Magdiretso sa kaundan

Magdiretso sa listahan sang kaundan

Hupti ang “Pagkaputli sang Tagiposoon” sa Sining Makahalanguyos nga mga Tion

Hupti ang “Pagkaputli sang Tagiposoon” sa Sining Makahalanguyos nga mga Tion

 Hupti ang “Pagkaputli sang Tagiposoon” sa Sining Makahalanguyos nga mga Tion

“WALA sang isa nga makapanghiwala nga ang pagkaputli amo ang problema sang Simbahan karon.” Amo ina ang obserbasyon sang Katoliko nga manunulat nga si Vittorio Messori sang nadalahig sa eskandalo sa sekso ang Simbahan sang Italya sining karon lang. “Kag indi ini masolbar bisan pa pahanugutan ang mga pari nga mangasawa bangod ang 80 porsiento sining mga kaso nagadalahig sa homoseksuwal nga mga pari. Mga kaso ini sang di-kinaugali nga seksuwal nga mga buhat subong sang pag-abuso sa mga lalaki kag mga bata nga lalaki.”—La Stampa.

Ang lapnag nga kalautan isa ka tanda nga yara na kita sa “katapusan nga mga adlaw” sining sistema sang mga butang. (2 Tim. 3:1-5) Subong sang ginapakita sang mga balita, ang pagnubo sang moral may negatibo nga impluwensia indi lamang sa ordinaryo nga mga tawo kundi pati sa mga tawo nga nagapangangkon nga mga tiglawas sang Dios. Ining makahuluya nga mga buhat nagapakita nga ang ila tagipusuon malaut kag indi putli. (Efe. 2:2) Gani, nagakaigo gid nga nagpaandam si Jesus nga “sa tagipusuon nagagikan ang malaut nga pangatarungan, pagpatay, panghilahi, pagpakighilawas, pagpangawat, di-matuod nga pagpanaksi, pagpasipala.” (Mat. 15:19) Apang, luyag ni Jehova nga Dios nga higugmaon sang iya mga alagad ang “pagkaputli sang tagiposoon.” (Hulu. 22:11) Kon amo, paano mahuptan sang isa ka Cristiano ang putli nga tagipusuon sa sining makahalanguyos nga mga tion?

Ano ang Buot Silingon nga Mangin “Putli sing Tagipusuon”?

Sa Biblia, masami nga ginagamit ang “tagipusuon” sa simbuliko nga paagi. Suno sa isa ka reperensia, ang termino sa Biblia nga tagipusuon nagapatuhoy sa “pinakanasulod nga bahin sang tawo” kag “amo ang panguna nga ginatan-aw sang Dios, nga sa diin napasad ang espirituwalidad kag moral nga paggawi sang isa ka tawo.” Ang tagipusuon amo ang nagasimbulo sang aton matuod nga pagkatawo. Ginapadaku sang ginkutlo nga reperensia sa ibabaw, nga amo ini ang ginausisa kag ginapabaloran ni Jehova sa iya mga alagad.—1 Ped. 3:4.

Sa Biblia, ang “kaputli” kag “katinlo” nagapahangop sang katinlo sa pisikal. Apang, ining mga termino naaplikar man sa moral kag espirituwal nga katinlo—nagapahangop sing pagkawalay dagta ukon mantsa. Sa iya Sermon sa Bukid, si Jesus nagsiling: “Malipayon ang mga putli sing tagipusuon.” Ginapatuhuyan niya yadtong mga tawo nga matinlo sa sulod. (Mat. 5:8) Ang ila mga balatyagon, handum, kag motibo putli. Luyag nila pasalamatan si Jehova amo nga ginahigugma nila sia sing bug-os tagipusuon, sinsero kag indi salimpapaw. (Luc. 10:27) Indi bala nga luyag mo man mangin putli?

Ang Hangkat sa Pagpabilin nga “Putli sing Tagipusuon”

Ang isa ka alagad ni Jehova indi lamang may “mga kamut nga matinlo” kundi dapat may “tagiposoon [man] nga putli.” (Sal. 24:3, 4) Apang sa karon, isa gid ka hangkat para sa mga alagad sang Dios nga mahuptan ang ila “tagiposoon nga putli.” Si Satanas kag ang kalibutan nga ginagamhan niya, pati na ang aton di-himpit nga unod, nagaipit sa aton para mapahilayo kita kay Jehova. Agod mapamatukan naton ining mga pag-ipit, importante gid nga higugmaon naton ang “pagkaputli sang tagiposoon” kag huptan ini sing malig-on. Magaamlig ini sa aton kag magabulig nga makapabilin kita nga mga abyan sang Dios. Paano naton mahuptan nga putli ang aton tagipusuon?

