Magdiretso sa kaundan

Magdiretso sa listahan sang kaundan

Takus si Jehova nga Dayawon Naton Tanan

Takus si Jehova nga Dayawon Naton Tanan

 Takus si Jehova nga Dayawon Naton Tanan

“Dayawa ninyo ang GINOO.”—SAL. 111:1.

1, 2. Ano ang kahulugan sang “Aleluya,” kag paano ini gingamit sa Cristianong Griegong Kasulatan?

“ALELUYA!” Ini nga tinaga pirme mabatian sa mga simbahan sang Cristiandad. Pirme man ini ginagamit sang iban sa ila adlaw-adlaw nga paghambalanay. Apang, diutay lang ang nakahibalo sang sagrado nga kahulugan sini, kag ang pagkabuhi sang kalabanan nga nagagamit sini wala nagapadungog sa Dios. (Tito 1:16) Suno sa isa ka diksionaryo sang Biblia, ang “Aleluya” isa ka “tinaga nga ginagamit sang mga manunulat sang lainlain nga salmo agod agdahon ang tanan nga mag-upod sa pagdayaw kay Jehova.” Ang matuod, nagasiling ang pila ka iskolar sa Biblia nga ang “Aleluya” nagakahulugan nga “‘Dayawa ninyo si Jah,’ [nga amo] si Jehova.”

2 Ang New World Translation nagbadbad sang ekspresyon sa Salmo 111:1 nga “Dayawa ninyo si Jah!” Ang Griego nga porma sini nga ekspresyon makita sing apat ka beses sa Bugna 19:1-6 bilang pagsaulog sang kalaglagan sang butig nga relihion. Kon matabo na ini, ang matuod nga mga sumilimba may rason gid nga gamiton ang “Aleluya” sa matinahuron nga paagi.

Ang Iya Dalagku nga mga Binuhatan

3. Ano ang panguna nga katuyuan sang aton regular nga pagtilipon?

3 Ang nagkomposo sang Salmo 111 naghatag sing madamo nga rason kon ngaa dayawon gid naton tanan si Jehova. Ang bersikulo 1 nagsiling: “Magapasalamat ako sa GINOO sa bug-os kong tagiposoon, sa sinapul sang matadlong, sa katilingban.” Amo gid sini ang ginabatyag sang mga Saksi ni Jehova karon. Ang panguna nga katuyuan sang aton regular nga pagtilipon sa kongregasyon kag sa mga kombension, amo nga dayawon si Jehova.

4. Paano ginpangita sang mga tawo ang mga binuhatan ni Jehova?

4 “Ang mga binuhatan sang GINOO dalagku, nga ginpangita sang tanan nga may kahamuut sini.” (Sal. 111:2) Talupangda ang ekspresyon nga “ginpangita.” Suno sa isa ka reperensia, ini nga bersikulo mahimo ipatuhoy sa mga tawo nga “nagatuon kag nagapamalandong gid sing maayo” sa mga binuhatan sang Dios. Ang mga tinuga ni Jehova may dalayawon nga katuyuan. Ang adlaw, duta, kag bulan, naplastar sing maayo agod ang aton duta may kainit, kasanag, gab-i kag adlaw, mga panahon, kag may hunas kag taub.

5. Ano ang ginapakita sang dugang nga pagtuon sang tawo tuhoy sa uniberso?

5 Natun-an sing maayo sang mga sientipiko ang nahamtangan sang aton duta sa sistema solar subong man ang eksakto gid nga orbito, kag kadakuon sang aton bulan. Ang plastada kag pagbuligay sining mga butang sa kalangitan nagaresulta sa matahom kag regular nga pagbag-obag-o sang  panahon. Madamo naman ang natun-an tuhoy sa mga puersa sa uniberso nga napasibu sing maayo. Gani, sa artikulo nga “Ang Gindesinyo ‘sing Maayo’ nga Uniberso,” ang isa ka propesor sa mechanical engineering nagsiling: “Indi katingalahan nga nagbag-o ang pensar sang madamo nga sientipiko sa nagligad nga 30 ka tuig, nga nagaugyon nga mabudlay patihan nga nagtuhaw lamang ang uniberso. Samtang nagadamo ang ila natun-an tuhoy sa duta, nagadugang man ang mga rason kon ngaa patihan nga may maalam gid nga nagdesinyo sini.”

