Magdiretso sa kaundan

Magdiretso sa listahan sang kaundan

Ginapabaskog sa Pagbato sa Pagsulay kag Kaluya sing Buot

Ginapabaskog sa Pagbato sa Pagsulay kag Kaluya sing Buot

 Ginapabaskog sa Pagbato sa Pagsulay kag Kaluya sing Buot

“Magabaton kamo sang gahom kon ang balaan nga espiritu mag-abot sa inyo.”—BINU. 1:8.

1, 2. Ano nga bulig ang ginsaad ni Jesus sa iya mga disipulo, kag ngaa kinahanglan nila ini?

NAHIBALUAN ni Jesus nga indi masarangan sang iya mga disipulo ang pagtuman sang iya mga sugo kon sa ila lang kaugalingon nga kusog. Tuman kasangkad sang ila teritoryo, makusog ang ila mga kaaway, kag may yara sila mga kaluyahon. Gani, maathag nga kinahanglan nila ang labaw sa tawo nga gahom. Antes sia nagkayab sa langit, ginpalig-on ni Jesus ang iya mga disipulo: “Magabaton kamo sang gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”—Binu. 1:8.

2 Ina nga saad natuman sugod sang Pentecostes 33 C.E. sang ang balaan nga espiritu naghatag sing gahom sa mga sumulunod ni Jesucristo sa pagbantala sa bug-os nga Jerusalem. Wala sing pagpamatok nga nakapauntat sa ila. (Binu. 4:20) Gani, kinahanglan gid sang matutom nga mga sumulunod ni Jesus, lakip na kita, ina nga kusog “sa tanan nga adlaw tubtob sa katapusan sang sistema sang mga butang.”—Mat. 28:20.

3. (a) Ipaathag kon ano ang kinatuhayan sang balaan nga espiritu kag gahom. (b) Paano makabulig sa aton ang gahom gikan kay Jehova?

3 Si Jesus nagsaad sa iya mga disipulo nga ‘magabaton sila sang gahom kon ang balaan nga espiritu mag-abot sa ila.’ Ang termino nga “gahom” kag “espiritu” may yara kinatuhayan. Ang espiritu sang Dios, ang iya aktibo nga puersa, amo ang kusog nga ginahatag niya sa mga tawo ukon butang agod matuman ang iya kabubut-on. Apang, ang gahom amo ang “ikasarang sa pagpanghikot ukon sa pagpahanabo.” Mahimo ini magpabilin nga di-aktibo sa isa ka tawo ukon butang tubtob sa tion nga gamiton na ini. Ang balaan nga espiritu mahimo ipaanggid sa koryente nga nagahatag sing enerhiya sa rechargeable battery, apang ang gahom mapaanggid sa enerhiya nga natago sa sina nga baterya. Ang gahom nga ginahatag ni Jehova sa iya mga alagad paagi sa iya balaan nga espiritu amo ang nagabulig sa kada isa sa aton nga matuman ang aton Cristianong dedikasyon kag mabatuan ang negatibo nga mga puersa.—Basaha ang Miqueas 3:8; Colosas 1:29.

4. Ano ang pagabinagbinagon sa sini nga artikulo, kag ngaa?

4 Ano ang nagapakita nga yara sa aton ang balaan nga espiritu? Paano ini makaimpluwensia sa aton mga ginahimo ukon reaksion? Samtang nagaalagad kita sing matutom sa Dios, madamo kita sang problema nga ginaatubang bangod kay Satanas, sa iya kalibutan, ukon sa aton pagkadihimpit. Gani, importante gid nga malandas naton ini agod makapabilin kita nga matutom, makapakigbahin sing regular sa ministeryo, kag mahuptan ang suod nga kaangtanan kay Jehova. Binagbinagon naton kon paano ang balaan nga espiritu makabulig sa aton sa pagbato sa pagsulay kag sa paglandas sa kakapoy kag kaluya sing buot.

