Magdiretso sa kaundan

Magdiretso sa listahan sang kaundan

Magdalagan nga May Pagbatas

Magdalagan nga May Pagbatas

 Magdalagan nga May Pagbatas

“Magdalagan kita nga may pagbatas sang dalaganon nga ginabutang sa aton atubangan.”—HEB. 12:1.

1, 2. Sa ano ginpaanggid ni apostol Pablo ang pagkabuhi sang isa ka Cristiano?

KADA tuig, may mga maraton nga ginahiwat sa lainlain nga lugar. Isa lang ang tulumuron sang bantog nga mga manugdalagan—ang magdaug. Pero ang kalabanan sa nagaentra nakahibalo nga indi sila magdaug. Ang importante lamang sa ila amo nga matapos nila ang palumba.

2 Sa Biblia, ang pagkabuhi sang isa ka Cristiano mapaanggid sa palumba. Sa iya nahauna nga sulat sa Corinto, ginpatalupangod ini ni apostol Pablo sa iya mga masigka-Cristiano. Sia nagsulat: “Wala bala kamo makahibalo nga ang mga manugdalagan sa isa ka palumba nagadalagan tanan, apang isa lamang ang nagabaton sang padya? Magdalagan kamo sa paagi nga maagom ninyo ini.”—1 Cor. 9:24.

3. Ngaa nagsiling si Pablo nga isa lang ang madaug sa palumba?

3 Buot bala silingon ni Pablo nga isa lamang ka Cristiano ang makabaton sang padya nga kabuhi kag wala sing pulos ang pagdalagan sang iban? Siempre indi! Ang mga manugdalagan nagapraktis kag grabe ang ila panikasog nga magdaug. Gusto ni Pablo nga pareho man sina nga panikasog ang himuon sang iya mga masigka-Cristiano sa pagtigayon sang kabuhi nga dayon. Kon himuon nila ina, malauman nila ang padya nga kabuhi. Huo, sa Cristianong palumba, amo ina ang padya sang tanan nga makatapos.

4. Ano ang binagbinagon naton kon parte sa dalaganon nga ginabutang sa aton atubang?

4 Ang ginsiling ni Pablo makapalig-on, apang makapahunahuna man sa mga nagapakigbahin sa dalaganon sa kabuhi subong. Ngaa? Bangod ang padya tuman kadaku—kabuhi man ini sa langit ukon sa Paraiso sa duta. Ang palumba malawig kag mabudlay, kay madamo sing balagbag, upang, kag mga katalagman sa alagyan. (Mat. 7:13, 14) Kag makapasubo nga ang pila naghinay, nag-untat, ukon natumba. Ano ang mga tugalbong kag katalagman sa palumba sa kabuhi? Paano mo ini malikawan? Ano ang imo himuon para makatapos sa palumba kag magdaug?

Kinahanglan ang Pagbatas Agod Magdaug

5. Ano ang ginpaathag ni Pablo parte sa palumba sa Hebreo 12:1?

5 Sa iya sulat sa Hebreong mga Cristiano sa Jerusalem kag Judea, ginsambit liwat ni Pablo ang parte sa palumba. (Basaha ang Hebreo 12:1.) Ginpaathag niya indi lamang ang rason sa pag-entra kundi kon ano ang dapat himuon agod magdaug. Antes naton usisaon kon ano ang aton matun-an sa laygay ni Pablo sa Hebreong mga Cristiano, binagbinagon anay naton kon ngaa ginsulatan niya sila kag kon ano ang luyag niya nga himuon nila.

6. Paano gin-ipit sang mga lider sang relihion ang mga Cristiano?

6 Ang mga Cristiano sang unang siglo, ilabi na ang nagapuyo sa Jerusalem kag Judea, nagaatubang sing madamo nga pagtilaw kag kabudlayan. Ginaipit sila sang Judiyong mga lider sang relihion nga may mabaskog gihapon nga impluwensia sa mga tawo. Mga 30 ka tuig antes sini, ginpapati nila ang mga tawo nga si Jesucristo isa ka rebelde kag ginpapatay sia subong kriminal. Luyag man nila pauntaton ang  mga nagabantala parte kay Jesus. Sa tulun-an sang Binuhatan, mabasa naton ang ila pagpamahog kag paghingabot sa mga Cristiano, nga nagsugod mismo pagkatapos sang milagruso nga mga hitabo sang Pentecostes 33 C.E. Bangod sini, nagbudlay pa gid ang kabuhi sang mga matutom.—Binu. 4:1-3; 5:17, 18; 6:8-12; 7:59; 8:1, 3.

