Magdiretso sa kaundan

Magdiretso sa listahan sang kaundan

Magpakita sing Maayong Pamatasan Subong mga Ministro sang Dios

Magpakita sing Maayong Pamatasan Subong mga Ministro sang Dios

 Magpakita sing Maayong Pamatasan Subong mga Ministro sang Dios

“Mangin manug-ilog kamo sa Dios.”—EFE. 5:1.

1, 2. (a) Ngaa importante ang maayong pamatasan? (b) Ano ang pagabinagbinagon sa sini nga artikulo?

ANG awtor nga si Sue Fox nagsulat tuhoy sa matinahuron nga paggawi: “Dapat kita magpakita sing maayo nga pamatasan sa tanan nga tion. Bisan diin man kita, dapat kita mangin matinahuron.” Kon ang mga tawo mangin matinahuron, malikawan nila ang problema sa iban. Apang kon indi sila magpakita sing pagtahod, masami ini nagatuga sang problema subong sang indi paghangpanay, paglainay sing buot, kag kasubo.

2 Sa kabilugan, ang Cristianong kongregasyon ginatapuan sang mga tawo nga may maayo nga pamatasan. Apang dapat kita mag-andam nga indi kita maimpluwensiahan sang malain nga pamatasan nga kinaandan sa kalibutan karon. Tan-awon  naton kon paano ang pag-aplikar sa mga prinsipio sa Biblia tuhoy sa pagpakita sing pagtahod makaamlig sa aton kag makabuyok sa mga tawo sa matuod nga pagsimba. Para mahangpan naton kon ano ang maayong pamatasan, binagbinagon naton ang halimbawa ni Jehova nga Dios kag sang iya Anak.

Si Jehova kag ang Iya Anak mga Halimbawa sang Maayong Pamatasan

3. Ano nga halimbawa sang pagkamatinahuron ang ginpahamtang ni Jehova nga Dios?

3 Si Jehova nga Dios nagpahamtang sang himpit nga halimbawa sang pagkamatinahuron. Bisan pa sia ang Soberano sang bug-os nga uniberso, ginapakig-angutan niya ang mga tawo sing tuman kalulo kag may pagtahod. Sa orihinal nga lenguahe, sang nagpakigsugilanon si Jehova kay Abraham kag kay Moises, naggamit sia sang tinaga nga palihug antes sia mangabay. (Gen. 13:14; Ex. 4:6) Kon makasala ang iya mga alagad, si Jehova “maloloy-on kag mainayohon, makuli sa pagpangakig kag bugana sa malig-on nga paghigugma kag sa kamatooran.” (Sal. 86:15) Tuhay gid sia sa mga tawo nga madali maakig kon indi nila makuha ang ila gusto.

4. Paano naton mailog si Jehova kon may iban nga nagahambal sa aton?

4 Makita man naton ang maayo nga pamatasan sang Dios sa iya paagi sang pagpamati sa mga tawo. Sang namangkot si Abraham tuhoy sa mga tawo sa Sodoma, mapailubon nga ginsabat ni Jehova ang iya sunodsunod nga mga pamangkot. (Gen. 18:23-32) Wala niya gintamod nga uyang sa Iya tion ang pagpamati kay Abraham. Si Jehova nagapamati sa mga pangamuyo sang iya mga alagad kag sa pakitluoy sang mahinulsulon nga mga makasasala. (Basaha ang Salmo 51:11, 17.) Mailog bala naton si Jehova paagi sa pagpamati kon may nagahambal sa aton?

5. Paano ang pag-ilog sa pagkamatinahuron ni Jesus makapauswag sang aton kaangtanan sa iban?

5 Lakip sa madamo nga butang nga natun-an ni Jesucristo sa iya Amay amo ang pagkamatinahuron. Bisan pa masako sia sa iya pagministeryo, mapailubon gid kag malulo si Jesus. Handa pirme si Jesus nga buligan ang mga aruon, mga bulag nga nagapakilimos, kag ang iban pa nga nagakinahanglan sing bulig. Bisan ano oras sila magkadto sa iya, ginaatipan gid niya sila. Sa masami, ginauntatan niya ang iya ginahimo agod buligan ang mga nalisdan. Tuman gid ka makonsiderasyon si Jesus sa mga nagatuo sa iya. (Mar. 5:30-34; Luc. 18:35-41) Subong mga Cristiano, ginasunod naton ang halimbawa ni Jesus paagi sa pagpakita sing pagkamaluluy-on kag pagkamabinuligon. Ina nga paggawi matalupangdan gid sang aton mga paryente, mga kaingod, kag sang iban. Dugang pa, ina nga paggawi nagahimaya kay Jehova kag nagahatag sa aton sing kalipay.

