Magdiretso sa kaundan

Magdiretso sa listahan sang kaundan

Tahura ang Dulot sang Dios nga Pag-asawahay

Tahura ang Dulot sang Dios nga Pag-asawahay

 Tahura ang Dulot sang Dios nga Pag-asawahay

“Busa bayaan sang lalaki ang iya amay kag ang iya iloy kag magahiusa sa iya asawa, kag mangin-isa sila ka unud.”—GEN. 2:24.

1. Ngaa si Jehova takus sang aton pagtahod?

SI Jehova nga Dios nga amo ang Tagtukod sang pag-asawahay, takus gid sang aton pagtahod. Subong aton Manunuga, Soberano, kag langitnon nga Amay, nagakaigo lamang nga tawgon sia nga Manughatag sang “tagsa ka maayong dulot kag tagsa ka himpit nga regalo.” (Sant. 1:17; Bug. 4:11) Isa ini ka pamatuod sang iya daku nga gugma. (1 Juan 4:8) Ang tanan nga ginatudlo niya sa aton, ang tanan nga ginapangabay, kag ang tanan nga ginahatag para gid sa aton kaayuhan kag benepisyo.—Isa. 48:17.

2. Ano nga mga instruksion ang ginhatag ni Jehova sa una nga mag-asawa?

2 Ginapakita sang Biblia nga ang pag-asawahay isa sa “maayong” mga dulot gikan sa Dios. (Rut 1:9; 2:12) Sa una nga kasal nga ginhimo ni Jehova, ginhatagan niya ang mag-asawa nga sanday Adan kag Eva sing espesipiko nga mga instruksion kon paano sila magmadinalag-on. (Basaha ang Mateo 19:4-6.) Kon ginsunod lamang nila ang panuytoy sang Dios, naagom kuntani nila ang permanente nga kalipay. Apang bangod ginsikway nila ang sugo sang Dios, nag-antos sila sing mapait nga mga resulta.—Gen. 3:6-13, 16-19, 23.

3, 4. (a) Paano ginasikway sang madamo sa karon ang pag-asawahay kag si Jehova nga Dios? (b) Ano nga mga halimbawa ang binagbinagon naton sa sini nga artikulo?

3 Kaangay sinang una nga mag-asawa, wala man ginasapak sang madamo nga tawo sa karon ang panuytoy ni Jehova sa ila mga desisyon sa pag-asawahay. Ang pila nagaupod na bisan wala pa makasal, samtang ang iban naman may ginasunod nga kaugalingon nga talaksan tuhoy sa pag-asawahay. (Roma 1:24-32; 2 Tim. 3:1-5) Wala nila ginakabig ang pag-asawahay nga isa ka dulot gikan sa Dios, kag paagi sa pagsikway sini nga dulot, ginasikway man nila ang Manughatag sini, si Jehova nga Dios.

4 Kon kaisa, bisan ang pila ka katawhan sang Dios naimpluwensiahan man sang tiko nga pagtamod sa pag-asawahay. May pila nga nagabulagay ukon nagadiborsio bisan pa wala sing Makasulatanhon nga basihan. Paano ini malikawan? Paano ang panuytoy sang Dios sa Genesis 2:24 makabulig agod magbakod ang pag-asawahay sang mga Cristiano? Kag paano makahanda sa sini ang mga nagaplano sa pagminyo? Binagbinagon naton ang tatlo ka madinalag-on nga pag-asawahay sang panahon sang Biblia nga nagapakita nga importante gid ang pagtahod kay Jehova agod magdugay ang pag-asawahay.

Palambua ang Pagkamainunungon

5, 6. Ano nga pagtilaw ang naatubang ni Zacarias kag ni Elisabet, kag paano ginpakamaayo ang ila pagkamainunungon?

5 Ang mag-asawa nga sanday Zacarias kag Elisabet naghimo sing husto nga mga desisyon sa ila kabuhi. Pareho sila nga nagpili sang matutom nga alagad ni Jehova. Si Zacarias matutom sa iya mga responsibilidad subong saserdote, kag pareho nila nga gintuman ang Kasuguan sang Dios sa ila bug-os nga masarangan. Madamo sila sing rason agod magpasalamat. Apang, kon magduaw ka sa ila balay sa Juda, matalupangdan mo gid nga may kulang. Wala sila sing kabataan. Si Elisabet baw-as, kag tigulang na sila nga duha.—Luc. 1:5-7.

