Magdiretso sa kaundan

Magdiretso sa listahan sang kaundan

Pagbasa sang Biblia—Tuburan sang Akon Kusog

Pagbasa sang Biblia—Tuburan sang Akon Kusog

 Pagbasa sang Biblia—Tuburan sang Akon Kusog

Panugiron ni Marceau Leroy

“SA GINSUGURAN gintuga sang Dios ang mga langit kag ang duta,” ang umpisa sang akon ginabasa sa sulod sang akon kuarto. Ginatago ko ini sa akon tatay nga ateista kay sigurado gid nga maakig sia kon makita niya ini nga libro, ang Biblia.

Ini ang una nga tion nga nabasa ko ang Biblia, kag nakibot gid ako sa una nga mga dinalan sa Genesis. Siling ko, ‘Ari man lang gali ang paathag kon ngaa nagahiliugyon ang mga kasuguan sa kinaugali nga pirme ko ginakatingalahan!’ Bangod sa kalipay, ginbasa ko ini halin alas otso sang gab-i asta gid alas kuatro sa kaagahon. Sugod sadto nangin batasan ko na ang pagbasa sang Biblia. Isugid ko sa inyo kon paano ini nangin tuburan sang akon kusog sa bug-os ko nga kabuhi.

“Mabasa Ka Na Gid Sina Adlaw-Adlaw!”

Natawo ako sang 1926, sa Vermelles, isa ka baryo nga minahan sang karbon sa naaminhan sang Pransia. Sang Bug-os Kalibutan nga Inaway II, importante gid ang karbon sa Pransia. Gani subong minero, wala ako ginpasoldado. Pero agod may tinun-an man ako, nag-eskwela ako sang radioelectronics kag electricity, kag natun-an ko nga nagahiliugyon gid ang kasuguan sa kinaugali. Sang 21 anyos ako, ginhatagan ako sang akon klasmeyt sing Biblia, kag nagsiling sia, “Manami ini basahon.” Sang mabasa ko ini, kumbinsido ako nga ang Biblia Pulong sang Dios kag mensahe niya para sa katawhan.

Abi ko gusto man sang akon mga kaingod ang Biblia, gani nagbakal ako sing walo gid ka bilog. Pero nakibot ako kay ginyaguta nila ako kag ginpamatukan. Ang akon mga paryente nga nagapati sa disparatis nagsiling: “Kon basahon mo ina, mabasa ka na gid sina adlaw-adlaw!” Pero ginbasa ko ini kag wala gid ako naghinulsol. Nangin bahin ini sang akon kabuhi.

Sang makita sang iban ko nga kaingod nga interesado ako sa Biblia, ginhatag nila sa akon ang mga publikasyon sang mga Saksi ni Jehova nga ara sa ila. Nabasa ko sa bukleta nga One World, One Government * (Pranses ang ara sa piktyur) kon ngaa suno sa Biblia ang Ginharian sang Dios lamang ang paglaum sang katawhan. (Mat. 6:10) Nangin determinado pa gid ako nga isugid ini nga paglaum sa iban.

Ang isa sa mga nagbaton sang Biblia nga ginhatag ko amo si Noël, nga abyan ko sugod sang bata pa ako. Katoliko sia, gani nangita sia sing paagi nga magkitaay kami sang isa ka seminarista. Ginkulbaan ako, pero nabasa ko sa Salmo  115:4-8 kag Mateo 23:9, nga wala mahamuot ang Dios sa paggamit sang mga idolo sa pagsimba kag sa relihioso nga mga titulo. Amo ini ang nagpaisog sa akon nga apinan ang akon bag-o nga pagpati. Subong resulta, nangin Saksi si Noël, kag matutom sia asta subong.

Ginduaw ko man ang akon magulang nga babayi. Ang akon bayaw ginagamo sang mga demonyo kay may mga libro sia parte sa espiritismo. Bisan pa sang primero daw wala ako sing mahimo, nakumbinse ako sang mga teksto subong sang Hebreo 1:14 nga ginasakdag ako sang mga anghel ni Jehova. Sang gin-aplikar sang akon bayaw ang mga prinsipio sa Biblia kag ginpanghaboy ang tanan nga butang nga may kaangtanan sa espiritismo, nahilway sia sa impluwensia sang demonyo. Sila sang akon magulang nangin makugi nga mga Saksi.

Sang 1947, nagtawag sa balay si Arthur Emiot, isa ka Amerikano nga Saksi. Nalipay gid ako kag ginpamangkot ko sia kon diin nagatipon ang mga Saksi. Ginsugiran niya ako nga may grupo nga nagatipon sa Liévin, mga dies kilometros halin sa amon. Bisan bisikleta malaka pa sadto, gani binulan nga ginalakat ko lang pakadto-pakari sa mga miting. Walo ka tuig nga gindumilian ang hilikuton sang mga Saksi ni Jehova sa Pransia. Mga 2,380 lang ang Saksi sa bilog nga pungsod—kag kalabanan sa ila Polaco nga mga imigrante. Apang sang Septiembre 1, 1947, nangin legal liwat ang aton hilikuton sa Pransia. Kag may sanga talatapan na liwat sa Paris sa Villa Guibert. Wala sing payunir sa Pransia, gani ang Disiembre 1947 nga gua sang Informant, (Ang Aton Ministeryo sa Ginharian subong) nangagda sa mga gusto magregular payunir, nga magbantala sing 150 ka oras kada bulan. (Sang 1949, ginhimo na lang ini nga 100 ka oras.) Bilang pag-ugyon sa ginsiling ni Jesus sa Juan 17:17, nga ‘ang pulong sang Dios kamatuoran,’ nagpabawtismo ako sang 1948, kag sang Disiembre 1949, nagpayunir ako.

