Magdiretso sa kaundan

Magdiretso sa listahan sang kaundan

Ginadumtan Mo Bala ang Pagkamalinapason?

Ginadumtan Mo Bala ang Pagkamalinapason?

 Ginadumtan Mo Bala ang Pagkamalinapason?

“Gindumtan mo [ni Jesus] ang pagkamalinapason.”—HEB. 1:9.

1. Ano ang gintudlo ni Jesus tuhoy sa gugma?

GINPADAKU ni Jesucristo ang importansia sang gugma sang ginsilingan niya ang iya mga disipulo: “Nagahatag ako sa inyo sang isa ka bag-o nga sugo, nga maghigugmaanay kamo; subong nga ako nagahigugma sa inyo, maghigugmaanay man kamo. Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:34, 35) Ginsugo ni Jesus ang iya mga sumulunod nga magpakita sing masinakripisyuhon nga gugma sa isa kag isa. Ina nga gugma amo ang tanda nga mga sumulunod sila ni Jesus. Ginpalig-on man niya sila: “Padayon nga higugmaa ang inyo mga kaaway kag ipangamuyo ang mga nagahingabot sa inyo.”—Mat. 5:44.

2. Ano ang dapat dumtan sang mga sumulunod ni Cristo?

2 Apang si Jesus wala lamang nagtudlo sa iya mga disipulo tuhoy sa gugma. Gintudluan man niya sila kon ano ang dapat nila dumtan. Ang Kasulatan nagsiling tuhoy kay Jesus: “Ginhigugma mo ang pagkamatarong, kag gindumtan mo ang pagkamalinapason [pagkamalaut].” (Heb. 1:9; Sal. 45:7) Nagapakita ini nga indi lamang ang gugma sa pagkamatarong ang dapat naton palambuon kundi dapat man naton dumtan ang sala, ukon pagkamalinapason. Talupangda  nga si apostol Juan espesipiko nga nagsiling: “Ang tagsatagsa nga nagapakasala nagabuhat man sang pagkamalinapason, gani ang sala pagkamalinapason.”—1 Juan 3:4.

3. Ano ang pagabinagbinagon sa sini nga artikulo?

3 Subong mga Cristiano, pamangkuton naton ang aton kaugalingon: ‘Ginadumtan ko bala ang pagkamalinapason?’ Usisaon naton kon paano naton ini madumtan sa apat ka aspekto sang kabuhi: (1) sa aton panimuot sa pag-abuso sa alkohol, (2) sa aton pagtamod sa espiritismo, (3) sa aton reaksion sa imoralidad, kag (4) sa aton pagtamod sa mga nagahigugma sa pagkamalinapason.

Ibutang sa Lugar ang Pag-inom sang Alkohol

4. Ngaa may kahilwayan si Jesus sa paghambal kon nagapaandam tuhoy sa sobra nga pag-inom?

4 May mga tion man nga si Jesus nag-inom sang alak kay nakahibalo sia nga dulot ini gikan sa Dios. (Sal. 104:14, 15) Apang wala gid gin-abusuhan ni Jesus ini nga dulot. (Hulu. 23:29-33) Gani, may kahilwayan sia sa paghambal kon nagalaygay tuhoy sa sini. (Basaha ang Lucas 21:34.) Ang pag-abuso sa alkohol mahimo magdul-ong sa iban pa nga serioso nga sala. Amo nga si apostol Pablo nagsulat: “Indi kamo magpahubog sa alak, nga may pagpatuyang, kundi padayon kamo nga mapuno sing espiritu.” (Efe. 5:18) Ginlaygayan man niya ang tigulang nga mga babayi sa kongregasyon nga indi ‘magpaulipon sa madamo nga alak.’—Tito 2:3.

5. Ano ang dapat ipamangkot sang mga nagainom sang alkoholiko nga mga ilimnon sa ila kaugalingon?

5 Kon nagainom ka sang alkoholiko nga mga ilimnon, pamangkuta ang imo kaugalingon: ‘Pareho bala kay Jesus ang akon pagtamod sa sobra nga pag-inom? Kon kinahanglan ko laygayan ang iban tuhoy sa sini, may kahilwayan bala ako sa paghambal? Nagainom bala ako agod malimtan ang problema ukon agod maumpawan sa stress? Daw ano kadamo ang akon ginainom kada semana? Ano ang reaksion ko kon munuhon ako sang iban nga sobra ako kon mag-inom? Nagarason bala ako ukon nagapangakig?’ Kon magpaulipon kita sa alak mahimo sini maapektuhan ang aton ikasarang sa pagpangatarungan kag sa paghimo sang mga desisyon. Dapat gid amligan sang mga sumulunod ni Cristo ang ila ikasarang sa paghunahuna.—Hulu. 3:21, 22.