6 Sa dumaan nga Israel, ginapabaloran gid ang pagpanganak, kag masami nga dalagku ang mga pamilya didto. (1 Sam. 1:2, 6, 10; Sal. 128:3, 4) Sadto, kon ang asawa indi makapanganak, mahimo sia bulagan sa malimbungon nga paagi sang  iya bana. Apang, si Zacarias mainunungon kay Elisabet. Wala sia nangita sing paagi nga bulagan ang iya asawa, amo man si Elisabet. Bisan pa nasubuan sila bangod wala sila sing anak, padayon sila nga nag-alagad sing matutom kay Jehova nga magkaupod. Sang ulihi, milagruso sila nga ginpakamaayo ni Jehova sang isa ka anak bisan pa tigulang na sila.—Luc. 1:8-14.

7. Sa ano nga paagi ginpakita ni Elisabet nga mainunungon sia sa iya bana?

7 Si Elisabet nagpakita man sing dalayawon nga pagkamainunungon sa isa pa ka paagi. Sang ginbun-ag niya ang ila anak nga si Juan, indi makahambal si Zacarias bangod ginpangduhaduhaan sini ang anghel sang Dios. Apang, mahimo nga nangita si Zacarias sing paagi nga mapaalinton sa iya asawa ang ginsiling sang anghel ni Jehova nga “Juan” ang ipangalan sa bata. Luyag kuntani sang ila mga kaingod kag mga paryente nga ngalanan ang bata pareho sa iya amay. Apang mainunungon nga ginsunod ni Elisabet ang ginsiling sang iya bana. Si Elisabet nagsiling: “Indi! kundi tawgon sia nga Juan.”—Luc. 1:59-63.

8, 9. (a) Paano ang pagkamainunungon makapabakod sang pag-asawahay? (b) Ano ang pila ka paagi nga mapakita sang bana kag asawa ang pagkamainunungon?

8 Kaangay nanday Zacarias kag Elisabet, ang mga mag-asawa karon nagaatubang man sang kalugaw-an kag iban pa nga mga kabudlayan. Kon ang mag-asawa indi mangin mainunungon sa isa kag isa, indi magmadinalag-on ang ila pag-asawahay. Ang pagpakiat, pornograpiya, pagpanghilahi, kag ang iban pa nga katalagman, mahimo makaguba sang pagsalig sang mga mag-asawa sa isa kag isa. Kag kon madula na ang pagsalig, amat-amat na nga magalas-ay ang ila gugma. Ang pagkamainunungon mapaanggid sa isa ka kudal nga nagaamlig sa puluy-an batok sa mga estranghero kag sa iban pa nga katalagman. Nagahatag ini sing seguridad sa mga nagapuyo sa balay. Gani, kon ang bana kag asawa mainunungon sa isa kag isa, makabatyag sila sing seguridad kag hilway nga makapabutyag sang ila balatyagon nga magapalambo sang ila gugma. Huo, importante gid ang pagkamainunungon.

9 Ginsilingan ni Jehova si Adan: “Bayaan sang lalaki ang iya amay kag ang iya iloy kag magahiusa sa iya asawa.” (Gen. 2:24) Ano ang buot silingon sina? Magabag-o na ang pagpakig-angot niya sa iya mga abyan kag mga paryente. Ang panguna nga hatagan sang tion kag atension sang kada isa amo na ang iya tiayon. Indi nila dapat pag-unahon ang ila mga abyan ukon mga paryente kag patumbayaan ang ila bag-o nga pamilya; indi man nila dapat pagtugutan ang ila ginikanan nga mag-entra sa ila mga desisyon ukon mga di-paghangpanay. Ang mag-asawa dapat na karon mahiusa sa isa kag isa. Amo ina ang sugo sang Dios.

