Magdiretso sa kaundan

Magdiretso sa listahan sang kaundan

Hupti ang Kalipay sa Tion sang mga Kabudlayan

Hupti ang Kalipay sa Tion sang mga Kabudlayan

 Hupti ang Kalipay sa Tion sang mga Kabudlayan

“Magkasadya ang tanan nga nagadangup [kay Jehova], magsinggit sila gihapon sa kalipay.”—SAL. 5:11.

1, 2. (a) Ano ang pila sang mga butang nga nagapabudlay sa mga tawo karon? (b) Magluwas sa mga kabudlayan nga kinaandan sa tanan nga tawo, ano pa ang dapat batason sang matuod nga mga Cristiano?

ANG mga Saksi ni Jehova indi hilway sa mga kabudlayan. Madamo nga alagad sang Dios ang nangin biktima sang krimen, inaway, kag iban pa nga inhustisya. Ang kinaugali nga mga kalamidad, kapigaduhon, balatian, kag kamatayon nagapabudlay gid sa mga tawo. Si apostol Pablo nagsulat: “Nahibaluan naton nga ang tanan nga tinuga padayon nga nagaugayong sing tingob kag ginasakitan sing tingob tubtob karon.” (Roma 8:22) Ang aton pagkadihimpit nagapabudlay man sa aton. Kaangay ni Hari David, mahimo kita makasiling: “Ang akon mga kalautan nagalapaw sa akon olo; subong sang mabug-at nga lulan lakas sila kabug-at sa akon.”—Sal. 38:4.

2 Magluwas sa mga kabudlayan nga kinaandan sa tanan nga tawo, ang matuod nga mga Cristiano may ginapas-an pa nga malaragwayon nga usok sang pag-antos. (Luc. 14:27) Kaangay ni Jesus, ang iya mga disipulo ginadumtan kag ginahingabot. (Mat. 10:22, 23; Juan 15:20; 16:2) Gani, ang pagsunod kay Cristo nagakinahanglan gid sing lakas nga pagpanikasog kag pagbatas samtang ginahulat naton ang mga pagpakamaayo sa bag-ong kalibutan.—Mat. 7:13, 14; Luc. 13:24.

3. Nagsiling bala ang Biblia nga dapat mag-antos ang mga Cristiano agod mapahamut-an ang Dios?

3 Ginapahangop bala sini nga ang kabuhi sang mga Cristiano wala gid sing kalipay? Puro na lang bala kasubo kag pag-antos ang aton kabuhi tubtob sa katapusan? Maathag nga luyag gid ni Jehova nga mangin malipayon kita samtang ginahulat naton ang katumanan sang iya mga saad. Sulitsulit nga ginalaragway sang Biblia ang matuod nga mga sumilimba subong malipayon nga  mga tawo. (Basaha ang Isaias 65:13, 14.) “Magkasadya ang tanan nga nagadangup [kay Jehova], magsinggit sila gihapon sa kalipay,” siling sang Salmo 5:11. Huo, posible kita makatigayon sing daku nga kalipay, kalinong sa hunahuna, kag pagkakontento walay sapayan sang mga kalamidad. Usisaon naton kon paano ang Biblia makabulig sa aton nga mangin malipayon sa gihapon bisan pa nagaatubang kita sang mga kabudlayan.

Si Jehova—Ang “Malipayon nga Dios”

4. Ano ang ginbatyag sang Dios sang wala gintuman ang iya kabubut-on?

4 Binagbinaga ang halimbawa ni Jehova. Subong Labing Gamhanan nga Dios, sia ang may awtoridad sa bug-os nga uniberso. Wala sang butang nga kulang sa iya kag wala sia nagakinahanglan sang bulig sang iban. Apang wala sapayan sang iya indi matupungan nga gahom, nagbatyag si Jehova sang kasubo sang nagrebelde ang isa sang iya espiritu nga mga anak kag nangin Satanas. Pat-od gid nga naapektuhan man sia sang nagbuylog ang iban pa nga mga anghel sa pagrebelde batok sa iya. Hunahunaa man ang kasakit nga ginbatyag sang Dios sang si Adan kag si Eva, ang obra maestra sang iya pisikal nga pagpanuga, nagtalikod sa iya. Sugod sadto, binilyon sang ila kaliwatan ang nagsikway sa awtoridad ni Jehova.—Roma 3:23.

