Magdiretso sa kaundan

Magdiretso sa listahan sang kaundan

Magmatinumanon kag Magpakabakod Kaangay ni Cristo

Magmatinumanon kag Magpakabakod Kaangay ni Cristo

 Magmatinumanon kag Magpakabakod Kaangay ni Cristo

“Magpakabakod kamo! Nadaug ko ang kalibutan.”—JUAN 16:33.

1. Paano ginpakita ni Jesus ang iya pagkamatinumanon sa Dios?

GINHIMO pirme ni Jesucristo ang kabubut-on sang Dios. Wala gid sia naghunahuna nga supakon ang iya langitnon nga Amay. (Juan 4:34; Heb. 7:26) Apang sang diri sia sa duta, may mga kahimtangan nga indi mahapos para sa iya nga mangin matinumanon. Sa umpisa pa lang sang iya pagministeryo, ang mga kaaway ni Jesus, pati na si Satanas, nagtinguha na nga hayluhon sia, piliton ukon limbungan agod talikdan niya ang dalanon sang katutom. (Mat. 4:1-11; Luc. 20:20-25) Naeksperiensiahan ni Jesus ang tuman nga kahuol, kasubo, kag kasakit bangod sa iya mga kaaway. Sang ulihi, nagmadinalag-on sila sa pagpatay sa iya sa usok sang pag-antos. (Mat. 26:37, 38; Luc. 22:44; Juan 19:1, 17, 18) Wala sapayan sang tuman nga mga pag-antos ni Jesus, nagpabilin sia nga “matinumanon tubtob sa kamatayon.”—Basaha ang Filipos 2:8.

2, 3. Ano ang matun-an naton sa pagpabilin ni Jesus nga matinumanon bisan pa sang mga pag-antos nga iya gin-atubang?

2 Ang eksperiensia ni Jesus diri sa duta nagtudlo sa iya kon paano mangin matinumanon sa idalom sang mabudlay nga mga kahimtangan. (Heb. 5:8) Mahimo maghunahuna kita nga nahibaluan na ni Jesus ang tanan parte sa pag-alagad kay Jehova  bangod nangin suod sia nga kaupod ni Jehova sa di-maisip nga kalawigon sang tion kag nangin “pangolo nga manugpangabudlay” sa tion sang pagpanuga. (Hulu. 8:30) Apang, ang iya pagbatas sa mga kabudlayan sa duta subong tawo amo ang nagpamatuod sang iya bug-os nga integridad. Bangod sini nangin suod pa gid si Jesus kay Jehova. Ano ang matun-an naton sa sini?

3 Bisan pa himpit nga tawo si Jesus, wala sia nagsalig sa iya kaugalingon nga ikasarang. Nangamuyo sia sa Dios agod buligan sia nga makapabilin nga matutom. (Basaha ang Hebreo 5:7.) Agod makapabilin kita nga matutom, dapat man nga mangin mapainubuson kita kag pirme mangayo sing bulig sa Dios. Bangod sini, ginlaygayan ni apostol Pablo ang mga Cristiano: “Hupti ninyo ining panimuot sang hunahuna nga yara man kay Cristo Jesus,” kay “nagpaubos sia kag nangin matinumanon tubtob sa kamatayon.” (Fil. 2:5-8) Ginpamatud-an ni Jesus nga mahimo mangin matinumanon ang tawo bisan pa napalibutan sia sang mga malauton. Apang, mahimo mangatarungan kita nga nahimo ini ni Jesus bangod himpit sia, apang kamusta naman kita nga mga di-himpit?

Matinumanon Bisan Pa Di-himpit

4. Ano ang kahulugan sang pagtuga sa aton nga may yara kahilwayan sa pagbuot?

4 Gintuga sang Dios sanday Adan kag Eva nga may kaalam kag kahilwayan sa pagbuot. Bangod kita mga kaliwat nila, may kahilwayan man kita sa pagbuot. Ano ang buot silingon sini? Ginapahangop sini nga makapili kita kon ano ang aton himuon, maayo man ukon malain. Sa iban pa nga hambal, ginhatagan kita sang Dios sing kahilwayan sa pagdesisyon kon bala tumanon naton sia ukon indi. Apang, ining daku nga kahilwayan, may upod nga salabton. Sa pagkamatuod, ang aton mga desisyon mahimo magresulta sa aton kabuhi ukon sa aton kamatayon. Kag maapektuhan man sini ang mga tawo nga suod sa aton.

