Magdiretso sa kaundan

Magdiretso sa listahan sang kaundan

Makaalagad Ka Bala sa Lugar Diin Kinahanglan ang Dugang pa nga mga Manugbantala sang Ginharian?

Makaalagad Ka Bala sa Lugar Diin Kinahanglan ang Dugang pa nga mga Manugbantala sang Ginharian?

 Makaalagad Ka Bala sa Lugar Diin Kinahanglan ang Dugang Pa nga mga Manugbantala sang Ginharian?

“Komportable ang amon pagkabuhi sa Estados Unidos, apang nabalaka kami kay basi maimpluwensiahan kami nga mag-asawa kag ang amon duha ka bata nga lalaki sang materyalistiko nga palibot. Kami nga mag-asawa mga misyonero anay, kag luyag namon maeksperiensiahan liwat inang simple apang malipayon nga kabuhi.”

BANGOD napahulag sina nga handum, sang 1991, nagdesisyon sanday Ralph kag Pam nga magsulat sa pila ka sanga talatapan agod ipabutyag ang ila handum nga mag-alagad kon diin kinahanglan ang dugang nga mga manugbantala sang Ginharian. Ang sanga talatapan sang Mexico nagsabat nga kinahanglanon gid ang mga manugbantala para sa nagahambal sing Ingles nga mga tawo sa sina nga pungsod. Ang matuod, ina nga teritoryo ginlaragway sang sanga talatapan subong ‘maputi na agod anihon.’ (Juan 4:35) Ginbaton gilayon nanday Ralph kag Pam, upod sa ila duha ka bata nga lalaki nga 8 kag 12 anyos sadto, ang imbitasyon kag naghanda nga magsaylo sa Mexico.

Masangkad nga Teritoryo

Si Ralph nagpanugiron: “Antes kami maghalin sa Estados Unidos, ang pila ka utod nagsiling sa amon: ‘Delikado katama magsaylo sa iban nga lugar!’ ‘Ano na lang kon magmasakit kamo didto?’ ‘Ngaa masaylo pa kamo sa teritoryo nga nagahambal sing Ingles? Indi interesado sa kamatuoran ang mga tawo didto!’ Apang, determinado na kami nga magsaylo. Isa pa, nabinagbinag na namon sing maayo ini nga desisyon. Tinuig na namon ini nga ginplanuhan. Wala na kami nangutang, nagsupot kami sing kuarta, kag pirme namon ginaistoryahan nga pamilya ang mga kabudlayan nga mahimo namon maeksperiensiahan.”

Una, nagkadto anay si Ralph kag ang iya pamilya sa sanga talatapan sang Mexico. Dayon, ginpakita sa ila sang mga utod didto ang mapa sang bug-os nga pungsod kag ginsilingan sila, “Amo ini ang inyo teritoryo!” Nag-istar ang ila pamilya sa San Miguel de Allende, isa ka banwa nga may madamo nga dumuluong nga mga tawo, kag nahamtang mga 240 kilometros sa aminhan nakatundan sang siudad sang Mexico. Pagligad sang tatlo ka tuig, naporma sa sina nga banwa ang isa ka Ingles nga kongregasyon nga ginatapuan sang 19 ka manugbantala. Amo ini ang una nga Ingles nga kongregasyon sa Mexico—apang daku pa ang hilikuton.

Ginabanabana nga mga isa ka milyon ka pumuluyo sang Estados Unidos ang nagapuyo sa Mexico. Dugang pa, madamo nga propesyonal kag estudyante nga mga Mexicano ang nagahambal sang Ingles subong ila ikaduha nga lenguahe. Nagpaathag si Ralph: “Ginpangamuyo namon nga padal-an kami sing dugang pa nga mga manugbantala.  May ekstra pirme nga kuarto sa amon balay para sa mga kauturan nga nagkadto sa amon lugar agod “magpangespiya sa duta.”—Num. 13:2.