10. Ano ang makabulig sa mga mag-asawa nga mapalambo ang pagkamainunungon?

10 Bisan sa mga panimalay nga nabahinbahin sa relihion, daku man ang mabulig sang pagkamainunungon. Ang isa ka utod nga babayi nga may di-tumuluo nga bana nagsiling: “Nagapasalamat gid ako kay Jehova bangod gintudluan niya ako kon paano magpasakop sa akon bana kag tahuron sia sing tudok. Bangod sa pagpabilin nga mainunungon, nahuptan namon ang gugma kag pagtahod sa sulod sang 47 ka tuig.” (1 Cor. 7:10, 11; 1 Ped. 3:1, 2) Gani, tinguhai gid nga mabatyagan sang imo tiayon nga may seguridad sia. Paagi sa imo pulong kag buhat, ipakita sa imo tiayon nga para sa imo, sia ang pinakaimportante nga tawo sa bug-os nga duta. Tubtob posible, indi pagtuguti ang bisan sin-o ukon bisan ano nga magguba sang inyo pag-asawahay. (Basaha ang Hulubaton 5:15-20.) Si Ron kag si Jeannette, nga malipayon nga nag-updanay sa sulod sang 35 ka tuig, nagsiling, “Bangod mainunungon namon nga ginahimo ang mga ginapatuman sang Dios sa amon, malipayon kag madinalag-on ang amon pag-asawahay.”

Ang Paghiusa Nagapabakod sa Pag-asawahay

11, 12. Paano nagabuligay sanday Aquila kag Priscila (a) sa puluy-an, (b) sa trabaho, kag (c) sa ministeryo?

11 Sa kada tion nga ginapatuhuyan ni apostol Pablo ang iya suod nga mga abyan nga sanday Aquila kag Priscila, wala niya ginasambit ang isa lang sa ila. Gin-aplikar gid sini nga mag-asawa ang ginsiling sang Dios nga ang bana kag asawa dapat mangin ‘isa ka unud.’ (Gen. 2:24) Magkaupod sila pirme nga nagapanghikot  sa ila balay, sa trabaho, kag sa ministeryo. Halimbawa, sang una nga nag-abot si Pablo sa Corinto, mainayuhon sia nga gin-agda nanday Aquila kag Priscila nga magpabilin sa ila balay, nga mahimo amo anay ang iya ginadayunan. Sang ulihi, sa Efeso, ginpagamit nila ang ila puluy-an agod hiwatan sang mga miting sang kongregasyon kag magkaupod sila nga nagbulig sa mga bag-uhan, kaangay ni Apolos, nga mag-uswag sa espirituwal. (Binu. 18:2, 18-26) Sang nagkadto sa Roma ining makugi nga magtiayon, ginpagamit man nila ang ila puluy-an didto agod hiwatan sang mga miting sang kongregasyon. Sang ulihi, nagbalik sila sa Efeso agod palig-unon ang ila mga kauturan.—Roma 16:3-5.

12 May tion man nga nakaupod ni Aquila kag ni Priscila si Pablo sa ila trabaho nga paghimo sing tolda. Makita naton nga magkaupod liwat ang mag-asawa, nagabuligay kag wala nagapaindisanay ukon nagaaway. (Binu. 18:3) Pat-od gid nga ang ila pag-updanay sa espirituwal nga mga hilikuton amo ang nagpabakod sa ila pag-asawahay. Sa Corinto man, Efeso, ukon Roma, nakilal-an sila nga “mga masigkamanugpangabudlay kay Cristo Jesus.” (Roma 16:3) Magkaupod sila nga nagpakigbahin sa pagbantala sang Ginharian nga hilikuton bisan diin sila mag-alagad.

13, 14. (a) Ano ang mahimo makaguba sa paghiusa sang mag-asawa? (b) Ano ang pila ka butang nga mahimo sang mga mag-asawa agod magbakod ang ila paghiusa subong ‘isa ka unud’?

13 Sa pagkamatuod, magabakod ang pag-asawahay kon nahiusa ang mag-asawa sa ila mga tulumuron kag hilikuton. (Man. 4:9, 10) Sing makapasubo, madamo nga mag-asawa sa karon nga diutay lang ang tion nga magkaupod. Madamo nga oras ang ginahinguyang nila sa magkatuhay nga trabaho. Ang iban nagalakbay sa malayo nga mga lugar bangod sa trabaho ukon naga-abroad agod magpadala na lang sing kuarta sa ila pamilya. May mga mag-asawa man nga bisan nagaupdanay sa balay, halos wala sing tion nga mag-istoryahanay bangod sa telebisyon, kalingawan, sports, video game, ukon Internet. Amo bala sina ang nagakatabo sa inyo puluy-an? Kon amo, mabag-o bala ninyo ang inyo kahimtangan agod makaupdanay kamo sing mas masunson? Makaupdanay bala kamo sa paghanda sing pagkaon, pagpanghugas sang pinggan, ukon sa pagpanghardin? Makaupdanay bala kamo sa pagtatap sa kabataan ukon sa pagbulig sa inyo tigulang na nga mga ginikanan?

