Magdiretso sa kaundan

Magdiretso sa listahan sang kaundan

Pamatud-i nga Matuod Ka nga Sumulunod ni Cristo

Pamatud-i nga Matuod Ka nga Sumulunod ni Cristo

 Pamatud-i nga Matuod Ka nga Sumulunod ni Cristo

“Ang tagsa ka maayo nga kahoy nagapatubas sang maayo nga bunga, apang ang tagsa ka malain nga kahoy nagapatubas sang wala pulos nga bunga.”—MAT. 7:17.

1, 2. Paano naton mapatuhay ang matuod nga mga sumulunod ni Jesus sa butig, ilabi na sa sining tion sang katapusan?

NAGSILING si Jesus nga makilala kon sin-o ang butig kag kon sin-o ang matuod nga mga Cristiano paagi sa ila mga bunga, buot silingon sa ila mga panudlo kag mga paggawi. (Mat. 7:15-17, 20) Huo, ang mga tawo ginaimpluwensiahan sang mga butang nga ginapasulod nila sa ila hunahuna kag tagipusuon. (Mat. 15:18, 19) Ang mga tawo nga gintudluan sang kabutigan nagapatubas sing “wala pulos nga bunga,” apang ang mga gintudluan sang espirituwal nga kamatuoran nagapatubas sang “maayo nga bunga.”

2 Ining duha ka sahi sang bunga nangin maathag sa sining tion sang katapusan. (Basaha ang Daniel 12:3, 10.) Ang butig nga mga Cristiano may yara sayop nga pagtamod tuhoy sa Dios kag sa masami nagapakunokuno nga may diosnon nga debosyon, apang ang mga may espirituwal nga kaalam nagasimba sa Dios “sa espiritu kag kamatuoran.” (Juan 4:24; 2 Tim. 3:1-5) Ginatinguhaan nila nga ipakita ang tulad-Cristo nga mga kinaiya. Apang kamusta kita subong mga indibiduwal? Samtang ginabinagbinag mo ang masunod nga lima ka palatandaan sang matuod nga Cristianismo, pamangkuta ang imo kaugalingon: ‘Ang akon bala paggawi kag panudlo nahisanto sa Pulong sang Dios? Nagaganyat bala ini sa mga nagapangita sang kamatuoran?’

Ikabuhi ang Pulong sang Dios

3. Ano ang nagapahamuot kay Jehova, kag ano ang ginapahangop sini para sa matuod nga mga Cristiano?

3 “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit,” siling ni Jesus, “kundi ang isa nga nagahimo sang kabubut-on sang akon Amay nga yara sa langit.” (Mat. 7:21) Huo, indi ang pagsiling sang isa nga Cristiano sia ang nagapahamuot kay Jehova, kundi ang paghimo niya sang hilikuton nga dapat himuon sang isa ka Cristiano. Para sa matuod nga mga sumulunod ni Cristo, nagadalahig ina sang tanan nga bahin sang ila kabuhi. Nalakip sa sini amo ang ila panimuot sa kuarta, trabaho, kalingawan, kinabatasan kag mga selebrasyon sang kalibutan, pag-asawahay kag sa ila kaangtanan sa iban nga tawo. Sa kabaliskaran, ang butig nga mga Cristiano nagasunod sa panghunahuna kag dalanon sang kalibutan, nga labi nga nangin di-diosnon sa sining tion sang katapusan.—Sal. 92:7.

4, 5. Paano naton maaplikar sa aton kabuhi ang pinamulong ni Jehova sa Malaquias 3:18?

4 Si manalagna Malaquias nagsulat: “Pat-od gid nga makita ninyo ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.” (Mal. 3:18, NW) Samtang ginahunahuna mo ina nga pinamulong, pamangkuta ang imo kaugalingon: ‘Pareho na bala ako sa mga tawo sa kalibutan ukon makita gid nila nga tuhay ako sa ila? Luyag ko bala pirme pahamut-an ang akon di-tumuluo nga mga kaeskwela kag mga katrabaho, ukon malig-on ko nga ginasunod ang mga prinsipio sang Biblia kag nagapanaksi sa ila kon may kahigayunan?’ (Basaha ang 1 Pedro 3:16.) Siempre indi naton luyag maggua nga ginapakamatarong naton ang aton kaugalingon, pero luyag naton nga mangin tuhay kita sa mga tawo nga wala nagahigugma kag nagaalagad kay Jehova.

