Magdiretso sa kaundan

Magdiretso sa listahan sang kaundan

Mailog Mo Bala si Finehas Kon Nagaatubang Ka sing mga Kabudlayan?

Mailog Mo Bala si Finehas Kon Nagaatubang Ka sing mga Kabudlayan?

 Mailog Mo Bala si Finehas Kon Nagaatubang Ka sing mga Kabudlayan?

HAMILI nga pribilehiyo ang mangin gulang sa kongregasyon. Apang suno sa Pulong sang Dios may mga kabudlayan man ini. Kon kaisa, dapat nila uyatan ang mga kaso sang pagpakasala nga sila ang ‘magahukom tungud sa GINOO.’ (2 Cron. 19:6) Ukon ang manugtatap mahimo makabaton sing asaynment nga sa pamatyag niya indi niya masarangan. Amo man sini ang ginbatyag ni Moises sang una, nga mapainubuson nga namangkot parte sa isa niya ka asaynment: “Sin-o bala ako nga magkadto ako kay Faraon?”—Ex. 3:11.

Ang Kasulatan, nga ginsulat sa pagtuytoy sang balaan nga espiritu nga amo man ang nagtangdo sa mga gulang, nagaaman sing buhi nga mga halimbawa sang mga manugtatap nga nagmadinalag-on sa pag-atubang sing mga pagtilaw. Si Finehas anak nga lalaki ni Eleazar kag apo ni Aaron kag lakip sia sa mangin mataas nga saserdote. Ginapakita sang tatlo ka hitabo sa iya kabuhi nga kinahanglan sang mga gulang ang kaisog, paghangop, kag pagsalig kay Jehova kon nagaatubang sang mga kabudlayan.

“Nagtindug Sia”

Si Finehas lamharon pa sang nagkampo ang mga Israelinhon sa Kapatagan sang Moab. Ang Biblia nagasiling: “Ang katawohan nagsugud sa pagkamahilawason sa babaying mga anak sang Moab. . . . Kag ang katawohan nagkaon, kag nagyaub sa ila mga dios.” (Num. 25:1, 2) Ginsilutan ni Jehova ang mga nakasala sing makamamatay nga salot. Mahunahuna mo bala kon ano ang ginbatyag ni Finehas sang mabalitaan niya ang pagpakasala kag ang salot nga resulta sini?

Ang Biblia nagpadayon sa pagsiling: “Kag yari karon, isa sang katawohan sang Israel nag-abut kag nagdala sing isa ka Madianhon nga babayi sa iya mga utud, sa itololok ni Moises kag sa itololok sang bug-os nga katilingban sang katawohan sang Israel, samtang nga nagahibi sila sa ganhaan sang layanglayang nga tiliponan.” (Num. 25:6) Ano ang himuon sang saserdote nga si Finehas? Lamharon pa sia, kag ang nakasala isa ka pangulo sa Israel nga nagapanguna sa pagsimba sang katawhan.—Num. 25:14.

Apang nahadlok si Finehas kay Jehova, indi sa mga tawo. Sang nakita niya ang duha, ginkuha dayon niya ang bangkaw kag ginsundan sila sa tolda kag gintuhog sila. Paano gintamod ni Jehova ang kaisog kag kalig-on ni Finehas? Gilayon nga ginpauntat ni Jehova ang salot kag ginpadyaan si Finehas sang katipan nga ang pagkasaserdote magapabilin sa iya kaliwatan sing “dayon.”—Num. 25:7-13.

Huo, wala ginapatay sang mga gulang ang nakasala subong. Apang kaangay ni Finehas, dapat sila mangin malig-on kag maisog kon nagadesisyon. Halimbawa, si Guilherme, nga pila pa lang ka bulan nga gulang, ginpangabay nga mangin bahin sang hudisyal nga komite. Ang may kaso amo ang gulang nga nagtudlo sa iya sang kamatuoran sang bata pa sia. “Nasaw-ahan gid ako,” siling niya. “Indi ako makatulog.  Ginapanumdom ko pirme kon paano makadesisyon nga indi maapektuhan sang akon emosyon. Pila ka adlaw ako nga nagpangamuyo kag nag-research sa mga publikasyon sang Biblia.” Ini ang naghatag sa iya sing kaisog nga maatubang ini nga kaso kag mabuligan sa espirituwal ang iya utod nga nakasala.—1 Tim. 4:11, 12.