Ginpasimple Nila ang Ila Kabuhi Agod Mapasangkad ang Ila Ministeryo

Sang ulihi, nag-abot ang mga kauturan nga luyag man magpasangkad sang ila ministeryo. Lakip sa ila amo sanday Bill kag Kathy halin sa Estados Unidos. Nakaalagad na sila sing 25 ka tuig sa mga teritoryo nga nagakinahanglan sing madamo nga manugbantala. Nahunahuna nila nga magtuon sing Espanyol, apang nagbag-o ang ila plano sang nagsaylo sila sa banwa sang Ajijic sa baybayon sang Lake Chapala, nga isa ka lugar nga luyag puy-an sang mga retirado gikan sa Estados Unidos. Si Bill nagpaathag, “Sa Ajijic, masako kami sa pagpangita sang mga tawo nga nagahambal sing Ingles nga luyag makatuon sing kamatuoran.” Sa sulod sang duha ka tuig nga pagtener sa sina nga banwa, nalipay sanday Bill kag Kathy nga makita ang pagporma sang isa ka kongregasyon—ang ikaduha nga Ingles nga kongregasyon sa Mexico.

Luyag nanday Ken kag Joanne nga taga-Canada nga pasimplehon ang ila kabuhi kag gamiton ang ila daku nga tion sa mga hilikuton sang Ginharian. Nagsaylo man sila sa Mexico upod sa ila bata nga si Britanny. Si Ken nagsiling, “Nabudlayan kami sa pagpasibu sang amon pangabuhi sa lugar nga wala sing mainit nga tubig, koryente, ukon telepono sa sulod sang pila ka adlaw.” Wala sapayan sini, nalipay kami sa pagpakigbahin sa pagbantala nga hilikuton. Wala madugay, gintangdo si Ken subong ministeryal nga alagad, kag pagligad sang duha ka tuig nangin gulang sia. Sang primero, mabudlay gid para sa ila bata nga babayi nga si Britanny nga mangin katapo sang isa ka gamay nga Ingles nga kongregasyon kay diutay lang ang mga pamatan-on. Apang, sang nagboluntaryo sia sa pagtukod sing mga Kingdom Hall, madamo sia sing nangin abyan sa bug-os nga pungsod.

Sanday Patrick kag Roxanne, sa estado sang Texas, Estados Unidos, nalangkag gid sang nabalitaan nila ang tuhoy sa pangmisyonero nga teritoryo nga malapit lang sa ila lugar sa diin ang mga tawo nagahambal sing Ingles. “Sa tapos kami nakakadto sa Monterrey, isa ka banwa sa aminhan-sidlangan sang Mexico, nabatyagan namon nga gintuytuyan kami ni Jehova nga magbulig didto,” siling ni Patrick. Sa sulod lang sang lima ka adlaw, nabaligya nila ang ila balay sa Texas kag daw subong bala nga ‘nagtabok sa Macedonia.’ (Binu. 16:9) Mabudlay ang pangabuhi sa Mexico, apang sa sulod lang sang duha ka tuig, nalipay sila nga makita nga ang grupo sang 17 ka Saksi nangin isa ka kongregasyon nga may 40 ka manugbantala.

Ang mag-asawa nga sanday Jeff kag Deb nagpasimple man sang ila kabuhi agod mapasangkad ang ila ministeryo. Ginbaligya nila ang ila daku nga balay sa Estados Unidos kag nagsaylo sa gamay nga apartment sa Cancún, isa ka siudad sa sidlangan nga baybayon sang Mexico. Sang una, naanad sila nga magtambong sa mga asembliya nga ginahiwat sa mga bilding nga may air-con nga malapit sa ila puluy-an. Apang karon, nagalakbay sila sing walo ka oras sa pagtambong sa pinakamalapit nga Ingles nga asembleya, nga ginahiwat sa istadyum nga wala sing atop. Apang nalipay gid sila bangod naporma sa Cancún ang isa ka kongregasyon nga may mga 50 ka manugbantala.