5 Kon nakita mo nga may palauswagon ka sa sini nga bahin, ngaa indi ini pag-ipangamuyo, kag magkuha sing kusog paagi sa regular nga pagtuon sa Biblia, pagpangamuyo kag pagtambong sa Cristianong mga miting? Samtang ginaaplikar mo sa imo kabuhi ang Pulong sang Dios, makapatubas ka sang “maayo nga bunga,” lakip ‘ang bunga sang  mga bibig nga dayag nga nagapahayag sang ngalan sang Dios.’—Heb. 13:15.

Ibantala ang Ginharian sang Dios

6, 7. Kon tuhoy sa mensahe sang Ginharian, ano nga kinatuhayan ang makita sa matuod kag butig nga mga Cristiano?

6 Si Jesus nagsiling: “Sa iban man nga mga siudad dapat ko ibantala ang maayong balita sang ginharian sang Dios, kay tungod sini ginpadala ako.” (Luc. 4:43) Ngaa ang Ginharian sang Dios amo ang panguna nga tema ni Jesus sa iya ministeryo? Bangod nahibaluan niya nga subong Hari sa sini nga Ginharian, sia kag ang iya ginbanhaw nga hinaplas sang espiritu nga mga utod, amo ang magadula sang gamot sang tanan nga problema sang katawhan—ang sala kag ang Yawa. (Roma 5:12; Bug. 20:10) Bangod sini, ginsugo niya ang iya mga sumulunod nga ibantala ina nga Ginharian tubtob mag-abot ang katapusan sang sistema sang mga butang. (Mat. 24:14) Ang mga tawo nga nagapangangkon lamang nga mga sumulunod ni Cristo, wala nagapakigbahin sa sini nga hilikuton. Indi sila makasarang sa paghimo sini. Ngaa? May yara tatlo ka rason: Una, indi nila mabantala ang wala nila mahangpan. Ikaduha, ang kalabanan sa ila kulang sing pagpaubos kag kaisog nga kinahanglanon agod maatubang ang mga pagyaguta kag mga pagpamatok nga ila masumalang sa pagbantala sang mensahe sang Ginharian sa mga tawo. (Mat. 24:9; 1 Ped. 2:23) Kag ikatlo, ang butig nga mga Cristiano wala sing espiritu sang Dios.—Juan 14:16, 17.

7 Sa pihak nga bahin, nahangpan sang matuod nga mga sumulunod ni Cristo kon ano ang Ginharian sang Dios kag kon ano ang pagahimuon sini. Dugang pa ginauna nila ang intereses sang Ginharian sa ila kabuhi kag ginabantala ini sa bug-os nga kalibutan sa bulig sang espiritu ni Jehova. (Zac. 4:6) Regular ka bala nga nagapakigbahin sa sini nga hilikuton? Ginatinguhaan mo bala nga mag-uswag subong manugbantala sang Ginharian paagi sa paghinguyang sang dugang nga tion sa ministeryo ukon sa pagpauswag sang imo pagpanudlo? Ginpauswag sang iban ang kalidad sang ila ministeryo paagi sa paggamit sing maayo sang Biblia. Si apostol Pablo, nga pirme nagagamit sang Kasulatan sa iya pagpangatarungan, nagsiling: “Ang pulong sang Dios buhi kag gamhanan.”—Heb. 4:12; Binu. 17:2, 3.

8, 9. (a) Ano nga mga eksperiensia ang nagapakita nga importante ang paggamit sang Biblia sa aton ministeryo? (b) Paano naton mapauswag ang aton paggamit sang Pulong sang Dios?

8 Samtang nagapamalaybalay, ginbasa sang isa ka utod nga lalaki ang Daniel 2:44 sa isa ka Katoliko nga lalaki kag ginpaathag kon paano ang Ginharian sang Dios magadala sing matuod nga paghidait kag kalig-unan. Ang lalaki nagsabat: “Naapresyar ko gid kay ginbuksan mo ang Biblia kag ginbasa ini sa akon sa baylo nga sugiran lang ako sang ginasiling dira.” Sang ginbasa naman sang isa ka utod nga lalaki ang Biblia sa isa ka babayi nga Griego nga Ortodokso, madamo ini sing ginpamangkot. Ginsabat ini sang utod nga lalaki kag sang iya asawa gikan sa Biblia. Sang ulihi, ang babayi nagsiling: “Kabalo kamo kon ngaa gusto ko nga makig-istorya sa inyo? Bangod nagkadto kamo diri nga may dala nga Biblia kag ginabasa ninyo ini.”

