Magdiretso sa kaundan

Magdiretso sa listahan sang kaundan

Ang Kooperasyon Importante Gid sa Espirituwal nga Pag-uswag

Ang Kooperasyon Importante Gid sa Espirituwal nga Pag-uswag

 Ang Kooperasyon Importante Gid sa Espirituwal nga Pag-uswag

ANG kooperasyon importante gid para makatukod sang isa ka pamilya nga mahunahunaon sa espirituwal. Sang gintuga ni Jehova ang una nga mag-asawa, ginpakita niya nga kinahanglan gid ang kooperasyon. Si Eva dapat mangin “kabulig” ni Adan. (Gen. 2:18) Ang bana kag asawa dapat magbuligay sa isa kag isa. (Man. 4:9-12) Kinahanglan man ang kooperasyon agod matuman ang papel nga ginhatag ni Jehova sa mga ginikanan kag sa mga kabataan.

Pangpamilya nga Pagsimba

Sanday Barry kag Heidi may lima ka kabataan. Ang regular nga pangpamilya nga pagtuon sa Biblia nakabulig gid sa ila nga mag-uswag. Nagsiling si Barry: “Sa amon pangpamilya nga pagtuon, ginahatagan ko kon kaisa ang mga kabataan sing gamay nga mga asaynment. Ginapahanda ko sila sing komento sa nabasahan nila nga mga artikulo sang Magmata! Ginapraktis man namon ang amon presentasyon sa pagbantala para ang kada isa sa ila makahibalo kon ano ang ihambal.” Si Heidi nagsiling man: “Tanan kami may listahan sang espirituwal nga mga tulumuron nga luyag namon malab-ot, kag regular namon ini nga ginabinagbinag sa amon pangpamilya nga pagtuon agod hibaluon kon ano na nga pag-uswag ang amon nahimo.” Ang mag-asawa nag-iskedyul man sang gab-i nga wala sing magtan-aw sing telebisyon, kag nakahatag ini sa ila sing tion nga magbasa.

Mga Miting sa Kongregasyon

Sanday Mike kag Denise may apat ka kabataan. Paano sila nakabenepisyo bangod sa ila pagkooperar sa isa kag isa? Nagsiling si Mike: “Kon kaisa, bisan pa ginaplano namon sing maayo nga makaabot sa miting sa husto nga oras, nagakaatrasar gihapon kami. Apang ang kooperasyon nakabulig sa amon nga makatambong sa miting sa husto nga oras.” Nagsiling si Denise: “Samtang nagadalagku ang amon kabataan, ang kada isa sa ila ginahatagan namon sing mga ulubrahon sa balay. Ang amon bata nga babayi nga si Kim nagabulig sa pagluto kag sa pagpreparar sang lamesa.” Ang ila anak nga lalaki nga si Michael naghinumdom: “Kon Martes sang gab-i may ginahiwat nga miting sa amon balay. Gani ginatinluan namon ang kuarto, gina-vacuum ang salog, kag ginaplastar ang mga pulungkuan.” Ang isa pa nila ka anak nga si Matthew nagsiling: “Sa gab-i nga may miting, nagapauli si Tatay sing temprano halin sa obra agod mahanda niya kami sa miting.” Ano ang mga resulta sini?

Takus Gid ang Tanan nga Panikasog

Si Mike nagsiling: “Sang 1987, nagpayunir kami ni Denise. Sadto nga tion, tatlo pa sang amon kabataan ang nabilin sa balay. Ang duha sa ila nagpayunir man, kag ang isa nagboluntaryo sa pagtukod sa mga pasilidad sang Bethel. Nangin malipayon pa gid ang amon pamilya kay nabuligan namon ang 40 ka indibiduwal nga magdedikar sang ila kaugalingon kay Jehova kag magpabawtismo. Ang amon pamilya nakapribilehiyo man nga magboluntaryo sa mga proyekto sang pagtukod, bisan gani sa iban nga pungsod.”

Huo, ang pagkooperar subong isa ka pamilya takus gid nga panikasugan. May iban pa bala nga mga pamaagi nga makakooperar ka sa imo pamilya? Pat-od gid nga ang imo kooperasyon makabulig sa imo pamilya nga mag-uswag pa gid sa espirituwal.

[Retrato sa pahina 28]

Ang pagpraktis makabulig para mag-uswag sa pagministeryo sa latagon