6. Paano nagpakita si Jesus sing maayo nga halimbawa sa pagkamainabyanon?

6 Nagpakita man si Jesus sing pagtahod paagi sa pagtawag sa mga tawo sa ila ngalan. Ginhimo man bala ina sang Judiyong relihiosong mga lider? Wala. Gintamod nila ang mga wala nakahibalo sang Kasuguan subong “ginpakamalaut nga mga tawo” kag gintamay nila sila. (Juan 7:49) Apang, indi amo sina ang Anak sang Dios. Sanday Marta, Maria, Zaqueo, kag ang iban pa gintawag ni Jesus sa ila ngalan. (Luc. 10:41, 42; 19:5) Bisan pa nanuhaytuhay ang ila gindak-an nga kultura, ang mga Saksi ni Jehova nagatinguha gid nga mangin mainabyanon sa iban. * Wala nila ginatugutan ang pagpasulabi nga magbuhin sang ila pagtahod sa ila mga masigkatumuluo kag sa iban nga tawo.—Basaha ang Santiago 2:1-4.

7. Paano ang mga prinsipio sa Biblia makabulig sa aton nga mangin matinahuron sa mga tawo sa bisan diin nga lugar?

7 Ang mainayuhon nga paagi sang Dios kag sang iya Anak sa pagpakig-angot sa mga tawo sang tanan nga pungsod kag etniko nga grupo nagapadungog sa ila kag nagaganyat sa mga husto nga nahuyog sa kamatuoran. Siempre, ang maayong pamatasan nanuhaytuhay sa kada lugar. Pero wala kita sing ginasunod nga estrikto nga kasuguan tuhoy sa maayong pamatasan. Sa baylo, ang mga prinsipio sa Biblia nagabulig sa aton nga makapasibu agod mapadunggan ang mga tawo sa bisan diin man nga lugar. Binagbinagon naton kon paano ang matinahuron nga pagpakig-angot sa mga tawo makadul-ong sa mas mabungahon nga ministeryo.

 Bugnuha kag Istoryaha ang mga Tawo

8, 9. (a) Ano nga paggawi ang mahimo kabigon nga malain nga pamatasan? (b) Ngaa dapat naton iaplikar ang ginsiling ni Jesus sa Mateo 5:47 sa aton pagpakig-angot sa mga tawo?

8 Bangod sa kasakuon sang mga tawo sa madamo nga lugar karon, masami nga ang duha ka tawo nga nagasugataay wala na nagabugnuhanay. Siempre, indi naton mapaabot nga masugilanon naton ang tanan nga masugat-an naton sa masako nga dalan. Apang, madamo sing kahigayunan nga nagakaigo nga bugnuhon naton ang iban. Nagapamugno ka bala? Ukon nagalabay ka lang nga wala gid nagayuhum ukon nagapanamyaw? Sa pagkamatuod, mahimo mapalambo sang isa ang indi maayo nga pamatasan sing indi hungod.

9 Si Jesus nagpahanumdom sa aton: “Kon ang inyo mga utod lamang ang inyo ginabugno, ano nga pinasahi nga butang ang ginahimo ninyo? Indi bala ginahimo man ini sang mga tawo sang mga pungsod?” (Mat. 5:47) Ang propesyonal nga manuglaygay nga si Donald Weiss, nagsulat tuhoy sa sini: “Nagalain ang buot sang iban kon ginalabayan mo lang sila kag wala ginabugno. Mabudlay mangita sing rason agod paumpawan ang mga wala mo ginbugno. Ang solusyon: Bugnuha ang mga tawo. Istoryaha sila.” Kon ginabatuan naton ang huyog nga indi mamugno sa iban, makatigayon kita sing maayo nga mga resulta.

