Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Ano nga leksion ang ginatudlo sang Hulubaton 24:27?

Ang manunulat sang Hulubaton nagalaygay sa isa ka pamatan-on: “Amana ang imo buluhaton sa luwas, ihanda mo ini sa imo sa latagon; kag ugaling magpatindug sang imo balay.” Ano ang buot silingon sini? Ang isa ka lalaki dapat maghanda sing maayo antes sia mangasawa kag magtukod sang iya kaugalingon nga pamilya kag dapat nakahibalo sia sang iya mga responsibilidad.

Sang una, ang kahulugan sini nga bersikulo ginhangop nga ang isa ka bana kag amay dapat nga indi lang mag-aman sang materyal nga kinahanglanon sang iya pamilya kundi magtinguha man nga pabakuron ukon palig-unon ang espirituwalidad sang iya pamilya. Ina nga ideya husto man kag Makasulatanhon, apang indi ina ang pinakapunto sini nga bersikulo. Ngaa? Binagbinaga ang duha ka rason.

Una, ang termino nga magpatindog sa sini nga bersikulo wala nagapatuhoy sa pagpalig-on ukon pagpabakod sa nagaluntad na nga pamilya. Sa baylo, ang ideya nagapatuhoy sa literal nga pagpatindog sang isa ka balay. Ang tinaga nga gingamit nga “magpatindug” mahimo man malaragwayon nga magpatuhoy sa pagtukod ukon pagpasad sang panimalay—buot silingon, sa pagpangasawa kag pagtigayon sang mga anak.

Ikaduha, ginapadaku sini nga bersikulo kon paano pasunuron ang paghimo sang mga butang kag kon ano ang dapat unahon. Apang, ginapahangop bala sini nga bersikulo nga dapat unahon sang isa ang materyal nga kalig-unan sangsa espirituwal? Siempre indi!

Sang panahon sang Biblia, kon ang isa ka tawo “magpatindug sang [iya] balay,” ukon magpangasawa kag magtukod sang isa ka pamilya, dapat niya pamangkuton ang iya kaugalingon, ‘Makasarang na bala ako mag-atipan kag magsuportar sang akon asawa kag sang amon mangin kabataan sa ulihi?’ Antes sia magtukod sang pamilya, may mga butang sia nga dapat himuon pareho sang pag-atipan sang iya uma ukon patubas. Gani, ang Maayong Balita nga Biblia maathag kag direkta nga nagsiling: “Indi ka magpatindog sing balay kag magpangasawa kon indi pa handa ang imo uma, kag kon wala pa ikaw sing pangita.” Naaplikar man bala ini nga prinsipio sa karon?

Huo. Ang isa ka lalaki nga luyag mangasawa kinahanglan gid nga mangin handa sa sina nga responsibilidad. Kon wala sia sing sablag sa pisikal, dapat sia magtrabaho. Apang, ang iya responsibilidad sa pag-atipan sa pamilya indi lamang ang pag-aman sang materyal nga mga butang. Ginapakita sang Biblia nga kon wala ginaaman sang isa ka tawo ang pisikal, emosyonal, kag espirituwal nga mga kinahanglanon sang iya pamilya, mas malain pa sia sa tawo nga wala sing pagtuo! (1 Tim. 5:8) Gani, kon nagaplano ang isa ka pamatan-on nga lalaki nga mangasawa kag magtukod sang pamilya, maayo nga pamangkuton niya ang iya kaugalingon: ‘Handa na bala ako sa pag-aman sang materyal nga kinahanglanon sang isa ka pamilya? Handa na bala ako nga manguna sa espirituwal nga hilikuton sang isa ka panimalay? Matuman ko ayhan ang akon responsibilidad nga dumalahan ang isa ka regular nga pagtuon sa Biblia upod sa akon asawa kag kabataan?’ Ginapadaku sang Biblia nga importante gid ina nga mga responsibilidad.—Deut. 6:6-8; Efe. 6:4.

Gani ang isa ka pamatan-on nga lalaki nga nagapangita sing palangasaw-on dapat magpamalandong sa prinsipio nga makita sa Hulubaton 24:27. Sing kaanggid ang isa ka pamatan-on nga babayi, maayo man nga mamangkot sa iya kaugalingon kon bala handa na sia sa mga responsibilidad sang isa ka asawa kag iloy. Ini nga mga pamangkot maayo man nga ipamangkot sang mag-asawa sa ila kaugalingon kon nagaplano sila nga magbata. (Luc. 14:28) Ang pagsunod sa sining inspirado nga laygay makabulig gid sa mga alagad sang Dios nga malikawan ang mga problema kag sa amo maagom nila ang makalilipay nga pagkabuhi subong pamilya.

[Blurb sa pahina 12]

Ano nga mga pamangkot ang dapat ipamangkot sang isa ka pamatan-on nga lalaki sa iya kaugalingon kon gusto na niya mangasawa?