Magdiretso sa kaundan

Magdiretso sa listahan sang kaundan

Padayon nga Palig-una ang Kongregasyon

Padayon nga Palig-una ang Kongregasyon

 Padayon nga Palig-una ang Kongregasyon

“Padayon nga lugpayi ang isa kag isa kag palig-una ang isa kag isa.”—1 TES. 5:11.

1. Ano nga mga pagpakamaayo ang matigayon sang isa nga bahin sang Cristianong kongregasyon, apang ano nga mga problema ang mahimo niya gihapon maatubang?

ISA gid ka daku nga pagpakamaayo nga mangin bahin sang Cristianong kongregasyon. May yara ka maayo nga kaangtanan kay Jehova. Naamligan ka sa malain nga resulta sang kalibutanon nga pagkabuhi bangod nagpagiya ka sa iya Pulong. Madamo ka sing matuod nga abyan nga nagabulig sa imo sa paghimo sing maayo. Huo, madamo ka sing pagpakamaayo. Apang, ang kalabanan nga Cristiano nagaatubang sang nanuhaytuhay nga mga problema. Ang pila sa ila mahimo nabudlayan sa paghangop sang madalom nga mga butang sa Pulong sang Dios. Ang iban nagamasakit ukon nagakasubo, ukon mahimo nagaantos sang malain nga resulta sang ila indi maalamon nga mga desisyon. Wala labot sini, tanan kita nagapuyo sa di-diosnon nga kalibutan.

2. Ano ang dapat naton himuon kon nagaatubang sang mga problema ang aton mga kauturan, kag ngaa?

2 Wala sang bisan isa sa aton nga luyag makita nga nagaantos ukon ginabudlayan ang aton mga masigka-Cristiano. Ginpaanggid ni apostol Pablo ang kongregasyon sa isa ka lawas kag nagsiling sia nga “kon ang isa ka bahin nagaantos, ang tanan iban pa nga bahin nagaantos upod sini.” (1 Cor. 12:12, 26) Gani, kon may problema ang  aton mga kauturan dapat naton sila buligan. May pila ka rekord sa Kasulatan nga nagasugid kon paano ginbuligan sang mga katapo sang kongregasyon ang iban nga malampuwasan ang ila mga problema. Samtang ginabinagbinag naton ini nga mga rekord, hunahunaa kon paano mo ini mailog. Paano mo mabuligan ang imo mga kauturan nga makapadayon sa pag-alagad kay Jehova kag sa amo mapalig-on ang kongregasyon?

“Ginpaupod Nila Sia sa Ila”

3, 4. Paano ginbuligan nanday Aquila kag Priscila si Apolos?

3 Sang si Apolos nag-abot sa Efeso, makugi na sia nga ebanghelisador. “Sanglit nagasilabo sa espiritu,” siling sang rekord sa Binuhatan, “padayon sia nga naghambal kag nagpanudlo sing sibu sang mga butang tuhoy kay Jesus, apang ang pagbawtismo ni Juan amo lamang ang iya nahibaluan.” Bangod wala nakahibalo si Apolos tuhoy sa bawtismo “sa ngalan sang Amay kag sang Anak kag sang balaan nga espiritu,” mahimo nga nabantalaan lamang sia sang mga disipulo ni Juan Bautista ukon sang mga sumulunod ni Jesus antes sang Pentecostes 33 C.E. Bisan pa makugi si Apolos, may importante nga mga butang nga wala pa niya mahangpan. Paano nakabulig sa iya ang pagpakig-upod sa iya mga masigkatumuluo?—Binu. 1:4, 5; 18:25; Mat. 28:19.

