Magdiretso sa kaundan

Magdiretso sa listahan sang kaundan

Ang Matutom nga Tulugyanan kag ang Nagadumala nga Hubon

Ang Matutom nga Tulugyanan kag ang Nagadumala nga Hubon

 Ang Matutom nga Tulugyanan kag ang Nagadumala nga Hubon

“Sin-o gid ang matutom nga tulugyanan, ang isa nga mainandamon, nga itangdo sang iya agalon sa iya hubon sang mga alagad agod padayon nga maghatag sa ila sang bastante nga pagkaon sa nagakaigo nga tion?”—LUC. 12:42.

1, 2. Anong importante nga pamangkot ang ginhambal ni Jesus sang ginasugid niya ang tanda sang katapusan nga mga adlaw?

SANG ginhatag ni Jesus ang mga tanda sang katapusan nga mga adlaw, namangkot sia: “Sin-o gid ang matutom kag mainandamon nga ulipon nga gintangdo sang iya agalon sa pagdumala sa iya panimalay, sa paghatag sa ila sang ila pagkaon sa nagakaigo nga tion?” Dayon nagsiling si Jesus nga ining ulipon pagapadyaan bangod sang iya katutom paagi sa pagtangdo sa iya sa pagdumala sang tanan nga pagkabutang sang iya agalon.—Mat. 24:45-47.

2 Mga pila ka bulan antes sini, ginpamangkot man ini ni Jesus sa ila. (Basaha ang Lucas 12:42-44.) Gintawag niya nga “tulugyanan” ang ulipon kag ginpatuhuyan nga “hubon sang mga alagad” ang iya “panimalay.” Ang tulugyanan amo ang nagadumala sa mga alagad  sa sulod sang balay. Pero ining tulugyanan alagad man. Sin-o ining alagad, ukon tulugyanan, kag paano sia makaaman sing “pagkaon sa nagakaigo nga tion”? Importante nga makilal-an naton kon sin-o ang ginagamit sa pag-aman sang espirituwal nga pagkaon.

3. (a) Paano ginapaathag sang mga komentarista sang Cristiandad ang ginsiling ni Jesus parte sa “ulipon”? (b) Sin-o ang “tulugyanan,” ukon “ulipon,” kag sin-o ang “mga alagad,” ukon “panimalay”?

3 Ang mga komentarista sang Cristiandad nagapati nga ang ginpatuhuyan ni Jesus amo ang mga tawo nga may mataas nga posisyon sa Cristiandad. Apang si Jesus, ang “agalon” sa ilustrasyon, wala nagsiling nga ang mga ulipon yara sa nagkalainlain nga sekta sang Cristiandad. Sa baylo, maathag sia nga nagsiling nga isa lang ang “tulugyanan,” ukon “ulipon,” nga iya itangdo sa tanan niya nga pagkabutang. Gani subong sang ginapaathag sini nga magasin, ang tulugyanan nagarepresentar sa “diutay nga panong” sang hinaplas nga mga disipulo subong isa ka grupo. Sila ang ginpatuhuyan ni Jesus sa iban nga teksto sang Ebanghelyo ni Lucas. (Luc. 12:32) Ang “hubon sang mga alagad,” ukon “panimalay,” nagapatuhoy sa pareho nga grupo apang nagapadaku ini sang ila tagsa ka papel. Ang pamangkot nga nagautwas amo, Ang tagsa bala ka miembro sini nga ulipon may bahin sa pag-aman sang espirituwal nga pagkaon sa nagakaigo nga tion? Mahibaluan naton ang sabat kon usisaon naton sing maayo ang ginasiling sang Kasulatan.

Mga Alagad ni Jehova sang Una

4. Ano ang pagkabig ni Jehova sa dumaan nga pungsod sang Israel, kag ano ang dapat naton talupangdon parte sa sina nga pungsod?