14 Ang importante sa tanan, amo ang regular nga pagpakigbahin sing magkaupod sa pag-alagad kay Jehova. Ang pagbinagbinag sa teksto kada adlaw kag pangpamilya nga pagsimba nagahatag sing dalayawon nga kahigayunan nga mahiusa ang panghunahuna kag mga tulumuron sang inyo pamilya. Magpakigbahin sa ministeryo nga magkaupod. Kon posible, tinguhai nga magpayunir kamo sing dungan, bisan sa isa lang ka bulan ukon sa sulod sang isa ka tuig. (Basaha ang 1 Corinto 15:58.) Ang isa ka utod nga babayi nga nagpayunir upod sa iya bana nagsiling: “Ang pagministeryo amo ang isa ka paagi nga makaupdanay kami kag makaistoryahanay sing maayo. Bangod pareho ang amon tulumuron nga magbulig sa iban sa espirituwal, nagabatyag ako nga isa kami ka team. Nangin suod ako sa iya indi lamang subong akon bana kundi subong isa ka maayo nga abyan.” Samtang magkaupod kamo nga nagahimo sang mapuslanon nga mga butang, ang inyo interes, prioridad, kag mga hilikuton amat-amat man nga mangin pareho tubtob nga mangin kaangay kamo nanday Aquila  kag Priscila, nga nagahunahuna, nagabatyag, kag nagapanghikot subong ‘isa ka unud.’

Unaha ang Dios sa Inyo Pag-asawahay

15. Ano ang yabi sa isa ka madinalag-on nga pag-asawahay? Ipaathag.

15 Nakita ni Jesus ang importansia sang pag-una sa Dios sa pag-asawahay. Nasaksihan niya ang una nga kasal nga ginhimo ni Jehova. Nakita niya kon daw ano ka malipayon sanday Adan kag Eva sang ginasunod nila ang panuytoy sang Dios, kag nakita man niya ang malain nga resulta sang ginsikway nila ini. Gani sang nagpanudlo na si Jesus, ginsulit niya ang instruksion sang iya Amay nga masapwan sa Genesis 2:24 kag nagdugang sia: “Ang gintingob sang Dios indi pagbulagon sang tawo.” (Mat. 19:6) Gani, ang tudok nga pagtahod kay Jehova, amo ang yabi sa malipayon kag madinalag-on nga pag-asawahay. Ang mga ginikanan ni Jesus nga sanday Jose kag Maria nagpahamtang gid sing maayo nga halimbawa sa sini.

16. Paano gin-una nanday Jose kag Maria ang Dios sa ila pamilya?

16 Si Jose isa ka mabuot nga tawo kag may respeto kay Maria. Sang nahibaluan niya nga nagabusong si Maria, ginpakitaan niya ini sing kaluoy, bisan wala pa napaathag sang anghel sang Dios ang natabo kay Maria. (Mat. 1:18-20) Subong mag-asawa, gintuman nila ang mando ni Cesar, amo man ang Mosaikong Kasuguan. (Luc. 2:1-5, 21, 22) Kag bisan pa ang mga lalaki lang ang ginasugo nga magtambong sa panguna nga relihiosong mga kapiestahan sa Jerusalem, nagatambong kada tuig sanday Jose kag Maria upod sa ila pamilya. (Deut. 16:16; Luc. 2:41) Ginapakita sini kon paano nagpanikasog ining diosnon nga mag-asawa nga pahamut-an si Jehova kag ipakita ang ila tudok nga pagtahod sa espirituwal nga mga butang. Gani, indi kita matingala nga sila ang ginpili ni Jehova nga mag-atipan sa iya Anak sa una nga bahin sang kabuhi ni Jesus sa duta.

17, 18. (a) Paano mauna sang mag-asawa ang Dios sa ila pamilya? (b) Paano sila makabenepisyo sa sini?

