Magdiretso sa kaundan

Magdiretso sa listahan sang kaundan

Ang Legal nga Kadalag-an sang Katawhan ni Jehova!

Ang Legal nga Kadalag-an sang Katawhan ni Jehova!

 Ang Legal nga Kadalag-an sang Katawhan ni Jehova!

NAGSUGOD ini sang 1995 kag naglawig sing 15 ka tuig. Sa sulod sining mga tinuig ang matuod nga mga Cristiano sa Rusya ginahingabot sang mga nagapamatok sa kahilwayan sang relihion. Determinado sila nga dumilian ang mga Saksi ni Jehova sa sulod kag gua sang Moscow. Apang ginpadyaan ni Jehova ang katutom sang aton mga kauturan didto paagi sa legal nga kadalag-an. Pero, paano ini nagsugod?

NATIGAYON GID MAN ANG KAHILWAYAN!

Sa umpisa sang dekada 1990, natigayon liwat sang mga kauturan sa Rusya ang kahilwayan sa relihion nga nadula sugod pa sang 1917. Sang 1991, ginrehistro sila subong isa ka relihion sa Unyon Sobyet. Sang mabungkag na ang Unyon Sobyet, ginrehistro ang mga Saksi ni Jehova sa Russian Federation. Ang mga Saksi nga ginhingabot sadto bangod sang ila relihion, ginkilala sang Estado subong biktima sang paghingabot sang gobierno. Sang 1993, ginrehistro sang Department of Justice sang Moscow ang Moscow Community of Jehovah’s Witnesses nga amo ang legal nga pagtawag sa aton didto. Sina man nga tuig, ginpatuman sang Rusya ang bag-o nga konstitusyon, nga nagalakip sang kahilwayan sa relihion. Indi katingalahan nga ang isa ka utod nakahambal, “Wala gid kami maghunahuna nga matigayon namon ini nga kahilwayan!” Nagdugang pa sia, “Singkuenta ka tuig na namon ini nga ginahulat!”

Gingamit gilayon sang mga kauturan sa Rusya ining “maayo nga panag-on” para sa pagbantala, kag madamo ang nagbaton. (2 Tim. 4:2) May isa nga nagsiling: “Interesado gid ang mga tawo sa relihion.” Wala magdugay, nagdamo ang manugbantala, mga payunir, kag mga kongregasyon. Ang matuod, sang 1990 tubtob 1995, nagdamo ang mga Saksi sa Moscow halin sa 300 tubtob sa sobra 5,000! Samtang nagadamo ang bag-o nga alagad ni Jehova sa Moscow, nabalaka ang mga nagapamatok sa kahilwayan sang relihion. Sang tungatunga sang 1990, nagsugod ang ila paghingabot paagi sa pagpasaka sing mga kaso sa korte. Nakalab-ot sa apat ka hugna ang ila mga akusasyon antes ini nasolbar.

NAGSUGOD ANG IMBESTIGASYON

Ang una nga hugna sang paghingabot nagsugod sang Hunyo 1995. Ang isa ka grupo nga miembro sang Russian Orthodox Church sa Moscow nagpasaka sing panumbungon nga ilegal ang hilikuton sang aton mga kauturan. Suno sa sini nga grupo, sila ang tiglawas sang mga katapo sang pamilya nga naakig kay ang ila mga tiayon ukon kabataan nangin mga Saksi. Sang Hunyo 1996, nangita sing ebidensia ang mga imbestigador apang wala sila sing nakita. Pero nagpasaka pa gid liwat sing panumbungon ang amo gihapon nga grupo, nga nagasumbong nga ang mga kauturan may ginahimo nga krimen. Nangita liwat sing ebidensia ang mga imbestigador apang wala gihapon sila sing nakita. Sa ikatlo nga tion, nagpasaka sing panumbungon ang mga manugpamatok, pasad sa amo gihapon nga kaso. Liwat nga gin-imbestigar ang mga Saksi ni Jehova sa Moscow, apang amo gihapon ang konklusion sang piskal—wala sing basihan ang kaso. Sa ikap-at nga tion, nagpasaka sing amo gihapon nga panumbungon ang mga manugpamatok, kag liwat nga wala sing nakita nga ebidensia ang piskal. Pero daw indi mapatihan nga ang amo gihapon nga mga manugpamatok nangabay nga suliton ang imbestigasyon.  Sang ulihi, sang Abril 13, 1998, ginsira sang bag-o nga imbestigador ang kaso.