Pagbato sa Pagsulay

5. Paano ang pangamuyo makabulig sa aton?

5 Gintudluan ni Jesus ang iya mga sumulunod nga mangamuyo: “Indi kami pagdalha sa pagsulay, kundi luwasa kami gikan sa isa nga malauton.” (Mat. 6:13) Indi gid pagpabay-an ni Jehova ang iya matutom nga mga alagad nga nagapangabay sini sa iya. Sang isa pa ka bes, si Jesus nagsiling nga “ang Amay sa langit  magahatag sang balaan nga espiritu sa mga nagapangayo sa iya.” (Luc. 11:13) Makapalig-on gid mahibaluan nga si Jehova handa maghatag sang iya balaan nga espiritu nga makabulig sa aton sa paghimo sing husto! Apang wala ini nagakahulugan nga punggan ni Jehova ang mga pagsulay. (1 Cor. 10:13) Kundi nagakahulugan ini nga kon ginasulay kita, dapat kita mangamuyo sing mas hanuot.—Mat. 26:42.

6. Sa ano ginbase ni Jesus ang iya sabat sa mga pagsulay ni Satanas?

6 Ginbase ni Jesus sa kasulatan ang iya sabat sang ginsulay sia sang Yawa. Maathag nga ang ginahunahuna ni Jesus amo ang Pulong sang Dios sang nagsabat sia: “Nasulat na . . . Sa liwat nasulat na . . . Palayo ka, Satanas! Kay nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’” Ang gugma kay Jehova kag sa iya Pulong amo ang nagpahulag kay Jesus nga pamatukan ang pangganyat sang Panulay. (Mat. 4:1-10) Pagkatapos sang sulitsulit nga pagpamatok ni Jesus sa pagsulay, ginbayaan sia ni Satanas.

7. Paano ang Biblia makabulig sa aton nga mabatuan ang pagsulay?

7 Kon si Jesus naggamit sang Kasulatan sa pagbato sa pagsulay sang Yawa, indi bala nga mas labi na gid kita? Huo, agod mabatuan naton ang Yawa kag ang iya mga ahente, importante gid nga mahibaluan naton ang mga talaksan sang Dios kag iaplikar ini. Madamo ang napahulag nga iaplikar ang ila natun-an sa Kasulatan sang nahangpan nila ang mga benepisyo sini. Sa pagkamatuod, “ang pulong sang Dios” may gahom nga sarang makahantop sang “mga panghunahuna kag mga tinutuyo sang tagipusuon.” (Heb. 4:12) Samtang labi naton nga ginabasa kag ginpamalandungan ang Kasulatan, labi man nga matigayon naton ang ‘paghantup sa kamatooran’ ni Jehova. (Dan. 9:13) Bangod sini, dapat naton pamalandungan ang mga kasulatan nga nagabinagbinag sang aton mga kaluyahon.

8. Paano naton matigayon ang balaan nga espiritu?

8 Luwas nga nahibaluan ni Jesus ang Kasulatan, nabatuan niya ang mga pagsulay bangod “puno [sia] sang balaan nga espiritu.” (Luc. 4:1) Agod matigayon naton ang kusog kag ikasarang kaangay kay Jesus, kinahanglan nga mangin suod kita kay Jehova. Mahimo naton ini kon panginpuslan naton ang tanan niya nga ginaaman agod mapuno kita sang iya espiritu. (Sant. 4:7, 8) Lakip sa sini amo ang pagtuon sa Biblia, pagpangamuyo, kag pagpakig-upod sa mga kauturan. Ang pagpabilin nga masako sa Cristianong mga hilikuton nakabulig man sa madamo nga magkonsentrar sa mga butang nga makapalig-on sa espirituwal.

9, 10. (a) Ano nga mga pagsulay ang inyo ginaatubang? (b) Paano ang pagpamalandong kag pagpangamuyo makabulig sa imo nga mabatuan ang pagsulay bisan pa nagabatyag ka sing kakapoy?

