Magdiretso sa kaundan

Magdiretso sa listahan sang kaundan

Kilala Ka Bala ni Jehova?

Kilala Ka Bala ni Jehova?

 Kilala Ka Bala ni Jehova?

“Kilala ni Jehova ang mga natungod sa iya.”—2 TIM. 2:19.

1, 2. (a) Ano gid ang importante para kay Jesus? (b) Ano nga mga pamangkot ang dapat naton binagbinagon?

ISA ka adlaw, ginpalapitan si Jesus kag ginpamangkot sang isa ka Fariseo: “Ano ang labing daku nga sugo sa Kasuguan?” Si Jesus nagsabat: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mat. 22:35-37) Ginahigugma gid ni Jesus ang iya langitnon nga Amay kag ginatuman ang iya ginsiling. Ginapakita man sang katutom ni Jesus nga importante gid sa iya ang iya kaangtanan kay Jehova. Gani antes sia napatay, nakasiling sia nga nakilala sia sang Dios nga matinumanon sa Iya mga sugo. Amo nga nakapabilin si Jesus sa gugma ni Jehova.—Juan 15:10.

2 Madamo subong ang nagasiling nga ginahigugma nila ang Dios. Pat-od nga nalakip kita sa ila. Apang dapat binagbinagon naton ang pila ka importante nga butang: ‘Kilala bala ako sang Dios? Paano ako ginatamod ni Jehova? Kilala bala ako nga natungod sa iya?’ (2 Tim. 2:19) Makalilipay mahibaluan nga puede kita mangin suod nga abyan sang Soberano sang uniberso!

3. Ngaa ginaduhaduhaan sang pila kon bala puede sila matungod kay Jehova, kag ano ang makabulig agod madula ini nga panghunahuna?

3 Apang kon kaisa, ang pila nga nagahigugma gid kay Jehova nagaduhaduha kon bala puede sila mangin abyan sang Dios. May iban naman nga nagabatyag nga wala sing pulos, gani ginaduhaduhaan nila kon bala puede sila matungod kay Jehova. Apang nalipay kita kay nahangpan naton nga tuhay ang panan-aw sang Dios sa aton. (1 Sam. 16:7) Ginsilingan ni apostol Pablo ang iya mga masigka-Cristiano: “Kon ang bisan sin-o nagahigugma sa Dios, ining isa kilala niya.” (1 Cor. 8:3) Agod makilala ka sang Dios, dapat ginahigugma mo sia. Binagbinaga ini: Ngaa ginabasa mo ini nga magasin? Ngaa ginatinguhaan mo nga alagaron si Jehova sing bug-os tagipusuon, kalag, hunahuna, kag kusog? Kon dedikado ka sa Dios kag bawtismado, ano ang nagpahulag sa imo nga himuon ini? Ginapaathag sang Biblia nga si Jehova, nga nagausisa sang tagipusuon, amo ang nagabuyok sa mga bilidhon. (Basaha ang Hageo 2:7; Juan 6:44.) Gani, makahinakop ka nga ginaalagad mo si Jehova bangod ginbuyok ka niya sa iya. Indi gid niya pagbiyaan ang iya ginbuyok kon magpabilin lang sila nga matutom. Hamili gid sila sa Dios, kag ginahigugma gid niya.—Sal. 94:14.

4. Ngaa dapat naton dumdumon pirme kon daw ano ka hamili nga kilala kita sang Dios?

4 Kon mabuyok na kita ni Jehova sa iya, dapat tinguhaan naton nga makapabilin sa iya gugma. (Basaha ang Judas 20, 21.) Dumduma nga suno sa Biblia, posible kita maanod ukon mapahilayo sa Dios. (Heb. 2:1; 3:12, 13) Halimbawa, antes sang iya ginsiling sa 2 Timoteo 2:19, ginsambit ni Pablo sanday Himeneo kag Fileto. Sang primero, ining duha natungod kay Jehova, apang sang ulihi nagsipak sila sa kamatuoran. (2 Tim. 2:16-18) Dumduma man nga sa kongregasyon sang Galacia, ang pila nga nakilala sang Dios wala magpabilin sa espirituwal nga kapawa. (Gal. 4:9) Kabay nga indi naton pagbalewalaon ang aton hamili nga kaangtanan sa Dios.

5. (a) Ano ang pila ka kinaiya nga ginapabaloran sang Dios? (b) Sin-o nga mga halimbawa ang binagbinagon naton?

