Magdiretso sa kaundan

Magdiretso sa listahan sang kaundan

Higugmaa ang Pagkamatarong sa Bug-os Mo nga Tagipusuon

Higugmaa ang Pagkamatarong sa Bug-os Mo nga Tagipusuon

 Higugmaa ang Pagkamatarong sa Bug-os Mo nga Tagipusuon

“Ginhigugma mo ang pagkamatarung.”—SAL. 45:7.

1. Paano kita makapabilin sa “mga banas sang pagkamatarung”?

PAAGI sa iya Pulong kag balaan nga espiritu, ginatuytuyan ni Jehova ang iya katawhan sa “mga banas sang pagkamatarung.” (Sal. 23:3) Apang, bangod sang aton pagkadihimpit mahimo kita maglisa sa sini nga banas. Agod makabalik kita sa paghimo sing matarong, kinahanglan naton ang determinasyon. Ano ang makabulig sa aton nga magmadinalag-on? Kaangay ni Jesus, dapat naton higugmaon ang paghimo sing matarong.—Basaha ang Salmo 45:7.

2. Ano ang “mga banas sang pagkamatarung”?

2 Ano ang “mga banas sang pagkamatarung”? Ining malaragwayon nga ‘banas’ nagapatuhoy sa dalanon sang pagkabuhi nga nahisuno sa matarong nga talaksan ni Jehova. Sa Hebreo kag Griego, ang “pagkamatarong” nagapatuhoy sa “pagkatadlong,” nga nagapahangop sang estrikto nga pagsunod sa moral nga mga prinsipio. Bangod si Jehova “ang puluy-an sang pagkamatarung,” ang iya mga sumilimba nalipay sa pagsunod sa matarong nga mga banas nga ginpahamtang niya.—Jer. 50:7.

3. Paano kita makatuon sing dugang pa tuhoy sa pagkamatarong sang Dios?

3 Matigayon lamang naton ang kahamuot sang Dios kon sundon naton sing bug-os tagipusuon ang iya matarong nga mga talaksan. (Deut. 32:4) Nagaumpisa ini sa pagtuon tuhoy kay Jehova nga Dios paagi sa iya Pulong, ang Biblia. Samtang nagadamo ang aton natun-an tuhoy sa iya, labi kita nga nagasuod sa iya, kag labi man nga nagadugang ang aton gugma sa pagkamatarong. (Sant. 4:8) Dapat man naton iaplikar ang panuytoy sang Pulong sang Dios kon nagahimo kita sang importante nga mga desisyon sa kabuhi.

Pangitaa ang Pagkamatarong sang Dios

4. Ano ang nadalahig sa pagpangita sang pagkamatarong sang Dios?

4 Basaha ang Mateo 6:33. Indi lamang ang pagbantala sang maayong balita sang Ginharian ang nadalahig sa pagpangita sang pagkamatarong sang Dios. Dapat man kita maggawi nahisuno sa mataas nga mga talaksan ni Jehova sa kada adlaw agod batunon niya ang aton sagrado nga pag-alagad. Ano ang dapat himuon sang tanan nga nagapangita sang pagkamatarong ni Jehova? Dapat sila “magsuklob sang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.”—Efe. 4:24.

5. Paano naton malandas ang pagluya sing buot?

5 Kon kaisa mahimo kita magbatyag sang kaluya sing buot bangod sang aton mga kakulangan samtang nagatinguha kita nga iaplikar ang matarong nga mga talaksan sang Dios. Paano naton ini malandas kag matun-an nga higugmaon kag himuon ang pagkamatarong? (Hulu. 24:10) Dapat kita mangamuyo sing regular kay Jehova “nga may maminatud-on nga tagipusuon nga may bug-os nga pasalig sang pagtuo.” (Heb. 10:19-22) Hinaplas man kita ukon may dutan-on nga paglaum, nagatuo kita sa halad-gawad ni Jesucristo kag sa iya papel subong ang aton dakung Mataas nga Saserdote. (Roma 5:8; Heb. 4:14-16) Si apostol Juan nagsulat: “Ang dugo ni Jesus . . . nagatinlo sa aton gikan sa tanan nga sala.” (1 Juan 1:6, 7) Bisan pa ang aton mga sala “mapula, papution ini kaangay sang niebe,” siling sang Biblia. Daw ano ka dalayawon nga aman ang ginhatag ni Jehova sa aton paagi sa halad-gawad sang iya pinalangga nga Anak!—Isa. 1:18, NW.

