Magdiretso sa kaundan

Magdiretso sa listahan sang kaundan

Ang mga Binhi sang Kamatuoran Nakalab-ot sa Nabaw-ing nga mga Rehiyon

Ang mga Binhi sang Kamatuoran Nakalab-ot sa Nabaw-ing nga mga Rehiyon

 Ang mga Binhi sang Kamatuoran Nakalab-ot sa Nabaw-ing nga mga Rehiyon

ANG Tuva Republic sa Rusya nahamtang sa pinakabagatnan sang Siberia, kag sa bagatnan-sidlangan sini makita ang Mongolia. Madamo nga tawo sa Tuva ang nagaistar sa nabaw-ing nga mga lugar nga mabudlay malab-ot sang mensahe sang Ginharian. Apang isa ka bes, madamo nga tawo gikan sa nabaw-ing nga bahin sang Tuva ang naglakbay pakadto sa Kyzyl, ang kapital sini, agod magtambong sa isa ka seminar. Nahibaluan ini ni Maria, isa ka payunir sa Kyzyl, kag nahunahuna niya nga isa ini ka kahigayunan nga mapaambit niya ang maayong balita sa ila.

Ginsugid ni Maria ang natabo: “Ginhiwat sa eskwelahan nga akon ginatudluan ang isa ka seminar parte sa pagbulong sang mga nagaabuso sa droga kag alkohol. Mga 50 ka tawo halin sa nabaw-ing nga mga rehiyon sang Tuva ang nagtambong. Lakip sa sini ang mga manunudlo, mga psychologist, mga social worker, kag iban pa.” Para kay Maria, maayo ini nga kahigayunan para makabantala, pero nahibaluan niya nga indi ini mahapos. Nagsiling sia: “Mahuluy-on gid ako, kag nabudlayan ako mag-informal witnessing. Pero, nangamuyo ako kay Jehova nga hatagan ako sing kaisog agod magamit ko ini nga kahigayunan sa pagpanaksi.” Nagmadinalag-on bala sia?

Si Maria nagpadayon: “Nakita ko ang Magmata! nga magasin parte sa phobia. ‘Maluyagan gid ini sang isa ka psychologist,’ hunahuna ko, amo nga gindala ko ang magasin sa eskwelahan. Sina nga adlaw, ang isa sa mga manunudlo nga nagtambong sa seminar nagkadto sa akon opisina, kag gintanyag ko sa iya ang magasin. Nalipay sia sa pagbaton sini. Ang matuod, nagsiling sia nga may phobia man sia. Pagkadason nga adlaw, gindala ko sa iya ang libro nga Questions Young People Ask—Answers That Work, Tomo 1. Ginbaton man niya ini. Bangod sini, nahunahuna ko nga interesado man sa sini nga libro ang iban pa nga manunudlo. Gani nagdala ako sa eskwelahan sang isa ka karton sang Young People Ask nga libro kag sang iban pa nga mga publikasyon.” Wala madugay, wala na sing unod ang karton. Ginsugid ni Maria nga ang pila ka kaupdanan sang mga manunudlo nga ginhatagan niya sang Young People Ask nagkadto sa iya opisina agod mangabay sing mga libro amo nga madasig ini nga naubos.

Sabado ang katapusan nga adlaw sang seminar. Wala sing trabaho si Maria sa sina nga adlaw, gani ginbutang niya ang mga literatura sa pila ka lamesa sa iya opisina. Dayon may ginsulat sia sa blackboard: “Pinalangga nga mga Manunudlo! Puede kamo makakuha sang mga literatura para sa inyo kag para sa mga kilala ninyo. Maayo gid ini nga mga publikasyon, kay makabulig ini sa inyo nga magmadinalag-on sa trabaho kag makapabakod ini sa inyo pamilya.” Ano ang resulta? “Nagkadto ako sa opisina sa sina nga adlaw kag diutay na lang ang nabilin nga literatura. Dayon, nagkuha pa gid ako sang bag-o nga suplay sang mga libro kag mga magasin.” Sang natapos na ang seminar, nakapahamtang si Maria sang 380 ka magasin, 173 ka libro, kag 34 ka brosyur. Sigurado gid nga gindala sang mga nagtambong sa seminar ang mga literatura sang nagpauli sila sa nabaw-ing nga mga rehiyon. Si Maria nagsiling, “Nalipay gid ako nga ang mga binhi sang kamatuoran nakalab-ot na karon sa pinakanabaw-ing nga mga bahin sang Tuva!”—Man. 11:6.

[Mapa sa pahina 32]

(Para sa aktual nga pormat, tan-awa ang publikasyon)

RUSYA

TUVA REPUBLIC