Magdiretso sa kaundan

Magdiretso sa listahan sang kaundan

Makatabok Ka Bala sa Macedonia?

Makatabok Ka Bala sa Macedonia?

 Makatabok Ka Bala sa Macedonia?

SAMTANG yara sila sa siudad sang Troas sa Asia Minor nga may daku nga pantalan, nakabaton si apostol Pablo sang isa ka palanan-awon. May isa ka lalaki nga taga-Macedonia nga nagapangabay sa iya: “Magtabok ka sa Macedonia kag buligi kami.” Sang nakita ni Pablo ang palanan-awon, sia kag ang iya kaupod naghinakop nga “ang Dios ang nagtawag sa [ila] agod ipahayag ang maayong balita” sa mga taga-Macedonia. Ano ang resulta? Sa panguna nga siudad sang Macedonia nga amo ang Filipos, si Lidia kag ang iya panimalay nangin mga tumuluo. Kag ang iban pa sa Romano nga mga probinsia sang Macedonia nangin mga tumuluo man.—Binu. 16:9-15.

Ini nga espiritu sang kakugi makita man sa mga Saksi ni Jehova sa karon. Madamo ang kinabubut-on nga naggasto sang ila kaugalingon nga kuarta agod magsaylo sa mga lugar nga nagakinahanglan sing dugang nga mga manugbantala sang Ginharian. Halimbawa luyag gid ni Lisa nga unahon sa iya kabuhi ang pagbantala nga hilikuton. Gani, nagbiya sia sa Canada kag nagsaylo sa Kenya. Sanday Trevor kag Emily nga taga-Canada man nagsaylo sa Malawi agod mapasangkad pa gid ang ila ministeryo. Ginkabig ni Paul kag ni Maggie nga taga-Inglaterra ang ila pagretiro subong maayo gid nga kahigayunan sa pagpasangkad sang ila pag-alagad kay Jehova kag nagsaylo sila sa Sidlangan nga Aprika. Handa ka man bala magsakripisyo? Makasaylo ka man bala? Kon amo, ano nga mga prinsipio sa Biblia kag praktikal nga mga panugda ang makabulig sa imo nga magmadinalag-on?

Usisaa ang Imo Kaugalingon

Ang una nga butang nga dapat mo usisaon amo ang imo mga motibo. Ang labing daku nga sugo nga ginsiling ni Jesus, amo ini: “Higugmaon  mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” Dapat ang rason sang aton pag-alagad sa iban nga pungsod amo ang aton gugma sa Dios kag ang aton handum nga tumanon ang sugo nga maghimo sing mga disipulo. Nagpadayon si Jesus: “Ang ikaduha, nga kaangay sini, amo ini, ‘Higugmaon mo ang imo isigkatawo subong sang imo kaugalingon.’” Ang aton gugma sa aton mga isigkatawo madayag paagi sa aton sinsero nga pagbulig sa ila. (Mat. 22:36-39; 28:19, 20) Ang pag-alagad sa iban nga pungsod may yara mga kabudlayan kag nagakinahanglan ini sang pagsakripisyo. Indi lamang ini pagbakasyon para magliwaliwa. Dapat nga gugma ang magpahulag sa imo. Sanday Remco kag Suzanne nga taga-Netherlands, kag nagapangalagad karon sa Namibia, nagsiling, “Ang gugma amo ang nakabulig sa amon nga magpabilin diri.”

Si Willie nga nagalakbay nga manugtatap sa Namibia nagsulat: “Ang mga dumuluong nga utod nga nakapabilin diri amo yadtong wala nagapaabot nga atipanon sila sang lokal nga mga kauturan. Ang ginahunahuna nila amo ang pag-alagad upod sa ila mga kauturan kag ang pagbulig sa ila pagbantala nga hilikuton.”

Sa tapos mo mausisa ang imo mga motibo, pamangkuta ang imo kaugalingon: ‘Ano nga mga eksperiensia ang akon magamit sa pag-alagad sa iban nga pungsod? Epektibo bala ako nga ministro? Ano nga mga lenguahe ang nahibaluan ko? Handa bala ako magtuon sing bag-o nga lenguahe?’ Hambali ini upod sa imo pamilya. Pamangkuta ang mga gulang sa inyo kongregasyon kag ipangamuyo ini kay Jehova. Inang bunayag nga pag-usisa sa kaugalingon makabulig sa imo nga mahibaluan kon bala masarangan mo kag determinado ka gid nga mag-alagad sa iban nga  pungsod.—Tan-awa ang kahon nga  “Kilalaha ang Imo Kaugalingon.”