Ang pila ka Mexicano nga mga kauturan nagbulig man sa pagbantala nga hilikuton sa mga tawo nga nagahambal sing Ingles. Halimbawa,  sang nabalitaan nanday Rubén kag sang iya pamilya nga ang nahauna nga Ingles nga kongregasyon naporma sa San Miguel de Allende kag ang ila teritoryo amo ang bug-os nga Mexico, nagdesisyon sila gilayon nga mabulig. Agod mahimo nila ini, kinahanglan nga magtuon sila sing Ingles, maanad sa lain nga kultura, kag maglakbay sing malayo—mga 800 kilometros kada semana—agod makatambong sa mga miting. Si Rubén nagsiling: “Nalipay gid kami nga magpanaksi sa mga tawo nga naghalin sa iban nga pungsod kag tinuig na nga nagaistar sa Mexico, apang wala pa gid nakabati sang mensahe sang maayong balita sa ila lenguahe. Ang iban naghibi samtang ginpabutyag nila sa amon ang ila apresasyon.” Pagkatapos mabuligan nanday Rubén kag sang iya pamilya ang kongregasyon sa San Miguel de Allende, nagpayunir sila sa banwa sang Guanajuato, sa sentro sang Mexico, diin nagbulig sila sa pagporma sang Ingles nga kongregasyon nga may kapin sa 30 ka manugbantala. Sa karon, nagaalagad sila sa Ingles nga grupo sa Irapuato, isa ka banwa nga malapit sa Guanajuato.

Pagbantala sa mga Mabudlay Lab-uton

Magluwas sa mga tawo nga naghalin sa iban nga pungsod, madamo nga Mexicano ang nagahambal sing Ingles. Masami nga mabudlay sila mapalab-utan sang mensahe sang Ginharian bangod nagaistar sila sa manggaranon nga mga lugar diin ang mga kabulig lang ang nagaatubang sa mga manugbantala. Kon ang tagbalay gid man ang mag-atubang, indi sila gusto mamati sa aton mensahe bangod ginahunahuna nila nga ang mga Saksi ni Jehova gamay lang nga sekta sa ila lugar. Apang, kon ang mga Saksi nga naghalin sa iban nga pungsod amo ang magbantala sa ila, nagapamati ang pila sa ila.

 Binagbinaga ang halimbawa ni Gloria sa siudad sang Querétaro, sa sentro sang Mexico. Nagpaathag sia: “Ginduaw ako anay sang mga Saksi nga nagahambal sing Espanyol apang wala ako namati sa ila. Pero, sang may problema ang akon pamilya kag mga abyan, nasubuan gid ako amo nga nangamuyo ako sa Dios kag nangayo sing bulig nga masolbar ang akon problema. Wala madugay pagkatapos sini, ang isa ka babayi nga nagahambal sing Ingles nagbisita sa amon. Namangkot sia kon may kahibalo maghambal sing Ingles sa amon balay. Bangod isa sia ka dumuluong, interesado ako sa iya, kag ginsilingan ko sia nga kahibalo ako maghambal sing Ingles. Samtang nagahambal sia, naghunahuna ako, ‘Ano ang ginahimo sang Kana nga ini sa amon lugar?’ Apang nadumduman ko nga nagpangayo ako sa Dios sing tanda. Gani mahimo nga ini nga dumuluong amo ang sabat sang Dios sa akon pangamuyo.” Ginbaton ni Gloria ang pagtuon sa Biblia kag madasig sia nga nag-uswag padulong sa bawtismo, bisan pa ginapamatukan sia sang iya pamilya. Sa karon, regular payunir na si Gloria, kag ang iya bana kag bata nga lalaki nagaalagad man kay Jehova.

