Magdiretso sa kaundan

Magdiretso sa listahan sang kaundan

Nahiusa sa Gugma—Report Tuhoy sa Annual Meeting

Nahiusa sa Gugma—Report Tuhoy sa Annual Meeting

 Nahiusa sa Gugma—Report Tuhoy sa Annual Meeting

NAKUNYAG gid ang mga nagkadto sa Assembly Hall sang mga Saksi ni Jehova sa Jersey City, New Jersey, U.S.A. Sang aga sang Oktubre 3, 2009, kapin sa 5,000 ang nagtipon para sa ika-125 nga annual meeting sang Watch Tower Bible and Tract Society of Pennsylvania. Linibo nga iban pa ang nakabenepisyo sa programa kay ginpasalida ini sa tatlo ka puluy-an Bethel sa Estados Unidos kag sa Bethel sa Canada paagi sa video hookup. Sa kabug-usan, 13,235 nga nahiusa sa ila gugma kay Jehova ang malipayon nga nakabenepisyo sa tatlo ka oras nga miting.

Si Geoffrey Jackson nga katapo sang Nagadumala nga Hubon amo ang tsirman. Ginbuksan niya ang programa paagi sa pagpakilala sa choral group nga ginatapuan sang mga Bethelite nga nagkanta sang mga ambahanon gikan sa aton bag-o nga songbook. Si David Splane, nga isa pa ka katapo sang Nagadumala nga Hubon nga amo ang nanguna sa choral group, naghatag sing malip-ot nga pamulongpulong tuhoy sa importansia sang musika sa putli nga pagsimba. Ang tumalambong gin-agda sa pag-amba sang tatlo ka bag-o nga ambahanon; una ginkanta ini sang choral group, dayon ginbuylugan sila sang mga tumalambong. Ining choral group gingamit lamang para sa sining pinasahi nga okasyon kag indi ini kinahanglan ilugon sa mga miting sang kongregasyon, mga asembleya, ukon mga kombension.

Mga Report Gikan sa mga Sanga Talatapan

Ang mga bisita nga katapo sang Komite sang Sanga gikan sa lima ka sanga talatapan naghatag sang ila mga report. Si Kenneth Little nagsiling nga sa indi madugay, ang Canada na ang magaimprinta sang kalabanan nga magasin para sa Estados Unidos kag Canada. Magaresulta ini sa napulo ka pilo nga pagdugang sang produksion sa sina nga sanga. Agod mahimo ini, ang bag-o nga makina kinahanglan mag-imprinta sa adlaw kag gab-i, sa kabug-usan 16 ka oras kada adlaw.

Si Reiner Thompson amo ang nagreport tuhoy sa hilikuton sang Ginharian sa Dominican Republic, kag ginsaysay ni Albert Olih ang aton hilikuton sa Nigeria. Ginpaathag naman ni Emile Kritzinger gikan sa Mozambique nga pagligad sang dinekada nga paghingabot didto, ang mga Saksi ni Jehova ginrehistro na sang 1992. Ining tatlo ka pungsod may yara daku nga pag-uswag sa kadamuon sang mga manugbantala. Si Viv Mouritz gikan sa Australia nagreport man tuhoy sa pag-uswag sa East Timor, nga yara sa idalom sang pagtatap sang Australia.

Mga Komite sang Nagadumala nga Hubon

Sugod pa sang 1976, ang tanan nga hilikuton sang mga Saksi ni Jehova ginadumalahan sang anom ka komite sang Nagadumala nga Hubon. Sang ulihi, may mga katapo sang iban nga karnero nga gintangdo subong mga kabulig. Sa karon may yara 23 ka utod nga nagapangalagad subong kabulig. Anom sa ila ang gin-interbyu. Kon tingbon ang kalawigon sang ila bug-os tion nga pag-alagad, 341 ini tanan ka tuig—57 ka tuig ang aberids sang kada isa.

Si Don Adams, nga nangin Bethelite sang 1943, nagpaathag nga ang Coordinators’ Committee ginatapuan sang mga koordinetor gikan sa lima ka iban pa nga komite. Ini amo ang nagapat-od nga ang lima ka komite magapanghikot sa organisado nga paagi. Ini nga komite ang nagapanghikot sa dalagku nga mga emerhensia, paghingabot, mga kaso sa korte, mga kalamidad, kag iban pa nga hilingagawon nga mga butang nga nagaapektar sa mga Saksi ni Jehova sa bug-os nga kalibutan.