4 Sang nabatian sang Cristianong mag-asawa nga sanday Aquila kag Priscila nga si Apolos nagahambal sing maisugon sa sinagoga, ginpaupod nila sia sa ila, kag gintudluan sing dugang pa. (Basaha ang Binuhatan 18:24-26.) Isa gid ka mahigugmaon nga buhat ang ila ginhimo. Pat-od nga nangin mataktikanhon sanday Aquila kag Priscila sa ila paagi sang pagtudlo kay Apolos nga wala ginpabatyag sa iya nga ginapakanubo sia. Mahimo nga ginsugiran nila sia kon paano nagsugod ang Cristianong kongregasyon. Kag wala sing duhaduha nga nagpasalamat gid si Apolos sa iya bag-o nga mga kaupdanan nga nagtudlo sa iya sining importante nga mga detalye. Bangod sini nga ihibalo, ‘daku ang nabulig’ ni Apolos sa iya mga kauturan sa Acaya kag naghatag sia sing mabaskog nga panaksi.—Binu. 18:27, 28.

5. Anong mahigugmaon nga bulig ang ginatanyag sang linibo ka manugbantala sang Ginharian, kag ano ang resulta sini?

5 Sa karon, madamo nga Cristiano ang nagapasalamat gid sa mga nagbulig sa ila nga mahangpan ang Biblia. Madamo nga mga estudyante kag mga manunudlo ang nangin suod nga mag-abyan. Sa masami, binulan ang ginahinguyang sa pagduaw agod mabuligan ang isa ka tawo nga mahangpan ang kamatuoran. Apang, ang mga manugbantala sang Ginharian handa nga maghimo sina nga sakripisyo bangod nahibaluan nila nga kabuhi sang mga tawo ang nadalahig sa sini. (Juan 17:3) Kag daw ano nga kalipay ang aton mabatyagan kon makita naton nga nahangpan sang mga tawo ang kamatuoran, ginaaplikar ini, kag ginagamit ang ila kabuhi sa pagtuman sang kabubut-on ni Jehova!

 “Maayo ang Ginasugid Tuhoy sa Iya”

6, 7. (a) Ngaa si Timoteo ang ginpili ni Pablo nga mangin kaupod? (b) Paano nabuligan si Timoteo nga mag-uswag?

6 Sang nagduaw sanday apostol Pablo kag Silas sa Listra sa ila ikaduha nga paglakbay subong mga misyonero, nakilala nila ang pamatan-on nga si Timoteo. Mahimo nga tin-edyer ukon mga beintehon pa lang si Timoteo sadto. “Maayo ang ginasugid tuhoy sa iya sang mga kauturan sa Listra kag Iconio.” Ang iya iloy nga si Eunice kag ang iya lola nga si Loida mga dedikado nga Cristiano, apang ang iya amay indi tumuluo. (2 Tim. 1:5) Mahimo nga nakilala ni Pablo ini nga pamilya sa iya una nga pagbisita sa sina nga lugar mga duha ka tuig ang nagligad. Apang sa sini nga tion, nangin interesado si Pablo kay Timoteo bangod nakita niya ang talalupangdon nga katutom sini nga pamatan-on. Gani, upod ang pag-ugyon sang hubon sang mga gulang, si Timoteo nangin kabulig ni Pablo sa iya pagmisyonero.—Basaha ang Binuhatan 16:1-3.

7 Madamo pa sang dapat matun-an si Timoteo sa iya hamtong nga kaupod. Apang nag-uswag sia, tubtob sa punto nga ginsaligan sia ni Pablo kag ginpadala agod magbisita sa mga kongregasyon subong iya tiglawas. Sa kapin sa 15 ka tuig nga pag-upod ni Timoteo kay Pablo, ining di-eksperiensiado kag mahimo mahuluy-on nga pamatan-on, nag-uswag kag nangin maayo gid nga manugtatap.—Fil. 2:19-22; 1 Tim. 1:3.

8, 9. Ano ang mahimo sang mga katapo sang kongregasyon agod mapalig-on ang mga pamatan-on? Maghatag sang isa ka halimbawa.