 5 May pila ka kinaiya nga ginapabaloran gid ni Jehova. (Sal. 15:1-5; 1 Ped. 3:4) Ang pagtuo kag pagkamapainubuson amo ang nagapatuhay sa mga kilala sang Dios. Usisaon naton ang halimbawa sang duha ka tawo agod mahibaluan naton kon paano ining mga kinaiya nagpasuod sa ila kay Jehova. Binagbinagon man naton ang isa ka tawo nga abi niya kilala sia sang Dios pero nangin bugalon amo nga ginsikway sia ni Jehova. Matun-an naton ang importante nga mga leksion sa sining mga halimbawa.

Ang Amay sang mga May Pagtuo

6. (a) Ano nga sahi sang pagtuo sa mga saad ni Jehova ang ginpakita ni Abraham? (b) Paano nakilala ni Jehova si Abraham?

6 Si Abraham isa ka tawo nga ‘nagtoo sa GINOO.’ Ang matuod, gintawag sia nga ‘amay sang tanan nga may pagtuo.’ (Gen. 15:6; Roma 4:11) Bangod sa pagtuo, ginbiyaan ni Abraham ang iya puluy-an, mga abyan, kag mga pagkabutang agod magkadto sa malayo nga duog. (Gen. 12:1-4; Heb. 11:8-10) Malig-on gihapon ang pagtuo ni Abraham pagligad sang mga tinuig. Maathag ini sang ginsunod niya ang sugo ni Jehova nga “daw subong nga ginhalad na niya si Isaac” nga iya anak. (Heb. 11:17-19) Ginpakita ni Abraham ang pagtuo sa mga saad ni Jehova, gani kilala gid sia sang Dios kag ginakabig nga espesyal. (Basaha ang Genesis 18:19.) Wala lamang nahibaluan ni Jehova nga nagaluntad si Abraham kundi abyan pa Niya sia.—Sant. 2:22, 23.

7. Ano ang nahibal-an ni Abraham sa mga saad ni Jehova, kag ano ang epekto sini sa iya?

7 Napatay si Abraham nga wala niya mabaton ang palanublion nga ginsaad nga duta. Wala man niya makita nga ang iya binhi nangin “subong sang kabitoonan sang langit kag subong sang balas nga yara sa baybayon sang dagat.” (Gen. 22:17, 18) Bisan pa nga ining mga saad wala matuman sang tion ni Abraham, nahuptan niya ang mabakod nga pagtuo kay Jehova. Nahibaluan niya nga kon ano ang ginahambal si Jehova, matuman gid ini. Huo, nagkabuhi si Abraham suno sa sina nga pagtuo. (Basaha ang Hebreo 11:13.) Kilala bala kita ni Jehova nga pareho kita sing pagtuo kay Abraham?

Ang Paghulat kay Jehova Tanda sang Pagtuo

8. Anong normal nga mga handum ang luyag naton matuman?

8 Mahimo nga may mga handum kita nga luyag naton matuman. Normal lang kag indi malain ang handum nga magminyo, kag makatigayon  sing anak kag maayong panglawas. Apang indi tanan nga ginahandum naton nagakatuman. Kon amo, ang aton pag-atubang sa sini nga mga sitwasyon, magapakita kon daw ano kabakod ang aton pagtuo.

9, 10. (a) Ano ang ginhimo sang pila agod matuman ang ila mga handum? (b) Ano ang imo ginabatyag sa katumanan sang mga saad sang Dios?

9 Indi gid maalamon nga supakon ang panuytoy sang Dios para lamang matuman ang aton handum. Magaguba ini sang aton espirituwalidad. Halimbawa, may pila nga nagpili sing mga pagbulong nga supak sa laygay ni Jehova. Ang iban nagbaton sing obra nga nagaubos sang ila tion nga kuntani para sa ila pamilya ukon sa mga miting sa kongregasyon. Ang iban naman nakigrelasyon sa di-tumuluo. Kon himuon ini sang isa ka Cristiano, ginatinguhaan bala niya nga makilala sia ni Jehova? Handurawa kon tinak-an si Abraham sa paghulat sa mga saad sang Dios. Ano ayhan ang batyagon ni Jehova? Ano abi kon sa baylo nga maghulat kay Jehova, nagbalik si Abraham sa iya masulhay nga pagkabuhi kag nagtinguha nga mangin bantog? (Ipaanggid ang Genesis 11:4) Padayon ayhan sia nga ginkahamut-an ni Jehova?

