Magdiretso sa kaundan

Magdiretso sa listahan sang kaundan

Pangpamilya nga Pagsimba—Importante Gid Para sa Kaluwasan!

Pangpamilya nga Pagsimba—Importante Gid Para sa Kaluwasan!

 Pangpamilya nga Pagsimba—Importante Gid Para sa Kaluwasan!

HANDURAWA kon daw ano ka makakulugmat ang “inaway sang daku nga adlaw sang Dios nga Labing Gamhanan!” (Bug. 16:14) Ginlaragway ini ni manalagna Miqueas sang sia nagsulat: “Ang kabukiran matunaw . . . kag ang mga nalupyakan magalitik, subong sang talo sa atubangan sang kalayo, subong sang mga tubig nga ginaula sa bakilid nga duug.” (Miq. 1:4) Ano ang madangatan sang mga wala nagaalagad kay Jehova? Ang Biblia nagasiling: “Ang pinatay sang GINOO sa sadto nga adlaw manginkutub sa isa ka ukbung sang duta tubtub gid sa isa ka ukbung sang duta.”—Jer. 25:33.

Ina nga mga paandam makabulig gid sa mga ulo sang panimalay, nga madamo sa ila nagasolo nga ginikanan. Maayo nga pamangkuton nila ang ila kaugalingon tuhoy sa ila may buot na nga mga kabataan, ‘Maluwas ayhan sila sa Armagedon?’ Nagapasalig ang Biblia nga maluwas sila kon magpabilin sila nga aktibo kag mabakod sa espirituwal.—Mat. 24:21.

Importante Gid ang Paghatag sing Tion Para sa Pangpamilya nga Pagsimba

Subong ginikanan, pat-ura nga ginahimo mo ang imo bug-os nga masarangan nga mapadaku ang imo kabataan “sa disiplina kag nagatuytoy nga panghunahuna ni Jehova.” (Efe. 6:4) Importante gid nga tun-an mo sa Biblia ang imo mga kabataan. Luyag naton nga ang aton mga kabataan mangin kaangay sa mga Cristiano sa Filipos nga ginhatagan sing komendasyon ni Pablo bangod sang ila pagkamatinumanon kay Jehova. Sia nagsulat: “Mga hinigugma ko, subong nga pirme kamo nagatuman, indi lamang sa tion sang akon presensia, kundi labi pa gid karon sa tion nga wala ako, padayon ninyo nga panikasugi ang inyo kaugalingon nga kaluwasan nga may kahadlok kag pagkurog.”—Fil. 2:12.

Ginatuman bala sang imo kabataan ang kasuguan ni Jehova bisan wala ka? Kamusta kon yara sila sa eskwelahan? Paano mo mabuligan ang imo kabataan nga makumbinsi nga maalamon gid nga giya ang kasuguan ni Jehova sa ila kabuhi kag dapat nila ini sundon bisan indi ka nila kaupod?

Ang pangpamilya nga pagsimba may daku gid nga papel sa pagbulig sa imo kabataan nga mangin malig-on sa pagtuo kag mangin matinumanon kay Jehova. Gani, binagbinagon naton ang tatlo ka importante nga butang nga makabulig agod magmadinalag-on ang inyo pangpamilya nga pagtuon sa Biblia.

Himua nga Regular

Ginapakita sang Biblia sa Job 1:6 nga “may adlaw” nga nagatipon ang mga anak sang Dios sa iya atubangan sa gintalana nga mga tion. Amo man sini ang dapat mo himuon. Magtalana ka sang espesipiko nga adlaw kag oras para sa inyo gab-i sang Pangpamilya nga Pagsimba, kag sunda ini nga iskedyul. Dapat mangita ka man sing iban nga adlaw nga puede ninyo gamiton kon engkaso gid man may emerhensia.

Indi pagtuguti nga pagligad sang mga binulan, mangin indi na regular ang inyo pagtinuon sa Biblia. Dumduma nga ang imo kabataan amo ang imo pinakaimportante nga ginatun-an sa Biblia. Pero, sila man ang luyag ni Satanas nga biktimahon. (1 Ped. 5:8) Kon ibaylo mo ang imo tion para sa gab-i sang Pangpamilya nga Pagsimba sa pagtan-aw sang telebisyon ukon sa iban nga indi importante nga mga butang, magmadinalag-on gid si Satanas.—Efe. 5:15, 16; 6:12; Fil. 1:10.