5. Ano ang ginapakigbatuan naton tanan, kag paano kita magmadinalag-on?

5 Bangod sa aton napanubli nga pagkadihimpit, indi duna sa aton ang pagkamatinumanon. Indi pirme mahapos ang pagtuman sa mga kasuguan sang Dios. Naeksperiensiahan ini mismo ni Pablo. Nagsulat sia: “Nakita ko sa mga bahin sang akon lawas ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa mga bahin sang akon lawas.” (Roma 7:23) Siempre, mas mahapos magmatinumanon kon wala sing nadalahig nga kabudlayan, kasakit, ukon pag-antos. Pero ano ang aton himuon kon magsumpakilay ang aton handum nga mangin matinumanon kag ang aton ‘kailigbon sang unod kag kailigbon sang mga mata’? Ining sayop nga mga handum resulta sang aton pagkadihimpit kag impluwensia sang “espiritu sang kalibutan” sa aton palibot, kag tuman gid ini kabaskog. (1 Juan 2:16; 1 Cor. 2:12) Agod mabatuan ini, dapat nga ihanda naton ang aton tagipusuon antes pa kita makaatubang sang kabudlayan ukon pagsulay kag mangin determinado kita nga tumanon si Jehova ano man ang matabo. (Sal. 78:8) Madamo kita sing halimbawa sa Biblia nga nangin madinalag-on bangod ginhanda nila ang ila tagipusuon.—Esd. 7:10; Dan. 1:8.

6, 7. Ipaathag kon paano ang personal nga pagtuon makabulig sa aton sa paghimo sing maalamon nga mga desisyon.

6 Ang isa ka paagi agod mahanda naton ang aton tagipusuon amo ang regular nga pagtuon sang Kasulatan kag sang mga publikasyon nga pasad sa Biblia. Handurawa ang imo kaugalingon sa masunod nga kahimtangan. Halimbawa, iskedyul mo subong nga gab-i para sa imo personal nga pagtuon. Nangamuyo ka kay Jehova nga buligan ka paagi sa iya espiritu nga maaplikar ang imo matun-an sa iya Pulong. Sa pihak nga bahin, may plano ka nga magtan-aw sang isa ka pelikula sa TV sa masunod nga gab-i kag nabatian mo nga madamo ang nanamian sa sini, apang nahibaluan mo man nga may imoral kag masingki ini nga mga eksena.

7 Ginpamalandungan mo ang laygay ni Pablo sa Efeso 5:3: “Ang pagpakighilawas kag ang tanan nga sahi sang kahigkuan ukon kakagod indi gid paghinambitan sa tunga ninyo, subong nga nagakaigo sa mga tawo nga balaan.” Nadumduman mo man ang laygay ni Pablo sa Filipos 4:8. (Basaha.) Samtang ginapamalandungan mo ini nga teksto, namangkot ka sa imo kaugalingon, ‘Kon ipadayag ko ang akon tagipusuon kag hunahuna sa sina nga mga programa, ginasunod ko bala ang maayo nga  halimbawa ni Jesus sa pagkamatinumanon sa Dios?’ Ano ang himuon mo? Matan-aw ka bala gihapon sina nga pelikula?

8. Ngaa dapat naton huptan ang mataas nga moral kag espirituwal nga mga talaksan?

8 Isa gid ka sayop nga butang nga panubuon naton ang aton moral kag espirituwal nga mga talaksan. Halimbawa, basi maghunahuna kita nga malig-on na kita kag sarang na naton mabatuan ang mga epekto sang malain nga kaupdanan, lakip na ang masingki kag imoral nga kalingawan. Dapat naton amligan ang aton kaugalingon kag ang aton kabataan sa malain nga impluwensia sang espiritu ni Satanas. Ang mga nagagamit sing kompyuter nagapanikasog gid nga indi masudlan sang virus ang ila kompyuter kay mahimo ini makaguba sang ila data, makaupang sa pagpanghikot sini, ukon magakontrol pa gani sa ila kompyuter agod halitan ang iban nga kompyuter. Gani, indi bala nga dapat gid naton amligan ang aton kaugalingon gikan sa “mga pahito” ni Satanas?—Efe. 6:11.