Ang mga gulang mangin halimbawa sang katutom kag pagkamainunungon kon ipakita nila ang kaisog kag kalig-on kon kinahanglanon ini sa kongregasyon. Siempre, dapat man mangin maisog ang iban nga Cristiano paagi sa pagsugid sang serioso nga sala nga nahibaluan nila. Mapakita man sang isa ang pagkamainunungon kon untatan niya ang pagpakig-upod sa na-disfellowship nga abyan ukon paryente.—1 Cor. 5:11-13.

Nalikawan ang Inaway Bangod sa Paghangop

Ang kaisog ni Finehas indi bangod sang pagkadasudaso nga kinaandan sa mga lamharon. Binagbinaga kon paano sia nagpakita sing paghangop—nagpanghikot nga may kaalam kag pagkamainandamon—sang may nabalitaan naman sia liwat nga report. Nagtukod sang altar malapit sa Suba Jordan ang tribo nanday Ruben kag Gad kag ang katunga nga tribo ni Manases. Abi sang iban nga Israelinhon para ini sa butig nga pagsimba, gani naghanda sila sa pagsalakay.—Jos. 22:11, 12.

Ano ang ginhimo ni Finehas? Upod sa mga pangulo sang Israel, nakighambal sila sing maayo sa mga naghimo sang altar. Ginpaathag sa ila sang ginasumbong nga mga tribo nga ini nga altar para sa “pag-alagad sa GINOO.” Nalikawan ang inaway.—Jos. 22:13-34.

Kon ang isa ka Cristiano makabati sang sumbong ukon sang negatibo nga report parte sa iya masigkatumuluo, maayo gid kon ilugon niya si Finehas. Ang paghangop nagapugong sa aton nga maakig ukon magpakalain sa aton mga kauturan.—Hulu. 19:11.

Paano makabulig ang paghangop sa mga gulang para mailog nila si Finehas? “Kon istoryahan ako sang utod parte sa utod nga ginalainan sang iya buot,” siling ni Jaime, nga sobra na napulo ka tuig nga gulang, “nagapangamuyo dayon ako kay Jehova nga wala ako sing apinan kundi buligan sila paagi sa Biblia. Isa ka bes, ginsugiran ako sang isa ka utod nga babayi parte sa indi maayo nga pagtratar sa iya sang isa ka utod nga lalaki nga may palangakuan sa iban nga kongregasyon. Suod kami sang utod nga nalainan niya sing buot, gani mahapos kuntani nga ako na lang ang maistorya sa iya. Pero, ginbuligan ko ang utod nga babayi nga mahangpan ang mga prinsipio sa Biblia. Nagsugot sia nga istoryahon ini nga utod. (Mat. 5:23, 24) Pero wala dayon ini masolbar. Gani ginpalig-on ko naman ang utod nga babayi nga iaplikar ang iban nga prinsipio. Namat-od sia nga ipangamuyo liwat ang kahimtangan kag tinguhaan nga magpasaylo.”

Ano ang resulta? “Pila ka bulan sang ulihi,” siling ni Jaime, “ginpalapitan ako sang utod  nga babayi. Ginsugiran niya ako nga naghinulsol na ang utod nga nakasala sa iya kag nag-upod pa ini sa paggua sa latagon kag ginpasalamatan sia. Nasolbar ang problema. Nangin maayo ayhan ang resulta kon may gin-apinan ako?” Kon may mga di-paghangpanay, ang Biblia nagalaygay: “Dili pagdalhon sing dalidali sa corte.” (Hulu. 25:8) Ginapalig-on sang may paghangop nga mga gulang ang mga Cristiano nga may di-paghangpanay nga iaplikar ang mga prinsipio sa Biblia agod mahuptan ang paghidait.