Hibalua Kon sa Diin Ka Maalagad

Ginpakadto si Pablo sa Macedonia paagi sa isa ka palanan-awon. Sa karon, wala na si Jehova nagagamit sang palanan-awon para tuytuyan kita. Apang paagi sa sini nga magasin kag sa iban pa nga mga publikasyon, mahibaluan sang mga alagad sang Dios ang mga lugar nga nagakinahanglan sang bulig. Gani ilista ina nga mga lugar. Kon indi ka pa handa sa pagtuon sang bag-o nga lenguahe ukon wala ka sing plano nga magpabilin sing permanente sa iban nga pungsod, binagbinaga kon sa diin ka makaalagad nga nahibaluan mo ang panguna nga lenguahe sa sina nga lugar. Usisaa ang mga butang nga dapat mo mahibaluan kaangay sang pagkuha sang visa, transportasyon, seguridad, mga bili sang balaklon kag klima. Makabulig man sa imo ang pagpakig-istorya sa sadtong nakasaylo na sa iban nga pungsod. Ipangamuyo ini agod mahimo mo ang labing maayo nga desisyon. Dumduma nga si Pablo kag ang iya mga kaupod “gindumilian . . . sang balaan nga espiritu nga magsugid sang pulong sa distrito sang Asia.” Bisan pa nagtinguha sila nga magkadto sa Bitinia, “wala sila gintugutan sang espiritu ni Jesus.” Sing kaanggid, dapat naton binagbinagon sing maayo kon sa diin gid kita makabulig.—Binu. 16:6-10.

Sa karon mahimo may ginahunahuna ka na nga mga lugar nga kadtuan. Kon nagaplano ka nga mag-alagad sa iban nga pungsod, sulati ang sanga talatapan sang mga Saksi ni Jehova sa sina nga pungsod. Sambita ang imo mga pribilehiyo nga natigayon kag kon ano ang imo gusto nga ipamangkot, subong sang dalayunan, mga ospital, bili sang balaklon, kag palangabuhian. Dayon ihatag ang imo sulat ukon mga sulat sa komite sang pag-alagad sang inyo kongregasyon. Lakipan nila ini sang ila sulat sang rekomendasyon kag direkta nga ipadala sa sanga talatapan nga imo ginsambit. Ang ila sabat mahimo makabulig sa imo nga makahimo sing pinakamaayo nga desisyon.

Si Willie, nga ginsambit kaina, nagsiling: “Yadtong mga nagbisita anay sa pungsod kag nag-usisa sing maayo kon bala magmalipayon sila sa pag-alagad didto amo ang nagmadinalag-on. Nakita sang isa ka mag-asawa nga mahimo mabudlayan sila mag-istar sa isa ka baw-ing nga lugar. Gani ginpili nila ang isa ka gamay nga banwa nga nagakinahanglan man sing bulig apang indi tanto kabudlay ang kahimtangan kag mahimo sila gihapon mangin malipayon.”

Pag-atubang sa Bag-o nga mga Hangkat

Ang pagbiya sa puluy-an kag pagsaylo sa bag-o nga lugar mahimo nga indi gid mahapos para sa imo. “Mahimo ka magbatyag sing tuman nga kasubo,” siling ni Lisa, nga ginsambit kaina. Ano ang nakabulig sa iya? Nagpabilin sia nga suod sa lokal nga kongregasyon nga iya ginsayluhan. Nangin tulumuron niya nga makilala ang tanan nga mga kauturan. Agod mahimo ini temprano pa sia nga nagaabot sa mga miting kag nagapabilin sia pagkatapos sini para makapakig-istorya sa mga kauturan.  Si Lisa nagaupod sa mga kauturan sa pagministeryo, ginaagda niya sila sa iya balay kag nangin abyan niya sila. Nagsiling sia: “Wala ako naghinulsol sa akon mga pagsakripisyo. Ginpakamaayo gid ako ni Jehova.”

Sang dalagku na ang ila kabataan nagdesisyon sanday Paul kag Maggie nga mag-alagad sa iban nga lugar. Nagsiling si Paul: “Ang pagbiya sang mga pagkabutang indi mabudlay himuon. Apang ang pagbiya sa pamilya isa gid ka daku nga pagtilaw sa amon kag mas mabudlay pa sangsa amon ginapaabot. Naghilibion kami sa eroplano. Mahapos lang hunahunaon nga ‘Indi namon ini masarangan.’ Apang gintugyan namon ang tanan kay Jehova. Ang pagpakig-abyan sa mga kauturan nakabulig sa amon nga magpadayon.”

