Magdiretso sa kaundan

Magdiretso sa listahan sang kaundan

Indi Pa Ulihi Para Mag-alagad sa Dios

Indi Pa Ulihi Para Mag-alagad sa Dios

 Indi Pa Ulihi Para Mag-alagad sa Dios

Sa Málaga, sa nabagatnan nga Espanya, ang mag-iloy nga may pareho nga ngalan nga Ana, nabawtismuhan sang Disiembre 19, 2009. Nalakip sila sa 2,352 ka tawo nga nagpabawtismo sa Espanya sang 2009. Apang may butang nga pinasahi sa sini nga mag-iloy—ang ila mga edad. Ang iloy 107 kag ang anak 83!

Ano ang nagpahulag sa ila nga magpabawtismo subong simbulo sang ila dedikasyon kay Jehova? Sang temprano nga bahin sang dekada 1970, ang anak nga si Ana gin-agda sang iya Saksi nga kaingod nga magtambong sa Pagtinuon Sang Kongregasyon sa Libro nga ginahiwat sa ila balay. Nagtambong si Ana sing panalagsa. Apang, bangod sang iya trabaho wala sia nag-uswag.

Mga pulo ka tuig ang nagligad, ang pila sa kabataan ni Ana nagtuon sa Biblia kag nangin mga alagad ni Jehova. Ang isa sa ila, si Mari Carmen, amo ang nagpapanumbalik sang gugma sang iya iloy sa kamatuoran kag nagbulig sa iya nga magbaton sing pagtuon sa Biblia. Dayon, ang lola ni Mari Carmen, ang mas tigulang nga Ana, nagpakita man sing interes sa Biblia. Sang ulihi, napulo ka miembro sini nga pamilya ang nabawtismuhan.

Sa adlaw sang ila bawtismo, daku gid nga kalipay ang nabatyagan sining mag-iloy nga Ana. “Palangga gid ako ni Jehova bangod gintugutan niya ako nga makilala sia,” siling sang 107 anyos nga si Ana. “Samtang wala pa ang Paraiso,” siling sang iya anak, “luyag ko alagaron si Jehova, himuon ang iya kabubut-on kag ibantala ang maayong balita tubtob sa akon masarangan.”

Ining duha ka balo nalangkag gid sa pagtambong sa mga miting. “Wala gid sila nagapalya sa mga miting,” siling sang isa ka gulang sa ila kongregasyon. “Ginahandaan gid nila ang pagkomento sa Pagtinuon sa Lalantawan.”

Ang ila matutom nga halimbawa nagapahanumdom sa aton sang balo nga si Ana “nga wala gid nagapalya sa templo, nga nagahimo sang sagrado nga pag-alagad adlaw kag gab-i nga may mga pagpuasa kag pag-ampo.” Bangod sini, natigayon niya ang pribilehiyo nga makita ang bata nga si Jesus. (Luc. 2:36-38) Sa edad nga 84, wala ginkabig ni Ana ang iya kaugalingon nga tigulang na para mag-alagad kay Jehova, amo man ang duha ka Ana nga ginsambit diri.

May mga paryente ka man bala nga interesado mamati sa mensahe sang Biblia? Ukon nakasumalang ka na bala sang interesado nga tigulang sa imo pagpamalaybalay? Mahimo sila mangin kaangay sang mga Ana sa sini nga eksperiensia, kay indi pa ulihi nga magsugod sa pag-alagad sa matuod nga Dios nga si Jehova.

[Blurb sa pahina 25]

“Palangga gid ako ni Jehova”

[Blurb sa pahina 25]

“Samtang wala pa ang Paraiso, luyag ko alagaron si Jehova”