Magdiretso sa kaundan

Magdiretso sa listahan sang kaundan

Padayon nga Pauswaga ang Imo Utudnon nga Gugma

Padayon nga Pauswaga ang Imo Utudnon nga Gugma

 Padayon nga Pauswaga ang Imo Utudnon nga Gugma

“Padayon kamo nga maglakat sa gugma, subong nga si Cristo naghigugma man sa inyo.”—EFE. 5:2.

1. Ano ang ginsiling ni Jesus nga importante nga palatandaan sang iya mga sumulunod?

ANG mga Saksi ni Jehova kilala gid sa pagbantala sang maayong balita sang Ginharian sang Dios sa mga pamalay. Apang si Cristo Jesus naghatag sing tuhay nga palatandaan nga magapakilala sang iya matuod nga mga disipulo. Sia nagsiling: “Nagahatag ako sa inyo sang isa ka bag-o nga sugo, nga maghigugmaanay kamo; subong nga ako nagahigugma sa inyo, maghigugmaanay man kamo. Paagi sa sini ang tanan makahibalo nga kamo mga disipulo ko, kon nagahigugmaanay kamo.”—Juan 13:34, 35.

2, 3. Ano ang epekto sang aton utudnon nga gugma sa mga nagatambong sa aton Cristianong mga miting?

2 Ang gugma sang matuod nga mga Cristiano sa isa kag isa indi matupungan sang iban. Kaangay sa magnet nga ginatapikan sang salsalon, ang gugma sang mga alagad ni Jehova amo ang nagapahiusa sa ila kag nagabuyok sa sinsero nga mga tawo sa matuod nga pagsimba. Halimbawa, si Marcelino nga taga-Cameroon nabulag bangod sa aksidente sa ila trabaho. Pagkatapos sina, naglapnag ang huringhuring nga nabulag sia bangod isa sia ka manughiwit. Sa baylo nga paumpawan sia, ginsikway sia sang ila pastor kag sang iban nga miembro sang ila simbahan. Sang gin-agda sia sang isa ka Saksi ni Jehova sa ila miting, nagpangalag-ag si Marcelino. Indi niya luyag nga mapaslawan liwat.

3 Apang, nakibot si Marcelino sa iya nakita sa Kingdom Hall. Mainit sia nga gin-abiabi, kag nalugpayan sia sa mga panudlo sa Biblia nga iya nabatian. Gintambungan niya ang tanan nga miting sang kongregasyon, nag-uswag sia sa iya pagtuon sa Biblia, kag nabawtismuhan sang 2006. Karon, ginapaambit niya ang kamatuoran sa iya pamilya kag mga kaingod kag madamo na sia sing ginatun-an sa Biblia. Luyag ni Marcelino nga mabatyagan man sang iya mga ginatun-an sa Biblia ang gugma nga iya nabatyagan sa tunga sang katawhan ni Jehova.

4. Ngaa dapat naton tumanon ang laygay ni Pablo nga ‘padayon nga maglakat sa gugma’?

4 Ang aton utudnon nga gugma makagalanyat gid, apang dapat naton himuon ang aton bahin agod mahuptan ini. Ang aton utudnon nga gugma daw kaangay sa isa ka dabok sa matugnaw nga kagab-ihon, nga nagaganyat sa mga tawo bangod sa kainit sang kalayo sini. Apang, kon ining dabok indi pagbutangan sing gatong, mapatay ini. Sing kaanggid, ang dalayawon nga gugma nga nagapahiusa sa kongregasyon magaluya man kon indi paghimuon sang kada isa ang iya bahin sa pagpabakod sini. Ano ang dapat naton himuon? Si apostol Pablo nagsabat: “Padayon kamo nga maglakat sa gugma, subong nga si Cristo naghigugma man sa inyo kag nagtugyan sang iya kaugalingon para sa inyo subong isa ka dulot kag isa ka halad sa Dios subong isa ka mahumot nga kaamyon.” (Efe. 5:2) Ang pamangkot nga luyag naton binagbinagon amo, Paano ako padayon nga maglakat sa gugma?

“Kamo Man Magpasangkad”

5, 6. Ngaa ginlaygayan ni Pablo ang mga Cristiano sa Corinto nga “magpasangkad”?