9. Ngaa dapat kita mangin determinado nga tumanon si Jehova kada adlaw?

9 Halos kada adlaw, kinahanglan kita magdesisyon kon bala tumanon naton si Jehova ukon indi. Agod maluwas kita, dapat naton tumanon ang Dios kag magkabuhi suno sa iya matarong nga mga prinsipio. Paagi sa pagsunod sa pagkamatinumanon ni Cristo “tubtob sa kamatayon,” mapamatud-an naton nga matuod ang aton pagtuo. Kon magapabilin kita nga matutom, pagapadyaan kita ni Jehova. Si Jesus nagsaad: “Sia nga nakabatas tubtob sa katapusan amo ang maluwas.” (Mat. 24:13) Maathag nga kinahanglan gid naton palambuon ang kabakod nga kaangay sang ginpakita ni Jesus.—Sal. 31:24.

Si Jesus—Ang Pinakamaayo nga Halimbawa sa Kabakod

10. Ano nga mga pag-ipit ang mahimo naton maatubang, kag ano ang dapat naton himuon?

10 Bangod napalibutan kita sang malain nga panimuot kag paggawi sa sining kalibutan, kinahanglan naton ang kabakod agod indi kita maimpluwensiahan. Ang mga Cristiano mahimo makaatubang sang mga pag-ipit nga maghimo sing sala ukon makigbahin sa mga buhat ukon tradisyon sang butig nga relihion, ukon mga problema sa pinansial. Ini nga mga pag-ipit mahimo makapahilayo sa ila sa matarong nga mga dalanon ni Jehova. Madamo ang ginapamatukan sang ila pamilya. Sa iban nga mga pungsod, labi nga ginapasanyog sang mga eskwelahan ang teoriya sang ebolusyon, kag madamo na ang nagapati sa ateismo. Indi puede nga balewalaon lang naton ini nga mga pag-ipit. Dapat gid kita maghimo sing mga paagi nga mapamatukan ini agod maamligan ang aton kaugalingon. Ang halimbawa ni Jesus makabulig gid sa aton sa paghimo sini.

11. Paano ang pagpamalandong sa halimbawa ni Jesus makahatag sa aton sing dugang nga kabakod?

11 Ginsilingan ni Jesus ang iya mga disipulo: “Sa kalibutan may kapipit-an kamo, apang magpakabakod kamo! Nadaug ko ang kalibutan.” (Juan 16:33) Wala gid sia nagpaimpluwensia sa kalibutan. Wala gid niya gintugutan ang kalibutan nga upangan sia sa pagbantala nga hilikuton ukon panubuon ang iya espirituwal kag moral nga mga talaksan. Gani amo man sina ang dapat naton himuon. Sa iya pangamuyo, si Jesus nagsiling tuhoy sa iya mga disipulo: “Indi sila bahin sang kalibutan, subong nga ako indi bahin sang kalibutan.” (Juan 17:16) Ang pagtuon sa kabakod nga  ginpakita ni Cristo kag ang pagpamalandong sa sini makabulig gid sa aton nga magpabilin nga indi bahin sang kalibutan.

Magtuon sa Kaisog ni Jesus

12-14. Maghatag sing mga halimbawa kon paano nagpakita si Jesus sing kaisog.

12 Si Jesus nagpakita gid sing kaisog sa iya bug-os nga ministeryo. Agod ipakita ang iya awtoridad subong Anak sang Dios, wala sing kahadlok nga “nagsulod si Jesus sa templo kag gintabog ang tanan nga nagapamaligya kag nagapamakal sa templo, kag ginpamaliskad ang mga lamesa sang mga manugbaylo sing kuarta kag ang mga bangko sang mga nagabaligya sang mga salampati.” (Mat. 21:12) Sang gindakop sia sang mga soldado sang gab-i antes sia napatay, maisugon niya nga ginpangapinan ang iya mga disipulo, nga nagasiling: “Kon ako ang inyo ginapangita, palakta sila.” (Juan 18:8) Wala magdugay pagkatapos sini, ginsilingan niya si Pedro nga itagob ang iya espada agod ipakita nga wala nagasalig si Jesus sa mga hinganiban sang tawo kundi kay Jehova.—Juan 18:11.

