Magdiretso sa kaundan

Magdiretso sa listahan sang kaundan

Nagapatuytoy Ka Bala sa Espiritu sang Dios?

Nagapatuytoy Ka Bala sa Espiritu sang Dios?

 Nagapatuytoy Ka Bala sa Espiritu sang Dios?

“Ang imo maayong [e]spiritu magtuytuy sa akon sa duta sang pagkatadlong!”—SAL. 143:10.

1, 2. (a) Ano ang pila ka hitabo nga gingamit ni Jehova ang iya balaan nga espiritu nga magpanghikot sa iya mga alagad? (b) Ang balaan nga espiritu nagapanghikot lamang bala sa pinasahi nga mga kahimtangan? Ipaathag.

ANO ang nagasulod sa imo hunahuna kon pamalandungan mo ang pagpanghikot sang balaan nga espiritu? Mahanduraw mo bala ang mga ginhimo nanday Gideon kag Samson? (Huk. 6:33, 34; 15:14, 15) Ayhan mahunahuna mo ang kaisog sang una nga mga Cristiano ukon ang pagkakalmado ni Esteban sa atubangan sang Sanhedrin. (Binu. 4:31; 6:15) Kamusta naman ang kalipay nga makita naton karon sa mga internasyonal nga kombension, ang integridad sang mga utod nga ginbilanggo bangod sa ila neutralidad, kag ang dalayawon nga pag-uswag sang pagbantala nga hilikuton? Ini tanan nagapamatuod sang pagpanghikot sang balaan nga espiritu.

2 Ang balaan nga espiritu wala lamang nagapanghikot sa pinasahi nga mga kahimtangan. Ang Pulong sang Dios nagasiling nga ang mga Cristiano ‘nagalakat suno sa espiritu,’ ‘ginatuytuyan sang espiritu,’ kag ‘nagakabuhi suno sa espiritu.’ (Gal. 5:16, 18, 25) Ini nga mga ekspresyon nagapakita nga ang balaan nga espiritu padayon nga makaimpluwensia sa aton kabuhi. Sa kada adlaw, dapat kita magpangabay kay Jehova nga tuytuyan ang aton panghunahuna, panghambal, kag mga buhat paagi sa iya espiritu. (Basaha ang Salmo 143:10.) Kon ginatugutan naton nga magpanghikot sing hilway ang espiritu sa aton kabuhi, nagapatubas ini sang mga bunga nga makapaumpaw sa iban kag nagadala sing kadayawan sa Dios.

3. (a) Ngaa kinahanglan kita magpatuytoy sa balaan nga espiritu? (b) Ano nga mga pamangkot ang aton binagbinagon?

3 Ngaa importante nga magpatuytoy kita sa balaan nga espiritu? Bangod may isa pa ka puersa nga luyag magkontrol sa aton, puersa nga nagapanghikot batok sa balaan nga espiritu. Ina nga puersa ginatawag sa Kasulatan nga “ang unod,” nga nagapatuhoy sa makasasala nga huyog sang aton di-himpit nga unod nga napanubli naton kay Adan. (Basaha ang Galacia 5:17.) Gani, ano ang nadalahig sa pagpatuytoy naton sa espiritu sang Dios? May mahimo bala kita nga mga tikang agod mabatuan ang puersa sang aton makasasala nga unod? Binagbinagon naton ining mga pamangkot samtang ginabinagbinag naton ang anom pa ka “bunga sang espiritu,” ang “pagkamapinasensiahon, kaayo, pagkamaayo, pagtuo, kalulo, pagpugong sa kaugalingon.”—Gal. 5:22, 23.

Ang Kalulo kag Pagkamapinasensiahon Nagapasanyog sang Paghidait sang Kongregasyon

4. Paano ang kalulo kag pagkamapinasensiahon makaamot sa paghidait sang kongregasyon?

4 Basaha ang Colosas 3:12, 13. Ang kalulo kag pagkamapinasensiahon nagabuligay sa pagpasanyog sang paghidait sa kongregasyon. Ini nga mga bunga sang espiritu nagabulig sa aton nga makig-angot sing mainayuhon sa iban, magpabilin nga kalmado kon ginapaakig, kag indi magbalos kon hambalan ukon himuan sang indi maayo. Kon may problema kita sa aton masigka-Cristiano, ang pagkamapinasensiahon makabulig sa aton nga indi mangampo sa pagtinguha nga mabalik ang aton maayo nga pagtamdanay. Kinahanglan gid bala ang kalulo kag pagkamapinasensiahon sa kongregasyon? Huo, bangod kita tanan indi himpit.

