Magdiretso sa kaundan

Magdiretso sa listahan sang kaundan

Mga Babayi, Ngaa Dapat Kamo Magpasakop sa Kahimusan sa Pagkaulo?

Mga Babayi, Ngaa Dapat Kamo Magpasakop sa Kahimusan sa Pagkaulo?

 Mga Babayi, Ngaa Dapat Kamo Magpasakop sa Kahimusan sa Pagkaulo?

“Ang ulo . . . sang babayi amo ang lalaki.”—1 COR. 11:3.

1, 2. (a) Ano ang ginsulat ni apostol Pablo tuhoy sa kahimusan ni Jehova sa pagkaulo kag pagpasakop? (b) Ano nga mga pamangkot ang pagabinagbinagon sa sini nga artikulo?

SI Jehova nagpasad sang isa ka mahim-ong nga kahimusan. Ginsambit ini ni apostol Pablo sang nagsulat sia nga “ang ulo sang tagsa ka lalaki amo ang Cristo” kag “ang ulo naman sang Cristo amo ang Dios.” (1 Cor. 11:3) Nakita naton sa una nga artikulo nga ginkabig ni Jesus nga isa ka pribilehiyo ang pagpasakop sa iya Ulo, si Jehova nga Dios. Natun-an man naton nga ang ulo sang mga Cristianong lalaki amo si Cristo. Si Cristo mainayuhon, malulo, mainawaon, kag masinakripisyuhon sa iya pagpakig-angot sa mga tawo. Amo man sina ang dapat himuon sang mga lalaki sa kongregasyon kon nagapakig-angot sila sa iban, ilabi na sa ila asawa.

2 Apang, kamusta naman ang mga babayi? Sin-o ang ila ulo? ‘Ang ulo sang babayi amo ang lalaki,’ sulat ni Pablo. Paano dapat tamdon sang mga babayi ining inspirado nga pinamulong? Ini bala nga prinsipio naaplikar gihapon bisan pa ang bana indi tumuluo? Ang pagpasakop bala sang babayi sa pagkaulo sang iya bana nagakahulugan nga maghipos na lang sia kag magsunodsunod sa tanan nga desisyon sang lalaki? Paano makatigayon sing pagdayaw ang mga babayi?

 “Himoan Ko Sia sing Kabulig”

3, 4. Ngaa ang kahimusan sa pagkaulo mapuslanon sa pag-asawahay?

3 Ang Dios amo ang nagpasad sang kahimusan sang pagkaulo. Pagkatapos gintuga ni Jehova nga Dios si Adan, nagsiling sia: “Indi maayo nga ang tawo mag-isa lamang; himoan ko sia sing kabulig nga bagay sa iya.” Pagkatapos matuga si Eva, nalipay gid si Adan amo nga nagsiling sia: “Ini karon tul-an sang akon katul-anan kag unud sang akon unud.” (Gen. 2:18-24) Si Adan kag si Eva amo kuntani ang mangin amay kag iloy sang himpit nga katawhan nga malipayon nga magapuyo sing walay katapusan sa paraiso nga duta.

4 Bangod sa pagrebelde sang aton una nga mga ginikanan sa hardin sang Eden, indi na matuman sing himpit sang mga tawo ang ila papel sa kahimusan sang pagkaulo. (Basaha ang Roma 5:12.) Apang wala nagbag-o ang kahimusan sang Dios tuhoy sa pagkaulo. Kon sundon ini sing husto, magadala ini sing daku nga benepisyo kag kalipay sa pag-asawahay kaangay sang nabatyagan ni Jesus sa iya pagpasakop sa iya Ulo, si Jehova. Antes sia nangin tawo, si Jesus “nagakasadya sing dayon sa atubangan” ni Jehova. (Hulu. 8:30) Huo, bangod sang pagkadihimpit, ang mga lalaki indi na sarang mangin himpit nga ulo, kag ang mga babayi indi man makapasakop sing himpit. Apang, kon himuon sang mga bana kag mga asawa ang tanan nila nga masarangan nga sundon ini nga kahimusan, maagom nila ang kalipay sa ila pag-asawahay.

5. Ngaa dapat tamdon sing serioso sang mga mag-asawa ang laygay sa Roma 12:10?

5 Agod magmadinalag-on ang pag-asawahay, importante gid nga iaplikar sang mga mag-asawa ang laygay sang Kasulatan para sa tanan nga Cristiano: “Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.” (Roma 12:10) Ang bana kag asawa dapat pareho nga manikasog nga “mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa.”—Efe. 4:32.

