Magdiretso sa kaundan

Magdiretso sa listahan sang kaundan

Magpabilin nga Bunayag sa Di-bunayag nga Kalibutan

Magpabilin nga Bunayag sa Di-bunayag nga Kalibutan

 Magpabilin nga Bunayag sa Di-bunayag nga Kalibutan

KAANGAY sang hangin nga aton ginahaklo, lapnag man ang pagkadibunayag. Ang mga tawo nagabinutig, nagapanukot sing sobra, nagapangawat, wala nagabayad sang mga utang, kag nagapangdaya sa negosyo. Bangod amo sini ang mga tawo sa aton palibot, sa masami nagaatubang kita sang mga kahimtangan nga nagatilaw sang aton pagkabunayag. Paano naton padayon nga mabatuan ang pagkadibunayag? Binagbinagon naton ang tatlo ka butang nga makabulig sa aton nga mangin bunayag—kahadlok kay Jehova, matinlo nga konsiensia, kag pagkakontento.

Ang Kahadlok kay Jehova

Si manalagna Isaias nagsulat: “Si Jehova amo ang aton Hukom, si Jehova amo ang aton Manughatag sing kasuguan, si Jehova amo ang aton Hari.” (Isa. 33:22, NW) Ang pagkilala sa posisyon kag awtoridad ni Jehova nagaresulta sa diosnon nga kahadlok nga amo ang nagapahulag sa aton nga mabatuan ang pagkadibunayag. Ang Hulubaton 16:6 nagasiling: “Tungud sa kahadluk sa GINOO ang tawo nagatalikod sa malaut.” Ini nga sahi sang kahadlok, indi kahadlok sa silot sang mapintas nga Dios kundi kahadlok nga indi mapahamut-an ang aton langitnon nga Amay nga interesado gid sa aton kaayuhan.—1 Ped. 3:12.

Ginapakita sining matuod nga eksperiensia ang maayo nga resulta sang diosnon nga kahadlok. Si Ricardo kag ang iya asawa nga si Fernanda nag-withdraw sang ila kuarta sa banko nga nagabalor sing pito ka gatos ka dolyar (U.S.). * Ginsulod lang dayon ni Fernanda ang nabandol nga kuarta sa iya kahita nga wala gin-isip. Pag-abot sa ila balay nakibot sila kay daw wala naibanan ang ila kuarta bisan madamo na sila sing nabayaran. “Sobra siguro ang ginhatag sa aton sang teller,” siling nila. Sang primero, daw indi na lang nila pag-ibalik ang kuarta kay madamo pa sila sing balayran. Si Ricardo nagsiling: “Nangamuyo kami kay Jehova nga hatagan kami sing kaisog nga iuli ang kuarta. Ang amon handum nga pahamut-an sia subong pagtuman sang iya pangabay sa Hulubaton 27:11 amo ang nagpahulag sa amon nga ibalik ang kuarta.”

Ang Nahanas sa Biblia nga Konsiensia

Mahanas naton ang aton konsiensia paagi sa pagtuon sa Biblia kag pag-aplikar sang aton natun-an. Paagi sa sini, ‘ang pulong sang Dios nga buhi kag gamhanan’ magatudok sa aton hunahuna kag tagipusuon. Ini ang magapahulag sa aton nga “maggawi sing bunayag sa tanan nga butang.”—Heb. 4:12; 13:18.

Binagbinaga ang halimbawa ni João. Nakalab-ot ang iya utang sa lima ka libo ka dolyar (U.S.). Nagsaylo sia sa iban nga banwa nga wala mabayaran ang iya utang. Pagligad sang walo ka tuig, nakatuon si João sing kamatuoran kag napahulag sia sang iya nahanas sa Biblia nga konsiensia nga bayaran ang iya utang! Bangod gamay lang ang kita ni João kag may asawa sia kag apat ka kabataan nga ginasakdag, nagpasugot ang iya nautangan nga amat-amatan lang niya bayad ang iya utang kada bulan.

