Magdiretso sa kaundan

Magdiretso sa listahan sang kaundan

Madumduman Mo Bala?

Madumduman Mo Bala?

 Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Sa diin naghalin ang panudlo tuhoy sa predestinasyon?

Ginapadaku sang Calvinismo ang doktrina sang predestinasyon. Ini nga mga panudlo iya sang Repormador nga si Jean Cauvin (John Calvin) nga ginasunod sang mga sekta subong sang Reformed, Presbyterian, Congregational, kag Puritan.—9/1, pahina 18-21.

• Diin ginkuha ni Cain ang iya asawa?

Ang asawa ni Cain isa sa mga kaliwat ni Eva, nga nagbun-ag sang “mga anak nga lalaki kag mga anak nga babayi.” (Gen. 5:4)—9/1, pahina 25.

• Sin-o ang anghel nga ginpadala sang Dios agod manguna sa Israel pagua sa Egipto? (Ex. 23:20, 21)

Makatarunganon nga maghinakop kita nga ining anghel, nga ‘may ngalan ni Jehova,’ amo ang Bugtong nga Anak sang Dios, nga sang ulihi nakilala nga si Jesus.—9/15, pahina 21.

• Ngaa ginsambit sa tulun-an sang 1 Corinto ang karne nga ginhalad sa mga idolo?

Ang mga sapat ginahalad sa Griego kag Romano nga mga templo, pero ang nabilin nga karne nga wala nakaon sa tion sang seremonya mahimo ibaligya sa mga balaligyaan sing karne. Ang mga Cristiano wala nagaentra sa pagano nga pagsimba; pero wala nila ginatamod nga mahigko ang mga karne sa balaligyaan. Si apostol Pablo nagsulat: “Ang tanan nga ginabaligya sa balaligyaan sing karne padayon ninyo nga kaunon, nga wala nagapangusisa tungod sa inyo konsiensia; kay ‘iya ni Jehova ang duta kag ang tanan nga yara sa sini.’” (1 Cor. 10:25, 26)—10/1, pahina 12.

• Tuhoy sa matuod nga pagsimba, ano nga mga balibad ang wala ginabaton sang Dios?

‘Mabudlay ini katama. Indi ‘ko. Masako gid ako. Indi ko ina masarangan. May nakasaklaw sa akon.’ Ini nga mga balibad indi makatarunganon nga rason agod patumbayaan ang mga sugo sang Dios.—10/15, pahina 12-15.

• Ano ang pila ka paagi agod mangin makapabakod ang Cristianong mga miting para sa imo kag sa iban?

Maghanda sing abanse. Magtambong sing regular. Mag-abot sa eksakto nga oras. Dal-a ang tanan nga reperensia. Likawi ang mga tublag. Magpakigbahin. Magkomento sing malip-ot. Tungdi ang imo mga bahin. Hatagi sing komendasyon ang mga may bahin. Makigsugilanon sa iban nga nagatambong antes kag pagkatapos sang mga miting.—10/15, pahina 22.

• Sa diin mabasa sa Biblia ang tuhoy sa aro, nga nagalakip sa Hansen’s disease sa karon, nga nagadalahig sa isa ka bata nga babayi?

Ang 2 Hari kapitulo 5 nagasugid tuhoy sa bata nga babayi nga Israelinhon nga alagad sa balay sang isa ka pangulo sang mga soldado sang Siria nga si Naaman. Bangod may aro si Naaman, ginsilingan sia sang bata nga magkadto sa propeta nga si Eliseo agod mag-ayo.—11/1, pahina 22.

• Ano ang matun-an naton sa pagpadala ni Aaron sa pag-ipit sang iya mga kaupdanan?

Sang wala si Moises, gin-ipit sang mga Israelinhon si Aaron nga maghimo sang dios para sa ila kag nagpasugot sia. Ginapakita sini nga ang ginaipit indi lamang ang mga pamatan-on. Makaapektar man ini bisan sa mga may edad na nga luyag maghimo sing husto. Gani, dapat gid naton pamatukan ang negatibo nga pag-ipit sang aton mga kaupdanan.—11/15, pahina 8.

• Diin ang husto kag diin ang sala?

Si Satanas matuod nga persona: husto. (2 Cor. 11:14) Kon mapatay ang tawo, magasaylo sia sa pihak nga kinabuhi: sala. (Man. 9:5) Nagaulikid sa aton ang matutom nga mga anghel: husto. (Sal. 34:7) Si Jesus tupong sa Dios: sala. (1 Cor. 11:3)—12/1, pahina 8-9.