Kon ang Tiayon Indi Tumuluo

6, 7. Ano ang mahimo mangin resulta kon ang Cristianong asawa magpasakop sa iya indi tumuluo nga bana?

6 Kamusta naman kon ang imo tiayon indi alagad ni Jehova? Sa masami, ang bana amo ang indi tumuluo. Kon amo sini ang kahimtangan, paano sia dapat tamdon sang iya asawa? Ang Biblia nagasabat: “Kamo nga mga asawa, magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa, bangod nasaksihan mismo nila ang inyo putli nga paggawi upod ang tudok nga pagtahod.”—1 Ped. 3:1, 2.

7 Ang Pulong sang Dios nagasugo sa mga asawa nga mangin mapinasakupon sa ila indi tumuluo nga bana. Ang ila maayo nga paggawi mahimo magpahulag sa ila bana nga usisaon kon ano ang rason sang ila maayo nga pamatasan. Sa amo, mahimo tun-an sang bana ang pagtuluuhan sang iya Cristianong asawa kag sa ulihi batunon mismo ang kamatuoran.

8, 9. Ano ang sarang mahimo sang Cristianong asawa kon negatibo ang reaksion sang iya indi tumuluo nga bana sa iya maayo nga paggawi?

8 Apang, ano abi kon negatibo ang reaksion sang indi tumuluo nga bana? Ginapalig-on  sang Kasulatan ang tumuluo nga asawa nga magpakita sing Cristianong mga kinaiya sa tanan nga tion, bisan pa mabudlay ini himuon. Halimbawa, mabasa naton sa 1 Corinto 13:4: “Ang gugma mapinasensiahon.” Gani, ang Cristianong mga asawa dapat padayon nga maggawi “nga may bug-os nga pagpaubos sang hunahuna kag kalulo, nga may pagkamapinasensiahon,” nga ginabatas ang kahimtangan bangod sa gugma. (Efe. 4:2) Sa bulig sang aktibo nga puersa sang Dios—ang iya balaan nga espiritu—posible naton mahuptan ang Cristianong mga kinaiya bisan sa mabudlay gid nga mga kahimtangan.

9 “Sa tanan nga butang may kusog ako paagi sa iya nga nagapabakod sa akon,” sulat ni Pablo. (Fil. 4:13) Madamo nga butang ang indi mahimo sang isa ka Cristianong tiayon kon wala ang bulig sang espiritu sang Dios. Halimbawa, kon ang asawa ginasakit sang iya bana, mahimo masulay sia nga magbalos. Apang, ang Biblia nagasiling sa tanan nga Cristiano: “Indi magbalos sang malaut sa malaut kay bisan sin-o. . . . Kay nasulat na: ‘Akon ang pagtimalos; ako ang magabalos, siling ni Jehova.’” (Roma 12:17-19) Sing kaanggid, ang 1 Tesalonica 5:15 nagalaygay sa aton: “Pat-ura nga wala sing magbalos sang kahalitan sa kahalitan kay bisan sin-o, kundi tinguhai pirme kon ano ang maayo sa isa kag isa kag sa tanan.” Paagi sa bulig sang balaan nga espiritu ni Jehova, mahimo naton ang mga butang nga indi naton masarangan kon sa aton lang kaugalingon. Gani, nagakaigo lamang nga mangamuyo kita sang balaan nga espiritu sang Dios nga magpuno sang aton kakulangan.

10. Paano gin-atubang ni Jesus ang malain nga ginahambal kag ginahimo sang iban?

10 Si Jesus nagpakita sing maayo gid nga halimbawa sa pag-atubang sa mga nagahambal ukon nagahimo sing indi maayo sa iya. “Sang gintamay sia,” siling sang 1 Pedro 2:23, “wala sia magbalos sang pagtamay. Sang nag-antos sia, wala sia magpamahog, kundi padayon niya nga gintugyan ang iya kaugalingon sa isa nga nagahukom sing matarong.” Ginalaygayan kita nga sundon ang iya maayo nga halimbawa. Indi kita dapat mangínit bisan pa ginapaakig kita sang iban. Kay ang tanan nga Cristiano ginalaygayan nga mangin “mapinalanggaon nga may kaawa, mapainubuson sa hunahuna, nga wala nagabalos sang halit sa halit ukon sang pagtamay sa pagtamay.”—1 Ped. 3:8, 9.