5 Si apostol Pablo nagsulat sa mga Cristiano sa dumaan nga Corinto: “Gintikab namon ang amon baba sa inyo, mga taga-Corinto, ang amon tagipusuon ginpasangkad. Wala kamo ginapiutan sa sulod namon, apang ginapiutan kamo sa inyo mismo mapinalanggaon nga balatyagon. Gani, subong balos—nagahambal ako subong nga sa mga anak—kamo man magpasang kad.” (2 Cor. 6:11-13) Ngaa ginlaygayan ni Pablo ang mga taga-Corinto nga magpasangkad sang ila gugma?

6 Binagbinaga kon paano nag-umpisa ang kongregasyon sa dumaan nga Corinto. Nag-abot si Pablo sa Corinto sang tigragas sang 50 C.E. Bisan pa sa umpisa, nabudlayan sia sa pagbantala didto, wala sia nag-untat. Wala magdugay, madamo ang nagtuo sa maayong balita sa sina nga siudad. Sa sulod sang “isa ka tuig kag anom ka bulan,” si Pablo nagtudlo kag nagpabakod sa bag-o nga kongregasyon. Ginapakita sini nga tudok gid ang iya gugma sa mga Cristiano sa Corinto. (Binu. 18:5, 6, 9-11) Bangod sini, ginhigugma kag gintahod man nila sia. Apang, may pila sa kongregasyon nga wala nanamian sa iya. Mahimo nga nasaklaw sila sa iya prangka nga mga laygay. (1 Cor. 5:1-5; 6:1-10) Ang iban mahimo naimpluwensiahan sang pagpasipala sang “pinakaali nga mga apostoles.” (2 Cor. 11:5, 6) Apang, luyag ni Pablo nga ang iya mga kauturan magpakita sing tunay nga gugma sa isa kag isa. Amo nga ginpangabay niya sila nga “magpasangkad” paagi sa pagpakigsuod sa iya kag sa ila mga masigkatumuluo.

7. Paano naton ‘mapasangkad’ ang aton utudnon nga gugma?

7 Kamusta naman kita? Paano naton ‘mapasangkad’ ang aton utudnon nga gugma? Sa masami, ang mga tawo madali magsuod sa ila mga kaedad ukon sa mga pareho nila sang ginhalinan. Kag pirme nagaupdanay ang mga tawo nga may pareho sing nanamian nga kalingawan. Apang kon natalupangdan naton nga amo lang gihapon nga mga utod ang aton pirme ginaupdan, dapat kita “magpasangkad.” Maayo nga pamangkuton naton ang aton kaugalingon: ‘Nagaupod man bala ako sa ministeryo ukon nagalingawlingaw upod sa kauturan nga indi ko suod? Ginalimitehan ko bala ang pagpakig-angot sa mga bag-uhan sa Kingdom Hall bangod nagahunahuna ako nga dapat anay nila pamatud-an nga takus sila sang akon pagpakig-abyan? Ginatamyaw ko man bala ang mga tigulang kag mga kabataan sa kongregasyon?’

8, 9. Paano ang laygay ni Pablo nga narekord sa Roma 15:7 makabulig sa aton nga mapauswag ang aton utudnon nga gugma paagi sa pagtamyaw sa isa kag isa?

8 Tuhoy sa pagtamyaw sa kada isa, ang mga pulong ni Pablo sa mga taga-Roma makabulig sa aton nga makatigayon sing husto nga pagtamod sa aton mga masigkatumuluo. (Basaha ang Roma 15:7.) Ang Griegong tinaga nga ginbadbad “batuna” nagakahulugan sing “pagbaton sing mainayuhon ukon sing maabiabihon, pagpakig-upod kag pagpakig-abyan sa isa ka tawo.” Sang panahon sang Biblia, kon ang isa ka maabiabihon nga tagbalay nagabaton sang mga abyan sa iya balay, ginapahibalo niya sa ila nga nalipay gid sia nga makita sila. Sa malaragwayon nga paagi, amo man sina ang pagbaton ni Cristo sa aton sa Cristianong kongregasyon, kag ginalaygayan kita nga ilugon sia sa pagbaton sa aton mga masigkatumuluo.