Likawi ang Espiritismo

6, 7. (a) Paano gin-atubang ni Jesus si Satanas kag ang mga demonyo? (b) Ngaa lapnag gid ang espiritismo sa karon?

6 Sang diri si Jesus sa duta, malig-on niya nga ginpamatukan si Satanas kag ang mga demonyo. Wala sia nagpadala sa direkta nga mga pagsulay ni Satanas. (Luc. 4:1-13) Ginpamatukan man niya ang malalangon nga mga pahito nga makaimpluwensia sa iya hunahuna kag mga buhat. (Mat. 16:21-23) Ginbuligan ni Jesus ang mga tawo nga makapanginpadlos sa mapintas nga pagkontrol sang mga demonyo.—Mar. 5:2, 8, 12-15; 9:20, 25-27.

7 Sang nangin Hari si Jesus sang 1914, gintinluan niya ang langit sa impluwensia ni Satanas kag sang mga demonyo. Subong resulta, mas labi nga determinado si Satanas nga ‘patalangon ang bug-os napuy-an nga duta.’ (Bug. 12:9, 10) Gani, indi kita dapat makibot kon ngaa tuman kadasig ang paglapnag sang espiritismo sa karon. Paano naton maamligan ang aton kaugalingon?

8. Kon nagapili sang kalingawan, ano ang dapat naton ipamangkot sa aton kaugalingon?

8 Ang Biblia maathag nga nagapaandam tuhoy  sa mga katalagman sang espiritismo. (Basaha ang Deuteronomio 18:10-12.) Sa karon, ginaimpluwensiahan ni Satanas kag sang mga demonyo ang panghunahuna sang mga tawo paagi sa mga pelikula, mga libro, kag mga video game parte sa espiritismo. Gani kon nagapili kita sang kalingawan, pamangkuton naton ang aton kaugalingon: ‘Sa nagligad nga mga bulan, nawili bala ako sa mga pelikula, programa sa telebisyon, mga video game, mga libro, ukon komiks nga may labot sa espiritismo? Nahangpan ko bala ang mga katalagman sang espiritismo, ukon ginabalewala ko ini? Nahunahuna ko bala kon ano ang batyagon ni Jehova kon pilion ko ini nga kalingawan? Kon nagpadala ako sa sining sataniko nga mga impluwensia, ang akon bala gugma kay Jehova kag sa iya matarong nga mga prinsipio magapahulag sa akon nga untatan ini sa gilayon?’—Binu. 19:19, 20.

Pamatii ang Paandam ni Jesus Tuhoy sa Imoralidad

9. Paano mapalambo sang isa ang gugma sa pagkamalinapason?

9 Ginsakdag ni Jesus ang talaksan ni Jehova sa moralidad. Nagsiling sia: “Wala bala ninyo mabasahi nga sia nga nagtuga sa ila sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod’? Amo nga indi na sila duha, kundi isa ka unod. Gani, ang gintingob sang Dios indi pagbulagon sang tawo.” (Mat. 19:4-6) Nahibaluan ni Jesus nga ang aton makita makaapektar sa aton tagipusuon. Gani sa iya Sermon sa Bukid nagsiling sia: “Nabatian ninyo nga ginsiling, ‘Indi ka magpanghilahi.’ Apang nagasiling ako sa inyo nga ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mat. 5:27, 28) Ang matuod, kon ginasikway sang isa ang paandam ni Jesus, nagapalambo sia sing gugma sa pagkamalinapason.

10. Magsugid sang eksperiensia nga nagapakita nga sarang mauntat sang isa ang pagkaadik sa pornograpiya.

10 Ginapasanyog ni Satanas ang imoralidad paagi sa pornograpiya. Tuman na gid ini kalapnag sa karon. Ang mga nagatan-aw sang pornograpiya nabudlayan gid sa pagkakas sang imoral nga mga eksena sa ila hunahuna. Mahimo pa gani sila maadik sa sini. Binagbinaga ang natabo sa isa ka Cristiano. Nagsiling sia: “Sekreto ako nga nagatan-aw sang pornograpiya. Nakahimo ako sang kaugalingon ko nga kalibutan nga abi ko indi konektado sa kalibutan nga ginaalagad ko si Jehova. Nahibaluan ko nga sala ini apang ginakumbinsi ko ang akon kaugalingon nga ginabaton gihapon sang Dios ang akon pag-alagad.” Ano ang nagpabag-o sa panghunahuna sini nga utod? Nagsiling sia: “Bisan pa amo yadto ang pinakamabudlay nga butang nga ginhimo ko, nagdesisyon ako nga isugid sa mga gulang ang akon problema.” Bangod sini, nabuligan ang utod nga untatan ang iya makahuluya nga bisyo. “Sang gin-untat ko na ang paghimo sini nga sala,” siling niya, “natigayon ko ang matuod nga matinlo nga konsiensia.” Ang mga nagadumot sa pagkamalinapason dapat man magdumot sa pornograpiya.