7. Ngaa mabudlay ang kahimtangan sang mga Cristiano nga ginsulatan ni Pablo?

7 Ang mga Cristiano sadto nagakabuhi antes ang katapusan sang Judiyong sistema sang mga butang. Ginsugiran sila ni Jesus parte sa kalaglagan sang Jerusalem. Ginsugid man niya sa ila ang matabo antes sining kalaglagan, kag ginhatagan sila sang espesipiko nga mga instruksion kon paano maluwas. (Basaha ang Lucas 21:20-22.) Ano ang dapat nila himuon? Si Jesus nagsiling: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali.”—Luc. 21:34.

8. Ano ang mahimo nakapahinay ukon nakapauntat sa pagdalagan sang pila ka Cristiano?

8 Sang ginsulatan ni Pablo ang mga Hebreo, mga 30 ka tuig na sugod sang nagpaandam si Jesus. Ano ang natabo sa mga Cristiano pagligad sang tion? Ang pila nagluya sa espirituwal bangod nagpadala sila sa mga pag-ipit kag mga kabalaka sa matag-adlaw nga pagkabuhi. (Heb. 5:11-14) Siguro naghunahuna ang iban nga mas mahapos ang kabuhi kon ilugon na lang nila ang kalabanan nga Judiyo sa ila palibot. Isa pa, wala man gintalikdan sing bug-os sini nga mga Judiyo ang Dios. Nagasunod gihapon sila sa pila ka bahin sang Kasuguan. May pila naman nga nakumbinse ukon napilitan nga sundon ang Mosaikong Kasuguan kag tradisyon bangod sa impluwensia sang iban. Ano ang puede ilaygay ni Pablo agod mabuligan ang iya mga kauturan nga mangin alisto sa espirituwal kag makabatas sa palumba?

9, 10. (a) Sa hingapusan sang Hebreo kapitulo 10, ano ang mabasa naton nga pagpalig-on ni Pablo? (b) Ngaa ginsambit ni Pablo ang mga binuhatan sang matutom nga mga saksi?

9 Gintuytuyan ni Jehova si Pablo nga palig-unon paagi sa sulat ang Hebreong mga Cristiano. Sa kapitulo 10 sang iya sulat, nagsiling sia nga ang Kasuguan “landong sang maayong mga butang nga magaabot” kag maathag nga nagapakita sang balor sang halad-gawad ni Cristo. Sa hingapusan sina nga kapitulo, si Pablo naglaygay sa iya mga ginsulatan: “Kinahanglan nga magbatas kamo, agod sa tapos ninyo mahimo ang kabubut-on sang Dios, mabaton ninyo ang katumanan sang saad. Kay sa ‘malip-ot na lang gid nga tion,’ kag ‘sia nga nagakari magaabot kag indi magpalantang.’”—Heb. 10:1, 36, 37.

10 Sa Hebreo kapitulo 11, ginpaathag ni Pablo kon ano ang matuod nga pagtuo. Gin-ilustrar niya ini paagi sa mga halimbawa sang mga matutom sadto. Naglisa na bala sia sa punto? Wala. Nahibaluan niya nga dapat anay mahangpan sang iya mga masigkasumilimba nga ang pagtuo nagakinahanglan sing kaisog kag pagbatas. Ang maayo nga halimbawa sang matutom nga mga alagad ni Jehova sadto magapalig-on sa mga Hebreo nga maatubang ang mga pagtilaw kag mga kabudlayan. Gani, pagkatapos masambit ang mga hinimuan sang mga matutom sadto, si Pablo nagsiling: “Sanglit ginalibutan kita sang tuman kadaku nga panganod sang mga saksi, isikway man naton ang tagsa ka kabug-atan kag ang sala nga madali nagasalawid sa aton, kag magdalagan kita nga may pagbatas sang dalaganon nga ginabutang sa aton atubangan.”—Heb. 12:1.