9 Ano nga mga pagsulay ang ginapakigbatuan mo? Ginasulay ka bala nga magpakiat sa isa nga indi mo tiayon? Kon di-minyo ka pa, ginasulay ka bala nga makigdeyt sa isa nga indi tumuluo? Ang mga Cristiano nga nagatan-aw sang telebisyon ukon nagagamit sang Internet, mahimo masulay nga magtan-aw sang mahigko nga mga laragway. Natabo na bala ina sa imo? Kon amo, ano ang ginhimo mo? Dapat mo tandaan nga ang isa ka sayop mahimo magdul-ong sa isa pa ka sayop, kag sa ulihi sa serioso nga sala. (Sant. 1:14, 15) Hunahunaa ang kasakit nga batyagon ni Jehova, sang kongregasyon, kag sang imo pamilya kon himuon mo ini. Apang kon magpabilin ka nga mainunungon sa mga prinsipio sang Dios mahuptan mo nga matinlo ang imo konsiensia. (Basaha ang Salmo 119:37; * Hulubaton 22:3.) Gani kon makaatubang ka sini nga mga pagsulay, dapat ka mangayo sing kusog nga mabatuan ini.

10 May butang pa nga dapat naton dumdumon sa mga pagsulay sang Yawa. Ginsulay ni Satanas si Jesus pagkatapos sang Iya 40 ka adlaw nga pagpuasa sa kahanayakan. Pat-od gid nga naghunahuna ang Yawa nga isa ini ka nagakaigo nga “kahigayunan” agod tilawan ang integridad ni Jesus. (Luc. 4:13) Nagapangita man si Satanas sang nagakaigo nga kahigayunan agod  tilawan ang aton integridad. Gani, importante gid nga magpabilin kita nga malig-on sa espirituwal. Sa masami, ginaatake kita ni Satanas kon makita niya nga maluya kita. Gani, kon nagabatyag kita sing kakapoy ukon kaluya sing buot, mas labi na gid nga dapat kita mangabay kay Jehova nga amligan kita kag hatagan sang iya balaan nga espiritu.—2 Cor. 12:8-10.

Paglandas sa Kakapoy kag Kaluya sing Buot

11, 12. (a) Ngaa madamo ang ginaluyahan sing buot sa karon? (b) Ano ang makabulig sa aton nga mabatuan ang kaluya sing buot?

11 Bangod indi kita himpit, kon kaisa nagabatyag kita sang kaluya sing buot. Mahimo naton ina maeksperiensiahan bangod nagakabuhi kita sa panahon nga puno sing problema. Naeksperiensiahan naton ang pinakamabudlay nga tion sa maragtas. (2 Tim. 3:1-5) Samtang nagahilapit ang Armagedon, labi nga nagadugang ang problema sa ekonomiya, sa emosyon, kag iban pa. Gani, indi katingalahan kon ngaa madamo ang nabudlayan nga tungdan ang ila responsibilidad sa pag-atipan kag pag-aman sang kinahanglanon sang ila pamilya. Nagabatyag sila sing kakapoy, kabug-at, kalapyo, kag kahuol pa gani. Kon amo sina ang imo ginabatyag, paano mo ina malandas?

12 Dumduma nga ginsaaran ni Jesus ang iya mga disipulo nga hatagan niya sila sing manugbulig—ang balaan nga espiritu sang Dios. (Basaha ang Juan 14:16, 17.) Amo ini ang pinakagamhanan nga puersa sa uniberso. Paagi sa sini, mahatagan kita ni Jehova sang “labaw gid” nga kusog nga kinahanglan naton agod mabatas ang bisan ano nga pagtilaw. (Efe. 3:20) Paagi sa pagsalig sa sini, siling ni apostol Pablo, matigayon naton ang “gahom nga labaw sa kinaandan,” bisan pa “ginaipit [kita] sa tanan nga paagi.” (2 Cor. 4:7, 8) Wala nagsaad si Jehova nga kuhaon niya ang mga kabudlayan, sa baylo ginapasalig niya kita nga paagi sa iya balaan nga espiritu magahatag sia sa aton sing kusog agod malandas ini.—Fil. 4:13.