“Apang katingalahan gid ang natabo,” siling sang abogado nga nagauyat sa kaso. Bisan pa gin-aku sang piskal nga nag-uyat sang ikalima nga imbestigasyon nga wala sing nakita nga ebidensia, nagdesisyon gihapon sia nga kasuhan ang mga kauturan. Suno sa alegasyon, nalapas sang Moscow Community of Jehovah’s Witnesses ang kasuguan sang Rusya kag sang iban nga pungsod. Nag-ugyon sa sini ang piskal sang Northern Administrative Circuit of Moscow kag ginpasaka nila ang kaso. * Sang Septiembre 29, 1998, nagsugod ang pagbista sa Golovinsky District Court sang Moscow. Amo ini ang ikaduha nga hugna sang paghingabot.

ANG BIBLIA SA KORTE

Ang bista ginhiwat sa gamay nga korte sa aminhan sang Moscow. Ginsugdan sang piskal nga si Tatyana Kondratyeva ang panumbungon paagi sa pagsambit nga suno sa kasuguan sang 1997, ang tradisyunal nga mga relihion amo lamang ang Ortodokso nga Cristianismo, Islam, Judaismo, kag Budhismo. * Ini man nga kasuguan ang rason kon ngaa indi marehistro ang iban nga relihion. Diri man ginabase sang korte ang pagdumili sa mga relihion nga nagapasanyog sang dumot. Paagi sini nga kasuguan, sayop nga ginsumbong sang piskal ang mga Saksi ni Jehova nga manugpasanyog sang dumot kag manugguba sang mga pamilya amo nga dapat ini dumilian.

Ang isa ka abogado sang aton mga kauturan namangkot: “Sin-o sa Moscow Congregation ang nakasala sa kasuguan?” Wala sing masambit nga ngalan ang piskal. Apang nagsiling sia nga nagapaaway kuno sang relihion ang mga literatura sang mga Saksi ni Jehova. Agod pamatud-an ang iya ginsiling, may ginbasa sia sa Ang Lalantawan kag Magmata! kag sa iban nga publikasyon (tan-awa sa ibabaw). Sang ginpamangkot sia kon paano nagapaaway ini nga mga publikasyon, nagsabat sia: “Ginatudlo sang mga Saksi ni Jehova nga sila lang ang matuod nga relihion.”

Gindahuan sang aton abogado, nga Saksi man, ang hukom kag ang piskal sing tig-isa ka Biblia kag ginbasa ang Efeso 4:5: “Isa ka Ginuo, isa ka pagtuo, isa ka bawtismo.” Wala magdugay, ang hukom, ang piskal, kag ang abogado, nga ang kada isa may Biblia, nagahinun-anon na sang mga teksto subong sang Juan 17:18 kag Santiago 1:27. Ang korte namangkot: “Ini bala nga mga teksto nagapaaway sa mga relihion?” Ang piskal nagsabat nga indi sia kalipikado nga magkomento parte sa Biblia. Ginpakita dayon sang abogado ang mga publikasyon sang Russian Orthodox Church nga nagapakalain gid sang mga Saksi ni Jehova kag namangkot: “Ang ginahambal bala sa sini nagalapas sa kasuguan?” Ang piskal nagsabat: “Indi ako kalipikado nga magkomento parte sa mga ginasiling sang klero.”

MGA PANUMBUNGON NGA WALA SING EBIDENSIA

Ginsumbong pa gid sang piskal nga ginaguba sang mga Saksi ang mga pamilya kay wala  sila nagasaulog sang mga kapiestahan subong sang Krismas. Apang ginbaton niya sang ulihi nga wala ginapilit sang kasuguan sang Rusya ang mga pumuluyo nga magsaulog sang Krismas. Ang mga Ruso—lakip ang Ruso nga mga Saksi ni Jehova—sarang makapili. Nagsumbong man ang piskal nga ‘ginadingot sang aton organisasyon sa kabataan ang normal nga pahuway kag kalipay.’ Apang sang ginpamangkot sia, gin-aku niya nga wala pa gid sia makaistorya sa mga pamatan-on nga ginpadaku nga Saksi. Sang ginpamangkot kon bala nakatambong na sia sa mga miting sang mga Saksi ni Jehova, nagsabat ang piskal: “Indi na kinahanglan.”