5. Ano ang natabo kanday Pablo kag Bernabe, kag ano ang ginapakita sini?

5 Binagbinaga ang natabo kanday Pablo kag  Bernabe. Madugay na sila nga magkaupod sa pagpalapnag sang maayong balita. Ang kada isa sa ila may maayo nga mga kinaiya. Apang isa ka bes, may natabo sa ila nga “pagsilabo sang kaakig, amo nga nagbulagay sila.” (Binu. 15:36-39) Ginapakita lamang sini nga bisan ang matutom nga mga alagad sang Dios may mga di-paghangpanay man kon kaisa. Kon ang isa ka utod may problema sa iya masigkatumuluo, ano ang puede niya himuon agod indi ini maglala?

6, 7. (a) Ano nga laygay sang Biblia ang mahimo naton sundon antes mag-init ang diskusyon sa tunga naton kag sang isa ka masigkatumuluo? (b) Ano ang mga benepisyo kon “mangin maabtik [kita] sa pagpamati, mahinay sa paghambal, mahinay sa pagpangakig”?

6 Subong sang ginapakita sang prase nga “pagsilabo sang kaakig,” ang natabo kanday Pablo kag Bernabe hinali kag grabe nga pagpautwas sang kaakig. Kon mabatyagan sang isa ka Cristiano nga nairitar na sia samtang nagapakig-istorya sa iya masigkatumuluo, maayo nga sundon niya ang laygay sa Santiago 1:19, 20: “Ang tagsa ka tawo dapat mangin maabtik sa pagpamati, mahinay sa paghambal, mahinay sa pagpangakig; kay ang kaakig sang tawo wala nagapatubas sang pagkamatarong sang Dios.” Depende sa kahimtangan, mahimo niya bag-uhon ang topiko, ipaiway anay ang pag-istoryahanay, ukon mahalin antes pa mag-init ang diskusyon.—Hulu. 12:16; 17:14; 29:11.

7 Ano ang mga benepisyo sa pagsunod sa sini nga laygay? Paagi sa paghatag sing tion nga mapakalma anay ang kaugalingon, makapangamuyo, kag mabinagbinag kon ano ang maayo nga isabat, ginatugutan sang isa ka Cristiano nga tuytuyan sia sang espiritu sang Dios. (Hulu. 15:1, 28) Paagi sa bulig sang espiritu, makapakita sia sing kalulo kag pagkamapinasensiahon. Gani, nasangkapan na sia sa pagtuman sang laygay sa Efeso 4:26, 29: “Kon mangakig kamo, indi kamo magpakasala . . . Indi maggua ang dunot nga pinamulong gikan sa inyo baba, kundi ang bisan anong pinamulong nga maayo para sa pagpabakod suno sa kinahanglanon, agod mahatag sini ang maayo sa mga nagapamati.” Kon ipakita naton ang kalulo kag pagkamapinasensiahon, makaamot kita sa paghidait kag paghiusa sang kongregasyon.

Ang Kaayo kag Pagkamaayo Makapaumpaw sa Imo Pamilya

8, 9. Ano ang kaayo kag pagkamaayo, kag ano ang epekto sini sa sulod sang puluy-an?

8 Basaha ang Efeso 4:31, 32; 5:8, 9. Kaangay sang mabugnaw nga hangin kag ilimnon sa isa ka mapaang nga adlaw, ang kaayo kag pagkamaayo makapaumpaw. Makapahalipay ini sa sulod sang pamilya. Ang kaayo isa ka kinaiya nga ginapahulag sang matuod nga interes sa iban, kag ginapakita ini paagi sa pagbulig kag sa mainayuhon nga panghambal. Ang pagkamaayo, kaangay sang kaayo, isa ka positibo nga kinaiya nga ginapakita paagi sa mga buhat nga nagahatag sing benepisyo sa iban. Nalakip sa sini ang  pagpakita sang kaalwan. (Binu. 9:36, 39; 16:14, 15) Apang kapin pa ang nadalahig sa pagkamaayo.