6. Ano ang imo masiling sa kon paano gintuga sang Dios ang tawo?

6 Ang isa pa ka daku nga binuhatan sang Dios amo ang iya pagtuga sa aton. (Sal. 139:14) Sang gintuga sang Dios ang mga tawo, ginhimuan niya sila sing hunahuna, sing lawas nga kompleto sa kinahanglanon nga mga organo, subong man sing abilidad kag ikasarang nga magtrabaho. Halimbawa, katingalahan gid ang ginhatag sang Dios nga mga ikasarang sa paghambal kag pagpamati, subong man sa pagsulat kag pagbasa. Madamo nga tawo ang may yara sini nga mga ikasarang. Yara man sa imo ang isa ka dalayawon nga lawas nga may ikasarang sa pagtindog sing tiso. Dalayawon gid ang desinyo kag pagkabalanse sang imo lawas, ang ikasarang sini sa pagpanghikot kag pagtrabaho, kag ang kemikal nga mga proseso sa sulod sini. Isa pa, wala gihapon matupungan sang mga sientipiko ang makatilingala nga mga koneksion sang mga ugat nga amo ang nagapahulag sa aton hunahuna kag igbalatyag. Ang matuod, ang mga hinimuan sang tawo nangin posible lamang bangod sa hunahuna kag igbalatyag nga yara sa iya. Bisan ang pinakaeksperiensiado nga enhinyero indi makahimo sing butang nga pareho katahom kag ka mapuslanon sa aton gindesinyo sing makatilingala nga mga tudlo. Pamangkuta ang imo kaugalingon, ‘Mahimo bala ang dalayawon nga mga taliambong kag mga tinukod kon wala ining mga tudlo nga ginhatag sang Dios sa aton?’

Ang Dalagku nga mga Binuhatan sang Dios kag ang Iya mga Kinaiya

7. Ngaa dapat naton kabigon ang Biblia nga isa sa daku nga mga buhat sang Dios?

7 Ang dalagku nga mga binuhatan ni Jehova nagalakip sang iban pa dalayawon nga mga butang nga ginhimo niya para sa katawhan, subong sang ginlaragway sa Biblia. Ang Biblia mismo isa ka daku nga buhat ni Jehova kag ang mga tulun-an sini nagahisantuanay. Indi kaangay sa iban nga libro, ‘gintuytuyan ini sang Dios kag mapuslanon sa pagpanudlo.’ (2 Tim. 3:16) Halimbawa, ang una nga tulun-an sa Biblia nga Genesis, nagapaathag kon paano gindula sang Dios ang kalautan sa duta sang panahon ni Noe. Ang ikaduha nga tulun-an, ang Exodo, nagasugid kon paano ginbindikar ni Jehova ang iya pagka-Dios paagi sa pagluwas sa Israel gikan sa pagkaulipon sa Egipto. Mahimo nga amo ini nga mga hitabo ang ginahunahuna sang salmista sang magsiling sia: “Ang iya [Jehova] binuhatan kadungganan kag pagkahari, kag ang iya pagkamatarung nagapadayon sa gihapon. Nahimo niya nga dumdumon ang iya makatilingala nga mga binuhatan; ang GINOO mainayohon kag maloloy-on.” (Sal. 111:3, 4) Indi bala nga ang mga binuhatan ni Jehova halin sang una, tubtob sa imo karon panahon, nagapahanumdom sang iya “kadungganan kag pagkahari”?

8, 9. (a) Ano ang kinatuhayan sang mga binuhatan sang Dios sa mga binuhatan sang tawo? (b) Ano ang pila sa mga kinaiya sang Dios nga nanamian mo?

