mahangpan pa gid naton ang aton maragtas kag ang mga nakasaksi sini.

Paghimo sing listahan: Linibo ka sarisari nga butang ang ara sa Writing Archives. Ang pila sini masobra na isa ka gatos ka tuig ang kadugayon. Lainlain ang hitsura, kadakuon, kag pormat sini gani dapat himuan sing listahan para madali pangitaon sa ulihi.

Pagkay-o kag Pagpreserbar: Ang gabok nga mga libro kag iban pa nga butang ginakay-o kag ginapreserbar sang mga eksperto. Ang mga dokumento, piktyur, balasahon, pelikula, kag mga plaka ginbutang sa kompyuter. Gani puede ini gamiton nga indi na kinahanglan uyatan ang orihinal nga mga dokumento.

Talaguan kag Pagkuha: Ang mga materyal sa archive ginatago sing pasunod kag ginatipigan sing maayo agod indi madula kag maproteksionan sa silak kag hulas. May database nga ginhimo agod madali makita sang mga naga-research ining hamili nga mga hiyas sang aton maragtas.

[Retrato sa pahina 32]

1. Poster sang “Photo-Drama of Creation.” 2. Listahan sang suskripsion. 3. De-trompa nga salakyan. 4. Cover sang Abril 15, 1912, nga Watch Tower. 5. Sulat sang prisuhan kay J. F. Rutherford. 6. Mikropono sang WBBR. 7. Radyo pono. 8. Suludlan sang libro. 9. Personal nga nota. 10. Telegrama para kay J. F. Rutherford.