9 Kon yara kita sa Kingdom Hall, sa asembleya, ukon kombension, dapat naton istoryahon ang mga utod nga talagsa lang naton makita ukon maistorya. Maayo nga hatagan naton sila sing tion bisan pila lang ka minuto. Sa masunod nga miting, iban naman ang aton sugilanunon. Sa indi madugay, maistorya naton ang halos tanan nga kauturan. Indi kita dapat mabalaka kon indi naton maistorya ang tanan sa isa lang ka tion.  Wala sing may masaklaw kon indi naton sila matamyaw sa kada miting.

10. Ano ang bilidhon nga kahigayunan nga bukas para sa kada isa sa kongregasyon, kag paano kita makabenepisyo sa sini?

10 Ang pagtamyaw sa iban amo ang una nga tikang nga mapakita naton nga ginabaton naton sila. Ini nga tikang mahimo magdul-ong sa malipayon nga pag-istoryahanay kag pag-abyanay. Halimbawa, kon ang mga nagatambong sa mga kombension kag mga asembleya nagakilalahay kag nagaistoryahanay, nalangkag sila nga magkitaay liwat. Ang mga boluntaryo sa pagpatindog sang mga Kingdom Hall kag ang mga nagabulig sa tion sang kalamidad nangin maayo nga mga mag-abyan bangod nakilala nila ang maayo nga mga kinaiya sang kada isa samtang nagainupdanay sila. Madamo sing kahigayunan nga makatukod kita sing nagadugay nga mga pag-abyanay sa sulod sang organisasyon ni Jehova. Kon “magpasangkad” kita, magadamo ang aton mga abyan kag magalig-on ang aton gugma nga amo ang nagapahiusa sa aton sa matuod nga pagsimba.

Hatagi sang Tion ang Iban

11. Ano nga halimbawa ang ginpahamtang ni Jesus nga makita sa Marcos 10:13-16?

11 Mahimo panikasugan sang tanan nga Cristiano nga mangin mahapos palapitan, kaangay ni Jesus. Binagbinaga kon ano ang ginsiling ni Jesus sang ginpunggan sang iya mga disipulo ang mga ginikanan nga dalhon ang ila kabataan sa iya. “Pabay-i ang mga bata nga magpalapit sa akon,” siling niya. “Indi sila pagpunggi, kay ang ginharian sang Dios ila sang mga kaangay nila.” Dayon, “ginhakos niya ang mga bata kag ginpakamaayo sila, kag gintungtong niya ang iya mga kamot sa ila.” (Mar. 10:13-16) Handurawa kon daw ano ang kakunyag sadtong mga kabataan sang ginpakitaan sila sing mahigugmaon nga igtalupangod sang Dakung Manunudlo!

12. Ano ang mahimo makaupang sa aton pagpakig-istorya sa iban?

12 Maayo nga pamangkuton sang tagsa ka Cristiano ang iya kaugalingon, ‘Nagahatag bala ako sang tion sa iban ukon ginapakita ko nga daw pirme lang ako masako?’ Kon kaisa may mga ginahimo kita nga indi man sala pero makaupang sa aton pagpakig-istorya sa iban. Kon makita kita sang iban nga pirme lang nagagamit sang cell phone ukon pirme lang may earphone sa dulunggan, mahimo maghunahuna sila nga wala kita sing gana nga makig-upod sa ila. Amo man kon masami kita nila makita nga nawili sa pagkuti sa mga gadget, mahimo sila maghunahuna nga wala kita sing gana makigsugilanon sa ila. Siempre, may “tion sa paghipus.” Apang kon may kaupod kita nga mga tawo, amo naman ini ang “tion sa pagpamolong.” (Man. 3:7) Ang iban mahimo magsiling, “Mas gusto ko pa nga mag-isahanon” ukon “Wala ako sing gana nga mag-istorya kon aga.” Kon nagapakig-istorya kita sa iban bisan pa wala kita naanad sa paghimo sini, ginapamatud-an naton nga ang gugma “wala nagapangita sang kaugalingon nga kaayuhan.”—1 Cor. 13:5.

13. Paano ginpalig-on ni Pablo si Timoteo tuhoy sa husto nga pagtamod sa Cristianong mga kauturan?

13 Ginpalig-on ni Pablo ang pamatan-on nga si Timoteo nga tahuron ang tanan nga katapo sang kongregasyon. (Basaha ang 1 Timoteo 5:1, 2.) Dapat man naton pakig-angutan ang may edad na nga mga Cristiano subong aton mga iloy kag mga amay kag ang mga lamharon subong aton mga utod. Kon amo sina ang aton panimuot, mangin suod sa aton ang aton mga kauturan.