4 Ginkabig ni Jehova ang iya katawhan, ang dumaan nga pungsod sang Israel, subong isa ka grupo sang iya mga alagad. “‘Kamo akon mga saksi,’ nagasiling ang GINOO, ‘kag ang akon alagad nga ginpili ko.’” (Isa. 43:10) Ang tanan nga miembro sang pungsod nalakip sa sina nga alagad. Pero, importante nga talupangdon naton nga ang mga saserdote kag mga Levinhon lamang ang may katungdanan sa pagtudlo sa pungsod.—2 Cron. 35:3; Mal. 2:7.

5. Suno kay Jesus, ano ang daku nga pagbag-o nga matabo?

5 Ang pungsod bala sang Israel amo ang ulipon nga ginpatuhuyan ni Jesus? Indi. Nahibaluan naton ina bangod sa ginsiling ni Jesus sa mga Judiyo: “Ang ginharian sang Dios kuhaon sa inyo kag ihatag sa isa ka pungsod nga nagapatubas sang mga bunga sini.” (Mat. 21:43) Maathag nga may pagbag-o nga matabo. Gamiton ni Jehova ang isa ka bag-o nga pungsod. Bisan pa amo sini ang natabo, kon parte sa pagtudlo sang Dios sa mga tawo, ang katungdanan sang ulipon sa ilustrasyon ni Jesus pareho gihapon sa “alagad” sang Dios sa dumaan nga Israel.

Nagluntad ang Matutom nga Ulipon

6. Anong bag-o nga pungsod ang natukod sang Pentecostes 33 C.E., kag sin-o ang nangin bahin sini?

6 Ang bag-o nga pungsod, “ang Israel sang Dios,” ginahuman sang espirituwal nga mga Israelinhon. (Gal. 6:16; Roma 2:28, 29; 9:6) Natukod ini sang ginbubo ang espiritu sang Dios sang Pentecostes 33 C.E. Pagkatapos sini, ang tanan nga hinaplas nga mga Cristiano nangin bahin sina nga pungsod nga nagaalagad karon subong ulipon nga gintangdo sang Agalon nga si Jesucristo. Ang tagsa ka miembro sa sina nga pungsod ginsugo nga magbantala sing maayong balita kag maghimo sing disipulo. (Mat. 28:19, 20) Pero, tanan bala nga miembro sina nga grupo nadalahig sa pag-aman sang espirituwal nga pagkaon sa nagakaigo nga tion? Tan-awon naton ang sabat sang Kasulatan.

7. Sang primero, ano ang panguna nga hilikuton sang mga apostoles, kag ano pa ang gindugang nga responsibilidad sa ila?

7 Sang ginpili ni Jesus ang iya 12 ka apostoles, ang ila panguna nga hilikuton amo ang pagbantala sang maayong balita. (Basaha ang Marcos 3:13-15.) Ini nga hilikuton nahisanto sa kahulugan sang Griegong tinaga nga apostolos, nga naghalin sa verb nga nagakahulugan sing “ipadala.” Pero sang ulihi, sang malapit na matukod ang Cristianong kongregasyon, nangin  “manugtatap” na ang mga apostoles.—Binu. 1:20-26.

8, 9. (a) Ano gid ang hilikuton sang 12 ka apostoles? (b) Sin-o ang ginhatagan sing dugang nga mga katungdanan nga ginkilala sang nagadumala nga hubon?

8 Ano gid ang hilikuton sang 12 ka apostoles? Mahibaluan naton ang sabat paagi sa mga hitabo pagkatapos sang Pentecostes. Sang nag-utwas ang problema parte sa pagpanagtag sing pagkaon para sa mga balo, gintipon sang 12 ka apostoles ang mga disipulo kag nagsiling: “Indi kalahamut-an nga bayaan namon ang pulong sang Dios agod magpanagtag sang pagkaon sa mga lamesa.” (Basaha ang Binuhatan 6:1-6.) Nian nagtangdo ang mga apostoles sang iban nga kalipikado nga mga lalaki agod tatapon ining “kinahanglanon nga buluhaton,” para masentro nila ang ila igtalupangod sa “ministeryo may kaangtanan sa pulong.” Ginpakamaayo gid ni Jehova ini nga kahimusan kay “ang pulong sang Dios padayon nga nagtubo, kag padayon nga nagdamo sing madasig ang mga disipulo sa Jerusalem.” (Binu. 6:7) Gani, ang panguna nga responsibilidad sang mga apostoles amo ang pag-aman sang espirituwal nga pagkaon.—Binu. 2:42.