9 Ang pagkamaayo isa ka dalayawon nga kinaiya. Nadalahig sa sini indi lamang ang aton ginahimo kundi, ang aton bug-os nga pagkatawo. Kaangay ini sang isa ka prutas nga matam-is kag wala sing samad sa sulod kag sa gua. Ang pagkamaayo nga ginapatubas sang balaan nga espiritu nagaimpluwensia sa bug-os nga pagkabuhi sang isa ka Cristiano.

10. Ano ang puede himuon agod mabuligan ang kada katapo sang pamilya nga mapalambo ang mga bunga sang espiritu?

10 Sa isa ka Cristianong panimalay, ano ang makabulig sa kada katapo agod mapakita nila ang kaayo kag pagkamaayo sa isa kag isa? Importante gid ang papel sang sibu nga ihibalo tuhoy sa Pulong sang Dios. (Col. 3:9, 10) Ginalakip sang pila ka ulo sang pamilya sa ila semanal nga Pangpamilya nga Pagsimba ang pagtuon tuhoy sa mga bunga sang espiritu. Ang pagbinagbinag sini indi mabudlay himuon. Magpanalawsaw sang mga materyal nga nagabinagbinag sang isa ka bunga sang espiritu. Mahimo kamo magbinagbinag sang pila ka parapo kada semana, nga nagahinguyang sing pila ka semana sa kada bunga. Samtang ginatun-an ninyo ang materyal, basaha kag binagbinaga ang ginsambit nga mga teksto. Mangita sing paagi nga maaplikar ang inyo natun-an, kag mangamuyo kay Jehova nga pakamaayuhon ang inyo mga panikasog. (1 Tim. 4:15; 1 Juan 5:14, 15) Sa banta mo, makabulig ayhan ini nga pagtuon sa maayo nga pagtamdanay sa sulod sang pamilya?

11, 12. Paano nakabulig sa duha ka mag-asawa ang pagtuon tuhoy sa kaayo?

11 Ang lamharon nga mag-asawa nga nagahandum nga magmadinalag-on ang ila pag-asawahay, nagdesisyon nga tun-an nila sing tul-id ang mga bunga sang espiritu. Paano sila nakabenepisyo? Ang asawa nagsiling: “Sang natun-an namon nga ang kaayo nagalakip sang katutom kag pagkamainunungon, nakabulig ini sa amon nga pakig-angutan sing maayo ang isa kag isa tubtob sa karon. Gintudluan kami sini nga mangin mapainumuron kag mapinatawaron. Kag nakabulig man ini sa amon nga matun-an ang pagsiling sing ‘salamat’ kag ‘pasayluha ako’ kon kinahanglanon.”

12 Ang isa pa ka Cristianong mag-asawa nga may problema sa ila pag-asawahay, nakarealisar nga wala sila nagapakita sing kaayo sa isa kag isa. Namat-od sila nga tun-an sing magkaupod ang topiko tuhoy sa kaayo. Ano ang nangin resulta? Ang bana nagsiling: “Ang amon pagtuon tuhoy sa kaayo nakabulig sa amon nga indi pagduhaduhaan ang motibo sang kada isa kundi magsalig kag apresyahon ang maayo nga kinaiya sang tagsatagsa. Nangin mas interesado kami sa  kinahanglanon sang kada isa. Bilang pagpakita sang kaayo, ginatugutan ko ang akon asawa nga magpabutyag sang iya ginahunahuna kag wala ako nagakaakig sa iya mga ginahambal. Agod mahimo ini, kinahanglan ko dulaon ang akon bugal. Samtang ginaaplikar namon ang kaayo sa amon pag-asawahay, amat-amat nga nalikawan namon ang pagbasulay. Makapaumpaw gid ini.” Sa banta mo makabulig man bala sa inyo pamilya ang pagtuon tuhoy sa mga bunga sang espiritu?