14. Ano ang mga benepisyo kon nagapakig-istorya kita sing makapalig-on sa iban?

14 Kon nagapakig-istorya kita sing makapalig-on sa iban, nagabulig kita sa ila espirituwal kag emosyonal nga kaayuhan. Ang isa ka utod nga lalaki nga nagaalagad sa isa ka sanga talatapan nakadumdom pa kon paano sia anay regular nga ginaistorya sang mga Bethelite nga may edad na sang bag-o pa lang sia sa Bethel. Ang ila makapalig-on nga mga pulong nagpabatyag sa iya nga bahin gid sia sang pamilya Bethel. Sa karon, ginatinguhaan man niya nga ilugon sila paagi sa pagpakigsugilanon niya sa iya mga kaupod sa Bethel.

Ang Pagkamapainubuson Nagabulig sa Pagpakighidait

15. Ano nga mga halimbawa ang nagapakita nga mahimo mag-utwas ang mga di-paghangpanay bisan sa tunga sang mga masigkatumuluo?

15 Sanday Eudias kag Sintique nga duha ka Cristiano  nga utod nga babayi sa dumaan nga Filipos, may yara anay di-paghangpanay. (Fil. 4:2, 3) Ang mainit nga pagbaisay nanday Pablo kag Bernabe nangin hayag kag ginbangdan ini sang ila pagbulagay sing makadali. (Binu. 15:37-39) Ginapakita sining mga halimbawa nga mahimo mag-utwas ang mga di-paghangpanay sa tunga sang matuod nga mga sumilimba. Ginhatagan kita ni Jehova sing bulig kon paano lubaron ang mga sinuay kag kon paano ipasag-uli ang mga pag-abyanay. Apang may yara pa sia ginapatuman sa aton.

16, 17. (a) Daw ano ka importante ang pagkamapainubuson sa paglubad sa mga sinuay? (b) Paano ang ginhimo ni Jacob sang nagkitaay sila ni Esau nagapakita sang importansia sang pagkamapainubuson?

16 Handurawa nga ikaw kag ang imo abyan magabiyahe sakay sa isa ka salakyan. Antes ka makaumpisa sa paglakbay, dapat ka anay maggamit sang yabi sa pagpaandar sang imo salakyan. Gani, nagakinahanglan man kita sang yabi agod malubad ang mga di-paghangpanay. Ina nga yabi amo ang pagkamapainubuson. (Basaha Santiago 4:10.) Makita naton sa masunod nga halimbawa nga ang paggamit sina nga yabi makabulig sa mga wala nagahangpanay nga iaplikar ang mga prinsipio sa Biblia.

17 Si Esau nagdumot sa iya kapid nga si Jacob bangod nadula niya ang iya pagkapanganay, kag luyag niya nga patyon si Jacob. Pagligad sang 20 ka tuig, magakitaay sila liwat, “niyan si Jacob hinadlukan sing daku kag nalisang.” Naghunahuna sia nga daku gid ang posibilidad nga patyon sia ni Esau. Apang sang nagkitaay sila, may ginhimo si Jacob nga wala ginpaabot ni Esau. ‘Nagyaub sia sa duta’ samtang nagapalapit sia sa iya utod. Ano ang masunod nga natabo? “Si Esau nagdalagan sa pagsugata sa iya, kag ginhakus sia, kag nagkupo sa iya liog kag ginhalukan sia, kag naghibi sila.” Nalikawan nila ang pag-engkuentrohanay. Ang pagkamapainubuson ni Jacob nagdula sa dumot nga mahimo nabatyagan ni Esau.—Gen. 27:41; 32:3-8; 33:3, 4.

18, 19. (a) Kon mag-utwas ang mga di-paghangpanay, ngaa kita dapat ang mag-una sa pag-aplikar sang laygay sang Biblia? (b) Ngaa indi kita dapat mangampo kon negatibo ang una nga reaksion sang isa sa aton pagtinguha nga magpakighidait?

