Magdiretso sa kaundan

Magdiretso sa listahan sang kaundan

Pagsunod kay Cristo, ang Himpit nga Lider

Pagsunod kay Cristo, ang Himpit nga Lider

 Pagsunod kay Cristo, ang Himpit nga Lider

ANG mga nagasunod sa tawhanon nga mga gumalahom masami nga nagakapaslawan. Apang tuhay gid ang naeksperiensiahan sang mga nagapasakop kay Cristo. Si Jesus nagsiling: “Kari sa akon, kamo tanan nga ginabudlayan kag ginabug-atan, kag paumpawan ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sang kaumpawan sa inyo kaugalingon.” (Mat. 11:28, 29) Ang pagpanguna ni Jesus makapaumpaw kag makalilipay. Interesado gid sia sa mga kubos kag ginapigos, kag ginaagda sila nga itakod ang iya mamag-an nga gota. Apang ano ang nadalahig sa pagsunod kay Jesus?

“Si Cristo mismo nag-antos tungod sa inyo,” sulat ni Pedro, “nga nagabilin sa inyo sang huwaran agod sundon ninyo sing maayo ang iya mga tikang.” (1 Ped. 2:21) Daw ano ka importante para sa aton nga sundon ang mga tikang ni Jesus? Handurawa nga upod ka sa grupo nga maagi sa lugar nga may nalubong nga mga bomba kag isa lamang sa inyo ang nakahibalo sang alagyan. Indi mo bala pagsundon sing maayo ang iya tikang, nga ginasunod kon diin sia magtapak? Sing kaanggid, ang aton palaabuton nasandig sa pagsunod sa halimbawa ni Jesus. Lakip sa sini ang pagpamati kag pagtuman sa iya kag pagkooperar sa iya mga tiglawas.

Mamati kag Magtuman

Sa konklusion sang iya Sermon sa Bukid, si Jesus nagsiling: “Ang tagsatagsa nga nagapamati sining akon pinamulong kag nagahimo sini mangin kaangay sa mainandamon nga tawo, nga nagtukod sang iya balay sa igang. Kag nagbundak ang ulan kag nagbaha kag naghuyop ang hangin kag nagwaswas sa balay, apang wala ini matumba, kay ginpasad ini sa igang.”—Mat. 7:24, 25.

Gintawag ni Jesus nga “mainandamon” ang tawo nga nagapamati kag nagatuman sa iya. Ginapakita bala naton ang pagtahod kag pagpabalor sa halimbawa ni Cristo paagi sa tinagipusuon nga pagtuman sa iya, ukon ginapili lang naton ang mga sugo nga mahapos tumanon? Si Jesus nagsiling: “Pirme ko ginahimo ang mga butang nga kalahamut-an sa [Dios].” (Juan 8:29) Gani, tinguhaan naton nga mailog sia.

Sang unang siglo, nagpahamtang sing maayo nga halimbawa ang mga apostoles sa pagsunod kay Cristo. Isa ka bes, si Pedro nagsiling kay Jesus: “Yari karon! Ginbiyaan namon ang tanan nga butang kag nagsunod sa imo.” (Mar. 10:28) Huo, para sa mga apostoles bilidhon gid ang pagsunod kay Jesus amo nga handa sila nga biyaan ang tanan nga butang.—Mat. 4:18-22.

Magkooperar sa mga Tiglawas ni Cristo

Antes mapatay si Jesus, ginsambit niya ang isa pa ka paagi sa pagsunod sa iya. “Sia nga nagabaton kay bisan sin-o nga akon ginpadala nagabaton man sa akon,” siling niya. (Juan 13:20) Ang matuod, gintawag ni Jesus ang iya hinaplas nga mga tiglawas subong iya “mga utod.” (Mat. 25:40) Sang mabanhaw sia kag magkayab, ang iya “mga utod” gintangdo nga magtiglawas sa iya, nga “salili para kay Cristo” subong mga embahador nga nagaagda sa iban nga magpasag-uli kay Jehova nga Dios. (2 Cor. 5:18-20) Ginakilala naton ang pagpanguna  ni Cristo kon nagapasakop kita sa iya “mga utod.”

Maayo nga usisaon naton kon bala ginasunod naton ang suno sa tion nga laygay sang Biblia nga yara sa aton mga publikasyon. Ang pagtuon sang Biblia kag pagtambong sa mga miting nagapahanumdom sa aton sang mga pulong ni Cristo. (2 Ped. 3:1, 2) Mapakita naton ang apresasyon sa sining espirituwal nga pagkaon kon regular naton nga ginakaon ini. Apang, ano ang aton reaksion sa sulitsulit nga mga laygay? Halimbawa, ang Biblia nagalaygay sa mga Cristiano nga magminyo “lamang sa Ginuo.” (1 Cor. 7:39) Sa sulod sang kapin na sa 100 ka tuig, ini nga topiko pirme ginabinagbinag sa Ang Lalantawan. Ginapakita sang mga utod ni Cristo ang ila pag-ulikid sa aton espirituwal nga kaayuhan paagi sa pagbalhag sing mga artikulo parte sa sini kag sa iban pa nga laygay. Ang pagpamati sa sini nagapakita nga ginasunod naton ang aton himpit nga Lider, si Jesucristo.

Ang Hulubaton 4:18 nagasiling: “Ang banas sang matarung subong sang nagapamanagbanag nga kapawa, nga nagasilak sing labi kag labi tubtub sa himpit nga adlaw.” Huo, aktibo si Jesus sa iya pagpanguna. Ang isa pa ka paagi nga makakooperar sa “mga utod” ni Cristo amo ang pagbaton sang mga pagbag-o sa pila ka paghangop sang kamatuoran sa Biblia nga ginabalhag sang “matutom kag mainandamon nga ulipon.”—Mat. 24:45.

Ginapakita man naton ang pagpasakop sa “mga utod” ni Cristo paagi sa pagkooperar sa iya gintangdo nga mga manugtatap sa kongregasyon. Si Pablo nagsiling: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag.” (Heb. 13:17) Halimbawa, mahimo kita palig-unon sang gulang nga importante nga may Pangpamilya nga Pagsimba kada semana ukon hatagan sing mga panugda sa pila ka bahin sang aton pag-alagad sa latagon. Mahimo man kita hatagan sing praktikal nga mga laygay sang nagalakbay nga manugtatap paagi sa Biblia. Ang aton pagtuman nagapakita nga ginasunod naton ang aton Lider, si Jesus.

Makapasubo nga indi maayo ang pagpanguna sang mga lider sa kalibutan. Apang makapaumpaw ang pagsunod sa mahigugmaon nga pagpanguna ni Cristo! Kabay nga tumanon naton ang aton Lider kag magkooperar sa iya mga tiglawas subong.

[Mga Retrato sa pahina 27]

Ginasunod mo bala ang laygay sang Biblia nga indi magpagota sa di-tumuluo?