Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Paano naton hangpon ang mga numero sa tuigan nga report sang pag-alagad?

Kada tuig, nalipay kita nga basahon ang report sa Tuigan nga Libro. Nalangkag kita nga mahibaluan ang nahimo sang katawhan ni Jehova sa bug-os kalibutan nga pagbantala sang Ginharian kag pagpanudlo nga hilikuton. Apang agod makabenepisyo kita sa sini, dapat mahangpan naton sing maayo ang ginareport. Binagbinagon naton ang pila ka halimbawa.

Tuig sang pag-alagad. Nagasugod ini sa Septiembre kag matapos sa Agosto sa masunod nga tuig. Ang Tuigan nga Libro nagaunod sing report sang nagligad nga tuig. Gani ang yara sa 2011 Tuigan nga Libro amo ang report sang 2010 nga tuig sang pag-alagad, sugod sa Septiembre 1, 2009, tubtob Agosto 31, 2010.

Pinakamadamo nga manugbantala kag aberids nga mga manugbantala. Ang “mga manugbantala” nagalakip sa bawtismado nga Saksi ni Jehova kag sa mga indi bawtismado nga kalipikado na nga manugbantala sang Ginharian. Ang “pinakamadamo nga manugbantala” amo ang pinakamataas nga report sa bisan ano nga bulan sa sina nga tuig sang pag-alagad kag ayhan lakip sa sini ang leyt nga mga report. Amo nga kon kaisa duha ka beses maisip ang pila ka manugbantala. Apang, wala malakip sa sini ang aktual nga nakapakigbahin sa pagbantala pero nalipat magreport. Ginapakita sini nga importante gid nga ang kada isa magreport sa eksakto nga tion kada bulan. Ang “aberids nga mga manugbantala” amo ang kinaandan nga mga nagareport kada bulan.

Kabilugan nga oras. Suno sa 2011 Tuigan nga Libro, ang mga Saksi ni Jehova naghinguyang sing masobra 1.6 bilyones ka oras sa pagbantala. Pero indi lang amo sini ang oras nga aton ginahinguyang sa aton pagsimba, kay wala nalakip sa sini ang pag-shepherding, pagtambong sa mga miting, kag pagtuon sa Biblia sing personal kag pagpamalandong.

Gasto. Sang 2010 nga tuig sang pag-alagad, nakagasto ang mga Saksi ni Jehova sing masobra $155 milyones para sa mga espesyal payunir, misyonero, kag mga nagalakbay nga manugtatap sa ila mga asaynment. Pero wala nalakip sa sini ang gasto sa pag-imprinta sang mga pasad sa Biblia nga publikasyon; amo man ang gasto sa masobra 20,000 ka Bethelite sa bug-os nga kalibutan.

Nakig-ambit sa emblema sang Memoryal. Amo ini ang kadamuon sang mga bawtismado nga nakig-ambit sa emblema sang Memoryal sa bug-os nga kalibutan. Amo gid bala sini ang eksakto nga kadamuon sang mga hinaplas sa duta? Indi. May mga nagapakig-ambit bangod sa ila anay ginapatihan ukon mahimo may problema sa ila pamensaron ukon emosyon, amo nga abi nila mapalangit sila. Gani indi naton mapat-od ang eksakto nga kadamuon sang mga hinaplas sa duta; ukon dapat naton ini hibaluon. Wala sing listahan ang Nagadumala nga Hubon sang tanan nga nagapakig-ambit sa bug-os nga kalibutan. *

Ang nahibaluan lang naton amo nga may pila pa ka hinaplas nga “mga ulipon sang aton Dios” sa duta kon ang hangin sang kalaglagan buy-an sa dakung kapipit-an. (Bug. 7:1-3) Asta sa sina nga tion, magapanguna ang mga hinaplas sa hilikuton nga ginareport sa aton tuigan nga pag-alagad—ang pinakalapnag nga pagbantala kag pagtudlo sa maragtas sang tawo.

[Nota]

^ par. 8 Tan-awa ang artikulo nga “Ang Matutom nga Tulugyanan kag ang Nagadumala nga Hubon” sa Hunyo 15, 2009, nga gua sang Ang Lalantawan, pahina 24.