Mga Pagpakamaayo sang mga Nagpasangkad sang Ila Ministeryo

Ang pag-alagad sa mga lugar nga daku ang kinahanglanon nga mga manugbantala may mga hangkat, apang madamo ini sing mga pagpakamaayo. Si Ralph, nga ginsambit sa umpisa nagsiling: “Nagadumala kami sing pagtuon sa Biblia sa mga tawo nga naghalin sa Britanya, China, Jamaica, Sweden, kag bisan sa dungganon nga mga tawo sa Ghana. Ang pila sining mga estudyante sa Biblia nagsulod sa bug-os tion nga pag-alagad. Sa sulod sang nagliligad nga tinuig, nasaksihan sang amon pamilya ang pagporma sang pito ka Ingles nga kongregasyon. Ang duha namon ka bata nga lalaki nagpayunir man upod sa amon, kag nagaalagad na sila karon sa Bethel sa Estados Unidos.”

Sa karon, may 88 na ka Ingles nga kongregasyon sa Mexico kag may madamo pa nga grupo. Ano ang rason sining madasig nga pag-uswag? Madamo nga tawo nga nagahambal sing Ingles sa Mexico ang wala pa gid nakaistorya sa mga Saksi. Ang iban nagpamati bangod wala na sing mga miembro sang ila pamilya ukon mga abyan nga makapamatok sa ila bangod malayo na sila sa ila. Ang iban naman nagbaton sing pagtuon sa Biblia bangod retirado na sila kag may tion na sa pagtuon tuhoy sa espirituwal nga butang. Dugang pa, kapin sa un-tersia ka manugbantala sa Ingles nga mga kongregasyon ang nagaalagad subong mga payunir, nga nakabulig sing daku sa kakugi kag pag-uswag sina nga mga kongregasyon.

Mga Pagpakamaayo nga Nagahulat sa Inyo

Wala duhaduha nga madamo pa nga tawo sa bug-os nga kalibutan ang magabaton sang mensahe sang Ginharian kon mabatian nila ini sa ila kaugalingon nga lenguahe. Gani, makapalig-on gid nga madamo nga kauturan—bata kag tigulang, may asawa kag wala—nga handa nga magsaylo sa lugar diin kinahanglan ang dugang nga manugbantala sing Ginharian. Matuod may mga kabudlayan sila, apang diutay lang ina kon ipaanggid sa kalipay nga ila nabatyagan kon makasapo sila sing bunayag sing tagipusuon nga mga tawo nga magbaton sing kamatuoran sa Biblia. Makahimo ka bala sing mga pagbag-o agod makasaylo sa isa ka teritoryo sa inyo lugar ukon sa iban nga pungsod diin kinahanglan ang dugang pa nga manugbantala sang Ginharian? * (Luc. 14:28-30; 1 Cor. 16:9) Kon himuon mo ina, mapat-od mo nga makabaton ka sing madamo nga pagpakamaayo.

[Nota]

^ par. 21 Para sa dugang pa nga impormasyon tuhoy sa pag-alagad diin daku ang kinahanglanon, tan-awa ang Organisado sa Paghimo Sang Kabubut-on ni Jehova, pahina 111-112.

[Kahon sa pahina 21]

Ang Malipayon nga mga Retirado Nagpukaw sing Interes

Si Beryl nagsaylo sa Canada halin sa Britanya. Nagtrabaho sia didto subong manedyer sa pila ka internasyonal nga kompanya. Nangin sampaton man sia sa pagsakay sa kabayo kag napilian sia nga magrepresentar sa Canada sang 1980 nga Olympics. Sang nagretiro na si Beryl kag nag-istar sa Chapala, Mexico, pirme sila nagakaon sang iya bana sa mga restawran. Sang natalupangdan niya nga malipayon ang mga retirado nga nagahambal sing Ingles, nagpakilala sia sa ila kag namangkot kon ano ang ila ginahimo sa Mexico. Nagakatabuan pirme nga ang malipayon nga mga tawo nga nagakaon sa restawran mga Saksi ni Jehova gali. Bangod nahunahuna ni Beryl kag sang iya bana nga ang kalipay kag katuyuan sang kabuhi matigayon lamang paagi sa pagkilala sa Dios luyag man nila nga makilala ang Dios. Nagtambong sila sa Cristianong mga miting sa sulod sang pila ka bulan, kag pagkatapos sini nagpasugot si Beryl nga magtuon sa Biblia kag nangin isa sia ka Saksi. Sa sulod sang pila ka tuig, nakaalagad si Beryl subong regular payunir.