10. Paano ang maayong pamatasan makabulig agod magmabungahon ang aton ministeryo? (Tan-awa ang kahon nga  “Magyuhum.”)

10 Hunahunaa ang eksperiensia sang Cristianong mag-asawa nga sanday Tom kag Carol, nga nagaistar sa isa ka daku nga siudad sa Aminhan nga Amerika. Ginhimo nila nga bahin sang ila ministeryo ang pagtamyaw kag pagpakig-istorya sa ila mga kaingod. Paano nila ini ginahimo? Nagapatuhoy sa Santiago 3:18, nagsiling si Tom: “Ginatinguhaan namon nga mangin mainabyanon kag mahidaiton sa mga tawo. Ginapalapitan namon ang mga tawo sa gua sang ila balay kag ang mga nagatrabaho sa palibot. Ginayuhuman namon sila kag ginatamyaw. Nagapakig-istorya kami sa ila sa mga butang nga interesado sila, subong sang ila kabataan, ido, balay, kag trabaho. Sang ulihi, ginkabig nila kami nga mga abyan.” Si Carol nagdugang: “Sang ulihi sang nagbisita kami sa ila, nagpakilala kami kag ginpamangkot man namon sila sang ila ngalan. Ginsugiran namon sila kon ano ang amon ginahimo apang wala kami nagadugay sa pagpakig-istorya sa ila. Sang ulihi, ginapanaksihan na namon sila.” Nakuha nanday Tom kag Carol ang pagsalig sang ila mga kaingod. Madamo ang nagbaton sang mga publikasyon nga pasad  sa Biblia kag ang pila nagpakita sing daku nga interes sa pagtuon sang kamatuoran.

Magpakita sing Pagtahod Bisan sa Mabudlay nga mga Kahimtangan

11, 12. Ngaa dapat naton paabuton nga makaatubang kita sing indi maayo nga pagtratar samtang nagabantala sing maayong balita, kag ano ang dapat naton himuon?

11 Kon kaisa, nagaatubang kita sing indi maayo nga pagtratar samtang nagabantala kita sing maayong balita. Mapaabot naton ini kay ginpaandaman ni Cristo Jesus ang iya mga disipulo: “Kon ginhingabot nila ako, hingabuton man nila kamo.” (Juan 15:20) Ang pagbalos sa masakit nga mga komento sang mga tawo, wala sing maayo nga resulta. Kon amo, ano ang dapat naton himuon? Si apostol Pedro nagsulat: “Pakabalaana si Cristo subong Ginuo sa inyo tagipusuon, nga handa pirme nga magpangapin sa atubangan sang tanan nga nagapangayo sa inyo sang pangatarungan tuhoy sa paglaum nga yara sa inyo, apang ginahimo ini nga may kalulo kag tudok nga pagtahod.” (1 Ped. 3:15) Ang pagpakita sing pagtahod paagi sa pagsabat sing malulo mahimo magpabag-o sa panimuot sang mga nagainsulto sa aton.—Tito 2:7, 8.

12 Mahimo bala kita makahanda sa pag-atubang sa negatibo nga mga komento sa paagi nga magapahamuot sa Dios? Huo. Si Pablo nagpanugda: “Maghambal kamo pirme nga may pagkamainayuhon, nga natimplahan sing asin, agod mahibaluan ninyo kon paano kamo dapat magsabat sa kada isa.” (Col. 4:6) Kon kinabatasan na naton nga mangin matinahuron sa aton pamilya, sa aton mga kaeskwela, sa aton mga katrabaho, sa mga utod sa kongregasyon, kag sa aton mga kaingod, mangin handa kita sa pag-atubang sa pagyaguta kag pag-insulto sa paagi nga nagakaigo sa isa ka Cristiano.—Basaha ang Roma 12:17-21.

13. Maghatag sing halimbawa kon paano ang pagkamatinahuron nagpabag-o sa panimuot sang mga manugpamatok.

13 Ang pagpakita sing maayong pamatasan bisan sa mabudlay nga mga kahimtangan may maayo nga mga resulta. Halimbawa sa Japan, ang isa ka Saksi ginyaguta sang tagbalay kag sang iya bisita. Matinahuron nga nagbiya sa ganhaan ang utod nga lalaki. Samtang nagapadayon sia sa pagbantala sa sina nga teritoryo, natalupangdan niya nga ginatan-aw gihapon sia sang bisita. Sang ginpalapitan niya ini, ang lalaki nagsiling: “Pasensia ka na sa natabo. Bisan pa masakit ang amon ginhambal sa imo, natalupangdan ko nga nagayuhum ka man gihapon. Paano ko ikaw mailog?” Ini nga lalaki nadulaan gali sing trabaho kag bag-o lang namatyan sang iloy, amo nga nadulaan na sia sing paglaum  nga mangin malipayon pa. Gin-agda sia sang Saksi nga magtuon sa Biblia kag ginbaton niya ini. Wala madugay, nagatuon na sia sing duha ka beses kada semana.

