Magdiretso sa kaundan

Magdiretso sa listahan sang kaundan

Pamangkot Gikan sa mga Bumalasa

Pamangkot Gikan sa mga Bumalasa

 Pamangkot Gikan sa mga Bumalasa

Nagbantala si Jesus sa bug-os nga Israel. Gani ngaa nakasiling si apostol Pedro nga ang mga Judiyo kag ang ila mga gumalahom ‘nagpanghikot nga wala sing nahibaluan’ sang ginpapatay nila si Jesus?—Binu. 3:17.

Sang nagapakig-istorya sa grupo sang mga Judiyo parte sa ila papel sa kamatayon sang Mesias, nagsiling si apostol Pedro: “Nakahibalo ako nga nagpanghikot kamo nga wala sing nahibaluan, kaangay sa ginhimo man sang inyo mga manugdumala.” (Binu. 3:14-17) Mahimo nga wala mahangpan sang pila ka Judiyo si Jesus kag ang iya panudlo. Para sa iban, wala nila ginkilala ang Mesias bangod sa ila pag-ihig-ihig, kahisa, kag kaakig. Kag wala man sila sing handum nga pahamut-an ang Dios.

Binagbinaga kon paano naapektuhan ang madamo sa ila pagtamod sa panudlo ni Jesus bangod wala sila sing handum nga pahamut-an si Jehova. Masami nga nagagamit si Jesus sing ilustrasyon sa iya pagpanudlo kag ginapaathag niya ini sa tanan nga luyag pa gid makahibalo. Apang ang pila sa ila nagtalikod lang nga wala nagtinguha nga mahangpan ini. Isa ka bes, nasandad pa gani ang pila ka disipulo sa malaragwayon nga mga pinamulong ni Jesus. (Juan 6:52-66) Wala nila narealisar nga naggamit si Jesus sing mga ilustrasyon agod matilawan kon bala handa sila sa pagbag-o sang ila mga panimuot kag batasan. (Isa. 6:9, 10; 44:18; Mat. 13:10-15) Wala man nila ginsapak ang mga tagna parte sa paggamit sang Mesias sing mga ilustrasyon sa iya panudlo.—Sal. 78:2.

Bangod sang pag-ihig-ihig, ginsikway sang iban ang mga panudlo ni Jesus. Sang nagtudlo sia sa sinagoga sa ila banwa, sa Nazaret, “nahayanghag” ang mga tawo. Apang imbes nga batunon si Jesus subong Mesias, ginduhaduhaan niya sia bangod sang iya ginhalinan nga pamilya: “Diin ginkuha sini nga tawo ini nga mga butang? . . . Ini ang panday nga anak ni Maria kag utod ni Santiago kag ni Jose kag ni Judas kag ni Simon, indi bala? Kag ang iya mga utod nga babayi kaupod naton diri, indi bala?” (Mar. 6:1-3) Para sa mga taga-Nazaret wala sing pulos ang ginatudlo ni Jesus bangod pigado lamang sila.

Kamusta naman ang relihioso nga mga lider? Amo man ini ang ila rason kon ngaa wala sila namati kay Jesus. (Juan 7:47-52) Ginsikway man nila si Jesus bangod sang ila kahisa kay ginapamatian sia sang mga tawo. (Mar. 15:10) Kag madamo nga mga tawo ang naakig sang ginbuyagyag niya ang ila pagkasalimpapaw kag paglimbong. (Mat. 23:13-36) Ginpakamalaut ni Jesus ang ila hungod nga indi pagsapak nga nagasiling: “Kailo kamo nga mga batid sa Kasuguan, bangod ginkuha ninyo ang yabi sa ihibalo; kamo mismo wala magsulod [sa Ginharian], kag ginabalabagan ninyo ang mga nagasulod!”—Luc. 11:37-52.

Sa sulod sang tatlo ka tuig kag tunga, ginbantala ni Jesus ang maayong balita sa duta. Madamo man sia sing ginhanas sa pagbantala. (Luc. 9:1, 2; 10:1, 16, 17) Madinalag-on gid si Jesus kag ang iya mga disipulo amo nga nagreklamo ang mga Fariseo: “Tan-awa! Ang bug-os nga kalibutan nagasunod na sa iya.” (Juan 12:19) Gani, indi buot silingon nga wala gid sing hinalung-ong ang kalabanan nga mga Judiyo. Apang, nagpabilin sila nga “wala sing nahibaluan” tuhoy kay Jesus subong Mesias. Mahimo nila kuntani mapadalom ang ila ihibalo kag gugma sa Mesias, apang wala nila ini ginhimo. Ang pila nangin kabahin pa gani sa pagpatay kay Jesus. Amo nga ginpalig-on ni apostol Pedro ang madamo sa ila: “Gani, maghinulsol kamo kag magliso agod mapanas ang inyo mga sala, agod mag-abot ang mga tion sang kaumpawan gikan kay Jehova mismo kag agod ipadala niya ang Cristo nga gintangdo para sa inyo, si Jesus.” (Binu. 3:19, 20) Talalupangdon nga linibo ka Judiyo ang nagpamati, lakip na ang “isa ka daku nga kadam-an sang mga saserdote.” May nahibaluan na sila, amo nga naghinulsol sila kag natigayon ang kahamuot ni Jehova.—Binu. 2:41; 4:4; 5:14; 6:7.