 Usisaa ang Imo Espirituwal nga Hinganib

6. Ngaa importante gid nga usisaon naton ang aton espirituwal nga hinganib?

6 Sa tanan nga tion, kinahanglan naton isuklob ang “pagkamatarong subong panaming sa dughan,” kay importante ini nga bahin sang espirituwal nga hinganib gikan sa Dios. (Efe. 6:11, 14) Bag-uhan man kita ukon madugay na nga nagaalagad kay Jehova, importante gid nga usisaon naton ang aton espirituwal nga hinganib kada adlaw. Ngaa? Bangod ang Yawa kag iya mga demonyo gintagbong diri sa duta. (Bug. 12:7-12) Akig gid si Satanas kay nahibaluan niya nga malip-ot na lang ang iya tion. Bangod sini, labi nga ginapabaskog niya ang iya pag-atake sa katawhan sang Dios. Gani, nakita mo bala kon daw ano ka importante nga isuklob naton ang “pagkamatarong subong panaming sa dughan”?

7. Ano ang dapat naton himuon kon nahangpan naton ang importansia sang “pagkamatarong subong panaming sa dughan”?

7 Ang panaming sa dughan, nagaamlig sa pisikal nga tagipusuon. Bangod indi kita himpit, ang aton malaragwayon nga tagipusuon malimbungon kag makatalagam. (Jer. 17:9) May huyog ini nga maghimo sing sala, amo nga importante gid nga hanason ini kag disiplinahon. (Gen. 8:21) Kon nahangpan naton ang importansia sang “pagkamatarong subong panaming sa dughan,” indi naton ini paghukson bisan sing makadali lang paagi sa pagtan-aw sang mga butang nga ginadumtan sang Dios; ukon sa pagpantasya sa malain nga mga buhat. Indi man naton pag-ubuson ang aton hamili nga tion sa pagtan-aw sang telebisyon. Sa baylo, manikasog kita nga himuon ang mga butang nga ginakahamut-an ni Jehova. Bisan pa nakahimo kita sing sala bangod sa pagpadala sa undanon nga panghunahuna, makabangon kita liwat sa bulig ni Jehova.—Basaha ang Hulubaton 24:16.

8. Ngaa kinahanglan naton ang ‘daku nga taming sang pagtuo’?

8 Ang isa pa ka espirituwal nga hinganib amo ang ‘daku nga taming sang pagtuo.’ Paagi sa sini, “mapalong [naton] ang tanan nga nagadabadaba nga baslay sang isa nga malauton.” (Efe. 6:16) Ang pagtuo kag ang bug-os tagipusuon nga gugma kay Jehova amo ang magabulig sa aton nga himuon ang pagkamatarong kag magpabilin sa dalanon padulong sa kabuhi nga walay katapusan. Samtang labi nga nagadalom ang aton gugma kay Jehova, labi man nga ginapabaloran naton ang iya pagkamatarong. Apang, kamusta naman ang aton konsiensia? Paano ini nagabulig sa aton nga higugmaon ang pagkamatarong?

Hupti ang Isa ka Maayo nga Konsiensia

9. Paano kita makabenepisyo sa paghupot sang isa ka maayo nga konsiensia?

9 Sang nagpabawtismo kita, nangabay kita kay Jehova “sing maayo nga konsiensia.” (1 Ped. 3:21) Bangod nagatuo kita sa gawad, ginatabunan sang dugo ni Jesus ang aton mga sala kag sa amo natigayon naton ang matinlo nga tindog sa atubangan sang Dios. Agod makapabilin sa sini, dapat naton huptan ang isa ka maayo nga konsiensia. Kon may mga tion nga ginakonsiensia kita, dapat kita magpasalamat nga nagapanghikot ini. Tanda ina nga ang aton konsiensia wala pa nakibulan. (1 Tim. 4:2) Apang ang konsiensia may isa pa ka papel nga makabulig sa aton nga higugmaon ang pagkamatarong.

10, 11. (a) Magsugid sang isa ka eksperiensia nga nagapakita kon ngaa dapat naton sundon ang aton nahanas sa Biblia nga konsiensia. (b) Ngaa ang gugma sa pagkamatarong makahatag sa aton sing daku nga kalipay?

 10 Mahimo kita tublagon sang aton konsiensia kon may nahimo kita nga sala. Naeksperiensiahan ini sang isa ka pamatan-on nga naglisa sa “banas sang pagkamatarung.” Naadik sia sa pornograpiya kag marijuana. Ginakonsiensia sia kon magtambong sa mga miting kag nagabatyag nga isa sia ka salimpapaw kon nagapakigbahin sa pagbantala. Bangod sini, nag-untat sia sa pagpakigbahin sa sini nga mga hilikuton. “Apang,” siling niya, “wala gid ako naghunahuna nga tublagon ako sang akon konsiensia bangod sang akon mga ginhimo.” Nagdugang sia, “Ang akon kabuangan naglawig sing apat ka tuig.” Sang ulihi, naghunahuna sia nga magbalik sa kamatuoran. Bisan pa naghunahuna sia nga indi pagpamatian ni Jehova ang iya pangamuyo, nangamuyo gihapon sia kag nagpangayo sing kapatawaran. Wala pa nakaligad ang napulo ka minuto, ginbisitahan sia sang iya iloy kag ginpalig-on nga magtambong liwat sa mga miting. Nagkadto sia sa Kingdom Hall kag nangabay sa isa ka gulang nga tun-an sia. Sang ulihi, nabawtismuhan sia kag daku gid ang iya pasalamat kay Jehova sa pagluwas sang iya kabuhi.