11, 12. Paano naton mapakita nga ginadumtan naton ang pagkamalinapason kon nagapili kita sang musika?

11 Ang musika kag ang mga liriko sini makaimpluwensia sa aton emosyon kag sa aton malaragwayon nga tagipusuon. Huo, ang musika isa ka dulot gikan sa Dios kag madugay na nga ginagamit sa matuod nga pagsimba. (Ex. 15:20, 21; Efe. 5:19) Apang ang musika nga ginapasanyog sang kalibutan ni Satanas nagahimaya sa imoralidad.  (1 Juan 5:19) Paano mo mahibaluan kon ang musika nga imo ginapamatian makahalit sa imo ukon indi?

12 Pamangkuta ang imo kaugalingon: ‘Ang mga kanta bala nga akon ginapamatian nagapadaku sang pagpatay, pagpanghilahi, pagpakighilawas, kag pagpasipala sa Dios? Kon basahon ko ang mga liriko sini sa isa ka tawo, makasiling bala sia nga ginadumtan ko ang pagkamalinapason, ukon ginapakita sini nga nadagtaan na ang akon tagipusuon?’ Indi kita makasiling nga ginadumtan naton ang pagkamalinapason kon nagakanta kita sang mga musika nga nagahimaya sini. “Ang mga butang nga nagagua sa baba nagagikan sa tagipusuon,” siling ni Jesus, “kag ini nga mga butang nagadagta sa tawo. Halimbawa, gikan sa tagipusuon nagagikan ang malaut nga pangatarungan, pagpatay, panghilahi, pagpakighilawas, pagpangawat, di-matuod nga pagpanaksi, pagpasipala.”—Mat. 15:18, 19; ipaanggid ang Santiago 3:10, 11.

Iluga ang Pagtamod ni Jesus sa mga Nagahigugma sa Pagkamalinapason

13. Paano gintamod ni Jesus ang mga wala nagahinulsol?

13 Si Jesus nagsiling nga nagkari sia para buligan nga maghinulsol ang mga makasasala, ukon mga malinapason. (Luc. 5:30-32) Apang, paano niya ginatamod ang mga wala nagahinulsol? Si Jesus naghatag sing mabaskog nga paandam batok sa impluwensia sini nga mga tawo. (Mat. 23:15, 23-26) Nagsiling sia: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang isa nga nagahimo sang kabubut-on sang akon Amay nga yara sa langit. Madamo ang magasiling sa akon sa sina nga adlaw [kon ang Dios maghukom na], ‘Ginuo, Ginuo, wala bala kami nagpanagna sa imo ngalan, kag nagpanabog sang mga demonyo sa imo ngalan, kag naghimo sang madamong gamhanan nga mga buhat sa imo ngalan?’” Apang, isikway niya ining mga di-mahinulsulon nga nagahimo sang pagkamalinapason paagi sa pagsiling: “Palayo sa akon.” (Mat. 7:21-23) Ngaa amo sini ang paghukom sa ila? Bangod ginapakahuy-an nila ang Dios kag ginahalitan ang iban paagi sa ila kalautan.

14. Ngaa ang di-mahinulsulon nga mga makasasala dapat sikwayon sa kongregasyon?

14 Ang Pulong sang Dios nagasugo nga ang di-mahinulsulon nga mga makasasala dapat sikwayon sa kongregasyon. (Basaha ang 1 Corinto 5:9-13.) Kinahanglan ini bangod sa tatlo ka rason: (1) agod indi mahuy-an ang ngalan ni Jehova, (2) agod indi madagtaan ang kongregasyon, kag (3) agod mabuligan ang makasasala nga maghinulsol kon posible.

15. Kon luyag naton mangin mainunungon kay Jehova, ano ang ipamangkot naton sa aton kaugalingon?

15 Ginailog bala naton ang pagtamod ni Jesus sa mga makasasala nga wala nagahinulsol? Pamangkuton naton ang aton kaugalingon: ‘Nagapakig-upod bala ako sa isa nga gin-disfellowship ukon nag-disassociate sa kongregasyon? Kamusta kon malapit naton sia nga paryente nga wala nagaistar sa aton balay?’ Isa gid ini ka pagtilaw sa aton gugma sa pagkamatarong kag sa aton pagkamainunungon sa Dios. *

16, 17. Ano nga kabudlayan ang naatubang sang isa ka Cristianong iloy, kag ano ang nakabulig sa iya nga sakdagon ang kahimusan sa pag-disfellowship?

16 Binagbinaga ang eksperiensia sang utod nga babayi nga may hamtong na nga anak nga  nagaalagad anay kay Jehova. Apang sang ulihi, nagpakasala ini kag wala naghinulsol amo nga gin-disfellowship. Ginahigugma gid sang aton utod nga babayi si Jehova, apang ginahigugma man niya ang iya anak amo nga nabudlayan sia sa pag-aplikar sang sugo sang Biblia nga likawan ang pagpakig-upod sa iya.