Namangkot Sia kay Jehova

Nakapribilehiyo si Finehas nga mangin saserdote sang pinili nga katawhan sang Dios. Subong sang natun-an naton, tumalagsahon ang iya kaisog kag paghangop bisan sang lamharon pa sia. Apang ang iya kadalag-an sa pag-atubang sing mga kabudlayan nasandig sa pagsalig niya kay Jehova.

Pagkatapos sang masubo nga trahedya nga paglugos kag pagpatay sa babayi sang isa ka Levinhon sang mga taga-Gabaa nga gikan sa tribo ni Benjamin, naghanda sa pagpakig-away sa ila ang iban nga tribo. (Huk. 20:1-11) Antes makig-away, nangamuyo sila kay Jehova, apang duha ka beses nga nalutos sila kag madamo ang napatay. (Huk. 20:14-25) Makasiling bala sila nga wala sing pulos ang ila pagpangamuyo? Nagaugyon bala si Jehova sa ila himuon batok sa malaut nga buhat?

Bangod sa iya malig-on nga pagsalig, nanguna liwat si Finehas, nga isa na karon ka mataas nga saserdote sang Israel. Nangamuyo sia: “Magataklad pa bala kami liwat sa pagpakig-away sa mga anak sang Benjamin nga amon utud, ukon magauntat kami?” Bilang sabat, gintugyan ni Jehova ang mga Benjaminhon sa ila, kag ginsunog nila ang Gabaa.—Huk. 20:27-48.

Ano ang matun-an naton sa sini? May pila ka problema sa kongregasyon nga indi dayon masolbar bisan ginapanikasugan ini sang mga gulang kag ginapangamuyo ang bulig sang Dios. Kon matabo ini, maayo nga dumdumon sang mga gulang ang ginsiling ni Jesus: “Padayon sa pagpangayo [ukon pangamuyo], kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo.” (Luc. 11:9) Bisan daw indi insigida ang sabat sa pangamuyo, makasalig ang mga manugtatap nga si Jehova magasabat suno sa Iya tion.

Halimbawa, kinahanglan gid sang isa ka kongregasyon sa Ireland ang Kingdom Hall apang ginabalabagan sila sang planning officer didto. Ginpamatukan niya ang tanan nga ginapanugda sang mga kauturan nga patindugan. Ang paglaum na lang nga maaprobahan ini amo ang chief planning officer sa bug-os nga pungsod. Makabulig bala ang pangamuyo, subong sang adlaw ni Finehas?

Ang isa ka gulang didto nagsiling: “Pagkatapos sang grabe nga pinangamuyuay, nagkadto kami sa main planning office. Ginsilingan ako nga basi pila pa ka semana antes namon maistorya ang ila chief. Apang namedyusan namon nga maistorya sia bisan lima lamang ka minutos. Pagkatapos nga makita niya ang ginliwat nga mga plano, ginhatagan niya kami dayon sing permiso, kag sugod sadto nagbulig na sa amon ang planning officer sa amon lugar. Nagpabakod gid ini sa amon pagpati sa gahom sang pangamuyo.” Huo, ginasabat ni Jehova ang sinsero nga mga pangamuyo sang mga gulang nga nagasalig sa iya.

Si Finehas may mabug-at nga responsibilidad sa Israel sadto, apang upod ang kaisog, paghangop, kag pagsalig sa Dios, nagmadinalag-on sia sa pag-atubang sang mga kabudlayan. Nahamuot si Jehova sa mapisan nga pag-atipan ni Finehas sa kongregasyon sang Dios. Mga 1,000 ka tuig sang ulihi, gin-inspirar si Esdras sa pagsulat: “Si [Finehas] lalaking anak ni Eleazar pangolo nila anay; ang GINOO upud sa iya.” (1 Cron. 9:20) Kabay nga mangin matuod ini sa mga nagapanguna sa katawhan sang Dios subong kag sa tanan nga mga Cristiano nga nagaalagad sa iya sing matutom.