11 Nagaugyon ka bala nga ang paghimo sang matarong makahatag sing daku nga kalipay? Samtang ginatun-an naton nga higugmaon ang pagkamatarong kag ginakabuhi ini, labi nga kalipay ang aton matigayon sa pagpahamuot sa aton langitnon nga Amay. Hunahunaa ini! Magaabot ang tion nga ang tanan nga tawo mangin malipayon na bangod sa pagtigayon sang maayo nga konsiensia; mapadayag na nila sing himpit ang mga kinaiya sang Dios. Gani, tinguhaan naton karon nga ipatudok sa aton tagipusuon ang gugma sa pagkamatarong kag pahalipayon ang tagipusuon ni Jehova.—Hulu. 23:15, 16.

12, 13. Paano naton mahanas ang aton konsiensia?

12 Paano naton mahanas ang aton konsiensia? Kon nagatuon kita sa Kasulatan kag sa mga publikasyon nga napasad sa sini, importante nga dumdumon naton nga “ang matarong nga tawo nagahunahuna anay antes magsabat.” (Hulu. 15:28, NW) Binagbinaga kon paano ini makabulig sa aton kon nagaatubang kita sang mga pamangkot tuhoy sa trabaho. Kon ang isa ka trabaho direkta nga nagasumpakil sa ginasiling sang Kasulatan, mahapos lang para sa kalabanan sa aton nga sundon ang panuytoy sang matutom kag mainandamon nga ulipon. Apang kon indi kita sigurado, kinahanglan naton anay hibaluon ang mga prinsipio sa Biblia nga nadalahig kag ipangamuyo ini. * Nalakip sa sini ang prinsipio tuhoy sa paghalong nga indi matublag ang konsiensia sang iban. (1 Cor. 10:31-33) Ang labi na nga dapat naton kabalak-an amo ang mga prinsipio nga nagadalahig sang aton kaangtanan sa Dios. Kon si Jehova matuod gid sa aton, pamangkuton anay naton ang aton kaugalingon, ‘Indi ayhan masubuan si Jehova kon himuon ko ini?’—Sal. 78:40, 41.

13 Kon nagahanda kita para sa Pagtinuon sa Ang Lalantawan ukon sa Pagtinuon sang Kongregasyon sa Biblia, dapat naton dumdumon nga importante gid nga pamalandungan naton ang aton mga natun-an. Pirme bala kita nagadali kag  ginakuritan lang ang mga sabat? Kon amo sina ang aton paagi sa pagtuon, indi ina makapatudok sang aton gugma sa pagkamatarong ukon makabulig nga mangin sensitibo ang aton konsiensia. Agod mahigugma naton ang pagkamatarong, dapat kita mangin maukod sa pagtuon kag sa pagpamalandong sang aton mga nabasa sa Pulong sang Dios. Nagakinahanglan gid sing panikasog agod matun-an naton nga higugmaon ang pagkamatarong sa aton bug-os nga tagipusuon!

Ginagutom kag Ginauhaw sa Pagkamatarong

14. Ano ang luyag ni Jehova nga Dios kag ni Jesucristo nga mabatyagan naton sa aton pag-alagad?

14 Luyag ni Jehova nga Dios kag ni Jesucristo nga magmalipayon kita sa aton pag-alagad. Ano ang makahatag sa aton sing kalipay? Ang paghigugma sa pagkamatarong! Sa iya Sermon sa Bukid, si Jesus nagsiling: “Malipayon ang mga ginagutom kag ginauhaw sa pagkamatarong, kay busgon sila.” (Mat. 5:6) Ano ang kahulugan sining pinamulong para sa mga luyag maghigugma sa pagkamatarong?

15, 16. Sa ano nga mga paagi mabusog ang aton espirituwal nga pagkagutom kag pagkauhaw?

15 Nagakabuhi kita sa kalibutan nga ginagamhan sang isa nga malauton. (1 Juan 5:19) Sa bisan diin man nga pungsod, mabasa naton sa pamantalaan ang mga report tuhoy sa kapintas kag kasingki nga lapnag na gid sa karon. Ang kapintas nga ginahimo sang iban makatulublag gid para sa isa ka matarong nga tawo. (Man. 8:9) Subong mga nagahigugma kay Jehova, nakahibalo kita nga sia lamang ang makabusog sang aton espirituwal nga pagkagutom kag kauhaw sa pagkamatarong. Ang mga di-diosnon malapit na lang laglagon, kag ang mga nagahigugma sa pagkamatarong indi na matublag sang ginahimo sang mga malauton. (2 Ped. 2:7, 8) Daw ano nga kaumpawan!