9 Sang ulihi, ginsaligan ang iban sang mabug-at nga mga katungdanan. Paagi sa balaan nga espiritu, ginpadala sanday Pablo kag Bernabe subong mga misyonero sang kongregasyon sang Antioquia. Nakilala-an man sila subong mga apostoles, bisan pa wala sila nalakip sa orihinal nga 12. (Binu. 13:1-3; 14:14; Gal. 1:19) Ang pagtangdo sa ila ginkilala sang nagadumala nga hubon sa Jerusalem. (Gal. 2:7-10) Wala madugay pagkatapos sadto, may bahin na si Pablo sa pag-aman sang espirituwal nga pagkaon. Ginsulat niya ang iya nahauna nga sulat sa panuytoy sang Dios.

10. Sang unang siglo, tanan bala nga hinaplas nga mga Cristiano nagapakigbahin sa pag-aman sang espirituwal nga pagkaon? Ipaathag.

10 Apang, ang tanan bala nga hinaplas nga mga Cristiano nagapakigbahin sa pagdumala sa pagbantala nga hilikuton kag pag-aman sang espirituwal nga pagkaon? Indi. Si apostol Pablo nagsugid sa aton: “Indi tanan mga apostoles, indi bala? Indi tanan mga manalagna, indi bala? Indi tanan mga manunudlo, indi bala? Indi tanan nagahimo sang gamhanan nga mga buhat, indi bala?” (1 Cor. 12:29) Bisan pa nga ang tanan nga hinaplas nga mga Cristiano nagabantala, walo lang ka lalaki ang gingamit sa pagsulat sang 27 ka tulun-an sang Cristianong Griegong Kasulatan.

Ang Matutom nga Ulipon Karon

11. Ano nga “pagkabutang” ang gintangdo sa ulipon?

11 Sa ginsiling ni Jesus sa Mateo 24:45, ginpakita niya sing maathag nga may matutom kag mainandamon nga ulipon nga magakabuhi sa panahon sang katapusan. Ginpatuhuyan sila sang Bugna 12:17 subong “mga nabilin” sang binhi sang babayi. Subong isa ka grupo, ining mga hinaplas nga nagkalabilin amo ang gintangdo sa pagdumala sang mga pagkabutang ni Cristo diri sa duta. Ang “pagkabutang” nga ginpadumalahan sa matutom nga ulipon amo ang mga intereses sang Agalon diri sa duta, nga nagalakip sa dutan-on nga sakop sang Ginharian kag sang mga pasilidad nga ginagamit sa pagbantala sing maayong balita.

12, 13. Paano mahibaluan sang isa ka Cristiano nga may langitnon sia nga pagtawag?

12 Paano mahibaluan sang isa ka Cristiano nga may langitnon sia nga paglaum kag bahin sia sang nagkalabilin nga espirituwal nga Israel? Ang sabat makita sa mga pinamulong ni apostol Pablo parte sa mga kaupod niya nga may langitnon nga paglaum: “Ang tanan nga ginatuytuyan sang espiritu sang Dios, sila ang mga anak sang Dios. Kay wala kamo makabaton sang espiritu sang pagkaulipon nga ginabangdan liwat sang kahadlok, kundi nakabaton kamo sang espiritu sang pag-adoptar sa inyo subong mga anak, nga paagi sini nga espiritu nagatuaw kita sing mabaskog: ‘Abba, Amay!’ Ang espiritu mismo nagasaksi upod sa aton espiritu nga kita mga anak sang Dios. Nian, kon kita mga anak, mga manunubli man kita: mga manunubli gid sang Dios, apang kaupod nga mga manunubli ni Cristo, kon mag-antos  kita kaupod niya agod himayaon man kita kaupod niya.”—Roma 8:14-17.