9 Huo, ang aton mga literatura importante kag dapat itanyag sa aton pagbantala. Apang, ang Biblia amo ang aton panguna nga galamiton. Gani, kon wala ka pa naanad sa paggamit sini sa imo pagministeryo, ngaa indi mo ini himuon nga tulumuron? Mahimo ka magpili sang pila ka teksto nga nagapaathag kon ano ang Ginharian sang Dios kag kon  paano sini solbaron ang espesipiko nga mga problema nga ginakabalak-an sang mga tawo sa inyo lugar. Nian mangin handa nga basahon ini sa imo pagbantala sa mga pamalay.

Indi Pag-ikahuya ang Pagdala sang Ngalan sang Dios

10, 11. Tuhoy sa paggamit sang ngalan sang Dios ano ang kinatuhayan ni Jesus kag sang mga tawo nga nagapangangkon nga sumulunod niya?

10 “‘Kamo ang akon mga saksi,’ siling ni Jehova, ‘kag ako ang Dios.’” (Isa. 43:12, NW) Si Jesucristo, ang panguna nga Saksi ni Jehova, nagkabig nga isa ka kadungganan ang pagdala kag pagpakilala sang ngalan sang Dios. (Basaha ang Juan 17:6; Hebreo 2:12.) Ang matuod, bangod ginpakilala ni Jesus ang ngalan sang iya Amay, gintawag sia nga “ang Matutom nga Saksi.”—Bug. 1:5; Mat. 6:9.

11 Sa pihak nga bahin, madamo sa mga nagapangangkon nga tiglawas sang Dios ang wala nagatahod sa ngalan sang Dios kag nagdula pa gani sini sa ila mga bersion sang Biblia. Ini nga panimuot makita gid sa direktiba nga ginpatuman sa Katoliko nga mga obispo nga nagasiling nga “ang ngalan sang Dios sa porma sang tetragrammaton nga YHWH indi na paggamiton ukon sambiton” sa ila pagsimba. * Daw ano gid ka sayop nga panimuot!

12. Paano ang mga alagad ni Jehova labi nga nakilal-an sa iya ngalan sang 1931?

12 Subong pag-ilog kay Cristo kag sa daku nga “panganod sang mga saksi” nga nauna sa iya, ang matuod nga mga Cristiano wala nagakahuya sa paggamit sang ngalan sang Dios. (Heb. 12:1) Ang matuod, sang 1931, labi sila nga nakilal-an nga mga alagad ni Jehova sang ginbaton nila ang ngalan nga mga Saksi ni Jehova. (Basaha ang Isaias 43:10-12.) Gani, sa isa ka pinasahi nga paagi, ang mga sumulunod ni Cristo nangin ‘mga tawo nga ginatawag sa ngalan sang Dios.’—Binu. 15:14, 17.

13. Paano kita magakabuhi nahisuno sa ngalan nga ginhatag sang Dios sa aton?

13 Paano kita magakabuhi nahisuno sa aton pinasahi nga ngalan? Ang isa ka paagi amo ang matutom nga pagpanaksi tuhoy sa Dios. “Ang tagsatagsa nga nagatawag sa ngalan ni Jehova maluwas,” sulat ni Pablo. “Apang, paano sila magatawag sa iya nga wala nila ginatuuhan? Paano naman sila magatuo sa iya nga wala nila mabatian? Paano naman sila makabati kon wala sing isa nga magbantala? Paano naman sila magabantala kon wala sila ginpadala?” (Roma 10:13-15) Dapat man naton mataktikanhon nga ibuyagyag ang relihiosong mga kabutigan nga nagapakalain sa aton Manunuga, subong sang doktrina sang kalayuhon nga impierno nga nagatudlo nga ang Dios sang gugma mapintas kaangay sang Yawa.—Jer. 7:31; 1 Juan 4:8; Mar. 9:17-27.