Pagkakontento

Si apostol Pablo nagsulat: “Isa ini ka paagi nga makaganar sing daku, ining diosnon nga debosyon nga may pagkakontento. . . . Kon kita may pagkaon, panapton kag pasilungan, mangin kontento na kita sa sini nga mga butang.” (1 Tim. 6:6-8) Kon sundon naton ini nga laygay malikawan naton nga masiod sang kakagod,  ilegal nga negosyo, ukon di-realistiko nga mga padugi agod makakuarta dayon sa malip-ot lamang nga tion. (Hulu. 28:20) Ang pagsunod sa laygay ni Pablo makabulig man sa aton nga unahon ang Ginharian sang Dios, nga nagasalig nga amanan niya kita sang aton panguna nga mga kinahanglanon.—Mat. 6:25-34.

Apang, bangod sa “madaya nga gahom sang manggad,” indi kita magsalig nga indi na kita madala sang kakagod kag pagkamahamkunon. (Mat. 13:22) Dumduma ang natabo kay Acan. Nasaksihan niya ang milagruso nga pagtabok sang mga Israelinhon sa Suba Jordan. Apang nadaug sia sang kakagod, ginkawat niya ang mga pilak kag bulawan kag malahalon nga panapton gikan sa mga inagaw sa siudad sang Jerico. Bangod sini, ginsilutan sia sing kamatayon. (Jos. 7:1, 20-26) Indi katingalahan nga mga siniglo sang ulihi, si Jesus nagpaandam: “Magbantay kamo kag mag-andam batok sa tanan nga sahi sang pagkamahamkunon”!—Luc. 12:15.

Mangin Bunayag sa Ulubrahan

Binagbinagon naton ang mga kahimtangan nga mahimo magtilaw sang aton determinasyon nga magpabilin nga bunayag sa tanan nga butang. Bisan pa ang pagpangawat kinaandan na lang nga ginahimo sa mga ulubrahan, ang isa nga bunayag “wala nagapangawat.” (Tito 2:9, 10) Si Jurandir, nga empleyado sa isa ka ahensia sang gobierno, nagareport sing bunayag sang iya mga nagasto sa pagbiyahe. Apang, ginapasobrahan sang iya mga kaupdanan ang ila ginareport nga mga gasto. Ginahimo nila ini bangod ginahinabunan sila sang ila department head. Ginsaway pa gani si Jurandir sang ila head bangod sang iya pagkabunayag kag wala na sia ginpabiyahe. Apang sang ulihi, gin-awdit ang ahensia kag gindayaw si Jurandir sa iya pagkabunayag. Nakabaton man sia sang promosyon.

Si André nga isa ka ahente, ginsugo sang iya boss nga doblehon ang isukot sa ila kustomer. Nangamuyo sia kay Jehova nga hatagan sia sing kaisog nga sundon ang mga prinsipio sa Biblia. (Sal. 145:18-20) Ginpaathag niya sa iya boss kon ngaa indi niya mahimo ang ginasugo sini, pero wala sia ginpamatian. Gani, nagdesisyon si André nga maghalin sa iya trabaho nga daku sing sueldo. Apang pagligad sang isa ka tuig, ginpabalik sia sang iya boss sa trabaho kag ginpasalig nga indi na sila magsukot sing sobra sa ila mga kustomer. Nakabaton sing promosyon si André kag nangin manedyer.

Magbayad sang Utang

Ginlaygayan ni apostol Pablo ang mga Cristiano: “Indi kamo mag-utang sang bisan isa ka butang kay bisan sin-o.” (Roma 13:8) Mahimo kita mangatarungan nga indi na pagbayaran ang aton utang kay manggaranon man ang  aton nautangan kag wala na nagakinahanglan sang kuarta. Apang ang Biblia nagapaandam: “Ang malauton nagahulam, kag wala nagabayad.”—Sal. 37:21.