13 Buot silingon, ang balaan nga espiritu sang Dios ang naghaplas sa sining mga indibiduwal amo nga makabaton sila sang langitnon nga “pagtawag,” ukon imbitasyon. (Heb. 3:1) Personal ini nga imbitasyon sang Dios. Ginbaton naman nila nga wala sing pagpangduhaduha ukon kahadlok nga sila mga anak sang Dios. (Basaha ang 1 Juan 2:20, 21.) Gani, indi sila ang nagpili sini nga paglaum, kundi si Jehova amo ang nagbutang sang iya pat-in ukon balaan nga espiritu sa ila.—2 Cor. 1:21, 22; 1 Ped. 1:3, 4.

Ang Husto nga Pagtamod

14. Ano ang pagtamod sang mga hinaplas sa pagtawag sa ila?

14 Paano ginatamod sang mga hinaplas ang ila kaugalingon samtang ginahulat nila ang ila langitnon nga padya? Nahibaluan nila nga bisan pa nakabaton sila sang tumalagsahon nga imbitasyon, isa lamang ini ka imbitasyon. Dapat sila magpabilin nga matutom tubtob kamatayon agod mabaton nila ini nga padya. Mapainubuson nila nga ginapakita ang ginsiling ni Pablo: “Mga kauturan, wala ko pa ginakabig nga naagom ko na ini; apang may isa ka butang tuhoy sini: Ginakalimtan ang mga butang sa likuran kag ginalab-ot ang mga butang sa unahan, nagatinguha ako padulong sa lalambuton tungod sa padya nga langitnon nga pagtawag sang Dios paagi kay Cristo Jesus.” (Fil. 3:13, 14) Dapat panikasugan sang nagkalabilin nga mga hinaplas nga ‘maglakat sing takus sa pagtawag nga ila nabaton, nga may bug-os nga pagpaubos sang hunahuna,’ nga “may kahadlok kag pagkurog.”—Efe. 4:1, 2; Fil. 2:12; 1 Tes. 2:12.

15. Paano dapat tamdon sang mga Cristiano ang mga nagaambit sang mga emblema sa Memoryal, kag paano dapat tamdon sang mga hinaplas ang ila kaugalingon?

15 Sa pihak nga bahin, paano tamdon sang mga Cristiano ang isa ka utod nga nagapangangkon nga nakabaton sini nga pagtawag kag nagapakig-ambit sa mga emblema sa Memoryal? Indi sia dapat paghukman. Sia lang kag si Jehova ang nakahibalo sini. (Roma 14:12) Pero, ang mga Cristiano nga nakabaton sini nga pagtawag wala nagakabig sang ila kaugalingon nga mas importante sila sangsa iban. Wala sila nagapati nga bangod hinaplas sila, mas maalam sila sangsa mga eksperiensiado nga mga miembro sang “dakung  kadam-an.” (Bug. 7:9) Wala man sila nagapati nga nakabaton sila sing mas madamo nga balaan nga espiritu sangsa “iban nga mga karnero.” (Juan 10:16) Wala sila nagapaabot sing pinasahi nga pagtratar; ukon nagapangangkon nga mas mataas sila sangsa gintangdo nga mga gulang sa kongregasyon bangod nagaambit sila sang mga emblema.

16-18. (a) Ang tanan bala nga hinaplas nagapakigbahin sa pagpahayag sang espirituwal nga mga kamatuoran? Iilustrar. (b) Ngaa indi na kinahanglan pamangkuton sang Nagadumala nga Hubon ang tanan nga hinaplas?