“Panganod sang mga Saksi”

11. Ano ang epekto sa aton kon hunahunaon naton ang “tuman kadaku nga panganod sang mga saksi”?

11 Ang “tuman kadaku nga panganod sang mga saksi” indi mga tumalan-aw nga nagahulat lang nga magdaug ang ila paborito nga atleta ukon team. Sa baylo, sila mismo ang  nagdalagan amo nga ginpaanggid sila sa mga atleta nga nakatapos sa palumba. Bisan patay na sila, ang ila halimbawa makapalig-on gihapon sa mga bag-uhan nga magpadayon sa pagdalagan. Hunahunaa kon ano ang epekto sa bag-uhan kon nahibaluan niya nga ginapalibutan sia ukon ginatan-aw sang pila ka eksperiensiado gid nga manugdalagan. Indi bala sia mapahulag nga himuon ang iya labing masarangan? Ining mga saksi sang una makapamatuod nga puede magdaug sa malaragwayon nga palumba bisan daw ano pa ini ka budlay. Gani, ang pagdumdom sa halimbawa sang “panganod sang mga saksi,” makabulig sa unang-siglo nga Hebreong mga Cristiano kag sa aton man nga magbakod kag ‘makadalagan nga may pagbatas.’

12. Paano kita makabenepisyo sa mga halimbawa nga ginsambit ni Pablo?

12 Madamo sa matutom nga ginsambit ni Pablo ang kaanggid sing kahimtangan sa aton. Halimbawa, si Noe nagkabuhi sang malapit na laglagon ang kalibutan sadto paagi sa Anaw. Nagakabuhi man kita sa katapusan sang sistema sang mga butang. Ginsugo sanday Abraham kag Sara nga biyaan ang ila lugar agod sakdagon ang matuod nga pagsimba kag hulaton ang katumanan sang saad ni Jehova. Ginapalig-on man kita nga isikway ang aton kaugalingon kag tigayunon ang kahamuot kag pagpakamaayo ni Jehova. Si Moises naglakbay sa makahaladlok nga kamingawan pakadto sa Ginsaad nga Duta. Nagalakbay man kita sa sining nagatagumatayon nga sistema sang mga butang pakadto sa ginsaad nga bag-ong kalibutan. Makabulig gid sa aton ang pagbinagbinag sang ila mga inagihan, subong man sang ila kadalag-an kag kapaslawan, kag kabakod kag kaluyahon.—Roma 15:4; 1 Cor. 10:11.

Nagmadinalag-on Sila—Paano?

13. Ano nga mga kabudlayan ang naatubang ni Noe, kag paano niya ini nalampuwasan?

13 Paano nakabatas kag nagmadinalag-on sa palumba ining mga alagad ni Jehova? Talupangda kon ano ang ginsiling ni Pablo parte kay Noe. (Basaha ang Hebreo 11:7.) “Wala pa makita” ni Noe ang “anaw sang mga tubig sa ibabaw sang duta, [nga magalaglag] sang tanan nga unud.” (Gen. 6:17) Wala pa gid sing natabo nga kaangay sini. Apang wala ini ginbalewala ukon ginkabig nga imposible ni Noe. Ngaa? Bangod nagatuo sia nga kon ano ang ginasiling ni Jehova tumanon Niya. Wala ginkabig ni Noe nga tuman kabudlay ang ginapahimo sa iya. Sa baylo, “amo gid ini ang ginhimo niya.” (Gen. 6:22, NW) Kon binagbinagon naton ang ginhimo ni Noe—ang pagtukod sang arka, pagpasulod sang mga sapat, pagtipon sang pagkaon para sa mga tawo kag kasapatan, pagbantala sang paandam, kag pagpalig-on sang espirituwalidad sang iya pamilya, indi mahapos ang paghimo sang “amo gid.” Pero si Noe kag ang iya pamilya naluwas kag ginpakamaayo bangod sang iya pagtuo kag pagbatas.

14. Ano nga mga kabudlayan ang gin-antos nanday Abraham kag Sara, kag ano ang matun-an naton sa sini?

14 Sanday Abraham kag Sara amo ang masunod sa listahan ni Pablo sa “panganod sang mga saksi” nga nagalibot sa aton. Ginbiyaan nila ang ila normal nga pagkabuhi sa Ur, kag daw indi pa sigurado ang ila palaabuton. Halimbawa sila sang malig-on nga pagtuo kag pagkamatinumanon sa mabudlay nga mga kahimtangan. Bangod sang iya kahanda nga magsakripisyo para sa matuod nga pagsimba, takus si Abraham nga tawgon subong ‘amay sang tanan nga may pagtuo.’ (Roma 4:11) Ang importante lamang nga mga detalye ang ginlakip ni Pablo kay nahibaluan na sang iya mga bumalasa ang mga detalye sang kabuhi ni Abraham. Apang maathag ang punto nga luyag ipadaku ni Pablo: “Sila tanan [lakip si Abraham kag ang iya pamilya] napatay nga may pagtuo, bisan pa wala nila matigayon ang katumanan sang mga saad, apang nakita nila ini gikan sa malayo kag malipayon nga ginbaton ini kag dayag nga nagpahayag nga sila mga estranghero kag umalagi nga mga pumuluyo sa  duta.” (Heb. 11:13) Maathag nga ang ila pagtuo kag kaangtanan sa Dios amo ang nakabulig sa ila nga magdalagan nga may pagbatas.