Apang kamusta kon ang “wala ginapaabot nga hitabo” mag-upang sa aton sa pagbayad sang aton utang? (Man. 9:11, NW) Si Francisco naghulam sing pito ka libo ka dolyar (U.S.) kay Alfredo agod ibayad sa iya utang. Apang, bangod sa problema sa negosyo, wala makabayad si Francisco sa tion nga ila ginkasugtan. Gani, ginkadtuan niya si Alfredo agod ipaathag ang iya kahimtangan, kag nagpasugot si Alfredo nga amat-amatan lang niya bayad ang iya utang.

Likawi ang Pagkasalimpapaw

Dumduma ang malain nga halimbawa sang mag-asawa nga sanday Ananias kag Safira sang unang siglo nga Cristianong kongregasyon. Nagbaligya sila sang duta kag gindala sa mga apostoles ang bahin lang sang bili sini, apang nagsiling sila nga bug-os nga kantidad ang ila ginhatag. Luyag nila nga ipakitakita sa iban nga tuman sa ila kaalwan. Apang, paagi sa balaan nga espiritu sang Dios ginbuyagyag ni apostol Pedro ang ila kabutigan, kag ginpatay sila ni Jehova.—Binu. 5:1-11.

Indi kaangay sang di-bunayag nga sanday Ananias kag Safira, ang mga manunulat sang Biblia prangka kag bunayag. Ginsulat ni Moises pati ang iya nahimo nga sayop sang nagpadala sia sa iya kaakig nga amo ang ginbangdan nga wala sia makasulod sa Ginsaad nga Duta. (Num. 20:7-13) Wala man gintago ni Jonas ang iya mga kaluyahon antes kag pagkatapos sang iya pagbantala sa Ninive. Sa baylo, ginsulat pa gani niya ini.—Jon. 1:1-3; 4:1-3.

Huo, kinahanglan gid ang kaisog sa pagsugid sang matuod bisan pa mahimo masakit ang resulta sini, kaangay sang natabo sa 14 anyos nga estudyante nga si Nathalia. Sang gin-usisa niya ang resulta sang iya eksam, natalupangdan niya nga gintsekan sang iya maestro ang isa niya ka sabat nga sala. Bisan pa nahibaluan niya nga maapektuhan sini ang iya grado, wala sia nagduhaduha nga isugid ini sa iya maestro. “Pirme ako ginatudluan sang akon mga ginikanan nga mangin bunayag agod mapahamut-an ko si Jehova. Konsiensiahon gid ako kon wala ko ini ginsugid sa akon maestro,” siling niya. Gindayaw gid sang maestro ang pagkabunayag ni Nathalia.

Ang Pagkabunayag Nagapadungog kay Jehova

Si Giselle nga 17 anyos nga babayi, nakakita sang kahita nga may mga dokumento kag $35 (U.S). Nakig-angot sia sa mga opisyal sang eskwelahan agod mauli sa tag-iya ang kahita. Pagligad sang isa ka bulan, ginbasa sa ila klase sang bise-prinsipal ang isa ka sulat nga nagadayaw kay Giselle sa iya pagkabunayag kag nagahatag sing komendasyon sa iya pamilya sa maayo nga paghanas kag pagtudlo sa iya tuhoy sa Dios. Ang iya “maayong mga buhat” naghimaya kay Jehova.—Mat. 5:14-16.

Nagakinahanglan gid sing panikasog nga mangin bunayag bangod nagakabuhi kita upod sa mga tawo nga ‘mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, kag di-mainunungon.’ (2 Tim. 3:2) Apang, ang kahadlok kay Jehova, nahanas sa Biblia nga konsiensia, kag ang pagkakontento makabulig sa aton nga magpabilin nga bunayag sa di-bunayag nga kalibutan. Mapalambo man naton ang mas suod nga pagpakig-abyan kay Jehova, ‘ang isa nga matarung kag nagahigugma sang pagkamatarung.’—Sal. 11:7.

[Nota]

^ par. 5 Gin-islan ang iban nga ngalan.

[Mga Retrato sa pahina 7]

Ang kahadlok kay Jehova magapalig-on sang aton determinasyon nga mangin bunayag

[Retrato sa pahina 8]

Ang aton pagkabunayag nagahimaya kay Jehova