Himua nga Praktikal

Ang gab-i sang Pangpamilya nga Pagsimba indi lamang basta pagkuha sing ihibalo. Tinguhai nga ipasibu ang inyo pagtuon sa kinahanglanon sang pamilya. Paano? Sa pulupanag-on, magpili sang mga topiko nga may kaangtanan sa mga sitwasyon  nga mahimo maatubang sang imo kabataan sa masunod nga mga inadlaw. Halimbawa, mahimo kamo mag-ensayo para sa pagministeryo. Ang mga bata nanamian maghimo sang mga butang kon maayo sila sa sini. Gani ang pag-ensayo sang mga presentasyon kag ang pagbinagbinag kon paano atubangon ang mga pagpamatok makabulig sa ila nga mangin handa sa pagpakigbahin sa nanuhaytuhay nga aspekto sang pagbantala sang Ginharian nga hilikuton.—2 Tim. 2:15.

Mahimo man kamo mag-ensayo agod mabuligan ang imo kabataan nga atubangon ang pag-ipit sang ila mga katubotubo. Ang Kapitulo 15 sang libro nga Questions Young People Ask—Answers That Work, Tomo 2, mahimo magamit sang pamilya para sa ila pagbinagbinag. Ang “Peer-Pressure Planner” sa pahina 132 kag 133 nagahatag sang mga panugda kag kahigayunan sa mga bata nga mapabutyag ang ila ginabatyag. Ang panugda nga makita sa ubos sa pahina 133 nagapalig-on sa mga pamatan-on nga mag-ensayo upod sa ila ginikanan ukon sa isa ka hamtong nga abyan kon ano ang isabat sa mga pag-ipit sa ila. Ngaa indi mo paghimuon ina nga pag-ensayo nga mangin bahin sang inyo gab-i sang Pangpamilya nga Pagsimba?

Ang pangpamilya nga pagsimba nagahatag sing tion sa mga ginikanan nga ipadaku sa ila kabataan ang kapuslanan sang espirituwal nga mga tulumuron. Ang tract nga Mga Pamatan-on—Ano ang Himuon Ninyo sa Inyo Kabuhi? nagaunod sing mapuslanon nga mga impormasyon tuhoy sa sini. Samtang ginabinagbinag mo ini nga tract upod sa imo anak, buligi sia nga maapresyar nga ang pagsentro sang iya kabuhi sa pag-alagad kay Jehova amo ang pinakamaayo nga dalanon. Buligi ang imo anak nga himuon nga tulumuron ang pagpayunir, pag-alagad sa Bethel, pag-eskwela sa Ministerial Training School, ukon iban pa nga bahin sang bug-os tion nga pag-alagad.

Paandam: Ang pila sa mga ginikanan nagapokus sing tuman sa kon ano ang luyag nila para sa ila kabataan apang wala nila ginahatagan sing komendasyon ang maayo nga mga butang nga ginahimo sang ila kabataan. Huo, maayo gid nga palig-unon mo ang imo kabataan nga mangin tulumuron ang pag-alagad sa Bethel, pagmisyonero, kag iban pa nga espirituwal nga tulumuron. Apang, maghalong nga indi ka magpaabot sing sobra sa imo anak nga mahimo bangdan sang pagluya sang iya buot. (Col. 3:21) Dumduma nga dapat higugmaon sang imo anak si Jehova gikan sa iya tagipusuon kag indi bangod ginpilit mo sia nga himuon ini. (Mat. 22:37) Gani hatagi sing komendasyon ang imo anak sa maayo niya nga ginahimo, kag likawi nga magpokus sa mga butang nga wala niya mahimo. Buligi sia nga maapresyar ang tanan nga ginhimo ni Jehova. Kag tuguti sia nga mapakita ang iya apresasyon sa kaayo ni Jehova.

Himua Ini nga Makalilipay

Ang ikatlo nga butang nga makabulig agod magmadinalag-on ang inyo gab-i sang Pangpamilya nga Pagsimba amo ang paghimo sini nga makalilipay. Paano? Ayhan kon kaisa mahimo kamo mamati sa narekord nga mga drama ukon maglantaw kag magbinagbinag sang mga video nga ginhimo sang mga Saksi ni Jehova. Ukon mahimo man kamo magbasa sang Biblia nga magkaupod nga ang kada isa nakaasayn nga magbasa sing partikular nga karakter sa Biblia.