8 Sa karon, madamo nga pamatan-on nga lalaki kag babayi sa Cristianong kongregasyon ang may yara man daku nga potensial. Kon ining mga pamatan-on palig-unon kag hanason sang hamtong sa espirituwal nga mga utod, mahimo sila magtinguha nga maglab-ot sing mga pribilehiyo sa organisasyon ni Jehova. Kamusta ang inyo kongregasyon? May nakita ka bala nga mga pamatan-on nga mahimo mag-uswag kaangay ni Timoteo? Paagi sa imo bulig kag pagpalig-on, mahimo sila mangin payunir, Bethelite, misyonero, ukon nagalakbay nga manugtatap. Apang paano mo sila mabuligan nga malab-ot ina nga mga tulumuron?

9 Si Martin nga katapo sang pamilya Bethel sa sulod na sang 20 ka tuig, nagpasalamat gid sa interes nga ginpakita sa iya sang manugtatap sang sirkito nga nakaupod niya sa pag-alagad sa latagon mga 30 ka tuig na ang nagligad. Ginsugiran sia sang manugtatap sang malipayon sini nga pag-alagad sa Bethel sang pamatan-on pa sia. Ginpalig-on niya si Martin nga binagbinagon man ang pag-alagad sa Bethel. Para kay Martin, yadto nga pag-istoryahanay may daku gid nga epekto sa ginhimo niya nga desisyon sang ulihi. Sing kaanggid, wala ka man makahibalo sang mangin epekto sa mga pamatan-on kon magpakig-istorya ka sa ila tuhoy sa espirituwal nga mga tulumuron.

 “Lipayon ang mga Kalag nga Ginapung-awan”

10. Ano ang ginbatyag ni Epafrodito, kag ngaa?

10 Si Epafrodito naghimo sing malawig kag makakalapoy nga paglakbay halin sa Filipos pakadto sa Roma agod bisitahan si apostol Pablo nga nabilanggo didto bangod sang iya pagtuo. Ginsugo sia sang mga taga-Filipos nga magdala sang ila regalo para sa apostol. Nagplano man sia nga magpabilin didto agod buligan si Pablo sa iya mabudlay nga kahimtangan. Apang sang didto na si Epafrodito sa Roma, nagmasakit sia kag “halos mapatay na.” Nagbatyag sia sing depresyon bangod para sa iya napaslawan sia sa pagtuman sang iya misyon.—Fil. 2:25-27.

11. (a) Ngaa indi kita matingala kon ang pila sa kongregasyon nagabatyag sang depresyon? (b) Ano ang ginrekomendar ni Pablo nga himuon para kay Epafrodito?

11 Ang mga tawo sa karon nagabatyag sang depresyon bangod sang nanuhaytuhay nga mga problema. Ginapakita sang estadistika sang World Health Organization nga 1 sa kada 5 ka tawo ang mahimo nakaagi sang depresyon sa ila kabuhi. Bisan ang mga alagad ni Jehova nakaeksperiensia man sini. Ang isa mahimo makabatyag sing depresyon bangod sa mga problema sa pag-aman sang mga kinahanglanon sang pamilya, balatian, kapaslawan, kag iban pa. Ano ang sarang mahimo sang mga taga-Filipos agod mabuligan si Epafrodito? Si Pablo nagsulat: “Abiabiha ninyo sia subong sang kinaandan nga pag-abiabi ninyo sa mga sumulunod sang Ginuo nga may bug-os nga kalipay; kag padayon ninyo nga pakamahalon ang subong sina nga sahi sang mga tawo, kay tungod sa buluhaton sang Ginuo diutayan lang sia mapatay, nga nagabutang sang iya kalag sa katalagman, agod bisan wala kamo diri yari man sia agod maghimo sang pribado nga pag-alagad sa akon.”—Fil. 2:29, 30.