13. (a) Ano ang nakabulig sa isa ka pamatan-on nga malandas ang mabudlay nga kahimtangan? (b) May nahibaluan ka bala nga kaanggid sini nga eksperiensia?

13 Binagbinaga ang halimbawa ni Stephanie, isa ka 19 anyos nga regular payunir. Sang 12 anyos sia, naistrok sia kag natukiban nga may tumor sa utok. Bangod sini, duha ka beses sia nga gin-operahan kag napaidalom sa radiation therapy. Duha ka beses pa gid sia nga naistrok amo nga nangin paralisado ang wala nga bahin sang iya lawas kag naapektuhan ang iya panan-aw. Kinahanglan gid ireserba ni Stephanie ang iya kusog para sa mas importante nga mga butang, subong sang pagtambong sa mga miting kag pagbantala. Apang nabatyagan gid niya nga  ginabuligan sia ni Jehova nga makabatas. Kon ginaluyahan sia, napalig-on sia sa pagbasa sang mga eksperiensia sang mga kauturan sa aton mga publikasyon. Ginapalig-on man sia sang mga kauturan paagi sa sulat ukon pagpakighambal sa iya antes kag pagkatapos sang mga miting. Naapresyar man sang mga interesado ang pagtudlo ni Stephanie sa ila amo nga sila na mismo ang nagakadto sa iya balay agod magtuon sa Biblia. Bangod sini, nagapasalamat gid sing daku si Stephanie kay Jehova. Ang paborito niya nga teksto amo ang Salmo 41:3, kay nangin matuod gid ini sa iya.

14. Ano ang dapat naton likawan kon ginaluyahan kita, kag ngaa?

14 Kon nagabatyag kita sing kakapoy ukon kabudlayan, indi gid kita dapat maghunahuna nga ang solusyon sini amo ang pag-untat sa aton espirituwal nga mga hilikuton. Amo ina ang pinakadaku nga sala nga mahimo naton. Ngaa? Bangod ang aton hilikuton subong sang personal kag pangpamilya nga pagtuon sa Biblia, pagministeryo, kag pagtambong sa mga miting amo ang paagi nga mabaton naton ang balaan nga espiritu. Ini nga mga hilikuton ang nagahatag sing kaumpawan. (Basaha ang Mateo 11:28, 29.) Madamo nga kauturan ang nagaabot sa aton mga miting nga kapoy, apang nagapauli nga masadya kay natughungan na ang ila espirituwal nga baterya!

15. (a) Nagsaad bala si Jehova nga ang mga Cristiano indi na makaagom sing kabudlayan? Ipaathag nga nagagamit sang Kasulatan. (b) Ano ang ginsaad sang Dios sa aton, kag ano nga pamangkot ang nagautwas?

15 Siempre pa, wala ini nagapahangop nga ang hilikuton sang mga alagad sang Dios mahapos lang. Kinahanglan gid ang panikasog agod mangin matutom nga Cristiano. (Mat. 16:24-26; Luc. 13:24) Walay sapayan sini, sarang mapabakod ni Jehova ang mga ginakapoy paagi sa iya balaan nga espiritu. “Ang mga nagahulat sa GINOO magabag-o sang ila kusug,” siling sang manalagna nga si Isaias. “Magatimbook sila nga may mga pakpak subong sang mga aguila, magadalagan sila kag indi paglapyoon, magalakat sila kag indi pagpunawon.” (Isa. 40:29-31) Gani, pamangkuton naton ang aton kaugalingon, Ano gid bala ang kabangdanan ngaa ginakapoy kita sa espirituwal?