10 Ano nga mga handum ang luyag mo matuman? Mabakod bala ang imo pagtuo sa paghulat kay Jehova, nga nagasaad nga paayawan ang tanan mo nga handum? (Sal. 145:16) Pareho kay Abraham, ang pila ka saad sang Dios mahimo nga indi dayon matuman suno sa luyag naton. Apang ginapabaloran sang Dios ang pagtinguha naton nga mailog ang pagtuo ni Abraham kag maggawi suno sa sini. Para gid ini sa aton kaayuhan.—Heb. 11:6.

Ang Kinatuhayan sang Pagkamapainubuson kag Bugal

11. Ano ang mahimo nga pribilehiyo ni Core, kag ano ang ginapakita sini parte sa iya panimuot sa Dios?

11 Magkatuhay gid si Moises kag si Core kon tuhoy sa pagtahod sa mga kahimusan kag mga desisyon ni Jehova. Ang pagtamod sa ila ni Jehova nabase sa ila mga paggawi. Si Core isa ka Kohatnon nga Levinhon, kag madamo sia sing pribilehiyo. Nakita niya ang pagluwas ni Jehova sa iya pungsod sa Dagat nga Pula, ginsuportahan niya ang paghukom ni Jehova sa di-matinumanon nga mga Israelinhon sa Bukid Sinai, kag may bahin sia sa pagdala sang kaban sang katipan. (Ex. 32:26-29; Num. 3:30, 31) Matutom sia kay Jehova sa sulod sang mga tinuig kag ginatahod sang madamo sa kampo sang Israel.

12. Subong sang ginapakita sa pahina 28, ano ang epekto sang bugal sa pagkilala sang Dios kay Core?

12 Apang, samtang ang pungsod sang Israel nagapakadto sa Ginsaad nga Duta, nagbatyag si Core nga may diperensia sa mga kahimusan sang Dios. Dayon nagdampig sa iya ang 250 pa ka pangulo sang pungsod sa luyag niya nga mga pagbag-o. Mahimo nagsalig gid sila nga maayo ang ila kaangtanan kay Jehova. Ginsilingan nila si Moises: “Nagapalakas kamo sa inyo! Sa ginatan-aw nga ang bug-os nga katilingban balaan, ang tagsatagsa sa ila, kag ang GINOO yara sa tunga nila.” (Num. 16:1-3) Sobra gid nga bugal kag pagsalig sa kaugalingon! Si Moises nagsiling sa ila: “Magapahayag ang GINOO kon sin-o ang iya.” (Basaha ang Numeros 16:5.) Sang masunod nga adlaw, napatay si Core kag ang mga nagrebelde upod sa iya.—Num. 16:31-35.

13, 14. Paano ginpakita ni Moises ang iya pagkamapainubuson?

13 Sa pihak nga bahin, si Moises “tama gid kamapainubuson, labi pa sa tanan nga tawo nga yara sa kadaygan sang duta.” (Num. 12:3) Ginpakita niya ini paagi sa pagsunod sing bug-os sa panuytoy ni Jehova. (Ex. 7:6; 40:16) Maathag nga wala nagduhaduha ukon nagreklamo si Moises sa mga pamaagi kag mga instruksion ni Jehova. Halimbawa, ginhatagan sia sing instruksion bisan sa pinakadiutay  nga detalye sa pagtukod sang tabernakulo, subong sang kolor sang hilo kag kon daw ano kadamo ang sulusingsing sang tolda. (Ex. 26:1-6) Kon may manugtatap sa organisasyon sang Dios nga puerte ka uti kon nagahatag sing mga instruksion, mahimo nga maugot ka. Apang si Jehova isa ka himpit nga manugtatap, nga nagabahinbahin sang hilikuton kag nagasalig sa iya mga alagad. May maayo gid nga rason ang paghatag niya sing madamo nga detalye. Talupangda nga si Moises wala maugot kay Jehova, ukon nagbatyag nga ginapakanubo ukon ginapunggan sa iya diskarte ukon kahilwayan. Sa baylo, ginpat-od ni Moises nga ginasunod sang mga nagaobra ang “amo gid” suno sa sugo sang Dios. (Ex. 39:32, NW) Mapainubuson gid sia! Nahibaluan ni Moises nga hilikuton ini ni Jehova kag instrumento lamang sia agod matapos ini.