16 Subong mga alagad ni Jehova kag mga sumulunod ni Jesucristo, nahibaluan naton nga ang tanan nga ginagutom kag ginauhaw sa pagkamatarong ‘pagabusgon.’ Matigayon nila ang bug-os nga kaayawan paagi sa kahimusan sang Dios nga bag-ong langit kag bag-ong duta nga sa diin “magapuyo ang pagkamatarong.” (2 Ped. 3:13) Gani, indi kita dapat maluyahan ukon matingala kon ang kalibutan ni Satanas puno sing kasingki kag pagpamigos. (Man. 5:8) Si Jehova nga amo ang Labing Mataas, nakahibalo gid sang nagakatabo kag sa dili madugay luwason niya ang mga nagahigugma sa pagkamatarong.

Magbenepisyo sa Paghigugma sa Pagkamatarong

17. Ano ang pila ka benepisyo nga aton matigayon sa paghigugma sa pagkamatarong?

17 Ginapadaku sang Salmo 146:8 ang benepisyo sang pagsunod sa banas sang pagkamatarong. Ang salmista nag-amba: “Ang GINOO nagahigugma sang matarung.” Hunahunaa ini! Ginahigugma kita sang Soberano sang bug-os nga uniberso bangod sa paghigugma naton sa pagkamatarong! Bangod sang gugma ni Jehova, makasalig kita nga amanan niya kita kon unahon naton ang intereses sang Ginharian sa aton kabuhi. (Basaha ang Salmo 37:25; Hulubaton 10:3.) Sa ulihi, ang bug-os nga duta pagapuy-an sang mga nagahigugma sa pagkamatarong. (Hulu. 13:22) Para sa kalabanan nga katawhan sang Dios, ang ila padya sa paghimo sang pagkamatarong amo ang malipayon kag walay katapusan nga kabuhi sa matahom nga paraiso sa duta. Bisan sa karon, ginaagom na nila ang nasulod nga kalinong nga nagaamot sa paghiusa sang ila pamilya kag kongregasyon.—Fil. 4:6, 7.

18. Anong positibo nga mga butang ang padayon naton nga himuon samtang ginahulat naton ang adlaw ni Jehova?

 18 Samtang ginahulat naton ang pag-abot sang dakung adlaw ni Jehova, dapat nga padayon naton nga pangitaon ang iya pagkamatarong. (Sof. 2:2, 3) Gani, dapat gid naton ipakita ang matuod nga gugma sa matarong nga mga dalanon ni Jehova nga Dios. Nalakip sa sini ang padayon nga pagsuklob sang “pagkamatarong subong panaming sa dughan” nga amo ang magaamlig sang aton malaragwayon nga tagipusuon. Kinahanglan man naton huptan ang isa ka maayo nga konsiensia nga makapahalipay sa aton kag sa tagipusuon sang aton Dios.—Hulu. 27:11.

19. Ano ang determinado naton nga himuon, kag ano ang pagabinagbinagon sa masunod nga artikulo?

19 “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cron. 16:9) Daw ano ka makapalig-on ina nga pinamulong para sa aton nga nagahimo sing matarong sa tunga sining magamo, wala sing kasiguruhan, puno sing kasingki, kag malaut nga kalibutan! Huo, ang mga tawo nga nahamulag sa Dios mahimo nga nagakatingala gid sa aton matarong nga mga buhat. Apang, madamo kita sing benepisyo sa pagsunod sa pagkamatarong ni Jehova. (Isa. 48:17; 1 Ped. 4:4) Gani, dapat kita magtigayon sing himpit nga tagipusuon kag mangin determinado nga higugmaon kag himuon ang pagkamatarong sing bug-os tagipusuon. Apang, ang pagtigayon sing himpit nga tagipusuon nagalakip man sang pagdumot sa pagkamalinapason. Amo ini ang pagabinagbinagon sa masunod nga artikulo.

[Nota]

^ par. 12 Para sa pagbinagbinag sang mga prinsipio sa Biblia tuhoy sa mga pamangkot sa trabaho, tan-awa ang Lalantawan, Abril 15, 1999, pahina 28-30.

Ano ang Imo Sabat?

• Paano ang pag-apresyar sa gawad makabulig sa aton nga higugmaon ang pagkamatarong?

• Ngaa importante gid nga isuklob naton ang “pagkamatarong subong panaming sa dughan”?

• Paano naton mahanas ang aton konsiensia?

[Mga Pamangkot sa Pagtinuon]

[Retrato sa pahina 26]

Ang aton nahanas nga konsiensia makabulig sa aton sa pagdesisyon tuhoy sa trabaho