14. Ano ang reaksion sang pila ka tawo sang makilala nila ang ngalan sang Dios?

14 Ginapabugal mo bala ang pagdala sang ngalan sang imo langitnon nga Amay? Ginabuligan mo bala ang iban nga makilala ang Iya balaan nga ngalan? Nabatian sang isa ka babayi nga taga-Paris, Pransia nga ang mga Saksi ni Jehova nakakilala sang ngalan sang Dios. Gani sang nakasumalang sia sang isa ka Saksi, ginpangabay niya ini nga ipakita sa iya ang ngalan sang Dios gikan sa Biblia. Sang nabasa niya ang Salmo 83:18, natandog gid sia. Nagtuon sia sa Biblia kag karon matutom na sia nga nagaalagad sa iban nga pungsod. Sa una nga tion nga nakita sang isa ka Katoliko nga babayi nga taga-Australia ang ngalan sang Dios sa Biblia, naghibi sia sa kalipay. Ini nga babayi nagaalagad karon subong regular payunir sa sulod na sang madamo nga mga tinuig. Sining karon lang, sang ginpakita sang mga Saksi sa Jamaica sa isa ka babayi ang ngalan sang Dios sa iya mismo Biblia, naghibi man ini sa kalipay. Gani, indi pag-ikahuya ang pagdala sang ngalan sang Dios kag iluga si Jesus sa pagpakilala sining hamili nga ngalan sa tanan.

“Indi . . . Paghigugmaa ang Kalibutan”

15, 16. Paano ginatamod sang matuod nga mga Cristiano ang kalibutan, kag ano nga mga pamangkot ang dapat naton ipamangkot sa aton kaugalingon?

15 “Indi ninyo paghigugmaa ang kalibutan ukon ang mga butang sa kalibutan. Kon ang bisan sin-o nagahigugma sa kalibutan, ang gugma sa Amay wala sa iya.” (1 Juan 2:15) Ang kalibutan kag ang espiritu sini supak kay Jehova kag sa iya balaan nga espiritu. Gani, wala lamang ginalikawan sang matuod nga mga sumulunod ni Cristo nga mangin bahin sang kalibutan kundi, ginadumtan nila ini kay nahibaluan nila nga ang “pagpakig-abyan sa kalibutan pagpakig-away sa Dios” subong sang ginsulat ni disipulo Santiago.—Sant. 4:4.

 16 Bangod sa tuman kadamo nga pagsulay nga ginatanyag sang kalibutan, mabudlay gid tumanon ang ginsiling ni Santiago. (2 Tim. 4:10) Gani, si Jesus nangamuyo para sa iya mga sumulunod: “Nagapangabay ako sa imo nga indi mo sila pagkuhaon gikan sa kalibutan, kundi bantayan mo sila bangod sa isa nga malauton. Indi sila bahin sang kalibutan, subong nga ako indi bahin sang kalibutan.” (Juan 17:15, 16) Pamangkuta ang imo kaugalingon: ‘Ginalikawan ko bala nga mangin bahin sang kalibutan? Nakahibalo bala ang iban kon ngaa wala ako nagaentra sa di-makasulatanhon nga mga selebrasyon kag mga kinabatasan lakip na yadtong wala man sang pagano nga ginhalinan apang nagapadayag sang espiritu sang kalibutan?’—2 Cor. 6:17; 1 Ped. 4:3, 4.

17. Ano ang mahimo makapahulag sa mga bunayag sing tagipusuon nga magdampig kay Jehova?

17 Mahimo nga indi kita kahamut-an sang kalibutan kon sundon naton ang mga talaksan sang Biblia, apang mahimo ini makapukaw sang interes sang bunayag sing tagipusuon nga mga tawo. Ang matuod, kon makita sining mga indibiduwal nga ang aton pagtuo napasad sing malig-on sa Kasulatan kag ginaaplikar naton ini sa aton kabuhi, mahimo sila maganyat kag malaragwayon nga magsiling sa mga hinaplas: “Magaupud kami sa inyo, kay nabatian namon nga ang Dios nagaupud sa inyo.”—Zac. 8:23.

Ipakita ang Matuod nga Cristianong Gugma

18. Ano ang nadalahig sa pagpakita sing gugma kay Jehova kag sa aton isigkatawo?

18 Si Jesus nagsiling: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna” kag “higugmaon mo ang imo isigkatawo subong sang imo kaugalingon.” (Mat. 22:37, 39) Ina nga gugma (a·gaʹpe sa Griego) isa ka sahi sang gugma nga ginapakita bangod sa prinsipio kag obligasyon, kag agod masunod ang talaksan sang maayo nga paggawi. Apang sa masami nagalakip man ini sang mabaskog nga emosyon. Mahimo ini mangin mapinalanggaon kag hanuot. (1 Ped. 1:22) Kabaliskaran gid ini sang kakagod, bangod ginapahulag kita sini nga gugma nga indi magmangin maiyaiyahon sa pulong kag sa buhat.—Basaha ang 1 Corinto 13:4-7.