16. Paano naton malikawan ang kakapoy kag kaluya sing buot?

16 Ginapalig-on kita sang Pulong ni Jehova nga ‘pat-uron naton ang mas importante nga mga butang.’ (Fil. 1:10) Ginpaanggid ni Pablo ang kabuhi sang mga Cristiano sa isa ka palumba sa dalagan, kag gin-inspirar sia sa pagsiling: “Isikway man naton ang tagsa ka kabug-atan . . . , kag magdalagan kita nga may pagbatas sang dalaganon nga ginabutang sa aton atubangan.” (Heb. 12:1) Ginapahangop niya nga dapat naton likawan ang indi kinahanglanon nga mga hilikuton kag kabug-atan nga makapalapyo sa aton. Ayhan ang pila sa aton masako na apang nagabaton pa gihapon sang dugang nga mga hilikuton. Gani, kon pirme ka nagabatyag sing kakapoy kag kabudlay, ngaa indi mo pag-usisaon kon ano kadamo nga tion ang ginahinguyang mo sa trabaho, sa pagliwaliwa, sa sports, kag sa iban pa nga kalingawan? Agod mabuhinan naton ang indi kinahanglanon nga mga hilikuton, dapat kita mangin makatarunganon kag kilalahon ang aton mga limitasyon.

17. Ngaa may pila nga ginaluyahan, apang ano ang ginapasalig ni Jehova?

17 Ayhan may iban man sa aton nga ginaluyahan bangod ang katapusan sang sistema sang mga butang wala mag-abot suno sa aton ginapaabot. (Hulu. 13:12) Ang bisan sin-o nga nagabatyag sini mapalig-on sang pinamulong sa Habacuc 2:3: “Ang palanan-awon naigo pa sa pinat-ud nga tion; nagadalidali sa katapusan—ini indi magbutig. Bisan magpalantang, hulata ini; kay sa pagkamatuud magaabut ini, indi ini  magpalantang.” Ginapasalig kita ni Jehova nga ang katapusan sang sistema sang mga butang magaabot suno sa iya gintalana nga tion!

18. (a) Ano nga mga saad ang nagahatag sa imo sang kusog? (b) Paano makabulig sa aton ang masunod nga artikulo?

18 Pat-od gid nga ginakalangkagan sang tanan nga matutom nga alagad ni Jehova ang tion nga madula na ang kakapoy kag kaluya sing buot, kag ang tanan nga tawo magabalik na sa “pagkapamatan-on.” (Job 33:25) Bisan sa karon makabatyag na kita sing nasulod nga kusog sa bulig sang balaan nga espiritu samtang nagapakigbahin kita sa espirituwal nga mga hilikuton. (2 Cor. 4:16; Efe. 3:16) Indi pagtuguti ang kakapoy nga mag-upang sa imo sa pagtigayon sang walay katapusan nga mga pagpakamaayo. Ang kada pagtilaw—pagsulay man ini, kakapoy, ukon kaluya sang buot—madula na, kon indi pa subong, sa bag-o nga kalibutan sang Dios. Sa masunod nga artikulo, binagbinagon naton kon paano ang balaan nga espiritu makabulig sa mga Cristiano nga mabatas ang mga paghingabot, pag-ipit, kag nanuhaytuhay nga kabudlayan.

[Footnote]

^ par. 9 Salmo 119:37 (NW): “Ilikaw ang akon mga mata sa pagtan-aw sa walay pulos nga mga butang; amligi ang akon kabuhi sa imo dalanon.”

Ano ang Imo Sabat?

• Paano ang pagbasa sang Biblia makabulig sa aton?

• Paano ang pagpangamuyo kag pagpamalandong makabulig sa aton?

• Paano naton malikawan ang mga butang nga mahimo magpaluya sang aton buot?

[Mga Pamangkot sa Pagtinuon]

[Piktyur sa pahina 24]

Ang Cristianong mga miting makapaumpaw gid sa aton sa espirituwal