Gingamit sang piskal bilang saksi ang isa ka saykayatris kag propesor pa. Suno sa saykayatris, nagapabuang kuno ang aton mga literatura. Sang ang aton abogado nagsiling nga ang ginsulat nga pahayag sang saykayatris pareho sa pahayag nga ginhanda sang Moscow Patriarchate, gin-aku sang saykayatris nga ang kalabanan sini ginkopya lang niya sa amo nga dokumento. Nakita sa padayon nga pag-usisa nga wala pa sia sing nangin pasyente nga Saksi ni Jehova. Sa kabaliskaran, ang isa pa ka saykayatris nagtestigo sa korte nga gintun-an niya ang masobra 100 ka Saksi sa Moscow. Nakita niya nga normal ang ila panghunahuna, kag nangin mas mainabyanon sila sa iban nga relihion sang nangin Saksi na sila.

KADALAG-AN—APANG INDI PA BUG-OS

Sang Marso 12, 1999, nagtangdo ang hukom sang lima ka iskolar agod tun-an ang mga literatura sang mga Saksi ni Jehova, kag gin-untat anay ang pagbista. Wala sing labot sa natabo nga pagbista sa Moscow, ang Justice Ministry sa Rusya may gintangdo na nga isa ka grupo sang mga iskolar agod tun-an ang aton literatura. Sang Abril 15, 1999, ini nga grupo nagreport sa Ministry nga wala sila sing nakita nga malain sa aton mga publikasyon. Gani sang Abril 29, 1999, ginrehistro liwat sang Justice Ministry ang mga Saksi ni Jehova sa pungsod.  Bisan pa sining maayo nga report, ang korte sang Moscow nagpamilit nga usisaon liwat sang bag-o nga grupo ang aton literatura. Makatilingala gid ang sitwasyon—ang mga Saksi ni Jehova ginakilala sang Ministry of Justice sa Rusya bilang relihion nga nagasunod sa kasuguan. Pero ginaimbestigahan ini sang Department of Justice sang Moscow sa panumbungon nga paglapas sang kasuguan.

Halos duha pa ka tuig ang nagligad antes ginpadayon ang kaso, kag sang Pebrero 23, 2001, si Judge Yelena Prokhorycheva nagpapanaug sang desisyon. Sang mabinagbinag niya ang report sang grupo nga gintangdo niya, nagdesisyon sia: “Wala sing basihan ang pagpauntat kag pagdumili sa hilikuton sang mga Saksi ni Jehova sa Moscow.” Napamatud-an gid man nga ang aton mga kauturan inosente sa mga panumbungon batok sa ila! Pero, wala ginbaton sang piskal ang desisyon kag nag-apelar ini sa Moscow City Court. Pagligad sang tatlo ka bulan, sang Mayo 30, 2001, ginkanselar sini nga korte ang desisyon ni Judge Prokhorycheva. Nagsugo ang korte nga bistahon liwat ang kaso. Amo gihapon nga piskal ang mauyat sini, pero lain na ang judge. Ini na ang ikatlo nga hugna sang paghingabot.

NAPIERDE—PERO WALA PA MATAPOS ANG KASO

Sang Oktubre 30, 2001, ginbista liwat ang kaso kag gin-uyatan ini ni Judge Vera Dubinskaya. * Ginsulit ni Piskal Kondratyeva ang panumbungon nga ginapasanyog sang mga Saksi ang dumot, pero nagdugang sia nga ang pagdumili sa mga Saksi ni Jehova sa Moscow proteksion sa mga Saksi didto! Bilang sabat sa sining indi mapatihan nga alegasyon, ang 10,000 ka Saksi sa Moscow nagpirma dayon sing petisyon nga nagapangabay sa korte nga ibasura ang ginatanyag sang piskal nga “proteksion.”