18 Ang Biblia nagaunod sing pinakamaayo nga laygay sa pagsolbar sa mga di-paghangpanay. (Mat. 5:23, 24; 18:15-17; Efe. 4:26, 27) * Apang, mabudlay ang pagpakighidait kon indi naton mapainubuson nga iaplikar ina nga laygay. Indi naton malubad ang problema kon hulaton pa naton ang iban nga magpakita sing pagkamapainubuson. Dumdumon naton nga may yara man kita yabi.

19 Kon indi kita magmadinalag-on sa una naton nga pagtinguha nga makighidait, indi kita  dapat mangampo. Mahimo inang utod nagakinahanglan pa sing tion para makahunahuna. Si Jose ginluiban anay sang iya mga utod. Sang nagkitaay sila liwat pagligad sang malawig nga tion, primer ministro na si Jose sa Egipto. Apang sang ulihi, naghinulsol sila kag nangayo sing kapatawaran. Ginpatawad sila ni Jose, kag ang mga anak ni Jacob nangin isa ka pungsod nga nakabaton sing pribilehiyo nga magdala sang ngalan ni Jehova. (Gen. 50:15-21) Kon ginahuptan naton ang paghidait sa aton mga kauturan, nagabulig kita sa paghiusa kag kalipay sang kongregasyon.—Basaha ang Colosas 3:12-14.

Maghigugma Kita “Paagi sa Buhat kag Kamatuoran”

20, 21. Ano ang matun-an naton sa paghinaw ni Jesus sa tiil sang iya mga apostoles?

20 Wala madugay antes sang iya kamatayon, ginsilingan ni Jesus ang iya mga apostoles: “Naghatag ako sa inyo sang sulundan, nga subong sang ginhimo ko sa inyo, dapat man ninyo himuon.” (Juan 13:15) Bag-o lang niya ginhinawan ang mga tiil sang 12 ka apostoles. Ang ginhimo ni Jesus indi isa ka ritwal ukon isa ka buhat sang kaayo. Antes ginsaysay ni Juan ang paghugas ni Jesus sang ila mga tiil, si Juan nagsulat: “Ginhigugma [ni Jesus] ang mga iya nga yari sa kalibutan, padayon niya nga ginhigugma sila tubtob sa katapusan.” (Juan 13:1) Ang iya gugma sa iya mga disipulo amo ang nagpahulag kay Jesus nga himuon ang isa ka serbisyo nga kinaandan nga ginahimo sang isa ka ulipon. Amo man sini ang dapat nila himuon sing mapainubuson para sa isa kag isa. Kon tunay ang aton gugma, magapakita kita sing pag-ulikid kag kabalaka sa tanan naton nga Cristianong kauturan.

21 Si apostol Pedro, nga ginhinawan sang Anak sang Dios sa tiil, nakahangop sa kahulugan sang ginhimo ni Jesus. Nagsulat sia: “Karon nga ginpaputli na ninyo ang inyo kalag paagi sa inyo pagkamatinumanon sa kamatuoran nga nagresulta sa di-salimpapaw nga utudnon nga pagpalangga, maghigugmaanay kamo sing hanuot gikan sa tagipusuon.” (1 Ped. 1:22) Si apostol Juan nga ginhinawan man sang Ginuo sa tiil, nagsulat: “Mga anak, maghigugma kita, indi paagi sa pulong ukon paagi sa dila, kundi paagi sa buhat kag kamatuoran.” (1 Juan 3:18) Kabay nga ang aton gugma sa aton kauturan ipakita naton paagi sa buhat.

[Nota]

^ par. 18 Tan-awa ang libro nga Organisado sa Paghimo Sang Kabubut-on ni Jehova, pahina 144-150.

Nadumduman Mo Bala?

• Paano naton ‘mapasangkad’ ang aton gugma sa isa kag isa?

• Ano ang makabulig sa aton agod mahatagan naton sing tion ang iban?

• Ano ang papel sang pagkamapainubuson sa pagpakighidait?

• Ano dapat ang magapahulag sa aton nga mag-ulikid sa aton masigkatumuluo?

[Mga Pamangkot sa Pagtinuon]

[Retrato sa pahina 21]

Batuna ang imo mga masigkatumuluo

[Retrato sa pahina 23]

Indi pagwasiha ang kahigayunan nga makapakig-istorya sa iban