Ipakita ang Pagtuo Bisan sa Pribado

13. Ano nga katalagman sa aton espirituwalidad ang dapat naton bantayan?

13 Ang mga Cristiano kinahanglan gid magpatuytoy sa espiritu sang Dios sa publiko man ukon sa pribado. Lapnag gid sa kalibutan ni Satanas sa karon ang bastos kag malain nga mga kalingawan. Makatalagam ini sa aton espirituwalidad. Ano ang dapat himuon sang isa ka Cristiano? Ang Pulong sang Dios nagalaygay sa aton: “Isikway ang tanan nga kahigkuan kag ang wala pulos nga butang, ang kalainan, kag batuna nga may kalulo ang pagpatudok sing pulong nga makaluwas sang inyo kalag.” (Sant. 1:21) Binagbinagon naton kon paano ang pagtuo nga isa pa ka bunga sang espiritu, makabulig sa aton nga magpabilin nga matinlo sa atubangan ni Jehova.

14. Paano ang kakulang sing pagtuo makadul-ong sa paghimo sing sala?

14 Ang panguna nga kahulugan sang pagtuo amo nga si Jehova nga Dios matuod gid para sa aton. Kon ang Dios indi matuod para sa aton, mahapos lang kita makahimo sing sala. Binagbinaga ang natabo anay sa katawhan sang Dios. Ginsugid ni Jehova kay manalagna Ezequiel ang makangilil-ad nga mga butang nga ginahimo nila sa pribado. Nagsiling sia: “Anak sang tawo, nakita mo bala ang ginhimo sang mga tigulang sang panimalay sang Israel sa kadudulman, ang tagsa ka tawo sa iya mga hulut sang larawan? Kay nagasiling sila, ‘Wala makakita sa amon ang GINOO, ginbayaan sang GINOO ang duta.’” (Ezeq. 8:12) Natalupangdan mo bala kon ano ang problema? Wala sila nagapati nga nakita ni Jehova ang ila ginahimo. Si Jehova indi matuod para sa ila.

15. Paano ang malig-on nga pagtuo kay Jehova makaamlig sa aton?

15 Sa pihak nga bahin, binagbinaga ang halimbawa ni Jose. Bisan pa napahilayo sia sa iya pamilya kag sa iya katawhan, wala sia nakighilahi upod sa asawa ni Potifar. Ngaa? Nagsiling sia: “Paano bala niyan nga makahimo ako sining daku nga pagkamalaut, kag magpakasala batok sa Dios?” (Gen. 39:7-9) Huo, si Jehova matuod gid para sa iya. Kon ang Dios matuod man para sa aton, indi kita magtan-aw sing mahigko nga kalingawan ukon maghimo sing bisan ano sa pribado nga makasaklaw sa Dios. Determinasyon naton nga mangin kaangay sa salmista nga nag-amba: “Magakabuhi ako nga may putli nga tagipusuon sa sulod sang akon balay. Wala ako nagatulok sa butang nga walay pulos.”—Sal. 101:2, 3, NW.

 Amligi ang Imo Tagipusuon Paagi sa Pagpugong sa Kaugalingon

16, 17. (a) Subong sang ginalaragway sa tulun-an sang Hulubaton, paano ang “isa ka pamatan-on nga lalaki nga nawad-an sing paghangup” nasiod sa paghimo sing sala? (b) Subong sang ginapakita sang laragway sa pahina 26, paano karon mahimo masiod ang isa bisan ano man ang iya edad?

16 Ang pagpugong sa kaugalingon, ang ikasiam nga bunga sang espiritu, amo ang makabulig sa aton nga makalikaw sa mga butang nga ginapakamalaut sang Dios. Makabulig ini sa aton nga maamligan ang aton tagipusuon. (Hulu. 4:23) Binagbinaga ang eksena sa Hulubaton 7:6-23, nga nagalaragway sa “isa ka pamatan-on nga lalaki nga nawad-an sing paghangup” nga nagapadala sa pangganyat sang isa ka babayi nga makihilawason. Nasiod sia sang ‘nag-agi sia sa dalan malapit sa likoan sang babayi.’ Ayhan bangod sa iya pagkamausisaon nagdayandayan sia malapit sa balay sini. Wala niya namulalungan nga ginaguyod na sia sa paghimo sang kabuangan nga nagadalahig sang iya “kabuhi.”