Sa Hebreo 3:12, mabasa naton ining paandam: “Mag-andam kamo, mga kauturan, basi may isa sa inyo nga tubuan sang malaut nga tagipusuon nga wala sing pagtuo paagi sa pagpalayo sa buhi nga Dios.” Indi kita makapabilin nga “putli sing tagipusuon”  kon magpalambo kita sang tagipusuon nga “wala sing pagtuo.” Ano nga mga ideya ang ginapalapnag ni Satanas nga Yawa agod paluyahon ang aton pagtuo sa Dios? Nalakip sa sini ang teoriya sang ebolusyon, ang pagpati nga wala sing eksakto nga basihan sang husto kag sala, kag ang pagduhaduha sa pagkainspirado sang Balaan nga Kasulatan. Dapat nga indi naton pagtugutan nga maapektuhan kita sinang makatalagam nga mga panghunahuna. (Col. 2:8) Ang pagbasa sang Biblia adlaw-adlaw kag ang pagpamalandong sing maayo sa sini makabulig sa aton nga mabatuan ini nga mga pag-atake. Ang sibu nga ihibalo sa Pulong sang Dios magapalambo sang aton gugma kay Jehova kag magabulig sa aton nga maapresyar ang iya pagpakig-angot sa mga tawo. Ina nga gugma kag apresasyon kinahanglanon gid kon luyag naton isikway ang butig nga mga pangatarungan, magpabilin nga malig-on ang aton pagtuo kay Jehova, kag agod mahuptan naton nga putli ang aton tagipusuon.—1 Tim. 1:3-5.

Kon Nagaatubang sa mga Kailigbon sang Unod

Ang isa pa ka sahi sang pag-atake nga mahimo maatubang naton samtang ginatinguhaan naton nga huptan ang “pagkaputli sang tagiposoon” amo ang kailigbon sang unod kag materyalistiko nga mga handum. (1 Juan 2:15, 16) Ang gugma sa kuarta ukon ang handum nga magtipon sing manggad kag materyal nga mga pagkabutang makahalit gid sa tagipusuon sang isa ka Cristiano. Mahimo ini bangdan sa paghimo niya sang mga butang nga supak sa kabubut-on sang Dios. Ang pila nangin di-bunayag sa ila trabaho, nangdaya, ukon nangawat pa gani sang kuarta ukon mga pagkabutang sang iban.—1 Tim. 6:9, 10.

Sa pihak nga bahin, mapakita naton nga ginahigugma gid naton ang “pagkaputli sang tagiposoon” kon ginapalambo naton ang diosnon nga kahadlok, ginahigugma ang katarungan kag ginahuptan nga matinlo ang aton konsiensia. Ina nga gugma nagapahulag sa aton nga padayon nga “maggawi sing bunayag sa tanan nga butang.” (Heb. 13:18) Ang paggawi sing matarong kag bunayag nagaresulta sa maayo nga panaksi. Si Emilio nga isa ka Italyano nga Saksi nga nagatrabaho subong drayber sang bus nakakita sang kahita nga nagaunod sing 470 ka euro (mga ₱32,000). Nakibot gid ang iya mga katrabaho sang ginhatag niya  ang kahita sa ila superbisor nga amo ang nag-uli sini sa tag-iya. Nagdayaw gid ang pila sang iya mga katrabaho sa iya ginhimo amo nga nangin interesado sila sa Biblia kag nagbaton sang pagtuon. Subong resulta, pito ka tawo sa duha ka pamilya ang nagbaton sang kamatuoran. Huo, ang bunayag nga paggawi gikan sa putli nga tagipusuon makapahulag sa iban nga dayawon ang Dios.—Tito 2:10.

Ang isa pa ka butang nga may negatibo nga impluwensia sa putli nga tagipusuon sang isa ka Cristiano amo ang tiko kag imoral nga pagtamod tuhoy sa sekso. Halimbawa, ginatamod sang madamo nga normal lamang ang paghulid bisan wala makasal, amo man ang pagpanghilahi kag homoseksuwalidad. Ining sayop nga pagtamod mahimo makaimpluwensia sa tagipusuon sang isa ka Cristiano. Kon ang isa magpadala sa seksuwal nga imoralidad kag taguon ang iya sala, mahimo sia magkabuhi sing doble-kara. Ina nga buhat wala gid nagapadayag sing “pagkaputli sang tagiposoon.”