13 Wala sing kahadlok nga ginbuyagyag ni Jesus ang butig kag di-mahigugmaon nga mga manunudlo sang iya panahon pati na ang ila sayop nga mga panudlo. “Kailo kamo, mga escriba kag mga Fariseo, mga salimpapaw! bangod ginatakpan ninyo ang ginharian sang langit sa mga tawo,” siling ni Jesus sa ila. “Ginpatumbayaan ninyo ang mas importante nga mga bahin sang Kasuguan, nga amo ang katarungan kag kaluoy kag katutom. . . . Ginatinluan ninyo ang gua sang kopa kag sang pinggan, apang sa sulod puno ini sang inati kag pagpatuyang.” (Mat. 23:13, 23, 25) Kinahanglan sang mga disipulo ni Jesus ang kaangay sini nga kaisog bangod hingabuton man sila sang relihiosong mga lider kag ipapatay ang pila sa ila.—Mat. 23:34; 24:9.

14 Si Jesus wala man nahadlok sa mga demonyo. Isa ka bes, ginsugata sia sang isa ka tawo nga ginsudlan sang demonyo nga tama ka kusog nga indi masarangan gapuson sang kadena. Apang, wala sing kahadlok nga ginpagua ni Jesus ang madamo nga demonyo nga nagakontrol sa tawo. (Mar. 5:1-13) Sa karon, ang Dios wala na nagahatag sing gahom sa mga Cristiano agod makahimo sinang mga milagro. Pero, may yara gihapon kita espirituwal nga pagpakig-away kay Satanas sa aton pagbantala kag pagpanudlo, bangod ‘ginbulag niya ang hunahuna sang mga di-tumuluo.’ (2 Cor. 4:4) Kaangay ni Jesus, ang aton hinganiban “indi undanon, kundi gamhanan paagi sa Dios agod pukanon ang mga butang nga natukod sing malig-on,” nga nagapatuhoy sa sayop nga relihioso nga mga pagpati nga nanggamot na sa mga tawo. (2 Cor. 10:4) Makatuon gid kita sa halimbawa ni Jesus kon paano gamiton ining espirituwal nga mga hinganiban.

15. Sa ano napasad ang kaisog ni Jesus?

15 Ang kaisog ni Jesus wala napasad sa bugal kundi sa pagtuo. Gani ang kaisog naton dapat napasad man sa pagtuo. (Mar. 4:40) Paano kita makatigayon sing matuod nga pagtuo? Sa liwat, makatuon kita sa halimbawa ni Jesus. Madalom gid ang iya ihibalo sa Kasulatan kag bug-os ang iya pagsalig sa sini. Gingamit ni Jesus subong hinganiban indi ang literal nga espada, kundi ang espada sang espiritu, ang Pulong sang Dios. Ginapasad gid niya sa Kasulatan ang iya mga panudlo. Sa masami, nagasiling sia: “Nasulat na,” buot silingon, ang iya ginahambal nasulat sa Pulong sang Dios. *

16. Paano naton mapalig-on ang aton pagtuo?

16 Subong mga Cristiano, nagaatubang kita sang mga pagtilaw. Makatigayon kita sing pagtuo agod mabatas ining mga pagtilaw paagi sa pagbasa kag pagtuon sing Biblia kada adlaw kag sa pagtambong sa Cristianong mga miting, nga ginapuno  ang aton hunahuna sang mga kamatuoran nga amo ang pundasyon sang pagtuo. (Roma 10:17) Dapat man naton pamalandungan ang aton natun-an agod mapasalop ini sa aton tagipusuon. Kon buhi ang aton pagtuo, amo ini ang magapahulag sa aton nga mangin maisog. (Sant. 2:17) Kag dapat kita mangamuyo sing balaan nga espiritu bangod ang pagtuo isa ka bunga sang espiritu.—Gal. 5:22.