17 Paano kuntani nalikawan sang pamatan-on ining makamamatay nga sayop? Paagi sa pagsunod sa paandam: “Dili magtalang sa iya mga banas.” (Hulu. 7:25) May matun-an kita nga leksion sa sini: Kon luyag naton nga tuytuyan kita sang espiritu sang Dios, indi naton dapat pag-ibutang ang aton kaugalingon sa pagsulay. Ang isa mahimo mangin kaangay sang “pamatan-on nga lalaki nga nawad-an sing paghangup” kon padayon niya nga ginasaylosaylo ang estasyon sang TV ukon ginalagulad ang Internet nga wala man lang sing ginapangita. Hungod man niya ukon indi, mahimo sia makakita sing mga eksena nga makapukaw sa sekso. Ayhan amat-amat sia nga magiyan sa pagtan-aw sang pornograpiya, nga mahimo makahalit sa iya konsiensia kag sa iya kaangtanan sa Dios. Mahimo pa gani madalahig sa sini ang iya kabuhi.—Basaha ang Roma 8:5-8.

18. Ano nga mga tikang ang puede himuon sang isa ka Cristiano agod maamligan ang iya tagipusuon, kag paano nadalahig sa sini ang pagpugong sa kaugalingon?

18 Siempre, dapat kita magpakita sing pagpugong sa kaugalingon kon makakita kita sang makapukaw sa sekso nga mga laragway. Apang indi bala nga mas maayo kon indi na naton pag-ibutang ang aton kaugalingon sa sini nga sitwasyon? (Hulu. 22:3) Ang paghimo sing pila ka tikang agod maamligan ang aton kaugalingon nagakinahanglan sing pagpugong sa kaugalingon. Halimbawa, ang pagbutang sang kompyuter sa lugar nga makita sang iban mangin isa ka proteksion. Ang pila namat-od nga indi maggamit sing kompyuter ukon magtan-aw sing TV kon wala sing iban nga tawo. May iban naman nga nagdesisyon nga indi magpatakod sing Internet. (Basaha ang Mateo 5:27-30.) Kabay nga himuon naton ang aton masarangan nga amligan ang aton kaugalingon kag ang aton pamilya agod nga masimba naton si Jehova nga may ‘matinlo nga tagipusuon, maayo nga konsiensia, kag pagtuo nga indi salimpapaw.’—1 Tim. 1:5.

19. Ano ang mga benepisyo sang pagpatuytoy sa balaan nga espiritu?

19 Ang mga bunga sang balaan nga espiritu nagadala sing madamo nga pagpakamaayo. Ang kalulo kag pagkamapinasensiahon nagaamot sa paghidait sang kongregasyon. Ang kaayo kag pagkamaayo nagapahalipay sa pamilya. Ang pagtuo kag pagpugong sa kaugalingon nagabulig sa aton nga magpabilin nga suod kay Jehova kag matinlo sa iya atubangan. Dugang pa, ang Galacia 6:8 nagapasalig sa aton: “Sia nga nagasab-ug para sa espiritu magaani sang kabuhi nga walay katapusan gikan sa espiritu.” Huo, pasad sa halad-gawad ni Cristo, gamiton ni Jehova ang iya balaan nga espiritu agod hatagan sing walay katapusan nga kabuhi ang mga nagapatuytoy sa espiritu.

Ano ang Imo Sabat?

• Paano ang kalulo kag pagkamapinasensiahon makapasanyog sang paghidait sa kongregasyon?

• Ano ang makabulig sa mga Cristiano nga magpakita sing kaayo kag pagkamaayo sa puluy-an?

• Paano ang pagtuo kag pagpugong sa kaugalingon makaamlig sa tagipusuon sang isa ka Cristiano?

[Mga Pamangkot sa Pagtinuon]

[Retrato sa pahina 24]

Paano mo malikawan ang mainit nga diskusyon?

[Retrato sa pahina 25]

Ang pagtuon tuhoy sa mga bunga sang espiritu makabulig sa inyo pamilya

[Retrato sa pahina 26]

Ano nga mga katalagman ang malikawan naton kon magpakita kita sang pagtuo kag pagpugong sa kaugalingon?