Maghipos Na Lang Bala kag Magsunodsunod?

11. Sa anong daku nga pribilehiyo makapakigbahin man ang pila sang Cristianong mga babayi?

11 Ang pagpasakop bala sa pagkaulo sang bana nagakahulugan nga ang babayi maghipos na lang kag magsunodsunod, kag indi na puede magpabutyag sang iya opinyon sa mga butang may kaangtanan sa pamilya kag sa iban pa? Indi. Ginahatagan ni Jehova ang mga babayi kag mga lalaki sing madamo nga pribilehiyo. Hunahunaa lamang ang daku nga kadungganan nga matigayon sang 144,000 nga mangin mga hari kag mga saserdote sa langit sa idalom ni Cristo kon maggahom na sia sa bug-os nga duta! Nalakip sa sina ang mga babayi. (Gal. 3:26-29) Maathag nga ginhatagan ni Jehova sing importante nga papel ang mga babayi sa iya kahimusan.

12, 13. Maghatag sing halimbawa nga nagapakita nga ang mga babayi nagpanagna.

12 Halimbawa, sa panahon sang Biblia, ang pila ka babayi nagpanagna. Ang Joel 2:28, 29 nagtagna: “Ipasagahay ko ang akon [e]spiritu sa tanan nga unud; magatagna ang inyo mga anak nga lalaki kag ang inyo mga anak nga babayi. . . . Bisan sa mga alagad nga lalaki kag sa mga alagad nga babayi man ipasagahay ko ang akon [e]spiritu sa sadtong mga adlaw.”

13 Sa adlaw sang Pentecostes 33 C.E., nagtipon sa isa ka naibabaw nga hulot sa Jerusalem ang mga 120 ka disipulo ni Jesus nga ginatapuan sang mga babayi kag mga lalaki. Ang espiritu sang Dios ginbubo sa ila tanan. Gani, ginkutlo ni Pedro ang tagna ni Joel kag gin-aplikar ini sa mga lalaki kag sa mga babayi. Si Pedro nagsiling: “Amo ini ang ginsiling paagi kay manalagna Joel, ‘Kag sa katapusan nga mga adlaw,’ siling sang Dios, ‘ipasagahay ko ang akon espiritu sa tanan nga sahi sang unod, kag ang inyo mga anak nga lalaki kag ang inyo mga anak nga babayi magapanagna . . . ; kag bisan sa akon mga ulipon nga lalaki  kag sa akon mga ulipon nga babayi ipasagahay ko ang akon espiritu sa amo nga mga adlaw, kag magapanagna sila.’”—Binu. 2:16-18.

14. Ano ang papel sang mga babayi sa paglapnag sang Cristianismo sang una?

14 Sang unang siglo, ang mga babayi may daku nga papel sa pagpalapnag sang Cristianismo. Nagbantala sila sa iban tuhoy sa Ginharian sang Dios kag naghimo sang mga butang may kaangtanan sa pagbantala nga hilikuton. (Luc. 8:1-3) Halimbawa, gintawag ni apostol Pablo si Febe nga “isa ka ministro sa kongregasyon sa Cencrea.” Kag sang nagpadala si Pablo sing panamyaw sa iya mga masigkamanugpangabudlay, ginsambit niya ang madamo nga matutom nga babayi, subong ni ‘Trifena kag ni Trifosa, mga babayi nga nagapangabudlay sing lakas sa Ginuo.’ Ginsambit man niya “ang aton hinigugma nga si Persis, kay nagpangabudlay sia sing daku sa Ginuo.”—Roma 16:1, 12.

15. Ano ang papel sang mga babayi sa pagpalapnag sang Cristianismo sa karon?

15 Sa kapin sa pito ka milyon nga manugbantala sang maayong balita sang Ginharian sang Dios sa bug-os nga kalibutan sa karon, mas madamo ang mga babayi sangsa mga lalaki. (Mat. 24:14) Madamo sa ila ang bug-os tion nga mga ministro, misyonera, kag mga katapo sang pamilya Bethel. Ang salmista nga si David nag-amba: “Ang Ginoo nagahatag sang polong; ang mga babayi nga nagabantala sang mga balita daku nga kadam-an.” (Sal. 68:11) Daw ano ka makapalig-on ina nga pinamulong! Ginapabaloran gid ni Jehova ang papel sang mga babayi sa pagbantala sang maayong balita kag sa pagtuman sang iya mga katuyuan. Pat-od gid nga ang pagpasakop nga ginapatuman sa Cristianong mga babayi wala nagakahulugan nga magahipos na lamang sila.