5. Ano ang ilabi na nga nagapasakit sa balatyagon ni Jehova?

5 Ang pagrebelde nga ginsugdan ni Satanas nagapadayon gihapon. Sa sulod sang mga 6,000 ka tuig, nakita ni Jehova ang mga buhat sang idolatriya, kasingki, pagpatay, kag pagpatuyang sa sekso. (Gen. 6:5, 6, 11, 12) Dugang pa, nabatian niya ang tuman kalaut nga mga kabutigan kag mga pagpasipala. Kon kaisa, bisan gani ang matuod nga mga sumilimba sang Dios nagapasakit sang iya balatyagon. Ang isa sa sinang kahimtangan ginlaragway sang Biblia sing subong sini: “Makapila sila magsumpung sa iya sa kamingawan kag nagpakalisud sa iya sa desierto! Nagtalikod sila liwat kag ginsulay ang Dios, kag ginhangkat ang Balaan sang Israel.” (Sal. 78:40, 41) Tuman gid ang kasakit nga ginbatyag ni Jehova sang ginsikway sia sang iya katawhan. (Jer. 3:1-10) Huo, nagakahanabo ang malain nga mga butang, kag nagapasubo gid ini kay Jehova.—Basaha ang Isaias 63:9, 10.

6. Paano ginaatubang sang Dios ang mga problema?

6 Bisan pa nagabatyag si Jehova sing kasakit kag kapaslawan, wala ini nagpugong sa iya sa pagpanghikot. Kon may problema nga mag-utwas, nagahulag gilayon si Jehova agod indi maglala ang sitwasyon. Nagahimo man sia sang mga tikang agod indi maupangan ang iya dayon nga katuyuan. Bangod sining positibo nga mga  tikang, malipayon nga nagapaabot si Jehova sa pagbindikar sang iya pagkasoberano kag sa mga pagpakamaayo nga ihatag sini sa iya mainunungon nga mga sumilimba. (Sal. 104:31) Walay sapayan sang mga pagpakalain sa iya, si Jehova nagapabilin nga “malipayon nga Dios.”—1 Tim. 1:11; Sal. 16:11.

7, 8. Kon may mag-utwas nga problema, paano naton mailog si Jehova?

7 Huo, wala kita sing ikasarang sa pagsolbar sang mga problema kaangay sang mahimo ni Jehova. Apang, mailog naton si Jehova sa pag-atubang sang mga kabudlayan. Normal lamang nga magbatyag kita sing kasubo kon may mag-utwas nga problema, apang indi kita dapat magpabilin nga masinulub-on. Bangod gintuga kita sa larawan ni Jehova, may yara kita ikasarang sa paghunahuna kag praktikal nga kaalam, amo nga mausisa naton ang aton mga problema kag makahimo kita sing positibo nga mga tikang kon posible.

8 Ang isa ka importante nga butang nga makabulig sa aton nga malandas ang mga problema amo ang pagbaton nga may mga butang sa aton kabuhi nga indi naton makontrol. Ang sobra nga pagkabalaka sa sina nga mga butang mahimo makadul-ong sa kapaslawan kag makadula sang aton kalipay sa pag-alagad sa Dios. Kon nahimo mo na ang imo bug-os nga masarangan sa paglubad sang imo problema, untati na ang tuman nga pagkabalaka sa sini kag magkonsentrar sa mapuslanon nga mga butang. Ang masunod nga kasaysayan sa Biblia magapaathag sa sini nga punto.

Importante ang Pagkamakatarunganon

9. Paano si Ana nangin makatarunganon?

9 Binagbinaga ang halimbawa ni Ana nga sang ulihi nangin iloy ni Samuel nga manalagna. Nasubuan gid sia kay indi sia makabata. Bangod sini ginyaguta sia. May mga tion nga ginluyahan gid si Ana amo nga naghibi sia kag wala magkaon. (1 Sam. 1:2-7) Sang nagkadto sia sa santuaryo ni Jehova, si Ana “may kapaitan sa kalag kag nagpangamuyo sa GINOO, kag naghibi sing tama.” (1 Sam. 1:10) Sa tapos mapabutyag ni Ana ang iya balatyagon kay Jehova, si Eli nga mataas nga saserdote nagpalapit sa iya kag nagsiling: “Lakat ka sa paghidait, kag ang Dios sang Israel maghatag sa imo sang imo pangabay nga ginpangayo mo sa iya.” (1 Sam. 1:17) Sa sini nga tion, narealisar ni Ana nga nahimo na niya ang iya bug-os nga masarangan, kag wala na sia sing mahimo sa iya pagkabaw-as. Nangin makatarunganon si Ana. Dayon, “naglakat [sia] kag nagkaon, kag ang iya nawung indi na masubu.”—1 Sam. 1:18.