16 Ang tanan bala nga mga hinaplas sa bilog nga kalibutan bahin sang grupo nga nadalahig sa pagpahayag sang bag-ong espirituwal nga mga kamatuoran? Indi. Bisan pa sila amo ang grupo nga nagaaman sang espirituwal nga pagkaon, indi pareho ang responsibilidad kag buluhaton sang tagsa ka ulipon. (Basaha ang 1 Corinto 12:14-18.) Subong sang ginsiling kaina, nagabantala ang tanan sang unang siglo. Pero pila lang ang gingamit nga magsulat sang mga tulun-an sa Biblia kag magtatap sang Cristianong kongregasyon.

17 Sa pag-ilustrar: Kon kaisa nagasiling ang Kasulatan nga ang “kongregasyon” amo ang nagauyat sang hudisyal nga mga kaso. (Mat. 18:17) Pero, sa kamatuoran, ang mga gulang lamang ang nagauyat sini subong tiglawas sang kongregasyon. Wala na ginapamangkot sang mga gulang ang opinyon sang tagsa ka miembro sang kongregasyon antes sila magdesisyon. Ginatuman nila ang katungdanan nga ginhatag sa ila sang Dios; nagapanghikot sila para sa bilog nga kongregasyon.

18 Amo man sa karon, pila lamang sa mga hinaplas nga lalaki ang may responsibilidad nga magrepresentar sa ulipon. Ginatawag sila nga Nagadumala nga Hubon sang mga Saksi ni Jehova. Ining hinaplas nga mga lalaki amo ang nagatatap sang buluhaton sa Ginharian kag nagaaman sang espirituwal nga pagkaon. Kaangay sang unang siglo, wala na ginapamangkot sang Nagadumala nga Hubon ang tagsa ka miembro sang ulipon antes sila magdesisyon. (Basaha ang Binuhatan 16:4, 5.) Pero, ang tanan nga hinaplas nga Saksi nagapakigbahin gid sa importante nga buluhaton nga pagpangani subong. Ang “matutom kag mainandamon nga ulipon” isa ka grupo, pero subong indibiduwal lainlain ang ila mga katungdanan.—1 Cor. 12:19-26.

19, 20. Paano dapat tamdon sang dakung kadam-an ang “matutom kag mainandamon nga ulipon” kag ang Nagadumala nga Hubon?

19 Ano ang epekto sini nga mga kamatuoran sa nagadamo nga dakung kadam-an nga nagalaum sing kabuhi nga dayon sa duta? Subong bahin sang pagkabutang sang Hari, nalipay sila nga magkooperar sing bug-os sa mga kahimusan nga ginhimo sang Nagadumala nga Hubon, nga nagarepresentar sa “matutom kag mainandamon nga ulipon.” Ginaapresyar sang miembro sang dakung kadam-an ang espirituwal nga pagkaon nga ginaaman paagi sa panuytoy sang Nagdumala nga Hubon. Ginatahod man sang dakung kadam-an ang ulipon, pero wala nila sila ginapakataas. Ang matuod nga hinaplas nga mga Cristiano wala nagapaabot nga pakataason sila sang iban.—Binu. 10:25, 26; 14:14, 15.

20 Miembro man kita sang “panimalay,” nga bahin sang hinaplas nga nagkalabilin, ukon sang dakung kadam-an, mangin determinado kita nga magkooperar sing bug-os sa matutom nga tulugyanan kag sa Nagadumala nga Hubon. Kabay nga ang tagsa sa aton ‘magpadayon sa pagbantay’ kag mangin matutom asta sa katapusan.—Mat. 24:13, 42.

Madumduman Mo Bala?

• Sin-o ang “matutom kag mainandamon nga ulipon,” kag sin-o ang panimalay?

• Paano mahibaluan sang isa ka tawo nga may langitnon sia nga pagtawag?

• Sin-o ang may panguna nga responsibilidad sa pag-aman sang bag-ong espirituwal nga pagkaon?

• Paano dapat tamdon sang hinaplas ang iya kaugalingon?

[Mga Pamangkot sa Pagtinuon]

[Retrato sa pahina 23]

Ang Nagadumala nga Hubon amo ang nagarepresentar sa matutom kag mainandamon nga ulipon subong. Ini nga kahimusan kaanggid man sang unang siglo