Halin sa Prisuhan Pabalik sa Dunkerque

Ang akon una nga asaynment amo ang Agen, sa nabagatnan sang Pransia. Pero wala ako madugayi didto kay dapat ako magsoldado bangod indi na ako minero. Wala ako magsugot, gani ginbilanggo ako. Bisan indi ako puede magdala sang Biblia, nakakuha ako sang pila ka panid sang Salmo. Ang pagbasa sini nakapalig-on gid sa akon. Sang ginpagua na ako, dapat ako magdesisyon: Mauntat bala ako sa pagpayunir kag mangita na lang sing trabaho? Nabuligan ako liwat sang nabasahan ko sa Biblia. Ginpamalandungan ko ang ginhambal ni Pablo sa Filipos 4:11-13: “Sa tanan nga butang may kusog ako paagi sa iya nga nagapabakod sa akon.” Nagdesisyon ako nga magpadayon sa pagpayunir. Sang 1950, nabaton ko ang bag-o nga asaynment—ang Dunkerque, isa ka banwa nga nabantalaan ko anay.

Mabudlay gid ang kahimtangan sang pag-abot ko sa akon asaynment. Grabe nga kahalitan ang natuga sang Bug-os Kalibutan nga Inaway II sa sini nga banwa, kag mabudlay mangita sing dalayunan. Ginkadtuan ko ang pamilya nga nabantalaan ko anay, kag nalipay gid ang asawa sang tagbalay. Nagsiling sia: “Nakagua ka na gali Mister Leroy! Siling sang akon bana, kon ang mga tawo pareho lang sa imo, wala gid sing inaway.” May balay sila nga ginapadayunan, kag ginpaistar nila ako didto mientras wala pa sing mga turista. Sina man nga adlaw, gintanyagan ako sang obra sang utod ni Arthur Emiot nga si Evans. * Interpreter sia sa pier kag nagapangita sia sing manugbantay kon gab-i sa isa ka barko. Ginpakilala niya ako sa isa ka opisyal sang barko. Bangod bag-o lang ako makagua sa prisuhan, puerte sa akon kaniwang. Sang ginpaathag ni Evans ang natabo sa akon, ginsilingan ako sang opisyal nga makuha lang ako sang gusto ko sa repredyeritor. Sadto mismo nga adlaw, may dalayunan ako, may obra, kag may pagkaon! Nagbakod  pa gid ang akon pagsalig sa ginsiling ni Jesus sa Mateo 6:25-33.

Sang may mga turista na, kami sang akon partner nga si Simon Apolinarski dapat na mangita sang bag-o nga dalayunan, pero determinado gid kami nga magpabilin sa amon asaynment. May nagpadayon sa amon sa daan nga kuadra, kag dagami ang amon hiligdaan. Kon adlaw, masako kami sa pagbantala. Ginpanaksihan man namon ang tag-iya sang kuadra, kag isa sia sa mga nangin Saksi. Wala magdugay, may artikulo nga naggua sa lokal nga pamantalaan, nga nagapaandam sa mga pumuluyo sang Dunkerque sa “nagadamo nga mga Saksi ni Jehova sa sini nga duog.” Ang matuod, kami lang ni Simon upod sa pila ka manugbantala ang Saksi diri! Walay sapayan sang mga kabudlayan, napalig-on kami sang pagpamalandong sang amon Cristianong paglaum kag sa pag-atipan ni Jehova sa amon. Mga 30 na ang manugbantala sa Dunkerque sang ginsaylo ako sang 1952.

Napalig-on sang Bag-o nga mga Responsibilidad

Pagkatapos sang malip-ot nga tion sa siudad sang Amiens, gintangdo ako nga espesyal payunir sa Boulogne-Billancourt, sakop sang Paris. Madamo ako sang ginatun-an sa Biblia, kag sang ulihi ang iban sa ila nangin bug-os tion nga alagad kag ang iban misyonero. Ang isa ka pamatan-on nga si Guy Mabilat nagbaton sang kamatuoran. Nangin manugtatap sia sang sirkito kag sang ulihi nangin manugtatap sang distrito. Sia man ang nagdumala sa pagtukod sang imprintahan sa Bethel sa Louviers, nga medyo malayo sa Paris. Bangod pirme ko ginagamit ang Biblia sa ministeryo, labi nga nagtudok sa akon hunahuna ang mensahe sini. Nalipay gid ako kag nag-uswag man ang akon pagpanudlo.

