Magdiretso sa kaundan

Magdiretso sa listahan sang kaundan

Likawi ang mga Tublag sa Sining ‘Adlaw sang Maayong Balita’

Likawi ang mga Tublag sa Sining ‘Adlaw sang Maayong Balita’

 Likawi ang mga Tublag sa Sining ‘Adlaw sang Maayong Balita’

GINBINAGBINAG sang apat ka aruon ang ila pililian. Wala na gid sing may naglimos sa ila sa ganhaan sang siudad. Ginlikupan sang mga Sirianhon ang Samaria kag ginpagutuman ang mga tawo. Wala na sing pulos nga magsulod pa sila sa siudad kay tuman ka mahal ang pagkaon didto. Nabalitaan man nga may nagakatabo na nga kanibalismo.—2 Hari 6:24-29.

‘Ngaa indi kita magkadto sa kampo sang mga Sirianhon?’ siling sang mga aruon. ‘Wala man sing may madula sa aton kon himuon naton ini.’ Gani pagkagab-i, nagkadto sila sa kampo. Pag-abot nila, wala sila sing nabatian nga ginahod. Wala man sing nagabantay. May ginahigtan nga mga kabayo kag asno, apang wala sing mga soldado. Nagsulod sila sa isa ka tolda. Nakita nila ang madamo nga pagkaon kag ilimnon pero wala sing tawo. Nagkinaon sila kag nag-inom. May nakita man sila nga bulawan, pilak, panapton, kag iban pa nga malahalon nga mga butang. Ginpanguha nila ang tanan nila nga naluyagan, gintago ini, kag nagbalik pa gid para makakuha sing dugang. Ginbayaan sang mga Sirianhon ang bug-os nga kampo kay ginpabati sila ni Jehova sang ginahod sang isa ka daku nga hangaway. Naghunahuna ang mga Sirianhon nga ginsalakay sila, amo nga nagpinalagyo sila kag ginpamayaan ang tanan nila nga pagkabutang!

Ginpanguha sang mga aruon ang malahalon nga mga pagkabutang. Apang, ginkonsiensia sila kay nahibaluan nila nga ginagutom ang mga tawo sa Samaria. Nagsinilingay sila: ‘Wala kita nagahimo sing maayo. Ini nga adlaw, adlaw sang maayong balita!’ Gani, nagbalik ang mga aruon sa Samaria kag ginsugid ang maayong balita nga ila nadiskobrehan.—2 Hari 7:1-11.

Nagakabuhi man kita karon sa ginatawag nga ‘adlaw sang maayong balita.’ Ginpakita ni Jesus ang talalupangdon nga “tanda . . . sang katapusan sang sistema sang mga butang.” Sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mat. 24:3, 14) Ano ang epekto sini sa aton?

Ang Personal nga mga Kabalaka Makapabug-at sa Aton

Bangod sang tuman nga kalipay, nalipatan sing makadali sang mga aruon ang Samaria. Ginhunahuna lamang nila kon ano ang ila makuha. Matabo man ayhan ini sa aton? Ang “kakulang sa kalan-on” isa sa mga tanda sang katapusan sang sistema sang mga butang. (Luc. 21:7, 11) Ginpaandaman ni Jesus ang iya mga disipulo: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi.” (Luc. 21:34) Subong mga Cristiano, dapat indi naton pagtugutan nga malipatan naton nga nagakabuhi na kita sa ‘adlaw sang maayong balita’ bangod sang aton mga kabalaka sa adlaw-adlaw.

Wala gintugutan sang Cristiano nga si Blessing nga matublag sia sang personal nga mga interes. Nag-alagad sia subong isa ka payunir, nakatapos sa pag-eskwela, nakapamana sing isa ka Bethelite, kag nangin miembro sang pamilya Bethel sa Benin. Nagsiling sia: “Isa ako ka housekeeper, kag nalipay gid ako sa akon asaynment.” Malipayon nga ginadumdom ni Blessing ang 12 ka tuig niya nga pag-alagad sing bug-os tion  kag wala niya ginkalipatan ang ‘adlaw sang maayong balita’ sa aton tion.