Ang piskal nagsiling nga indi na kinahanglan nga maghatag sia sing ebidensia agod pamatud-an nga nakasala ang mga Saksi. Suno sa iya, ang bista parte sa literatura kag mga pagpati sang mga Saksi ni Jehova, indi sa ila mga hilikuton. Ginpahibalo niya nga gamiton niya nga testigo ang isa ka humalambal sang Russian Orthodox Church. Ginapakita sini nga ang mga katapo sang klero amo gid ang sa likod sang pagtinguha nga dumilian ang mga Saksi. Sang Mayo 22, 2003, nagmando ang judge nga tun-an liwat sang isa ka grupo sang mga eksperto ang mga publikasyon sang mga Saksi ni Jehova.

Sang Pebrero 17, 2004, ginpadayon ang bista agod repasuhon ang mga resulta sang pagtuon sang grupo. Nasapwan sang mga eksperto nga ginapalig-on sang aton mga publikasyon ang mga bumalasa nga “amligan ang pamilya kag ang kahimusan sa pag-asawahay” kag “wala sing pamatuod” nga ginapasanyog sini ang dumot. Gin-ugyunan ini sang iban pa nga iskolar. Ang isa ka propesor parte sa kasaysayan sang relihion ginpamangkot: “Ngaa nagabantala ang mga Saksi ni Jehova?” Sia nagsabat sa korte: “Ang isa ka Cristiano dapat magbantala. Amo sini ang ginasiling sang Ebanghelyo kag amo sini ang sugo ni Cristo sa iya mga disipulo—‘maglakat kag magbantala sa tanan nga pungsod.’” Apang sang Marso 26, 2004, gindumilian gihapon sang judge ang mga hilikuton sang mga Saksi ni Jehova sa Moscow. Sang Hunyo 16, 2004, ginsakdag sang Moscow City Court ini nga desisyon. * Parte sa desisyon, ang isa ka madugay na nga Saksi nagsiling: “Sang panahon sang Sobyet, ang Ruso dapat mangin ateista. Pero subong, ang Ruso dapat mangin Ortodokso.”

Ano ang reaksion sang mga kauturan? Gin-ilog nila si Nehemias. Sang gintinguhaan sang mga kaaway sang katawhan sang Dios nga pauntaton ang pagpatindog liwat sang pader  sang Jerusalem, si Nehemias kag ang iya katawhan wala magpapugong sa paghingabot. Sa baylo, ‘padayon sila nga nagkay-o kag nagpangabudlay sing bug-os.’ (Neh. 4:1-6, NW) Sing kaanggid, ang aton mga kauturan sa Moscow wala man nagpapugong sa mga manughingabot. Padayon sila nga nagabantala sang maayong balita. (1 Ped. 4:12, 16) Nagasalig sila nga atipanon sila ni Jehova, kag handa sila nga atubangon ang ikap-at nga hugna sang paghingabot.

NAGBASKOG PA GID ANG PAGHINGABOT

Sang Agosto 25, 2004, ang aton kauturan nagpetisyon sa presidente sang Rusya sadto nga si Vladimir Putin. Ang petisyon may 76 ka tomo kag nagaunod sing sobra sa 315,000 ka pirma. Sa pihak nga bahin, naggua gid ang matuod nga kolor sang klero sang Russian Orthodox. Ang humalambal sang Moscow Patriarchy nagsiling: “Kontra gid namon ang hilikuton sang mga Saksi ni Jehova.” Ang isa ka Muslim nga lider nagsiling nga ang pagdumili “importante gid kag maayo nga desisyon.”

Indi katingalahan nga ang iban nga Ruso nga nagpati sa mga akusasyon, nag-entra man sa paghingabot sa mga Saksi ni Jehova. May mga kauturan sa Moscow nga ginsumbag kag ginsipa samtang nagabantala. Ang isa ka utod nga babayi ginsipa pagua sa bilding sang akig nga tawo. Todo gid ang pagsipa sa iya sa likod amo nga natumba sia kag nakalampos ang iya ulo. Naospital sia, pero wala gindakop sang pulis ang nagsakit sa iya. Ang iban pa nga Saksi gindakop sang pulis, ginkuhaan sing mga fingerprint, ginkodakan, kag ginpriso sing isa ka gab-i. Ang mga manedyer sang mga ginahiwatan sang miting sa Moscow ginpahog nga pahalinon kon padayon sila nga magpaarkila sa mga Saksi. Wala magdugay, madamo ang nagkanselar sang arkila. Sa isa ka bilding nga may apat ka tilipunan, 40 ka kongregasyon ang kinahanglan magbulosbulos. Ang isa ka kongregasyon nagasugod sing alas 7:30 sang aga. “Ang mga kauturan dapat magbugtaw  sing alas singko agod makatambong,” siling sang isa ka C.O., “apang sobra sa isa ka tuig nga ginahimo nila ini nga wala sing reklamo.”