12. Paano malugpayan ang mga nagabatyag sang depresyon?

12 Dapat man naton palig-unon ang mga kauturan nga ginaluyahan ukon nagabatyag sang depresyon. Mahimo naton sila hatagan sing komendasyon sa ila pag-alagad kay Jehova. Ayhan daku nga pagbag-o ang ila ginhimo agod mangin Cristiano ukon agod makaalagad sing bug-os tion. Apresyahon naton ang ila mga panikasog, kag pasaligon naton sila nga ginaapresyar man ina ni Jehova. Bisan indi na mahimo sang pila ka matutom nga utod ang pag-alagad kaangay sang ginhimo nila sang una bangod sa katigulangon ukon problema sa panglawas, takus gihapon sila nga tahuron naton bangod sang ila malawig nga tion sa pag-alagad. Ano man ang kabangdanan sang ila depresyon, ginalaygayan ni Jehova ang iya matutom nga mga alagad: “Lipayon ang mga kalag nga ginapung-awan, sakdagon ang mga maluya, mangin mapinasensiahon sa tanan.”—1 Tes. 5:14.

‘Patawara Sia sing Mainayuhon kag Lugpayi’

13, 14. (a) Anong mabug-at nga desisyon ang ginhimo sang kongregasyon sang Corinto, kag ngaa? (b) Ano ang nangin epekto sang pag-disfellowship?

13 Sang unang siglo, sa kongregasyon sang Corinto, may isa ka tawo nga nagahimo sang pagpakighilawas kag wala nagahinulsol. Ang iya paggawi, mahimo magdagta sa kaputli sang kongregasyon kag makangilil-ad bisan sa pagtamod sang mga indi tumuluo. Gani, nagakaigo lamang nga nagsugo si Pablo nga sikwayon yadto nga tawo sa kongregasyon.—1 Cor. 5:1, 7, 11-13.

14 Ina nga pagdisiplina may maayo nga epekto. Naamligan ang kongregasyon gikan sa malain nga impluwensia, kag ang makasasala nakamarasmas kag hanuot nga naghinulsol. Bangod sa paghinulsol nga iya ginpakita, ginsambit ni Pablo sa iya ikaduha nga sulat sa sina nga kongregasyon nga ipasag-uli na ina nga tawo. Apang, indi lamang amo sina ang dapat nila himuon. Ginsilingan man ni Pablo ang kongregasyon nga “patawaron sing mainayuhon kag lugpayan [ang makasasala nga naghinulsol], agod ina nga tawo indi madaug sang iya tuman nga kasubo.”—Basaha ang 2 Corinto 2:5-8.

15. Paano naton dapat tamdon ang mga makasasala nga naghinulsol kag napasag-uli na sa kongregasyon?

15 Ano ang matun-an naton sa sini nga hitabo? Nagakasubo gid kita kon may isa nga ma-disfellowship. Mahimo nga nagdala sila sing kahuy-anan sa ngalan sang Dios kag sa kongregasyon.  Ayhan nakasala pa gani sila sa aton mismo. Apang, kon ang mga gulang nga gintangdo sa pag-usisa sang kaso magdesisyon nahisuno sa panuytoy ni Jehova nga pabalikon na sa kongregasyon ang isa nga mahinulsulon, nagapakita ina nga ginpatawad na sia ni Jehova. (Mat. 18:17-20) Indi bala nagakaigo lang nga ilugon naton si Jehova? Ang matuod, kon matigdas kita kag indi mapinatawaron, daw kaangay lang nga ginapamatukan naton si Jehova. Agod mahuptan ang paghidait kag paghiusa sa kongregasyon kag agod mabaton ang kahamuot ni Jehova, indi bala nga dapat lang nga ‘pamatud-an naton ang aton gugma’ sa mga makasasala nga hanuot na nga naghinulsol kag napasag-uli?—Mat. 6:14, 15; Luc. 15:7.