Ang Duha ka Babayi nga Wala Lamang Naghipos

16, 17. Paano ginpakita sang halimbawa ni Sara nga ang mga babayi puede man makapanugda?

16 Bangod ginhatagan ni Jehova sing madamo nga pribilehiyo ang mga babayi, indi bala nga dapat lamang pamangkuton sang mga bana ang ila asawa antes sila maghimo sing mabug-at nga mga desisyon? Isa gid ina ka maalamon nga tikang. Madamo nga beses nga ang Kasulatan nagsambit tuhoy sa mga babayi nga naghatag sing panugda ukon nanghikot bisan pa wala sila ginpangabay sang ila bana. Binagbinaga ang duha ka hitabo.

17 Si Sara, ang asawa sang patriarka nga si Abraham, padayon nga nagasiling sa iya bana nga pahalinon ang iya ikaduha nga asawa kag ang anak sini bangod wala sila sing pagtahod. “Ang butang tama kasubo kay Abraham”—apang indi sa Dios. Si Jehova nagsiling kay Abraham: “Dili magpakasubo bangud sang bata kag bangud sang imo ulipon nga babayi; ang tanan nga ginasiling sa imo ni Sara, himoa sono sa iya ginasogo.” (Gen. 21:8-12) Gintuman ni Abraham si Jehova, namati sia kay Sara, kag ginhimo niya ang ginpangabay sini.

18. Paano nagpakita si Abigail sing inisyatibo?

18 Dumduma man si Abigail nga asawa ni Nabal. Sang nagpalagyo si David kay Hari Saul, nagkampo sila malapit sa halalban sang mga panong ni Nabal. Wala ginhilabtan ni David kag sang iya mga tinawo ang madamo nga ginapanag-iyahan sining manggaranon nga tawo, kundi ginproteksionan pa gani nila ini. Apang, si Nabal “matig-a kag malaut sa iya mga binuhatan,” kag ‘ginyaguta’ niya ang mga tinawo ni David.  Isa sia ka “tawo nga wala sing pulus,” kag “upud sa iya ang kabuangan.” Sang matinahuron nga nangayo sing bulig ang mga tinawo ni David, gindis-ayrihan sila ni Nabal. Sang nahibaluan ni Abigail ang natabo, ano ang iya ginhimo? Wala niya ginsugiran si Nabal kundi “nagdalidali [sia], kag nagkuha sing duha ka gatus ka bilog nga tinapay, kag duha ka panit nga suludlan sang alak, kag lima ka carnero nga naihaw, kag lima ka sukub sang sinanlag nga uyas, kag isa ka gatus ka pongpong nga uyas nga binulad, kag duha ka gatus ka pighol nga higos” kag ginhatag ini kay David kag sa iya mga tinawo. Husto bala ang ginhimo ni Abigail? Ginpakita sang masunod nga mga hitabo nga husto ang iya ginhimo. “Ginsakit sang GINOO si Nabal,” siling sang Biblia, “kag napatay sia.” Sang ulihi, ginpangasawa ni David si Abigail.—1 Sam. 25:3, 14-19, 23-25, 38-42.

‘Ang Babayi nga Ginadayaw’

19, 20. Ano ang nagahimo sa isa ka babayi nga mangin dalayawon?

19 Ginadayaw sang Biblia ang asawa nga nagasunod sa mga dalanon ni Jehova. Ang tulun-an sang Biblia nga Hulubaton nagadayaw sa “babayi nga takus,” kag nagasiling: “Ang iya bili labaw pa gid sa mga rubi. Ang tagiposoon sang iya bana nagasalig sa iya, kag indi sia makulangan sing daug. Sia nagahimo sa iya sing maayo, kag indi malaut, sa tanan nga adlaw sang iya kabuhi.” Dugang pa, “nagabuka sia sang iya baba sa kaalam, kag ang kasogoan sang kalolo yara sa iya dila. Nagatatap sia sing maayo sa mga pagginawi sang iya panimalay, kag wala nagakaon sang kalan-on sang katamad. Ang iya mga anak nagabangon kag nagatawag sa iya bulahan; ang iya bana man, kag sia nagadayaw sa iya.”—Hulu. 31:10-12, 26-28.