Ginpili nanday Greg kag Crystal nga taga-Canada nga magsaylo sa Namibia bangod nagahambal sila sang Ingles, ang panguna nga lenguahe sa amo nga lugar. Apang sang ulihi, nakita nila nga mas daku ang ila mabulig kon magtuon sila sang lokal nga lenguahe. “Kon kaisa, ginaluyahan kami. Pero, sang natun-an na namon ang lokal nga lenguahe, nahangpan na namon ang ila kultura. Ang suod nga pagpakig-upod sa mga kauturan nakabulig sa amon nga magpasibu sa bag-o nga palibot.”

Inang mapainubuson kag masinakripisyuhon nga panimuot may positibo man nga epekto sa mga kauturan. Nadumduman pa ni Jenny ang mga pamilya nga nagsaylo sa Ireland, ang lugar nga iya gindak-an. “Sila pa ang mga maabiabihon,” siling niya. “Nagkadto sila para gid mag-alagad kag indi para alagaran. Makugi gid sila kag malipayon amo nga gusto ko man sila ilugon.” Sa karon nagaalagad si Jenny kag ang iya bana subong mga misyonero sa Gambia.

Ang Pagpakamaayo ni Jehova “Nagapamanggad”

Makalilipay gid ang eksperiensia ni Pablo sa Macedonia! Pagligad sang mga napulo ka tuig nagsulat sia sa mga kauturan sa Filipos: “Nagapasalamat ako pirme sa akon Dios sa tagsa ka tion nga madumduman ko kamo.”—Fil. 1:3.

Amo man sini ang ginbatyag nanday Trevor kag Emily nga nag-alagad sa Malawi antes sila gin-agda sa Watchtower Bible School of Gilead. “Kon kaisa nagaduhaduha kami kon bala husto ang amon ginahimo, apang malipayon kami. Suod kami sa isa kag isa kag nabatyagan namon ang pagpakamaayo ni Jehova.” Sanday Greg kag Crystal nga ginsambit kaina, nagsiling man: “Wala na sing butang nga mas maayo pa nga himuon namon.”

Ang matuod, indi posible sa tanan nga mag-alagad sa iban nga pungsod. Ang pila nagmadinalag-on paagi sa pagsaylo sa iban nga lugar sa ila pungsod diin daku ang kinahanglanon. Mahimo man mangin tulumuron sang iban ang pag-alagad sa iban nga kongregasyon malapit sa ila ginapuy-an. Ang importante amo nga himuon mo ang imo bug-os nga masarangan sa pag-alagad kay Jehova. (Col. 3:23) Sa amo, mangin matuod sa imo ang ginasiling sang Biblia: “Ang pagpakamaayo sang GINOO nagapamanggad, kag wala sia nagadugang sing kasubo sa sini.”—Hulu. 10:22.

[Kahon/Retrato sa pahina 5]

 Kilalaha ang Imo Kaugalingon

Agod mausisa ang imo kaugalingon kon puede ka makaalagad sa iban nga pungsod, binagbinaga ang masunod nga mga pamangkot kag bunayag nga usisaa kag ipangamuyo kon bala yara ka sa kahimtangan nga magsaylo. Ang mga impormasyon gikan sa nagligad nga mga isyu sang Ang Lalantawan makabulig sa imo sa paghimo sini.

• Espirituwal bala ako nga tawo?—“Mga Tikang Padulong sa Kalipay” (Oktubre 15, 1997, pahina 6)

• Epektibo bala ako nga ministro?—“Kon Paano Magmadinalag-on sa Payunir nga Ministeryo” (Mayo 15, 1989, pahina 21)

• Makabiya bala ako sa akon pamilya kag mga abyan?—“Paglandas sang Kahidlaw sa Balay Samtang Nagaalagad sa Dios” (Mayo 15, 1994, pahina 28)

• Makatuon bala ako sang bag-o nga lenguahe?—“Pag-alagad Upod sa Dumuluong Sing Lenguahe nga Kongregasyon” (Marso 15, 2006, pahina 17)

• Masarangan ko bala ang kagastuhanan sa akon pagsaylo?—“Makaalagad Bala Ikaw sa Iban nga Pungsod?” (Oktubre 15, 1999, pahina 23)

[Retrato sa pahina 6]

Ang mapainubuson kag masinakripisyuhon nga panimuot may positibo nga epekto sa mga kauturan

[Retrato sa pahina 7]

Ang mga nagsaylo para mag-alagad amo ang nagmadinalag-on