15. Ngaa ginbiyaan ni Moises ang hamungaya kag dungganon nga kabuhi?

15 Si Moises amo ang isa pa ka huwaran nga alagad ni Jehova nga nalakip sa “panganod sang mga saksi.” Ginbiyaan ni Moises ang hamungaya kag dungganon nga kabuhi, kag “ginpasulabi pa nga pintasan upod sa katawhan sang Dios.” Ano ang nagpahulag sa iya nga himuon ini? Si Pablo nagsabat: “Gintulok niya sing maayo ang balos nga padya. . . . Nagpabilin sia nga mapag-on subong nga nakakita sa Isa nga di-makita.” (Basaha ang Hebreo 11:24-27.) Wala mahaylo si Moises sang “umalagi nga pagpangalipay sa sala.” Matuod gid kay Moises ang Dios kag ang Iya mga saad amo nga ginpakita niya ang tumalagsahon nga kaisog kag pagbatas. Ginpanikasugan gid niya nga pangunahan ang mga Israelinhon paggua sa Egipto pakadto sa Ginsaad nga Duta.

16. Ngaa wala maglain ang buot ni Moises sang wala sia gintugutan nga magsulod sa Ginsaad nga Duta?

16 Pareho kay Abraham, wala makita ni Moises ang katumanan sang saad sang Dios. Sang manugsulod na ang mga Israelinhon sa Ginsaad nga Duta, ginsilingan si Moises: “Makita mo ang duta sa atubangan mo; apang dili ka magsulud sa duta nga ginahatag ko sa katawohan sang Israel.” Amo sini kay sang naugot na gid sila ni Aaron sa pagkarebelyuso sang katawhan, “naglapas [sila] batok sa [Dios] sa tunga sang katawohan sang Israel sa mga tubig sang Meriba.” (Deut. 32:51, 52) Naglain bala ang buot ni Moises ukon naakig sia? Wala. Ginpakamaayo niya ang katawhan kag nagsiling: “Bulahan ka, O Israel! Sin-o bala ang kaangay sa imo, katawohan nga linuwas sang GINOO, ang taming sang pagtabang sa imo,  kag ang espada sang imo pagkahalangdon!”—Deut. 33:29.

Mga Leksion Para sa Aton

17, 18. (a) Parte sa palumba sang kabuhi, ano ang matun-an naton sa “panganod sang mga saksi”? (b) Ano ang binagbinagon sa masunod nga artikulo?

17 Ginapakita sang pagbinagbinag naton sang kabuhi sang “panganod sang mga saksi” sa palibot naton, nga agod matapos naton ang palumba, dapat mabakod ang aton pagtuo sa Dios kag sa iya mga saad. (Heb. 11:6) Ang pagtuo indi lamang bahin sang aton kabuhi kundi amo ini ang sentro sang aton kabuhi. Indi pareho sa mga wala sing pagtuo, ang mga alagad ni Jehova nagatulok sa palaabuton. Makita naton ang “Isa nga di-makita” kag makadalagan nga may pagbatas.—2 Cor. 5:7.

18 Ang Cristianong palumba indi mahapos. Apang posible naton matapos ang palumba sing madinalag-on. Sa masunod nga artikulo, binagbinagon naton ang dugang pa nga bulig para sa aton.

Mapaathag Mo Bala?

• Ngaa ginsulat ni Pablo sing detalyado ang matutom nga mga saksi sadto?

• Paano makapalig-on sa aton nga magdalagan nga may pagbatas ang paghanduraw sa “panganod sang mga saksi” nga nagalibot sa aton?

• Ano ang natun-an mo sa matutom nga mga saksi subong nanday Noe, Abraham, Sara, kag Moises?

[Mga Pamangkot sa Pagtinuon]

[Retrato sa pahina 19]

Handa sanday Abraham kag Sara nga biyaan ang ila masulhay nga kabuhi sa Ur