20 Ano ang nagahimo sa isa ka babayi nga mangin dalayawon? “Ang kaalikaya malimbongon, kag ang katahum kadayawan,” siling sang Hulubaton 31:30, “apang ang babayi nga nagakahadluk sa GINOO dayawon sia.” Ang isa nga may kahadlok kay Jehova handa nga magpasakop sa iya kahimusan sang pagkaulo. “Ang ulo sang tagsa ka lalaki amo ang Cristo; ang ulo naman sang babayi amo ang lalaki; ang ulo naman sang Cristo amo ang Dios.”—1 Cor. 11:3.

Pasalamati ang Dulot sang Dios

21, 22. (a) Ngaa dapat magpasalamat ang minyo nga mga Cristiano sa dulot sang Dios nga pag-asawahay? (b) Ngaa dapat naton tahuron ang kahimusan ni Jehova tuhoy sa awtoridad kag pagkaulo? (Tan-awa ang kahon sa pahina 17.)

21 Ang minyo nga mga Cristiano madamo gid sing rason nga magpasalamat sa Dios! Ang labi na nga dapat nila pasalamatan sa dulot sang Dios nga pag-asawahay amo ang kahigayunan nga mag-updanay sila sa pag-alagad kay Jehova sing malipayon. (Rut 1:9; Miq. 6:8) Subong Tagtukod sang pag-asawahay, nakahibalo gid sia kon ano ang kinahanglanon para mangin malipayon ang mag-asawa. Sunda pirme ang mga dalanon ni Jehova, kag “ang kalipay sang GINOO among inyo kusug,” bisan sa sining magamo nga kalibutan.—Neh. 8:10.

22 Ang Cristianong bana nga nagahigugma sa iya asawa kaangay sa iya kaugalingon dapat mangin malulo kag makonsiderasyon nga ulo. Sa amo, ang iya diosnon nga asawa mangin hiligugmaon, kay mangin masinakdagon sia kag magapakita sing tudok nga pagtahod. Labaw sa tanan, ang ila huwaran nga pag-asawahay magapadungog sa aton dalayawon nga Dios, si Jehova.

Madumduman Mo Bala?

• Ano ang kahimusan ni Jehova tuhoy sa pagkaulo kag pagpasakop?

• Ngaa dapat padunggan sang mga mag-asawa ang isa kag isa?

• Paano dapat pakig-angutan sang tumuluo nga asawa ang iya indi tumuluo nga bana?

• Ngaa dapat pamangkuton sang mga bana ang ila asawa antes sila maghimo sing mabug-at nga mga desisyon?

[Mga Pamangkot sa Pagtinuon]

 [Kahon sa pahina 17]

Ngaa Dapat Tahuron ang Awtoridad?

Si Jehova nagpasad sing kahimusan tuhoy sa awtoridad kag pagkaulo sa iya intelihente nga mga tinuga. Para ini sa kaayuhan sang mga espiritu nga tinuga kag sang mga tawo. Nagahatag ini sa ila sing kahigayunan nga magamit ang ila hilway nga pagbuot kag padunggan ang Dios paagi sa pag-alagad sa iya sing nahiusa kag sa mahim-ong nga paagi.—Sal. 133:1.

Ang kongregasyon sang hinaplas nga mga Cristiano nagakilala sang awtoridad kag pagkaulo ni Jesucristo. (Efe. 1:22, 23) Agod ipakita nga ginakilala niya ang awtoridad ni Jehova, sa ulihi “ang Anak mismo magapasakop man sa Isa nga nagpasakop sang tanan nga butang sa iya, agod ang Dios mangin tanan nga butang sa tanan.” (1 Cor. 15:27, 28) Gani, daw ano ka nagakaigo nga ang mga tawo nga dedikado sa Dios magkooperar sa kahimusan sang pagkaulo sa sulod sang kongregasyon kag sa pamilya! (1 Cor. 11:3; Heb. 13:17) Paagi sa paghimo sini, maagom naton ang kahamuot kag pagpakamaayo ni Jehova.—Isa. 48:17.

[Retrato sa pahina 13]

Ang pangamuyo makabulig sa isa ka Cristianong asawa sa pagpakita sang diosnon nga mga kinaiya

[Mga Retrato sa pahina 15]

Ginapabaloran ni Jehova ang papel sang mga babayi sa pagpauswag sang mga intereses sang Ginharian