17 Ginauna man bala ninyo ang Dios sa inyo pamilya? Halimbawa, kon nagahimo kamo sang importante nga mga desisyon, nagapanalawsaw bala kamo anay sa mga prinsipio sa Biblia, nagapangamuyo tuhoy sa sini, kag nagapangayo sing laygay sa hamtong nga mga Cristiano? Ukon ginasolbar bala ninyo ang problema paagi sa pagsunod lang sa inyo balatyagon ukon sa balatyagon sang inyo pamilya kag mga abyan? Ginatinguhaan bala ninyo nga iaplikar ang nabalhag nga mga panugda sang matutom nga ulipon tuhoy sa pag-asawahay kag pamilya? Ukon ginasunod lang ninyo ang lokal nga mga kinabatasan ukon popular nga sekular nga mga laygay? Regular bala kamo nga nagapangamuyo kag nagatuon nga magkaupod, nagapahamtang sing espirituwal nga mga tulumuron, kag nagasugilanon tuhoy sa mga prioridad sang inyo pamilya?

18 Si Ray nagsiling tuhoy sa ila 50 ka tuig nga malipayon nga pag-asawahay: “Wala kami sing problema nga wala namon masolbar, bangod padayon namon nga ginahimo si Jehova nga bahin sang amon ‘lubid nga tatlo ka dupli.’” (Basaha ang Manugwali 4:12.) Si Danny kag si Trina nagaugyon man sa sini. “Bangod magkaupod kami nga nagaalagad sa Dios,” siling nila, “nangin mas malig-on ang amon pag-asawahay.” Malipayon sila nga magkaupod sa kapin na sa 34 ka tuig. Gani, kon ginauna ninyo pirme si Jehova sa inyo pag-asawahay, buligan niya kamo nga magmadinalag-on kag pakamaayuhon niya kamo sing bugana.—Sal. 127:1.

Padayon nga Tahura ang Dulot sang Dios

19. Ngaa nag-aman ang Dios sang dulot nga pag-asawahay?

19 Ang importante lang sa mga tawo sa karon amo ang ila kaugalingon nga kalipay. Apang tuhay  ang pagtamod sang mga alagad ni Jehova. Nakahibalo sila nga gin-aman sang Dios ang dulot nga pag-asawahay para matuman ang iya katuyuan. (Gen. 1:26-28) Kon gintahod lang nanday Adan kag Eva ina nga dulot, paraiso na kuntani ang bug-os nga duta nga puno sang malipayon kag matarong nga mga alagad sang Dios.

20, 21. (a) Ngaa dapat naton tamdon nga sagrado ang pag-asawahay? (b) Ano nga dulot ang tun-an naton sa masunod nga semana?

20 Labaw sa tanan, dapat tamdon sang mga alagad sang Dios ang pag-asawahay nga isa ka kahigayunan nga himayaon si Jehova. (Basaha ang 1 Corinto 10:31.) Subong sang nakita na naton, ang pagkamainunungon, paghiusa, kag pag-una sa Dios amo ang diosnon nga mga kinaiya nga nagapabakod sa pag-asawahay. Gani, bisan nagahanda pa lang kita sa pagminyo, minyo na, ukon nagatinguha nga kay-uhon ang aton pag-asawahay, ini ang dapat naton tandaan: ang pag-asawahay isa ka sagrado nga kahimusan sang Dios. Ang pagdumdom sina magapahulag sa aton nga himuon ang aton bug-os nga masarangan nga iaplikar ang Pulong sang Dios kon nagahimo kita sing mga desisyon tuhoy sa pag-asawahay. Paagi sa sini, mapakita naton ang pagtahod indi lamang sa dulot nga pag-asawahay kundi sa Manughatag man sa sina nga dulot, si Jehova nga Dios.

21 Sa pagkamatuod, ang pag-asawahay indi lamang ang dulot nga ginhatag ni Jehova sa aton; indi lamang ini ang nagahatag sing kalipay sa kabuhi. Sa masunod nga artikulo, binagbinagon naton ang isa pa ka hamili nga dulot gikan sa Dios—ang dulot sang pagkadiminyo.

Ang ang Imo Sabat?

• Paano ang pagkamainunungon makabulig sa minyo nga mga Cristiano?

• Paano ang pagpanghikot nga magkaupod nagapabakod sa pag-asawahay?

• Ano ang pila ka paagi nga mapakita sang mga mag-asawa nga ginauna nila ang Dios?

• Paano naton mapakita nga ginatahod naton si Jehova, ang Tagtukod sang pag-asawahay?

[Mga Pamangkot sa Pagtinuon]

[Mga piktyur sa pahina 15]

Ang pagpanghikot nga magkaupod nagapahiusa sa mga mag-asawa