10. Paano ginpakita ni Pablo ang realistiko nga pagtamod sang nag-atubang sia sing problema nga indi niya masolbar?

10 Amo man sini nga panimuot ang ginpakita ni apostol Pablo sang nag-atubang sia sing kabudlayan. May problema sia nga nagpabudlay gid sa iya. Gintawag niya ini nga “tunok sa unod.” (2 Cor. 12:7) Ano man nga problema ang ginatumod ni Pablo, ginhimo niya ang iya bug-os nga masarangan kag nangabay sia kay Jehova nga kuhaon ini sa iya. Pila ka beses nga nangabay si Pablo kay Jehova? Tatlo. Sa ikatlo nga tion, ginpahayag sang Dios kay Pablo nga ang iya “tunok sa unod” indi madula paagi sa milagro. Ginbaton ni Pablo ini nga kamatuoran kag nagkonsentrar sia sa pag-alagad kay Jehova sing bug-os.—Basaha ang 2 Corinto 12:8-10.

11. Paano ang pangamuyo kag pag-ampo makabulig sa aton sa pag-atubang sang mga problema?

11 Ini nga mga halimbawa wala nagapahangop nga kon may problema kita indi na kita mangamuyo kay Jehova. (Sal. 86:7) Sa baylo, ang Pulong sang Dios nagapangabay sa aton: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” Paano sabton ni Jehova ina nga mga pag-ampo kag mga pangabay? Ang Biblia nagdugang: “Kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna paagi kay Cristo Jesus.” (Fil. 4:6, 7) Huo, mahimo nga indi pagdulaon ni Jehova ang aton mga problema, pero sabton niya ang aton mga pangamuyo paagi sa pagbantay sang aton ikasarang sa paghunahuna. Sa tapos kita makapangamuyo, mahimo marealisar naton nga indi gali maayo ang tuman nga pagkabalaka.

 Magkalipay sa Paghimo sang Kabubut-on sang Dios

12. Ngaa ang pagpabilin nga masinulub-on sa madugay nga tion makahalalit?

12 Ang Hulubaton 24:10 nagasiling: “Kon mapunaw ka sa adlaw sang kapiotan, ang imo kusug diotay.” Ang isa pa ka hulubaton nagasiling: “Sa kasubo sang tagiposoon ang espiritu naboong.” (Hulu. 15:13) Ang pila ka Cristiano ginluyahan sing buot tubtob sa punto nga nag-untat na sila sa pagbasa sang Biblia kag sa pagpamalandong sa sini. Ang ila mga pangamuyo nangin rutina na lamang, kag wala na sila nagapakig-upod sa ila mga masigkasumilimba. Ang pagpabilin nga masinulub-on sa madugay nga tion makahalalit.—Hulu. 18:1, 14.

13. Ano nga mga hilikuton ang makabulig sa aton nga mabatuan ang pagluya sing buot kag makahatag sa aton sing kalipay?

13 Sa pihak nga bahin, ang positibo nga pagtamod makabulig sa aton nga magkonsentrar sa mga aspekto sang aton kabuhi nga makahatag sa aton sing kalipay. Si David nagsulat: “Nagakalipay ako sa paghimo sang imo kabubut-on, O Dios ko.” (Sal. 40:8) Bisan ano man nga problema ang mag-abot sa aton kabuhi, indi gid naton dapat pag-untatan ang aton maayo nga espirituwal nga rutina. Sa pagkamatuod, ang kasubo mabatuan naton paagi sa pagpabilin nga masako sa hilikuton nga makahatag sa aton sing kalipay. Si Jehova nagasugid sa aton nga makasapo kita sing kalipay paagi sa regular nga pagbasa sang iya Pulong kag sa pagpamalandong sa sini. (Sal. 1:1, 2; Sant. 1:25) Paagi sa Balaan nga Kasulatan kag sa aton Cristianong mga miting, makabaton kita sing “matahum nga mga polong” nga makapalig-on gid kag makapahalipay sa aton tagipusuon.—Hulu. 12:25; 16:24.

14. Ano nga pasalig ni Jehova ang nagahatag sa aton sing kalipay karon?

14 Ang Dios naghatag sa aton sing madamo nga rason para magkalipay. Ang panguna sini amo ang iya saad nga kaluwasan. (Sal. 13:5) Bisan ano man ang matabo sa aton karon, nahibaluan naton nga sa ulihi pagapadyaan sang Dios ang mga hanuot nga nagapangita sa iya. (Basaha ang Manugwali 8:12.) Si manalagna Habacuc nagpabutyag sang iya pagtuo paagi sa sining matahom nga pinamulong: “Bisan ang higuera indi magpamulak, ukon walay bunga sa mga uvas; ang patubas sang olivo mawad-an, kag ang mga latagon indi magpatubas sing kalan-on, ang panong mapapas sa toril kag  walay kabakahan sa mga palasudlan, apang ako magakasadya sa GINOO, magakalipay ako sa Dios sang akon kaluwasan.”—Hab. 3:17, 18.

“Malipayon ang Katawhan nga ang Dios Amo si Jehova!”

15, 16. Sambita ang pila sa mga dulot sang Dios nga nagapahalipay sa aton samtang nagahulat kita sang iya mga pagpakamaayo sa palaabuton.