17 Ano ang mahimo mo ilaygay sa sini nga utod? Ginbuligan sia sang isa ka gulang nga marealisar nga nahangpan ni Jehova ang kasakit nga iya ginabatyag. Ginsilingan sia sang gulang nga binagbinagon ang kasakit nga ginbatyag ni Jehova sang nagrebelde ang pila niya ka anak nga mga anghel. Nangatarungan ang gulang nga bisan nahibaluan ni Jehova nga masakit ini katama, kinahanglan niya ipatuman ang pag-disfellowship sa mga di-mahinulsulon. Tinagipusuon nga ginbaton sang utod nga babayi ini nga pahanumdom kag mainunungon niya nga ginsakdag ang kahimusan sa pag-disfellowship. * Ini nga pagkamainunungon nagapahalipay gid kay Jehova.—Hulu. 27:11.

18, 19. (a) Ano ang ginadumtan naton kon wala kita nagapakig-angot sa nagahimo sang kalautan? (b) Ano ang mahimo mangin resulta kon magmainunungon kita sa Dios kag sa iya kahimusan?

18 Kon amo sini ang imo kahimtangan, dumduma nga nahangpan ni Jehova ang imo ginabatyag. Kon wala ka nagapakig-angot sa isa nga gin-disfellowship ukon nag-disassociate, ginapakita mo nga ginadumtan mo ang malaut nga mga panimuot kag buhat. Nagapamatuod man ini nga ginahigugma mo ang nakasala kay ginahimo mo ini para sa iya kaayuhan. Ang imo pagkamainunungon kay Jehova makabulig sa isa nga gindisiplina nga maghinulsol kag magbalik kay Jehova.

19 Ang isa nga gin-disfellowship nga nakabalik sang ulihi nagsulat: “Nalipay ako nga ginahigugma ni Jehova ang iya katawhan kag ginapat-od niya nga magpabilin nga matinlo ang iya organisasyon. Bisan pa para sa mga tagagua daw mapintas ini nga kahimusan, ang matuod kinahanglanon gid ini kag mahigugmaon.” Sa banta mo nakamarasmas ayhan ini nga tawo kon ang mga katapo sang kongregasyon pati na ang iya pamilya nagapakig-upod gihapon sa iya bisan pa gin-disfellowship sia? Kon ginasakdag naton ang kahimusan sa pag-disfellowship, ginapamatud-an naton nga ginahigugma naton ang pagkamatarong kag ginakilala ang kinamatarong ni Jehova sa pagpahamtang sang mga talaksan sa paggawi.

“Dumti ang Malaut”

20, 21. Ngaa importante nga dumtan naton ang pagkamalinapason?

20 “Hupti ang inyo kaligdong, mangin mabinantayon,” paandam ni apostol Pedro. Ngaa? Bangod “ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.” (1 Ped. 5:8) Matukob ka ayhan? Nagadepende ina kon paano mo ginadumtan ang pagkamalinapason.

21 Ang pagdumot sa kon ano ang malain indi mahapos. Natawo kita nga makasasala, kag nagakabuhi sa kalibutan nga nagapaayon sa undanon nga kailigbon. (1 Juan 2:15-17) Apang kon ginailog naton si Jesucristo kag ginahigugma sing tudok si Jehova mangin madinalag-on kita sa pagdumot sa pagkamalinapason. Kabay nga mangin determinado kita nga ‘dumtan ang malaut,’ kag nagasalig sing bug-os nga si Jehova “nagatipig . . . sang iya mga balaan; ginaluwas niya sila sa kamut sang mga malauton.”—Sal. 97:10.

[Mga Nota]

^ par. 15 Para sa dugang nga detalye, tan-awa ang Septiembre 15, 1981, nga Watchtower, pahina 26-31.

Ano ang Imo Sabat?

• Ano ang makabulig sa aton nga usisaon ang aton panimuot sa alkoholiko nga mga ilimnon?

• Paano naton maamligan ang aton kaugalingon batok sa espiritismo?

• Ngaa makatalagam ang pornograpiya?

• Paano naton mapakita nga ginadumtan naton ang pagkamalinapason kon gin-disfellowship ang aton hinigugma?

[Mga Pamangkot sa Pagtinuon]

[Retrato sa pahina 29]

Kon gusto mo mag-inom sang alkoholiko nga ilimnon, ano ang dapat mo binagbinagon?

[Retrato sa pahina 30]

Mag-andam batok sa impluwensia ni Satanas sa mga kalingawan

[Retrato sa pahina 31]

Ano nga gugma ang ginapalambo sang isa nga nagatan-aw sang pornograpiya?