14 Maathag man ang pagkamapainubuson ni Moises sang nakaatubang sia sing mga problema nga pati sia apektado. Isa ka bes, wala makapugong si Moises kag wala niya mapakabalaan ang Dios sang gin-atubang niya ang mga nagareklamo. Subong resulta, ginsilingan sia ni Jehova nga indi sia ang manguna sa katawhan pasulod sa Ginsaad nga Duta. (Num. 20:2-12) Pila ka tuig nga gin-antos nila sang iya utod nga si Aaron, ang pagkumod sang mga Israelinhon. Kag bangod lang nga nakasala sia sing isa ka bes, indi na niya matigayon ang madugay na niya ginapaabot! Ano ang reaksion ni Moises? Bisan pa nga nalugaw-an sia, mapainubuson nga ginbaton ni Moises ang desisyon ni Jehova. Nahibaluan niya nga matarong nga Dios si Jehova nga sa iya wala sing inhustisya. (Deut. 3:25-27; 32:4) Kon dumdumon mo si Moises, indi bala maathag gid nga kilala sia ni Jehova?—Basaha ang Exodo 33:12, 13.

Ang Pagpasakop kay Jehova Nagakinahanglan sing Pagkamapainubuson

15. Ano ang matun-an naton sa pagkabugalon ni Core?

15 Ang aton reaksion sa mga pagbag-o sa bug-os kalibutan nga Cristianong kongregasyon kag sa mga desisyon sang mga nagapanguna sa sini may epekto sa pagkilala sa aton  ni Jehova. Si Core kag ang iya mga kaupod nagrebelde sa Dios paagi sa ila sobra nga pagsalig, bugal, kag kakulang sing pagtuo. Bisan pa para kay Core ang tigulang nga si Moises ang nagadesisyon, si Jehova gihapon amo ang nagatuytoy sa pungsod. Nalipatan ini ni Core kag wala sia mag-unong sa gintangdo sang Dios. Dapat kuntani nga naghulat si Core kay Jehova para sa dugang nga paathag ukon mga pagbag-o kon kinahanglanon gid. Ginguba ni Core ang iya rekord sang katutom bangod sang iya pagkabugalon!

16. Paano kita kilalahon ni Jehova kon ilugon naton ang pagkamapainubuson ni Moises?

16 Ini nga hitabo isa ka serioso nga paandam para sa mga gulang kag sa iban sa kongregasyon subong. Kinahanglan ang pagkamapainubuson sa paghulat kay Jehova kag sa pagsunod sa mga panuytoy sang mga nagapanguna. Ginailog bala naton ang pagkamapainubuson kag kalulo ni Moises? Ginatahod bala naton ang mga nagapanguna kag nagapasakop sa ila? Ginakontrol bala naton ang aton balatyagon kon may mga butang nga indi kita kontento? Kon himuon naton ini, kilalahon man kita kag kahamut-an ni Jehova. Dugang pa, kon mangin mapainubuson kag mapinasakupon kita, higugmaon man niya kita.

Kilala ni Jehova ang mga Natungod sa Iya

17, 18. Ano ang makabulig sa aton nga padayon nga kilalahon ni Jehova nga natungod sa iya?

17 Makabulig gid sa aton ang pagpamalandong sa mga tawo nga ginbuyok ni Jehova kag ginkilala niya. Sanday Abraham kag Moises indi himpit kag may kakulangan man, pareho sa aton. Apang kilala sila ni Jehova nga natungod sa iya. Ang halimbawa naman ni Core nagapakita nga posible kita mapahilayo kay Jehova kag indi na niya pagkilalahon. Mahimo naton ipamangkot: ‘Ano ang pagtamod sa akon ni Jehova? Ano ang matun-an ko sa sining mga halimbawa sa Biblia?’

18 Makalilipay mahibaluan nga ginakilala ni Jehova nga natungod sa iya ang mga matutom nga ginbuyok niya. Padayon nga palambua ang pagtuo, pagkamapainubuson, kag ang iban pa nga kinaiya nga magapasuod sa imo sa aton Dios. Ang makilala ni Jehova isa gid ka hamili nga pribilehiyo nga makahatag sa aton sing kaayawan subong, kag sing makalilipay nga mga pagpakamaayo sa palaabuton.—Sal. 37:18.

Madumduman Mo Bala?

• Anong hamili nga kaangtanan kay Jehova ang puede mo matigayon?

• Paano mo mailog ang pagtuo ni Abraham?

• Ano nga mga leksion ang matun-an naton kay Core kag kay Moises?

[Mga Pamangkot sa Pagtinuon]

[Retrato sa pahina 26]

Pareho ni Abraham, may pagtuo bala kita nga tumanon sing bug-os ni Jehova ang iya mga saad?

[Retrato sa pahina 28]

Si Core wala magpasakop sing mapainubuson sa panuytoy

[Retrato sa pahina 29]

Kilala ka bala ni Jehova nga mapainubuson nga nagapasakop sa mga panuytoy?