15 Samtang ginahulat naton ang matahom nga palaabuton nga gin-aman ni Jehova para sa aton, luyag niya nga magkalipay kita sa maayong mga butang nga ginahatag niya sa aton. Ang Biblia nagasiling: “Nahibaloan ko nga wala na sing maayo pa sa [katawhan] sang sa magkalipay kag maghimo sing maayo tubtub nga nagakabuhi sila; kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.” (Man. 3:12, 13) Ang ‘paghimo sing maayo’ nagalakip sa pagbuhat sing maayo nga mga butang para sa iban. Si Jesus nagsiling nga may kapin nga kalipay sa paghatag sangsa pagbaton. Ang paghimo sing maayo sa aton tiayon, kabataan, ginikanan, kag sa aton mga paryente nagahatag sa aton sing tudok nga kalipay. (Hulu. 3:27) Ang aton pagkamapinalanggaon, pagkamaabiabihon, kag pagkamapinatawaron sa aton espirituwal nga mga kauturan nagaresulta man sa daku nga kalipay, kag nagapahamuot kay Jehova. (Gal. 6:10; Col. 3:12-14; 1 Ped. 4:8, 9) Ang pagtuman sang aton ministeryo nga may masinakripisyuhon nga espiritu nagahatag man sa aton sing kalipay.

16 Ang mga pinamulong sa Manugwali nagsambit sang simple nga mga butang nga makahatag sa aton sing kalipay, subong sang pagkaon kag pag-inom. Huo, bisan pa nagaatubang kita sang mga pagtilaw, makasapo kita sing kalipay sa materyal nga mga dulot nga ginahatag sa aton ni Jehova. Dugang pa, ang matahom nga pagtunod sang adlaw, makahalawhaw nga kabukiran, makalilingaw nga mga kasapatan, kag iban pa nga katingalahan sa kinaugali wala sing bayad, apang nagahatag ini sa aton sing daku nga kalipay. Samtang ginapamalandungan naton ina nga mga butang, nagadugang ang aton gugma kay Jehova, kay sia ang Manughatag sang tanan nga maayong mga butang.

17. Ano ang makahatag sa aton sing bug-os nga kaumpawan gikan sa mga kabudlayan, apang samtang wala pa ini, ano ang makahatag sa aton sing lugpay?

17 Ang aton gugma sa Dios, pagkamatinumanon sa iya mga sugo, kag pagtuo sa halad gawad magaresulta sa ulihi sa bug-os nga kaumpawan gikan sa mga kabudlayan sa aton di-himpit nga kabuhi kag magahatag sa aton sing dayon nga kalipay. (1 Juan 5:3) Apang samtang wala pa ini, nalipay kita kay nahibaluan naton nga si Jehova nakahibalo sang tanan nga problema nga aton ginaatubang. Si David nagsulat: “Magakasadya ako kag magakalipay sa imo malig-on nga paghigugma, kay nakita mo ang akon kapipit-an, nakilala mo ang akon kalag sa kalalat-an.” (Sal. 31:7) Luwason kita ni Jehova sa mga kapipit-an bangod ginahigugma niya kita.—Sal. 34:19.

18. Ngaa dapat mangibabaw ang kalipay sa katawhan sang Dios?

18 Samtang ginahulat naton ang katumanan sang iya mga saad, kabay nga ilugon naton si Jehova, ang malipayon nga Dios. Kabay nga indi naton pagtugutan ang negatibo nga mga balatyagon nga magpaluya sang aton espirituwalidad. Kon may problema nga mag-utwas, kabay nga gamiton naton ang aton ikasarang sa paghunahuna kag praktikal nga kaalam. Buligan kita ni Jehova sa pagkontrol sang aton balatyagon kag sa paghimo sang mga tikang agod mapahaganhagan ang malain nga mga epekto sang mga kabudlayan. Magkalipay kita sa pisikal kag espirituwal nga mga dulot nga ginahatag niya. Paagi sa pagpabilin nga suod sa Dios, magakalipay kita bangod “malipayon ang katawhan nga ang Dios amo si Jehova!”—Sal. 144:15, NW.

Ano ang Natun-an Mo?

• Paano naton mailog si Jehova sa pag-atubang sa mga kabudlayan?

• Paano ang pagkamakatarunganon makabulig sa aton nga maatubang ang mga kabudlayan?

• Sa tion sang mga kabudlayan, paano kita makasapo sing kalipay sa paghimo sang kabubut-on sang Dios?

[Mga Pamangkot sa Pagtinuon]

[Mga Retrato sa pahina 16]

Nagakasubo si Jehova sa malain nga mga butang nga nagakahanabo

[Credit Line]

© G.M.B. Akash/Panos Pictures

[Mga Retrato sa pahina 18]

Si Jehova naghatag sa aton sing mga rason agod mahuptan ang kalipay