“BILANG PANAKSI”

Agod ipakita nga supak sa kasuguan ang pagdumili sa Moscow, sang Disiembre 2004 ang aton mga abogado nangayo sing bulig sa European Court of Human Rights. (Tan-awa ang kahon nga “Kon Ngaa ang Desisyon sang Rusya Ginrepaso sa Pransia,” sa pahina 6.) Anom ka tuig sang ulihi, sang Hunyo 10, 2010, ang Korte nagdesisyon nga wala sing sala ang mga Saksi ni Jehova. * Gin-usisa sang korte ang mga akusasyon kag napamatud-an nila nga wala gid ini sang basihan. Nagsiling man ini nga may legal nga obligasyon ang Rusya nga “untaton ang tanan nga paglapas nga ginahimo sini kag tubtob posible kay-uhon ang natuga nga kahalitan nga nakita sang Korte.”—Tan-awa ang kahon nga “Ang Desisyon sang Korte,” sa pahina 8.

Ang Korte nagdesisyon nga ang European Convention on Human Rights amo ang magaamlig sa mga Saksi ni Jehova, indi lamang sa Rusya kundi sa 46 pa ka pungsod nga miembro sang Council of Europe. Madamo nga judge, manughimo sang kasuguan, kag mga nagatuon parte sa kinamatarong sang tawo ang interesado sa sini nga desisyon. Ngaa? Kay sang nagdesisyon ang mga hukom sang Korte, gingamit nila nga halimbawa ang walo ka una nga desisyon sang Korte nga pabor sa mga Saksi ni Jehova. Ginbase man nila ini sa siam ka desisyon sang pinakamataas nga mga hukmanan sang Argentina, Canada, Espanya, Estados Unidos, Japan, Rusya, South Africa, kag United Kingdom, nga pabor sa mga Saksi. Gani, magamit na subong sang mga Saksi sa bug-os nga kalibutan ini nga desisyon sang Korte para amligan ang ila pagsimba.

Si Jesus nagsiling sa iya mga sumulunod: “Dalhon kamo sa atubangan sang mga gobernador kag mga hari bangod sa akon, subong panaksi sa ila kag sa mga pungsod.” (Mat. 10:18) Ang kinasuhay nga natabo sang nagligad nga 15 ka tuig naghatag sing kahigayunan sa aton mga kauturan nga mapakilala pa gid ang ngalan ni Jehova sa sulod kag gua sang Moscow. Ang atension nga nasentro sa mga Saksi bangod sang mga pagpangusisa, mga kaso, kag desisyon sang internasyonal nga korte nangin “panaksi” kag nakaamot sa “pag-uswag sang maayong balita.” (Fil. 1:12) Ang matuod, kon ang mga Saksi sa Moscow nagabantala subong, madamo nga tagbalay ang nagapamangkot, “Indi bala nga ginadumilian kamo?” Pirme ini nagabukas sing kahigayunan nga masugid sang mga kauturan sa mga tagbalay ang dugang nga impormasyon parte sa aton mga ginapatihan. Maathag nga wala sing paghingabot nga makapauntat sa aton pagbantala sing Ginharian. Ginapangamuyo naton nga padayon nga pakamaayuhon kag sakdagon ni Jehova ang aton pinalangga kag maisog nga mga kauturan sa Rusya.

[Mga Nota]

^ par. 8 Ginpasaka ang panumbungon sang Abril 20, 1998. Pagligad sang duha ka semana, sang Mayo 5, ginsakdag sang Rusya ang European Convention on Human Rights.

^ par. 10 “Ini nga kasuguan ginhimo bangod sang pagtinguha sang Russian Orthodox Church nga amligan ang ila posisyon sa Rusya, kag dumilian ang mga Saksi ni Jehova.”—Associated Press, Hunyo 25, 1999.