8 Talupangda nga ginapadaku man sang salmista ang matahom nga mga kinaiya ni Jehova subong sang pagkamatarong, pagkamainayuhon, kag kaluoy. Nahibaluan mo nga ang mga buhat sang makasasala nga mga tawo wala gid nabase sa pagkamatarong. Pirme ini nagapakita sing kakagod, kahisa, kag bugal. Makita ini sa makahalalit nga mga hinganiban nga ginhimo sang tawo para sa mga inaway nga sila man ang nag-umpisa kag para makakuarta. Nagadala ini sing pag-antos kag kahadlok sa minilyon ka inosente nga mga biktima. Madamo man sing ginahimo ang tawo nga nagapaantos sa mga kubos. Ang isa ka halimbawa sini amo ang paggamit sing mga ulipon sa pagtukod sang mga pyramid. Gintukod ini agod mangin lulubngan sang bugalon nga mga Paraon. Dugang pa, madamo sing mga proyekto karon nga indi lamang mapiguson kundi “nagalaglag sang duta.”—Basaha ang Bugna 11:18.

9 Tuhay gid ini sa mga binuhatan ni Jehova nga nabase sa kon ano ang matarong sa tanan nga  tion! Nalakip sa sini ang iya aman nga kaluwasan para sa makasasala nga mga tawo. Sa pag-aman sing gawad, ‘ginpakita sang Dios ang iya kaugalingon nga pagkamatarong.’ (Roma 3:25, 26) Matuod gid nga ang “iya pagkamatarung nagapadayon sa gihapon”! Ang pagkamainayuhon naman sang Dios makita sa iya pagpailob sa makasasala nga mga tawo. Kon kaisa, nagapangabay pa sia sa mga tawo nga isikway ang ila malaut nga mga dalanon kag maghimo sing maayo.—Basaha ang Ezequiel 18:25.

Matutom sa Iya mga Saad

10. Paano nangin matutom si Jehova sa iya katipan kay Abraham?

10 “Naghatag sia sing kalan-on sa mga nagakahadluk sa iya; sia madinumdumon sang iya katipan.” (Sal. 111:5) Posible nga ginapatuhuyan diri sang salmista ang Abrahamiko nga katipan. Nagsaad si Jehova nga pakamaayuhon niya ang binhi ni Abraham kag nagsiling nga panag-iyahan nila ang gawang sang ila mga kaaway. (Gen. 22:17, 18; Sal. 105:8, 9) Sa una nga katumanan sining mga saad, ang binhi ni Abraham nangin pungsod sang Israel. Ini nga pungsod naulipon sing malawig sa Egipto, apang “ang Dios nagdumdum sang iya katipan kay Abraham” kag ginluwas sila. (Ex. 2:24) Ang pagpakig-angot ni Jehova sa ila nagapakita kon daw ano sia kaalwan. Gin-amanan niya sila sing pisikal kag espirituwal nga pagkaon. (Deut. 6:1-3; 8:4; Neh. 9:21) Sa nagsunod nga mga siglo, pirme nila ginsikway ang Dios bisan pa nagpadala sia sing mga manalagna agod palig-unon sila nga manumbalik. Sobra 1,500 ka tuig sa tapos ginluwas ang mga Israelinhon gikan sa Egipto, ginpadala sang Dios ang iya bugtong nga Anak sa duta. Ginsikway sang kalabanan nga Judiyo si Jesus kag ginpapatay. Nian, naghimo si Jehova sing bag-o nga pungsod, ang simbuliko nga “Israel sang Dios.” Upod kay Cristo, ini nga pungsod amo ang espirituwal nga binhi ni Abraham nga gintagna ni Jehova nga gamiton Niya agod pakamaayuhon ang mga tawo.—Gal. 3:16, 29; 6:16.

11. Paano ni Jehova padayon nga ‘ginadumdom ang iya katipan’ kay Abraham?

11 Si Jehova padayon nga ‘nagdumdom sang iya katipan’ kag sang ginsaad nga mga pagpakamaayo sini. Sa karon, nagaaman sia sing bugana nga espirituwal nga pagkaon sa sobra sa 400 ka lenguahe. Dugang pa, padayon niya nga ginaaman ang aton mga kinahanglanon bilang sabat sa sini nga pangamuyo: “Hatagi kami karon nga adlaw sang amon pagkaon suno sa kinahanglan sa sini nga adlaw.”—Luc. 11:3; Sal. 72:16, 17; Isa. 25:6-8.