Si Gabriele nabawtismuhan sang 15 anyos sia kag nagpayunir gilayon. Apang sang ulihi, nakig-upod sia sa indi maayo nga mga kaupdanan sa mga diskohan. (Sal. 26:4) Amo ini ang panugod sang iya imoral kag doble-kara nga pagkabuhi, nga nagresulta sa pagdisfellowship sa iya sa Cristianong kongregasyon. Ang disiplina nga nabaton niya gikan kay Jehova nagpahunahuna gid sa iya. Si Gabriele naghinumdom: “Ginsugdan ko ang paghimo sang mga butang nga wala ko anay ginhimo sing serioso. Ginbasa ko ang Biblia adlaw-adlaw kag gintinguhaan ko nga hangpon kon ano gid ang ginasiling ni Jehova, kag gintun-an ko man sing maayo ang pasad sa Biblia nga mga publikasyon. Nakita ko kon daw ano ka mapuslanon kag makalilipay ang personal nga pagtuon kag kon daw ano nga kusog ang natigayon ko gikan sa pagbasa sang Biblia kag sa hanuot nga pagpangamuyo.” Nakabulig ini kay Gabriele nga isikway ang iya imoral nga paggawi kag mapasag-uli liwat ang iya kaangtanan kay Jehova.

Sa karon, nagaalagad liwat si Gabriele subong payunir upod sa iya asawa. Ang iya eksperiensia nagapamatuod nga ang pagtuon sa Biblia kag sa mga publikasyon sang “matutom kag mainandamon nga ulipon” makabulig gid sa isa ka tawo nga matigayon ang putli nga tagipusuon kag masikway ang imoralidad.—Mat. 24:45; Sal. 143:10.

“Pagkaputli sang Tagiposoon” Kon Nagaatubang sang mga Pagtilaw

Ang mga pagpamatok, kaimulon, kag malubha nga balatian mahimo magpaluya sa mga alagad sang Dios. Kon kaisa may negatibo ini nga epekto sa ila tagipusuon. Bisan si Hari David nakaeksperiensia sini: “Ang akon espiritu ginapunaw sa sulud nakon; mamingaw ang tagiposoon sa sulud nakon.” (Sal. 143:4) Ano ang nakabulig sa iya nga malandas ini? Ginpamalandungan ni David ang pagpakig-angot sang Dios sa Iya mga alagad kag kon paano sia mismo nakaeksperiensia sang pagluwas ni Jehova. Ginpamalandungan man niya kon ano ang ginhimo ni Jehova para sa Iya daku nga ngalan. Padayon nga ginhunahuna ni David ang mga binuhatan sang Dios. (Sal. 143:5) Sing kaanggid, ang pagpamalandong tuhoy sa aton Manunuga kag sa tanan niya nga ginahimo para sa aton makabulig sa aton nga maatubang ang mga pagtilaw.

Mahimo maglain ang aton buot kon may nakasala ukon nakasaklaw sang aton balatyagon. Kon pirme naton ginapamensar ang natabo mahimo mangin negatibo ang aton pagtamod sa aton mga kauturan. Mahimo naton ipahilayo ang aton kaugalingon kag mahimo maglas-ay ang aton pagtamod sa ila. Apang, kon amo sina ang aton himuon, nahisuno bala ina sa aton handum nga magtigayon sing ‘putli nga tagiposoon’? Huo, kon luyag naton mangin putli ang aton tagipusuon dapat naton huptan ang maayo nga kaangtanan sa aton Cristianong mga kauturan.

Nagalala ang kalautan kag naganubo ang moralidad sang kalibutan sa karon, apang tuhay gid kita subong matuod nga mga Cristiano bangod ginahigugma naton ang “pagkaputli sang tagiposoon.” Ang nasulod nga kalinong nga nabatyagan naton sa paghimo sang kabubut-on sang Dios may yara positibo nga epekto sa aton kabuhi. Labaw sa tanan mangin suod naton nga abyan ang aton Manunuga, si Jehova nga Dios, nga nagahigugma sa mga “putli sa tagiposoon.” (Sal. 73:1) Huo, malakip kita sa mga mangin malipayon bangod subong sang ginsaad ni Jesus, “makita nila ang Dios,” samtang nagapanghikot Sia para sa mga nagahigugma sang “pagkaputli sang tagiposoon.”—Mat. 5:8.