^ par. 20 Makahalam-ot nga ini man ang petsa sang ikapulo nga anibersaryo sang kasuguan sa Rusya nga nagakilala sa mga Saksi ni Jehova subong mga biktima sang paghingabot sang gobierno sang Sobyet bangod sang ila relihion.

^ par. 22 Bangod sa pagdumili, indi na legal ang mga Saksi sa Moscow. Gani, nagalaum ang mga manugpamatok nga indi na makapadayon sa pagbantala ang mga kauturan.

^ par. 28 Sang Nobiembre 22, 2010, ginbasura sang grupo sang lima ka judge sang Grand Chamber of the European Court of Human Rights ang petisyon sang Rusya nga ipasaka pa gid ang kaso sa Grand Chamber. Gani, ang desisyon sang Hunyo 10, 2010, indi na maligwat kag dapat gid ipatuman.

[Kahon/Retrato sa pahina 6]

Kon Ngaa ang Desisyon sang Rusya Ginrepaso sa Pransia

Sang Pebrero 28, 1996, nagpirma ang Rusya sa European Convention on Human Rights. (Sang Mayo 5, 1998, ginsakdag sang Rusya ang Kombension.) Sa pagpirma sini nga kasugtanan, gindeklarar sang gobierno sang Rusya nga ang mga pumuluyo sini may

‘kinamatarong sa kahilwayan sang relihion kag may kinamatarong nga himuon ang ila relihion sa ila puluy-an kag sa publiko kag puede mag-ilis sang ila relihion kon luyag nila.’—Artikulo 9.

‘kinamatarong sa paghambal kag pagsulat sang ila ginahunahuna kag paghatag sing impormasyon sa iban.’—Artikulo 10.

‘kinamatarong nga makigbahin sa mahidaiton nga mga pagtinipon.’—Artikulo 11.

Ang mga indibiduwal ukon organisasyon nga biktima sang paglapas sa sini nga kasugtanan kag nakahimo na sang tanan nga legal nga pamaagi sa ila pungsod apang wala gihapon mahusayan, makadala sang ila kaso sa European Court of Human Rights sa Strasbourg, Pransia (makita sa ibabaw). May 47 ini ka judge—nga pareho sa kadamuon sang mga pungsod nga nagpirma sa European Convention on Human Rights. Ang mga desisyon sang Korte indi na maligwat kag ang tanan nga pungsod nga nagpirma sa sini nga kasugtanan dapat magtuman.

[Kahon sa pahina 8]

Ang Desisyon sang Korte

Amo ini ang tatlo ka malip-ot nga bahin nga ginkutlo sa desisyon sang Korte.

Ang isa ka panumbungon amo nga ginaguba sang mga Saksi ni Jehova ang mga pamilya. Tuhay ang pamat-od sang Korte. Ini nagasiling:

“Ang pagpaganot kag indi pag-ugyon sang mga miembro sang pamilya nga batunon kag respetuhon ang kahilwayan sang ila paryente nga ipakita kag sundon ang iya relihion amo ang ginatunaan sang di-paghangpanay.”—Par. 111.

Ang Korte wala man sing nakita nga ebidensia sa panumbungon nga “manugkontrol sang hunahuna.” Ini nagasiling:

“Daw indi mapatihan sang Korte nga ang mga korte [sang Rusya] wala sing masambit nga ngalan sang bisan isa lang ka indibiduwal nga ginlapas kuno ang kinamatarong sa kahilwayan sang konsiensia sa sini nga mga pamaagi.”—Par. 129.

May panumbungon pa gid nga ginahalitan kuno sang mga Saksi ni Jehova ang ila ikaayong lawas kay wala sila nagapatughong sang dugo. Wala mag-ugyon sa sini ang Korte. Ini nagasiling:

“Ang kahilwayan nga magbaton ukon magbalibad sa isa ka sahi sang pagbulong, ukon ang pagpili sang alternatibo nga porma sang pagbulong, importante sa prinsipio sang pagpili kag pagdesisyon sang isa. Ang pasyente nga yara sa normal nga panghunahuna kag husto nga edad makadesisyon kon bala mapaopera sia ukon indi; mapabulong ukon indi, kag sa amo man nga prinsipio, magpatughong sing dugo ukon indi.”—Par. 136.