Ang Pinakamaayo nga Paagi sa Pagpalambo sang Pagkamatinahuron

14, 15. Paano ginhanas sang mga alagad ni Jehova sang panahon sang Biblia ang ila kabataan?

14 Ginpat-od sang diosnon nga mga ginikanan sang panahon sang Biblia nga matudluan ang ila kabataan sang pagkamatinahuron sa puluy-an. Binagbinaga ang matinahuron nga pagtawganay ni Abraham kag sang iya anak nga si Isaac nga narekord sa Genesis 22:7. Makita man sa paggawi ni Jose ang maayo nga paghanas sa iya sang iya mga ginikanan. Sang ginbilanggo sia, matinahuron sia bisan sa iya kaupod nga mga bilanggo. (Gen. 40:8, 14) Ang iya pinamulong kay Paraon nagapakita nga nakahibalo sia kon paano makigsugilanon sa isa ka tawo nga may mataas nga katungdanan.—Gen. 41:16, 33, 34.

15 Ang Napulo ka Sugo nga ginhatag sa mga Israelinhon nagalakip sini nga sugo: “Tahora ang imo amay kag ang imo iloy, agud nga ang imo mga adlaw maglawig sa duta nga ginahatag sa imo sang GINOO nga imo Dios.” (Ex. 20:12) Ang isa ka paagi nga mapadunggan sang mga kabataan ang ila mga ginikanan amo ang pagpakita sing maayo nga pamatasan sa ila puluy-an. Ang anak nga babayi ni Jefte nagpakita sing talalupangdon nga pagtahod sa iya amay paagi sa pagtuman sa isa ka panaad sang iya amay sa mabudlay gid nga kahimtangan.—Huk. 11:35-40.

16-18. (a) Paano naton tudluan sing maayong pamatasan ang aton kabataan? (b) Ano ang pila sa mga benepisyo sa pagtudlo sa kabataan sing maayong pamatasan?

16 Importante gid nga hanason naton ang aton kabataan nga magpakita sing maayo nga pamatasan. Agod mangin maayo sila nga mga tawo sa ulihi, dapat naton tudluan ang aton mga bata sang husto nga paagi sa pagtamyaw sa mga bisita, sa pagsabat sa telepono, kag sa pagkaon upod sa iban nga tawo. Dapat ipaathag sa ila kon ngaa dapat nila buksan ang puertahan para sa iban nga tawo, magpakita sing kaayo sa mga tigulang kag sa mga nagamasakit, kag sa pagbulig sa mga tawo nga may mabug-at nga dala. Dapat mahangpan nila kon ngaa importante gid nga maghambal sing “palihug,” “salamat,” “wala sing ano man,” “ano ang mabulig ko sa imo?,” kag “pasayluha ako.”

17 Indi mabudlay tudluan ang mga bata sing pagkamatinahuron. Ang pinakamaayo nga paagi amo ang pagpakita sing maayo nga halimbawa. Ang 25 anyos nga si Kurt nagsugid kon paano sila sang iya tatlo pa ka utod nga lalaki nakatuon sing pagkamatinahuron: “Ginapanilagan namon kon paano si Nanay kag si Tatay nagahambal sing mainayuhon sa isa kag isa kag kon paano nila ginapakig-angutan sing mapailubon kag sing makonside rasyon ang iban nga tawo. Sa Kingdom Hall antes kag pagkatapos sang mga miting, ginaupod ako ni Tatay sa pagpakigsugilanon sa may edad na nga mga kauturan. Nakita ko kon paano niya ginatamyaw kag ginatahod ang mga tigulang.” Si Kurt nagpadayon sa pagsiling: “Sang ulihi nailog ko ang iya maayong pamatasan. Nangin natural na lang sa akon ang pagtahod sa iban nga tawo. Ginahimo ko ini indi lamang bangod amo ini ang dapat ko himuon kundi bangod gusto ko ini himuon.”

18 Ano ang mangin resulta kon tudluan sang mga ginikanan ang ila kabataan sing maayong pamatasan? Ang kabataan mangin mainabyanon kag mangin mahidaiton sa iban. Mangin mahapos para sa ila nga makig-angot sa ila mga amo kag mga katrabaho. Dugang pa, ang mga kabataan nga matinahuron kag matarong nagapahalipay sa ila mga ginikanan.—Basaha ang Hulubaton 23:24, 25.

Ang Maayo nga Pamatasan May Maayo nga Resulta

19, 20. Ngaa dapat kita mangin determinado nga ilugon ang aton mainayuhon nga Dios kag ang iya Anak?