Ang Makahalawhaw nga Gahom ni Jehova

12. Sa ano nga paagi ginhatagan ang Israel sadto sang “panublion sang mga pungsud”?

12 “Ginpakitaan niya ang iya katawohan sang gahum sang iya mga binuhatan, sa paghatag sa ila sang panublion sang mga pungsud.” (Sal. 111:6) Ang isa ka talalupangdon nga hitabo sa Israel sadto nga ginahunahuna sang salmista amo ang milagruso nga pagluwas sa ila gikan sa Egipto. Sang ginpasulod na ni Jehova ang mga Israelinhon sa Ginsaad nga Duta, napierde nila ang mga ginharian sa sidlangan kag sa katundan sang Suba Jordan. (Basaha ang Nehemias 9:22-25.) Huo, ginhatagan ni Jehova ang Israel sang “panublion sang mga pungsud.” Ginapakita sini kon daw ano gid ka gamhanan ang Dios!

13, 14. (a) Ano nga pagpakita sang gahom sang Dios may kaangtanan sa Babilonia ang ginahunahuna sang salmista? (b) Ano pa nga daku nga buhat sang pagluwas ang nahimo ni Jehova?

13 Apang nahibaluan man naton nga sa pihak sang tanan nga ginhimo ni Jehova para sa Israel, wala sila nagpakita sing pagtahod sa iya ukon sa ila mga katigulangan nga sanday Abraham, Isaac, kag Jacob. Padayon sila nga nagrebelde sa Dios asta nga gingamit sang Dios ang Babilonia agod kuhaon sila sa ila duta kag itapok. (2 Cron. 36:15-17; Neh. 9:28-30) Kon ang nagkomposo sang Salmo 111 nagkabuhi sa tapos nagbalik ang mga Israelinhon halin sa pagkatapok sa Babilonia, suno sa ginasiling sang pila ka mga iskolar sang Biblia, may daku pa gid sia nga rason nga dayawon si Jehova bangod sa Iya katutom kag gahom. Ginpakita ini sang Dios paagi sa pagluwas sa mga Judiyo gikan sa Babilonia, ang emperyo nga wala gid nagapagua sang iya mga bihag.—Isa. 14:4, 17.

14 Mga lima ka siglo sang ulihi, gingamit ni Jehova ang iya gahom sa mas daku pa nga paagi. Ginluwas niya ang mahinulsulon nga mga tawo  halin sa pagkaulipon sa sala kag kamatayon. (Roma 5:12) Nagbukas ini sing kahigayunan para sa 144,000 ka tawo nga mangin hinaplas sang espiritu nga sumulunod ni Cristo. Sang 1919, gingamit ni Jehova ang iya gahom agod luwason ang diutay nga nagkalabilin sining hinaplas halin sa pagkaulipon sa butig nga relihion. Nangin madinalag-on sila sa sining tion sang katapusan bangod sa gahom sang Dios. Kon magpabilin sila nga matutom tubtob sa kamatayon, mangin kaupod sila ni Jesucristo nga magagahom sa langit para makabenepisyo ang mahinulsulon nga mga tawo diri sa duta. (Bug. 2:26, 27; 5:9, 10) Sa mas daku nga katumanan, panublion nila ang duta kaangay sang Israel sadto.—Mat. 5:5.

Walay Katapusan kag Malig-on nga mga Prinsipio

15, 16. (a) Ano ang nalakip sa mga binuhatan sang Dios? (b) Ano ang mga mando sang Dios sa Israel sadto?

15 “Ang mga binuhatan sang iya mga kamut mga kamatooran kag katarungan; ang tanan niyang sogo malig-on, ginapalig-on sila sa gihapon kag sa gihapon, ginhimo sila sa kamatooran kag sa pagkatadlong.” (Sal. 111:7, 8) Nalakip sa ‘mga binuhatan sang mga kamot ni Jehova’ amo ang duha ka tapitapi nga bato nga ginsulatan sang napulo ka importante nga kasuguan sang Israel. (Ex. 31:18) Ini nga mga kasuguan lakip ang iban pa nga mga pagsulundan nga nangin bahin sang katipan sang Mosaikong Kasuguan, nabase sa walay katapusan kag malig-on nga mga prinsipio.

