Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Sa ano nga mga kahimtangan dapat binagbinagon ang pagpabawtismo liwat?

Sa pila ka kahimtangan, ang isa ka tawo mahimo magduhaduha kon bala balido ang iya bawtismo kag maghunahuna nga magpabawtismo liwat. Halimbawa, ano abi kon sang ginbawtismuhan sia, may ginahimo pa sia nga sekreto nga mga sala nga puede sia madisfellowship kon nabawtismuhan na sia. Makadedikar bala sia sa Dios sa sina nga kahimtangan? Ang dedikasyon sang isa ka tawo kay Jehova makabig lamang nga balido kon gin-untatan na niya ang paghimo sang sala. Gani kon ang isa ka tawo ginbawtismuhan bisan nagahimo pa sia sing sala, nagakaigo lang nga binagbinagon niya ang pagpabawtismo liwat.

Kamusta naman ang isa nga wala na sing ginahimo nga sala sang ginbawtismuhan sia apang pagkatapos sia nabawtismuhan, nakahimo sia sing sala nga kinahanglan asikasuhon sang hudisyal nga komite? Ano abi kon magsiling sia nga indi balido ang iya bawtismo kay wala niya nahangpan sing bug-os ang iya pagpabawtismo? Kon istoryahon sang mga gulang ina nga tawo, indi na nila kinahanglan binagbinagon kon bala ang iya dedikasyon kag bawtismo balido ukon indi. Kay man, antes sia ginbawtismuhan nabatian na niya ang Makasulatanhon nga pamulongpulong tuhoy sa kahulugan sang bawtismo. Nagsabat sia sing ‘huo’ sa mga pamangkot tuhoy sa dedikasyon kag bawtismo. Nag-ilis sia sang iya bayo kag aktual sia nga gintum-oy sa tubig. Gani, makasiling gid kita nga nahangpan niya sing bug-os kon daw ano ka serioso ang iya ginhimo. Dapat lang nga kabigon sia sang mga gulang subong isa ka bawtismado nga tawo.

Kon ang isa nagapangduhaduha kon bala balido ang iya bawtismo, mahimo ipatalupangod sa iya sang mga gulang ang The Watchtower, Marso 1, 1960, pahina 159 kag 160, kag Pebrero 15, 1964, pahina 123 tubtob 126. Ini nga mga reperensia nagabinagbinag sing detalyado tuhoy sa pagpabawtismo liwat. Kon luyag sang isa magpabawtismo liwat bangod sa pila ka kahimtangan (subong sang kakulang niya sa ihibalo sa Biblia sang ginbawtismuhan sia) personal na niya ina nga desisyon.

Ano nga mga butang ang dapat binagbinagon sang mga Cristiano kon nagaistar sila sa isa ka balay upod sa iban nga tawo?

Tanan kita nagakinahanglan sing ilistaran. Apang, madamo karon ang wala sing kaugalingon nga puluy-an. Kon kaisa, bangod sa kapigaduhon, problema sa panglawas, kag iban pa nga rason, napilitan ang iban nga tawo nga mag-istar sa isa ka balay upod sa ila mga himata kag mga paryente. Sa pila ka duog, ang mga magparyentehanay nagaginutok sa isa lang ka kuarto.

Indi obligasyon sang organisasyon ni Jehova nga mag-aman sing malaba nga listahan sang mga pagsulundan tuhoy sa kon ano ang nagakaigo nga ilistaran para sa tanan nga katapo sang kongregasyon sa bug-os nga kalibutan. Ginapalig-on ang mga Cristiano nga maghunahuna suno sa Makasulatanhon nga mga prinsipio agod mapat-od nila kon bala ang ila ilistaran kalahamut-an sa Dios ukon indi. Ano ang pila sa sining mga prinsipio?

Ang una nga dapat naton binagbinagon amo ang epekto sa aton espirituwalidad sang pag- istar naton sa isa ka balay upod sa iban nga tawo. Ano bala sila nga sahi sang mga tawo? Mga alagad bala sila ni Jehova? Nagakabuhi bala sila nahisuno sa mga talaksan sang Biblia? “Indi pagtuguti nga mapatalang kamo,” sulat ni apostol Pablo. “Ang malain nga pagpakig-upod nagapalain sang mapuslanon nga mga batasan.”—1 Cor. 15:33.

Ginapaathag sang Kasulatan nga ginapakamalaut ni Jehova ang pagpakighilawas kag pagpanghilahi. (Heb. 13:4) Gani indi husto nga ang babayi kag lalaki nga indi kasal maghuliray sa pagtulog kaangay sang mag-asawa kay wala ini ginakahamut-an sang Dios. Pat-od gid nga indi luyag sang isa ka Cristiano nga mag-istar sa balay nga may nagahimo sing imoralidad.

Dugang pa, ginapalig-on sang Biblia ang tanan nga luyag makatigayon sang kahamuot sang Dios nga ‘magpalagyo gikan sa pagpakighilawas.’ (1 Cor. 6:18) Gani, maalamon gid nga likawan sang mga Cristiano ang mga ilistaran diin mahimo sila masulay sa paghimo sang imoralidad. Halimbawa, binagbinaga ang sitwasyon diin madamo nga Cristiano ang nagapuyo sa isa lang ka balay. Mahimo ayhan mag-utwas ang indi nagakaigo nga mga sitwasyon? Ano abi kon ang duha nga indi mag-asawa amo lang ang mabilin sa balay? Sing kaanggid, makatalagam man para sa duha ka magnobyahanay nga magpuyo sa isa lang ka balay. Maalamon gid nga likawan sang isa ini nga mga sitwasyon.

Indi man nagakaigo nga ang duha nga nagdiborsio padayon gihapon nga magpuyo sa isa lang ka balay. Bangod sang ila mahirop nga kaangtanan sang una, mahapos lang sila mahulog sa imoralidad.—Hulu. 22:3.

Ang isa pa ka importante nga butang nga dapat binagbinagon sang isa amo ang pagtamod sang komunidad sa iya desisyon. Mahimo tamdon sang isa ka Cristiano nga indi malain ang pagpuyo sa isa ka ilistaran. Apang kamusta kon indi maayo ang isiling sang mga tawo sa komunidad tuhoy sa sini? Dapat naton ini hatagan sing igtalupangod bangod indi naton luyag nga ang aton paggawi magadala sing kahuy-anan sa ngalan ni Jehova. Si Pablo nagsiling: “Likawi ninyo nga mangin kabangdanan sang pagkasandad sang mga Judiyo subong man sang mga Griego kag sang kongregasyon sang Dios, subong nga ginapahamut-an ko ang tanan nga tawo sa tanan nga butang, nga wala nagapangita sang akon kaugalingon nga kaayuhan kundi sang kaayuhan sang madamo, agod maluwas sila.”—1 Cor. 10:32, 33.

Mahimo mabudlay gid ang pagpangita sing nagakaigo nga ilistaran para sa mga luyag magsunod sa matarong nga mga talaksan ni Jehova. Apang, dapat ‘padayon nga pat-uron sang mga Cristiano kon ano ang kalahamut-an sa Ginuo.’ Kinahanglan nila pat-uron nga wala sing imoralidad nga nagakatabo sa ila balay. (Efe. 5:5, 10) Gani, nagakaigo lamang nga mangamuyo ang mga Cristiano para sa panuytoy sang Dios kag himuon ang tanan nila nga masarangan agod matipigan ang pisikal kag moral nga kaayuhan sang isa kag isa kag subong man ang maayo nga ngalan ni Jehova.