Sang 1953, wala ko gid ginapaabot nga matangdo ako subong manugtatap sang sirkito sa Alsace-Lorraine, isa ka rehiyon nga duha ka beses nga ginsakop sang Alemanya halin sang mga 1871 asta 1945. Gani dapat ako magtuon sang Aleman nga lenguahe. Sang mag-C.O. ako, diutay pa lang ang salakyan, telebisyon, ukon mga makinilya sa sina nga duog kag wala sing radyo ukon kompyuter. Apang makalilipay ang kabuhi. Sang una mas mahapos sundon ang laygay sang Biblia nga huptan ang ‘simple nga mata’ kay diutay pa lang ang mga sablag sa pag-alagad kay Jehova.—Mat. 6:19-22.

Indi ko gid malipatan ang “Triumphant Kingdom” Assembly sa Paris sang 1955. Didto ko nakilala ang akon nangin asawa, si Irène Kolanski, nga nauna sa akon sing isa ka tuig sa pagpayunir. Makugi kag madugay na nga mga Saksi ang iya Polaco nga mga ginikanan.  Ginduaw sila sa Pransia sang hardinero sadto ni Utod Russell nga si Adolf Weber nga nagkadto sa Europa agod magbantala. Ginkasal kami ni Irène sang 1956, kag nangin kaupod ko sia sa sirkito nga hilikuton. Ginsakdag gid niya ako sa sulod sang mga tinuig!

Duha ka tuig sang ulihi, nakibot pa gid ako sang gintangdo ako nga mag-D.O. Apang bangod kulang gihapon ang kalipikado nga mga utod, nagaduaw gihapon ako sa mga kongregasyon subong C.O. Masako gid ako sadto! Magluwas sa 100 ka oras kada bulan, dapat mamulongpulong ako kada semana, maduaw sa tatlo ka pagtinuon sa libro, ma-tsek sang mga rekord, kag mahanda sang mga report. Paano ako makabasa sang Biblia? Nakakita ako sang solusyon—ginapaksi ko ang pila ka panid sang daan nga Biblia kag ginadala ini. Kon may ginahulat ako, ginabasa ko ining mga panid. Ining malip-ot nga mga tinion sa pagbasa amo ang nagapabakod sa akon nga magpadayon sa akon asaynment.

Sang 1967, gin-agda kami ni Irène nga mangin Bethelite sa Boulogne-Billancourt. Naasayn ako sa Service Department, kag masobra na ako 40 ka tuig diri. Ang isa ka makalilipay nga bahin sang akon asaynment amo ang pagsabat sang mga pamangkot parte sa Biblia. Nalipay gid ako sa pagkutkot sa Pulong sang Dios kag sa “pagpangapin . . . sa maayong balita”! (Fil. 1:7) Nalipay man ako sa pagdumala sang paghinun-anon sang Biblia sa morning worship sa Bethel antes magpamahaw. Sang 1976, nangin miembro ako sang Branch Committee sa Pransia.

Ang Labing Maayo nga Pagkabuhi

Madamo na ako sing kabudlayan nga naagihan, pero subong ang pinakamabudlay nga tion sang akon kabuhi. Madamo na ang indi namon mahimo ni Irène bangod sa katigulangon kag balatian. Apang ang pagbasa kag pagtuon namon sang Pulong sang Dios nga magkaupod nagapabakod sang amon pagtuo. Nanamian kami magsakay sa bus pakadto sa amon teritoryo agod isugid ini nga paglaum sa iban. Kon tingbon, masobra na kami 120 ka tuig sa bug-os tion nga pag-alagad, gani ginarekomendar gid ini namon sa mga gusto makatigayon sing makakulunyag, makalilipay, kag mapuslanon nga kabuhi. Sang ginsulat ni Hari David ang Salmo 37:25, “tigulang na” sia, apang kaangay niya, “wala ako makakita nga ang matarong ginpabayaan.”

Sa bug-os ko nga kabuhi, ginpalig-on ako ni Jehova paagi sa iya Pulong. Sobra 60 ka tuig na ang nagligad sugod sang ginsilingan ako sang akon mga paryente nga kon basahon ko ang Biblia, basahon ko na ini asta mapatay ako. Wala gid sila magsala. Nangin bisyo ko na ini kada adlaw nga wala ko gid ginahinulsulan!

[Mga Nota]

^ par. 8 Ginbalhag sang 1944, pero wala na ginaimprinta.

^ par. 14 Para sa dugang nga impormasyon parte kay Evans Emiot, tan-awa ang Lalantawan, Enero 1, 1999, pahina 22 kag 23.

[Retrato sa pahina 5]

Kami ni Simon

[Retrato sa pahina 5]

Ang Biblia nga pareho sang akon una nga kopya

[Retrato sa pahina 5]

Sang manugtatap ako sang distrito

[Retrato sa pahina 6]

Sang ginkasal kami

[Retrato sa pahina 6]

Nalipay kami ni Irène nga basahon kag tun-an ang Pulong sang Dios