May mga artikulo sa Ang Lalantawan kag Magmata! nga maayo gid nga gamiton para sa pagbinagbinag sang pamilya. Halimbawa, mahimo mo gamiton ang pahina 31 sang magasin nga  Magmata! nga natig-uluhan “Ano ang Imo Sabat?” Sa kada duha ka bulan, ang pangpubliko nga edisyon sang Ang Lalantawan may artikulo nga “Para sa mga Pamatan-on.” Nagabuslanay ini sila sang artikulo nga para sa mga kabataan nga may tig-ulo “Tudlui ang Inyo Kabataan.”

Ang mga serye sang artikulo nga “Pamangkot sang mga Pamatan-on” sa Magmata! kag ang libro nga Young People Ask, Tomo 2 ilabi na nga makapainteres sa mga ginikanan sang mga tin-edyer. Kon ginagamit ina nga libro, indi pagkalimti ang kahon nga “What Do You Think?” sa katapusan sang kapitulo. Ang mga pamangkot sa kahon indi lamang para sa repaso kundi mahimo man gamiton sang pamilya sa ila pagbinagbinag.

Apang, likawi nga interogahon ang imo anak sa tion sang inyo pangpamilya nga pagtuon. Halimbawa, indi pagpilita ang imo anak nga basahon sing mabaskog ang iya ginsulat sa pahina nga natig-uluhan “My Journal” ukon sa iban pa nga bahin sang libro nga ginsulatan niya. Ang pahina 3 sa idalom sang tig-ulo nga “A Note to Parents” nagasiling nga para mapalig-on ang inyo kabataan nga isulat sa ila libro kon ano gid ang ila matuod nga nabatyagan, hatagi sila sing kahilwayan nga magtago sing sekreto. Sa ulihi, mahimo nga sila na mismo ang magsugid sa imo sang ila ginsulat.

Kon himuon ninyo nga regular, praktikal, kag makalilipay ang inyo pangpamilya nga pagsimba, pakamaayuhon gid ni Jehova sing bugana ang inyo mga panikasog. Ining pinasahi nga tion makabulig gid sa imo pinalangga nga pamilya nga magpabilin nga aktibo kag malig-on sa espirituwal.

[Kahon sa pahina 31]

Mangin Mapahituon

“Sa amon pagtuon upod sa amon kabataan nga babayi, ginabinagbinag namon ang materyal nga gamiton sa miting sa kongregasyon kag dayon ginapadrowing namon sa mga bata kon ano ang ila nahangpan. Kon kaisa, ginaakto namon liwat ang mga hitabo sa Biblia ukon nagaensayo kami sang mga presentasyon para sa pagbantala. Ang amon pagtuon ginabagay namon sa edad kag interes sang mga bata kag ginahimo ini nga makalilipay.”—J.M., Estados Unidos.

“Para mabuligan ang anak nga lalaki sang akon ginatun-an sa Biblia nga maapresyar ang paggamit sang linukot sang panahon sang Biblia, gin-imprinta namon ang tulun-an sang Isaias nga wala sing mga numero sang kapitulo kag bersikulo. Ginsugponsugpon namon ang mga pahina kag gintapik ang kada punta sini sa tubo. Dayon gin-ilog sang bata ang ginhimo ni Jesus sang yara sia sa sinagoga sa Nazaret. Ang rekord sa Lucas 4:16-21 nagasugid nga ‘ginbukad [ni Jesus] ang linukot [ni Isaias] kag nakita’ ang dinalan nga ginapangita niya. (Isa. 61:1, 2) Pero, sang ginbuksan man sang bata ang linukot, nabudlayan sia nga pangitaon ang Isaias 61 bangod wala ini sang mga numero sang kapitulo kag bersikulo. Nagdayaw gid sia sa ikasarang ni Jesus sa paggamit sang linukot amo nga nakasiling sia: ‘Bilib gid ako kay Jesus!’”—Y.T., Japan.

[Retrato sa pahina 30]

Ang pag-ensayo makabulig sa imo kabataan nga maatubang ang pag-ipit sang ila mga katubotubo

[Retrato sa pahina 31]

Tinguhai nga mangin makalilipay ang gab-i sang inyo Pangpamilya nga Pagsimba