Si Dan Molchan amo ang nagpaathag sang  hilikuton sang Personnel Committee, nga amo ang nagadumala sa espirituwal kag pisikal nga kaayuhan sang 19,851 ka Bethelite sa bug-os nga kalibutan. Ginpaathag ni David Sinclair kon paano ginadumalahan sang Publishing Committee ang pagpamakal sang mga suplay kag kagamitan para sa mga sanga. Dayon, si Robert Wallen, nga nagapangalagad sa Bethel sa halos 60 na ka tuig, nagsugid kon paano ginadumalahan sang Service Committee ang hilikuton sang katawhan ni Jehova sa latagon kag sa mga kongregasyon. Ginsugid ni William Malenfant ang pagpangabudlay sang Teaching Committee sa paghanda sang mga programa para sa mga kombension. Kag ginlaragway ni John Wischuk kon paano ginadumalahan sang Writing Committee ang mahalungon nga paghanda sang mga materyal para sa aton mga publikasyon. *

Ang Yeartext Para sa 2010 Nasentro sa Gugma

Ang masunod nga tatlo ka pamulongpulong ginhatag sang mga katapo sang Nagadumala nga Hubon. Si Gerrit Lösch nagsugod paagi sa pamangkot, “Luyag mo bala nga higugmaon ka sang iban?” Ginpaathag niya nga ang gugma isa ka panguna nga kinahanglanon sang tawo, kag nagalig-on kita sa sini. Nagluntad kita kay gintuga kita ni Jehova bangod sa gugma. Ang aton panguna nga motibo sa pagbantala kag pagtudlo amo ang aton gugma kay Jehova.

Ang gugma nga pasad sa prinsipio dapat naton ipakita indi lamang sa aton mga isigkatawo kundi pati man sa aton mga kaaway. (Mat. 5:43-45) Napalig-on ang mga tumalambong nga binagbinagon ang mga inagihan ni Jesus para sa aton—ginbunal sia, ginyaguta, ginduplaan, kag ginbuno. Walay sapayan sini, nangamuyo sia para sa mga soldado nga naglansang sa iya. Wala bala ini nagapahulag sa aton nga higugmaon sia sing labi pa? Dayon, ginpahibalo ni Utod Lösch ang yeartext para sa 2010: 1 Corinto 13:7, 8, ‘Ang gugma nagabatas sang tanan nga butang. Ang gugma wala gid nagauntat.’ May paglaum kita indi lamang nga mabuhi sing walay katapusan kundi maghigugma man kag higugmaon sing walay katapusan.

Nagabiyahe Ka Bala nga Diutay Lang ang Gasolina?

Gin-umpisahan ni Samuel Herd ang iya pamulongpulong paagi sa isa ka ilustrasyon. Halimbawa, ginhagad ka sang imo abyan nga magbiyahe sing 50 kilometros. Pagsakay mo sa iya salakyan, nakita mo nga diutay na lang ang gasolina sini. Ginsilingan mo sia nga magpatughong. Apang, nagsiling sia nga indi ka lang magkabalaka kay may reserba pa ini. Wala magdugay, naubusan kamo sing gasolina. Magrisgo ka bala nga magbiyahe bisan pa nakahibalo ka nga diutay lang ang imo gasolina? Indi bala mas maayo kon puno ini pirme? Sing kaanggid, kinahanglan nga puno pirme ang aton tangke sang malaragwayon nga gasolina—ang ihibalo tuhoy kay Jehova.

Agod mahimo ina, dapat regular kita nga magpatughong. May apat ka paagi nga mahimo naton ini. Una, paagi sa personal nga pagtuon kag pagbasa  sang Biblia adlaw-adlaw. Indi lang basta makabasa kita, kundi dapat man naton hangpon ang aton ginabasa. Ikaduha, paagi sa pagpanginpulos sa gab-i sang Pangpamilya nga Pagsimba. Nagadulog bala kita kada semana agod pun-on ang aton tangke ukon nagatughong lang kita sing diutay? Ikatlo, paagi sa paghanda kag pagtambong sa mga miting sang kongregasyon. Ikap-at, paagi sa pagpamalandong sa mga dalanon ni Jehova. Ang Salmo 143:5 nagasiling: “Nakadumdum ako sang mga adlaw nga dumaan, nagapamalandong ako sang tanan mong hinimoan.”

“Ang mga Matarong Magasilak”

Si John Barr nga naghatag sing ikatlo kag katapusan nga pamulongpulong, nagpaathag sang ilustrasyon ni Jesus tuhoy sa mga trigo kag mga gamhon. (Mat. 13:24-30, 38, 43) Ina nga ilustrasyon nagapatuhoy sa “pag-ani” nga sa diin “ang mga anak sang ginharian” tipunon kag ang mga gamhon painon kag sunugon.