[Kahon sa pahina 22]

“Isa Gid ka Pagpakamaayo nga Kaupod Namon Sila”

Ang mga nagsaylo sa mga lugar diin kinahanglan pa ang dugang nga mga manugbantala sang Ginharian ginaapresyar gid sang lokal nga mga kauturan. Ang isa ka sanga talatapan sa Caribbean nagsulat: “Kon magpauli sa ila pungsod ang ginatos nga nagaalagad diri, maapektuhan gid ang kongregasyon. Isa gid ka pagpakamaayo nga kaupod namon sila.”

Ang Pulong sang Dios nagasiling nga “ang mga babayi nga nagabantala sing maayong balita isa daku nga hangaway.” (Sal. 68:11, NW) Gani indi katingalahan nga madamo sang di-minyo nga mga utod nga babayi ang nagaalagad sa iban nga pungsod. Daku gid nga bulig ining masinakripisyuhon sa kaugalingon nga mga utod nga babayi. Ang isa ka sanga talatapan sa Sidlangan nga Europa nagsiling: “Sa madamo nga kongregasyon diri, mas madamo ang utod nga babayi, kag sa iban gani nga kongregasyon, sobra sa katunga sang mga manugbantala ang babayi. Kalabanan sa ila bag-uhan pa lang, apang ginbuligan sila sang di-minyo nga mga utod nga babayi nga payunir nga naghalin sa iban nga pungsod. Ini nga mga utod nga babayi isa gid pagpakamaayo para sa amon!”

Ano ang nabatyagan sining mga utod nga babayi sa ila pag-alagad sa iban nga pungsod? “Madamo sing kabudlayan,” siling ni Angelica, isa ka utod nga mga 35 ang edad kag tinuig na nga nagaalagad sa iban nga pungsod subong di-minyo nga payunir. “Sa isa ka asaynment, nagalakat ako kada adlaw sa lutakon nga dalan kag makita ko ang pag-antos sang mga tawo kag naluoy gid ako sa ila. Apang nalipay ako nga buligan ang mga tawo sa ministeryo. Natandog man ako nga pirme ako ginapasalamatan sang lokal nga mga kauturan nga babayi bangod sa akon pagkadto sa ila lugar agod magbulig sa ila. Ginsilingan ako sang isa ka utod nga babayi nga ang akon maayo nga halimbawa sa paglakbay sing malayo pakadto sa ila pungsod agod magpayunir nagpalig-on sa iya nga magpayunir man.”

Si Sue, isa ka payunir nga bag-o lang mag-50 anyos nagsiling: “Makaatubang ka sing mga kabudlayan, pero diutay lang ini ko ipaanggid sa mga pagpakamaayo nga imo mabaton. Makalilipay gid ang ministeryo! Madamo nga tion nga nagaalagad ako upod sa pamatan-on nga mga utod nga babayi, kag ginpaambit ko sa ila ang akon natun-an sa Biblia kag sa aton mga publikasyon kon paano atubangon ang mga kabudlayan. Nagsiling sila nga ang akon halimbawa sa pagbatas kag sa pagsolbar sa mga problema samtang nagaalagad subong di-minyo nga payunir sa sulod sang madamo nga tinuig nagpahunahuna sa ila nga mahimo man nila malampuwasan ang mga kabudlayan sa ila kabuhi. Naghatag gid sa akon sang daku nga kalipay ang pagbulig sa sining mga utod.”

[Mapa sa pahina 20]

(Para sa aktual nga pormat, tan-awa ang publikasyon)

MEXICO

Monterrey

Guanajuato

Irapuato

Chapala

Ajijic

Lake Chapala

San Miguel de Allende

Querétaro

MEXICO CITY

Cancún

[Retrato sa pahina 23]

Ang pila nalipay sa pagpanaksi sa mga dumuluong nga wala pa gid nakabati sang mensahe sang maayong balita