19 “Mangin manug-ilog kamo sa Dios, subong mga anak nga hinigugma,” sulat ni Pablo. (Efe. 5:1) Kon luyag naton ilugon si Jehova nga Dios kag ang iya Anak dapat naton iaplikar ang mga prinsipio sa Biblia, subong sang ginbinagbinag naton sa sini nga artikulo. Sa paghimo sini, malikawan naton ang pakitakita nga pagkamatinahuron agod lamang makuha ang pabor sang isa nga mas mataas sangsa aton ukon agod makatigayon sing materyal nga bentaha.—Jud. 16.

20 Sa sining katapusan nga mga adlaw sang malaut nga paggahom ni Satanas, determinado sia nga dulaon ang talaksan sang matinahuron nga paggawi nga ginpasad ni Jehova. Apang indi magmadinalag-on ang Yawa sa pagdula sang maayong pamatasan sang matuod nga mga Cristiano. Kabay nga mangin determinado kita nga sundon ang halimbawa sang aton mainayuhon nga Dios kag sang iya Anak. Sa amo, ang aton paghambal kag paggawi dapat mangin tuhay gid sa mga tawo nga di-matinahuron. Paagi sa sini, magadala kita sing kadayawan sa ngalan sang aton Dios nga si Jehova, nga nagpahamtang sing himpit nga talaksan sang maayong pamatasan, kag maganyat naton ang sinsero nga mga tawo sa matuod nga pagsimba.

[Nota]

^ par. 6 Sa pila kultura, ginakabig nga indi maayo nga pamatasan kon tawgon mo ang mas may edad sa imo sa iya lang ngalan luwas kon tugutan ka niya. Dapat nga tahuron sang mga Cristiano ina nga kinabatasan.

Madumduman Mo Bala?

• Ano ang matun-an naton kay Jehova kag sa iya Anak tuhoy sa pagpakita sing maayong pamatasan?

• Ngaa ang pagtamyaw sa mga tawo may maayo nga epekto sa aton subong mga Cristiano?

• Paano ang pagkamatinahuron makabulig agod mangin mabungahon ang aton ministeryo?

• Ano ang papel sang mga ginikanan sa pagtudlo sa mga kabataan sang maayong pamatasan?

[Mga Pamangkot sa Pagtinuon]

[Kahon sa pahina 27]

 Magyuhum

Madamo nga tawo ang nagapangalag-ag sa pagpakigsugilanon sa mga tawo nga indi nila kilala. Apang, bangod sa ila gugma sa Dios kag sa ila isigkatawo, ang mga Saksi ni Jehova nagapanikasog gid sa pagtuon kon paano sila makigsugilanon sa iban nga tawo agod mapaambit ang mga kamatuoran sa Biblia. Ano ang makabulig sa imo agod mag-uswag sa sini nga bahin?

May matahom nga prinsipio sa Filipos 2:4, nga nagasiling: “[Ituon ang inyo] mata, indi lamang sa inyo personal nga kaayuhan, kundi sa personal nga kaayuhan man sang iban.” Binagbinaga: Kon bag-o lang kamo magkit-anay sang isa ka tawo, mahimo ka niya tamdon subong estranghero. Paano mo mapahamtang ang iya buot sa imo? Makabulig ang pagyuhum kag ang mainabyanon nga pagtamyaw. Apang, may isa pa ka butang nga dapat binagbinagon.

Kon luyag mo istoryahon ang isa ka tawo, mahimo mo matublag ang iya ginahunahuna. Kon ipakighambal mo sa iya ang imo ginahunahuna nga wala anay ginabinagbinag kon ano ang iya ginapensar, mahimo nga madulaan sia sing interes. Gani, kon mahantop mo ang ginahunahuna sang isa ka tawo, ngaa indi ina ang gamiton mo sa pagpakigsugilanon sa iya? Amo sina ang ginhimo ni Jesus sang nagpakigsugilanon sia sa isa ka Samaritana. (Juan 4:7-26) Ang ginahunahuna sang babayi amo ang tubig. Amo nga gingamit ni Jesus ang tubig sa pagsugod sa pagpakigsugilanon sa babayi, kag sang ulihi nagresulta ini sa maayo nga paghinun-anon sa espirituwal nga mga butang.

[Mga Retrato sa pahina 26]

Ang pagkamainabyanon mahimo magresulta sa maayo nga panaksi

[Retrato sa pahina 28]

Ang maayong pamatasan dapat ipakita sa tanan nga tion