Ginpaathag ni Utod Barr nga ini nga pagtipon may katapusan. Ginsambit niya ang Mateo 24:34 nga nagasiling: “Ini nga kaliwatan indi gid magtaliwan tubtob mahanabo ini tanan nga butang.” Duha ka beses nga ginbasa niya ang komento: “Maathag nga ginapahangop ni Jesus nga ang pila sa hinaplas nga nakakita sang mga tanda nga natuman sang 1914, maabtan pa sang pila ka hinaplas nga makakita sang pag-umpisa sang dakung kapipit-an.” Wala kita makahibalo sang eksakto nga kalawigon sini nga “kaliwatan,” apang nahibaluan naton nga nag-abtanay ang kabuhi sining duha ka grupo. Bisan pa indi palareho ang edad sang mga hinaplas, ining duha ka grupo nga nagahuman sa kaliwatan nag-abtanay sa pila ka bahin sang katapusan nga mga adlaw. Daw ano gid ka makapalig-on nga mahibaluan nga ang bataon nga mga hinaplas nga nakaabot sa mga tigulang nga hinaplas nga nakakita sang tanda nga nagsugod sang 1914, indi pa tanan mapatay antes magsugod ang dakung kapipit-an!

“Ang mga anak sang ginharian” nalangkag gid sa pagpaabot sang ila langitnon nga padya, apang kita tanan dapat magpabilin nga matutom nga nagasilak sing masanag tubtob sa katapusan. Isa gid ka pribilehiyo nga makita naton ang pagtipon sang “mga trigo” sa aton tion.

Pagkatapos sang nagatakop nga ambahanon, si Theodore Jaracz nga katapo sang Nagadumala nga Hubon ang naghatag sang nagatakop nga pangamuyo. Makapalig-on gid ang mga programa sang annual meeting!

[Nota]

^ par. 10 Para sa dugang nga paathag tuhoy sa hilikuton sang anom ka komite sang Nagadumala nga Hubon, tan-awa ang Mayo 15, 2008 nga Ang Lalantawan, pahina 29.

[Kahon sa pahina 5]

ESKWELAHAN PARA SA MGA GULANG

Sa annual meeting, ginpahibalo ni Anthony Morris, katapo sang Nagadumala nga Hubon nga may yara ginahiwat nga paghanas para sa mga gulang sang kongregasyon. Ang eskwelahan para sa mga gulang sa Estados Unidos nagsugod sang maaga nga bahin sang 2008 sa educational center sa Patterson, New York. Bag-o lang natapos ang ika-72 nga klase kag 6,720 na ka gulang ang nahanas. Madamo pa ang dapat hanason. Sa Estados Unidos lamang, kapin sa 86,000 ang mga gulang. Gani, gin-aprobahan sang Nagadumala nga Hubon ang dugang nga eskwelahan nga hiwaton sa Brooklyn, New York, sugod sa Disiembre 7, 2009.

Sa sulod sang duha ka bulan, may apat ka nagalakbay nga manugtatap nga pagahanason sa Patterson subong mga instruktor. Pagkatapos sini, isaylo sila sa Brooklyn agod magtudlo sa klase nga pagahiwaton didto, dayon may bag-o naman nga apat nga pagahanason. Ining bag-o nga apat ka instruktor amo naman ang magabulos sa pagtudlo sa Brooklyn, kay ang una nga apat magatudlo na sa mga klase nga pagahiwaton sa mga Assembly Hall kag mga Kingdom Hall. Magapadayon ang paghanas tubtob may yara na 12 ka instruktor nga magatudlo sa anom ka klase kada semana sa Ingles nga lenguahe sa Estados Unidos. Dayon may apat naman ka instruktor nga pagahanason para magtudlo sa klase sa Espanyol nga lenguahe. Ini nga eskwelahan indi mangin tal-us sa ginahiwat nga Kingdom Ministry School kundi ang katuyuan sini amo nga mabuligan ang mga gulang nga labi nga mag-uswag sa espirituwal. Ang mga sanga talatapan sa bug-os nga kalibutan magahiwat sini nga eskwelahan sa mga Assembly Hall kag mga Kingdom Hall sugod sa 2011 nga tuig sang pag-alagad.

[Retrato sa pahina 4]

Ang annual meeting ginbuksan paagi sa pag-amba sang ambahanon gikan sa aton bag-o nga songbook, “Mag-amba kay Jehova”