17, 18. Paano ginpakita sang isa ka pamatan-on nga babayi ang kaisog sa ila eskwelahan?

17 Naeksperiensiahan ni Kitty, isa ka pamatan-on nga utod nga babayi, kon paano ang matuod nga pagtuo nagahatag sing kaisog. Sugod sang bata pa sia, nahibaluan na niya nga indi niya dapat ‘pag-ikahuya ang maayong balita’ sa eskwelahan, kag gusto gid niya nga panaksihan ang iya mga klasmeyt. (Roma 1:16) Kada tuig, nagatinguha gid sia nga mapaambit ang maayong balita sa iban, apang nagapangalag-ag sia bangod sa kakulang sing kaisog. Sang ulihi, nagsaylo sia sing eskwelahan. Nagsiling sia, “Determinado na ako karon nga makabawi sa tanan nga kahigayunan nga akon nawasi.” Nangamuyo si Kitty nga hatagan sia sing tulad-Cristo nga kaisog, pagkamataktikanhon, kag sing nagakaigo nga kahigayunan.

18 Sa una nga adlaw sang klase, isaisa nga ginpangabay ang mga estudyante nga magpakilala sang ila kaugalingon. Madamo ang nagsambit kon ano ang ila relihion, pero nagsiling sila nga talagsa lang sila nagasimba. Narealisar ni Kitty nga amo na ini ang kahigayunan nga ginpangamuyo niya. Sang iya na turno, may kaisog sia nga nagsiling, “Isa ako sa mga Saksi ni Jehova, kag ang Biblia amo ang akon ginakuhaan sang moral kag espirituwal nga panuytoy.” Samtang nagahambal sia, makita sa nawong sang iban nga estudyante nga indi sila komporme sa iya ginsiling. Apang ang iban nagpamati sing maayo, kag sang ulihi nagpamangkot sa iya. Ginhimo pa gani sia nga halimbawa sang iya maestro bangod gintindugan niya ang iya mga ginapatihan. Nalipay gid si Kitty nga nakatuon sia sa maayo nga halimbawa ni Jesus tuhoy sa kaisog.

Ipakita ang Tulad-Cristo nga Kaisog kag Pagtuo

19. (a) Ano ang nalakip sa matuod nga pagtuo? (b) Paano naton mapahalipay si Jehova?

19 Ang mga apostoles nakarealisar man nga ang ila kaisog dapat nabase sa pagtuo. Nangabay sila kay Jesus: “Hatagi kami sang dugang nga pagtuo.” (Basaha ang Lucas 17:5, 6.) Ang matuod nga pagtuo indi lamang basta pagpati nga may Dios. Nagalakip ini sang pagpalambo sing suod nga kaangtanan kay Jehova, kaangay sang kaangtanan sang isa ka bata sa iya mabuot kag mahigugmaon nga amay. Gintuytuyan sang Dios si Solomon sa pagsulat: “Anak ko, kon ang imo tagiposoon magmaalam, ang akon tagiposoon magakasadya. Ang akon tagiposoon magakalipay kon ang imo mga bibig nagapamolong sing mga butang nga matarung.” (Hulu. 23:15, 16) Sing kaanggid, ang aton mabakod nga panindugan sa matarong nga mga prinsipio magapahalipay kay Jehova, kag ang paghibalo sini nagahatag sa aton sing dugang pa gid nga kaisog. Gani, kabay nga padayon naton nga sundon ang halimbawa ni Jesus, nga maisog nga nagpanindugan sa pagkamatarong!

[Nota]

Mapaathag Mo Bala?

• Ano ang makabulig sa aton nga magpabilin nga matinumanon bisan pa di-himpit kita?

• Sa ano napasad ang matuod nga pagtuo, kag paano ini makabulig sa aton nga mangin maisog?

• Ano ang mangin resulta kon magmatinumanon kita kag magpakita sing tulad-Cristo nga kaisog?

[Mga Pamangkot sa Pagtinuon]

[Retrato sa pahina 13]

Ginahanda mo bala ang imo tagipusuon agod mapamatukan ang mga pagsulay?

[Retrato sa pahina 15]

Kaangay ni Jesus, mapakita naton ang kaisog nga napasad sa pagtuo