19, 20. Magsugid sang pila ka eksperiensia nga nagapakita sang gahom sang Cristianong gugma.

19 Bangod ang gugma bunga sang balaan nga espiritu sang Dios, nagabulig ini sa matuod nga mga Cristiano nga mahimo ang mga butang nga indi masarangan himuon sang iban, pareho sang paglandas sang pagpasulabi sa rasa, kultura  kag pungsod. (Basaha ang Juan 13:34, 35; Gal. 5:22.) Kon makita sang tulad-karnero nga mga tawo ina nga gugma, mahimo nga mapahulag gid sila. Halimbawa sa Israel, sang una nga bes nga nagtambong sa Cristianong miting ang isa ka pamatan-on nga Judiyo, nakibot gid sia sang nakita niya ang mga Judiyo kag Arabo nga magkaupod nga nagasimba kay Jehova. Subong resulta, nagsugod sia sa pagtambong sa mga miting sing regular kag nagbaton sang pagtuon sa Biblia. Nagapakita ka man bala sinang tinagipusuon nga gugma sa imo mga kauturan? Mainit mo bala nga ginaabiabi ang mga bag-uhan sa Kingdom Hall, ano man ang ila ginhalinan nga pungsod, kolor sang panit ukon kahimtangan sa pangabuhi?

20 Subong matuod nga mga Cristiano, ginapanikasugan gid naton nga ipakita ang aton gugma sa tanan. Sa El Salvador, ang isa ka pamatan-on nga manugbantala nagatudlo sang Biblia sa 87 anyos nga Katoliko nga babayi nga debotado gid sa iya relihion. Isa ka adlaw nagmasakit sing malubha ini nga babayi kag naospital. Sang nakagua na sia sa ospital, ginabisitahan sia sang mga Saksi sa iya balay kag ginadalhan sing pagkaon. Padayon nila ini nga ginhimo sa sulod sang mga isa ka bulan. Wala gid sang may nagbisita sa iya nga mga miembro sang iya relihion. Ano ang resulta? Ginpangguba sang babayi ang iya mga imahen, nagbiya sia sa iya relihion kag ginpadayon ang iya pagtuon sa Biblia. Huo, ang Cristianong gugma gamhanan gid! Mas makapahulag ini sa mga tawo sangsa basta pagbantala lamang sa ila.

21. Paano mangin malig-on ang aton palaabuton?

21 Sa indi madugay, si Jesus magasiling sa tanan nga butig nga mga Cristiano: “Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.” (Mat. 7:23) Gani, dapat gid kita magpatubas sang mga bunga nga nagapadungog sa Amay kag sa Anak. “Ang tagsatagsa nga nagapamati sining akon pinamulong kag nagahimo sini,” siling ni Jesus, “mangin kaangay sa mainandamon nga tawo, nga nagtukod sang iya balay sa igang.” (Mat. 7:24) Huo, kon pamatud-an naton nga matuod kita nga mga sumulunod ni Cristo, matigayon naton ang kahamuot sang Dios, kag ang aton palaabuton mangin malig-on, natukod sa igang!

[Nota]

^ par. 11 Ang pila sang moderno nga mga publikasyon sang mga Katoliko sa Ingles, lakip na ang The Jerusalem Bible, nagbadbad sang tetragrammaton nga “Yahweh.”

Madumduman Mo Bala?

• Paano mapatuhay ang matuod nga mga sumulunod ni Cristo sa butig?

• Sambita ang pila sang “mga bunga” nga nagapakilala sa matuod nga mga Cristiano.

• Ano nga mga tulumuron ang mahimo mo ipahamtang agod makapatubas ka sang Cristianong mga bunga?

[Mga Pamangkot sa Pagtinuon]

[Retrato sa pahina 13]

Pirme mo bala ginagamit ang Biblia sa imo pagministeryo?

[Retrato sa pahina 15]

Nakahibalo bala ang iban kon ngaa wala ka nagaentra sa di-makasulatanhon nga mga selebrasyon?