Mag-andam sa mga Butang nga Nagaubos sing Tion

Sang ginpadala ni Jesus ang 70 ka disipulo, sia nagsiling: “Sa pagkamatuod, ang alanyon bugana, apang pila lamang ang mamumugon. Busa pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Luc. 10:2) Kon indi mahingagaw ang pag-ani, mahimo mapierde ang alanyon. Sing kaanggid, madamo ang indi maluwas kon magpalantang kita sa pagbantala. Gani nagdugang si Jesus: “Indi kamo magdulog sa pagtamyaw kay bisan sin-o sa dalan.” (Luc. 10:4) Ang orihinal nga lenguahe para sa tinaga nga “pagtamyaw” wala lamang nagakahulugan sing pagsiling nga “kamusta” ukon “maayong adlaw.” Mahimo man ini maglakip sa paghaksanay kag malawig nga pag-istoryahanay kon masugata naton ang isa ka abyan. Gani, ginlaygayan ni Jesus ang iya mga sumulunod nga likawan ang indi nagakaigo nga mga tublag kag gamiton sing maalamon ang ila tion. Hilingagawon ang mensahe nga dapat nila ibantala.

Hunahunaa kon pila ang mauyang mo nga oras sa mga tublag. Sa sulod sang mga tinuig, ang telebisyon amo gid pirme ang nagaagaw sing tion sa madamo nga lugar. Kamusta naman ang cellphone kag kompyuter? Sang ginsurbe ang 1,000 ka adulto sa Britanya, nasapwan nga “ang mga pumuluyo sang Britanya nagahinguyang sing 88 minutos kada adlaw sa telepono, 62 minutos sa cellphone, 53 minutos sa pag-e-mail, kag 22 minutos sa pag-text.” Ang kabilugan sini naglab-ot sing sobra sa duha ka pilo ka oras nga ginahinguyang sang mga auxiliary payunir kada adlaw! Pila ka oras ang imo ginahinguyang sa paggamit sang telepono, pag-email, kag pag-text?

Sanday Ernst kag Hildegard Seliger nangin maalamon sa paggamit sang ila tion. Naghinguyang sila nga duha sing 40 ka tuig sa kampo konsentrasyon sang Nazi kag Komunista nga mga prisuhan. Sang ginpagua na sila, nagpayunir sila tubtob natapos ang ila dutan-on nga kabuhi.

Madamo gid ang luyag magsulat sa sini nga mag-asawa. Amo nga daku gid kuntani nga oras ang ila mahinguyang sa pagbasa kag paghimo sing mga sulat. Apang, ang ila pag-alagad kay Jehova amo gid ang panguna sa ila kabuhi.

Siempre, tanan kita nagabaton man sing sulat ukon tawag halin sa aton mga hinigugma. Indi ini malain. Kag maayo gid nga kon kaisa may bag-o naman kita nga ginahimo. Apang, dapat kita maghalong nga indi maubos ang aton panahon sa mga tublag sa sining tion sang pagbantala sang maayong balita.

Ibantala ang Maayong Balita sing Maid-id

Isa gid ka pagpakamaayo nga magkabuhi sa ‘adlaw sang maayong balita.’ Indi kita dapat matublag kaangay sang natabo sa apat ka aruon sang umpisa. Dumduma nga nagsiling sila sang ulihi: “Wala kita nagahimo sing maayo.” Sing kaanggid, indi man maayo nga tugutan naton nga matublag kita sang personal nga mga kabalaka ukon mga butang nga nagakuha sang aton daku nga tion sa pagpakigbahin sing bug-os sa pagbantala.

May maayo kita nga halimbawa sa sini. Sa paghinumdom sang iya 20 ka tuig nga ministeryo, si apostol Pablo nagsiling: “Nabantala ko sing bug-os ang maayong balita tuhoy sa Cristo.” (Roma 15:19) Wala gintugutan ni Pablo ang bisan ano nga butang nga magtublag sa iya kakugi sa pagministeryo. Kaangay ni Pablo, mangin makugi man kita sa pagbantala sing mensahe sang Ginharian sa sining ‘adlaw sang maayong balita.’

[Retrato sa pahina 28]

Wala gintugutan ni Blessing nga matublag sang personal nga mga interes ang iya bug-os tion nga pag-alagad

[Retrato sa pahina 29]

Sanday Ernst kag Hildegard Seliger nangin maalamon sa paggamit sang ila tion