16 Halimbawa, isa sa mga mando ukon mga kasuguan nga yara sa mga tapitapi ang nagasiling: “Ako ang GINOO nga imo Dios maimon nga Dios [“isa ka Dios nga nagapatuman sang eksklusibo nga debosyon,” NW].” Nagsiling pa ini nga si Jehova “nagapakita sing malig-on nga paghigugma sa linibo sang mga nagahigugma sa [iya] kag nagabantay sang [iya] mga sogo.” Nagaunod man ini sang wala nagalubad nga mga prinsipio subong sang “tahora ang imo amay kag ang imo iloy” kag “dili ka magpangawat.” Lakip man sa sini ang mapuslanon nga kasuguan nga nagadumili sa pagkaibog sa mga butang nga iya sang iban.—Ex. 20:5, 6, 12, 15, 17.

Ang Aton Balaan kag Makahalawhaw nga Manunubos

17. Ano ang mga rason nga pakabalaanon sang mga Israelinhon ang ngalan sang Dios?

17 “Nagpadala sia sing pagtubus sa iya katawohan; sia nagsogo sang iya katipan sa gihapon. Balaan kag yayauban [“makahalawhaw,” NW] ang iya ngalan.” (Sal. 111:9) Sa liwat, mahimo nga ginahunahuna sang salmista ang katutom ni Jehova sa iya saad kay Abraham. Sa pagtuman sini,  wala ginpabay-an ni Jehova ang iya katawhan sa pagkaulipon sa Egipto sadto, kag sang nabihag sila sa Babilonia sang ulihi. Sa pareho nga kahimtangan, gintubos ni Jehova ang iya katawhan. Bisan sa sining duha lang ka rason, dapat kuntani nga ginpakabalaan gid sang Israel ang ngalan sang Dios.—Basaha ang Exodo 20:7; Roma 2:23, 24.

18. Ngaa ginakabig mo nga pribilehiyo ang pagdala sang ngalan sang Dios?

18 Matuod man ini sa mga Cristiano karon nga gintubos halin sa wala na sing paglaum nga pagkaulipon sa sala kag kamatayon. Dapat naton himuon ang aton bug-os nga masarangan nga sundon ang una nga pangabay sa modelo nga pangamuyo: “Pakabalaanon ang imo ngalan.” (Mat. 6:9) Ang pagpamalandong sa sining mahimayaon nga ngalan magapahulag sa aton nga magkahadlok sa Dios. Ang manunulat sang Salmo 111 may husto nga pagtamod sa kahadlok sa Dios, nga nagasiling: “Ang kahadluk sa GINOO amo ang pamuno sang kaalam; ang tanan nga nagahimo sang iya mga sogo may maayong paghangup.”Sal. 111:10.

19. Ano ang pagabinagbinagon naton sa masunod nga artikulo?

19 Ang mapuslanon nga kahadlok sa Dios makabulig sa aton nga dumtan ang malaut. Makabulig man ini sa aton nga ilugon ang matahom nga mga kinaiya sang Dios nga ginapakita sa Salmo 112, nga pagabinagbinagon naton sa masunod nga artikulo. Ginapakita sini kon paano kita malakip sa minilyon nga magakalipay sa pagdayaw sa Dios sing dayon. Takus gid Sia sa sini nga pagdayaw. “Ang iya pagdayaw nagapadayon sa gihapon!”Sal. 111:10.

Mga Pamangkot Para Pamalandungan

• Ngaa dapat naton tanan dayawon si Jehova?

• Ano nga mga kinaiya ni Jehova ang makita sa iya mga binuhatan?

• Ano ang imo pagtamod sa pribilehiyo nga dal-on ang ngalan sang Dios?

[Mga Pamangkot sa Pagtinuon]

[Retrato sa pahina 20]

Ang panguna nga katuyuan sang aton regular nga pagtilipon amo nga dayawon si Jehova

[Retrato sa pahina 23]

Ang tanan nga kasuguan ni Jehova nabase sa walay katapusan kag malig-on nga mga prinsipio