“Makabulig Sia sa Akon”

16. Ngaa naakig si Pablo sa ginhimo ni Marcos?

16 May isa pa ka Makasulatanhon nga halimbawa nga nagapakita nga indi kita dapat maghinakit kon napaslawan kita sa ginapaabot naton sa iban. Halimbawa, si apostol Pablo nagbatyag nga ginpaslaw sia ni Juan Marcos. Paano? Sa una nga paglakbay nanday Pablo kag Bernabe sa ila pagmisyonero nga hilikuton, nag-upod si Marcos agod magbulig sa ila. Apang sa wala nahibaluan nga rason, ginbiyaan sila ni Juan Marcos kag nagpauli ini. Wala gid nanamian si Pablo sa ginhimo ni Marcos amo nga sang nagaplano sila sa ila ikaduha nga paglakbay, nagbaisay sila ni Bernabe kon bala paupdon pa nila liwat si Marcos. Bangod sa natabo sa ila una nga paglakbay, indi na luyag ni Pablo nga paupdon pa si Marcos.—Basaha ang Binuhatan 13:1-5, 13; 15:37, 38.

17, 18. Paano naton nahibaluan nga nasolbar ang problema sa tunga ni Pablo kag ni Marcos, kag ano ang matun-an naton sa sini?

17 Wala nagsunggod si Marcos sa reaksion ni Pablo. Nagpadayon sia sa pagmisyonero nga hilikuton upod kay Bernabe sa lain nga teritoryo. (Binu. 15:39) Ginpamatud-an ni Marcos ang iya katutom kag pagkamasaligan subong sang makita naton sa sulat ni Pablo mga pila ka tuig sang ulihi. Sang nabilanggo si Pablo sa Roma, ginsulatan niya si Timoteo nga magkadto sa iya. Sa iya sulat, si Pablo nagsiling: “Upda si Marcos, kay makabulig sia sa akon sa pag-alagad.” (2 Tim. 4:11) Huo, nakita ni Pablo nga nag-uswag na si Marcos amo nga ginsaligan na niya ini liwat.

18 Ano nga leksion ang matun-an naton sa sini? Napalambo ni Marcos ang mga kinaiya sang isa ka maayo nga misyonero. Wala sia nasandad sa una nga reaksion ni Pablo. Pareho sila ni Pablo nga hamtong sa espirituwal, kag wala sila nagdumot sa isa kag isa. Nagsiling pa gani si Pablo sang ulihi nga daku gid ang mabulig ni Marcos sa iya. Gani, kon nahusay na ang problema, ang pinakamaayo nga himuon amo nga kalimtan ini kag padayon nga buligan ang iban nga mag-uswag sa espirituwal. Ang pagpabilin nga positibo nagapalig-on sa kongregasyon.

Ikaw kag ang Kongregasyon

19. Ano nga bulig ang sarang mahatag sang tanan nga katapo sang kongregasyon sa kada isa?

19 Sa sining “makahalanguyos nga mga tion nga mabudlay atubangon,” kinahanglan mo ang bulig sang imo mga kauturan sa kongregasyon, kag kinahanglan man nila ang imo bulig. (2 Tim. 3:1) May mga tion nga ang isa ka Cristiano indi makahibalo kon ano ang iya himuon sa iya problema, apang si Jehova nakahibalo gid. Kag puede niya gamiton ang bisan sin-o nga katapo sang kongregasyon, pati na ikaw, agod mabuligan ang iban sa paghimo sang husto nga desisyon. (Isa. 30:20, 21; 32:1, 2) Gani, tinguhai gid nga iaplikar ang laygay ni apostol Pablo! “Padayon nga lugpayi ang isa kag isa kag palig-una ang isa kag isa, subong sang ginahimo ninyo.”—1 Tes. 5:11.

Paano Mo Sabton?

• Ngaa kinahanglan naton palig-unon ang kada isa sa Cristianong kongregasyon?

• Sa ano nga mga kabudlayan sarang ka makabulig sa iban?

• Ngaa kinahanglan naton ang bulig sang isa kag isa sa kongregasyon?

[Mga Pamangkot sa Pagtinuon]

[Retrato sa pahina 11]

Kon ang isa ka masigka-Cristiano nagaatubang sa mabudlay nga kahimtangan, mahimo naton sia buligan

[Retrato sa pahina 12]

Madamo nga pamatan-on nga lalaki kag babayi sa Cristianong kongregasyon sa karon ang may daku nga potensial