Magdiretso sa kaundan

Magdiretso sa listahan sang kaundan

Ang mga Matarong Magadayaw sa Dios sing Dayon

Ang mga Matarong Magadayaw sa Dios sing Dayon

 Ang mga Matarong Magadayaw sa Dios sing Dayon

“Ang matarung dumdumon sing dayon . . . Ang iya pagkamatarung nagapadayon sa gihapon.”—SAL. 112:6, 9.

1. (a) Ano ang matahom nga palaabuton sang mga tawo nga matarong sa pagtamod sang Dios? (b) Ano ang nag-utwas nga pamangkot?

MAY matahom gid nga palaabuton ang mga tawo nga matarong sa pagtamod sang Dios! Magakalipay sila sa walay katapusan nga pagtuon tuhoy sa matahom nga mga kinaiya ni Jehova. Dayawon pa gid nila ang Dios samtang ginatun-an nila sing dugang pa ang iya mga binuhatan. Ang isa sa panguna nga kinahanglanon agod matigayon ining makalilipay nga palaabuton amo ang “pagkamatarung,” nga ginpadaku sa Salmo 112. Si Jehova balaan kag matarong nga Dios, gani paano niya matamod nga matarong ang makasasala nga mga tawo? Bisan pa ginatinguhaan gid naton nga himuon ang husto, nagapakasala gihapon kita, kag kon kaisa mabug-at pa.—Roma 3:23; Sant. 3:2.

2. Ano ang duha ka milagro nga ginhimo ni Jehova bangod sang iya gugma?

2 Mahigugmaon nga nag-aman si Jehova sing paagi agod matamod niya nga matarong ang makasasala nga mga tawo. Paano? Una, paagi sa milagruso nga pagsaylo sang kabuhi sang iya hinigugma nga Anak sa taguangkan sang isa ka ulay agod mabun-ag subong isa ka himpit nga tawo. (Luc 1:30-35) Sa tapos nga ginpatay si Jesus sang iya mga kaaway, naghimo naman si Jehova sang isa ka talalupangdon nga milagro. Ginbanhaw  sang Dios si Jesus subong isa ka mahimayaon nga espiritu nga persona.—1 Ped. 3:18.

3. Ngaa nalipay si Jehova nga padyaan sing kabuhi sa langit ang iya Anak?

3 Ginpadyaan ni Jehova si Jesus sing di-malaglag nga kabuhi sa langit, isa ka butang nga wala anay sa iya antes sia nangin tawo sa duta. (Heb. 7:15-17, 28) Nalipay si Jehova sa paghatag sini nga padya kay nangin matutom si Jesus bisan pa sa mabudlay gid nga mga pagtilaw. Sa amo, nahatag ni Jesus sa iya amay ang pinakamaayo kag pinakakompleto nga sabat sa kabutigan ni Satanas nga ang mga tawo nagaalagad sa Dios para lamang sa ila kaugalingon nga kaayuhan kag indi tungod sa daku nga gugma.—Hulu. 27:11.

4. (a) Pagbalik ni Jesus sa langit, ano ang iya ginhimo para sa aton, kag ano ang reaksion ni Jehova? (b) Ano ang imo nabatyagan sa ginhimo ni Jehova kag ni Jesus para sa imo?

4 Sa langit, madamo pa sing ginhimo si Jesus. ‘Nag-atubang sia sa Dios mismo para sa aton’ upod ang balor sang “iya kaugalingon nga dugo.” Ginbaton sang aton mahigugmaon nga Amay sa langit ang hamili nga halad ni Jesus subong “nagapasag-uli nga halad para sa aton mga sala.” Gani, upod ang ‘matinlo nga konsiensia,’ makahimo kita sing “sagrado nga pag-alagad sa buhi nga Dios.” Nagahatag ini sa aton sing rason nga mag-ugyon sa nagabukas nga pinamulong sang Salmo 112, “Dayawa ninyo ang GINOO.”Heb. 9:12-14, 24; 1 Juan 2:2.

5. (a) Ano ang dapat naton himuon agod makapabilin nga matarong sa pagtamod sang Dios? (b) Paano ginplastar ang Salmo 111 kag Salmo 112?

5 Agod makapabilin kita nga matarong sa pagtamod sang Dios, dapat kita padayon nga magpakita sing pagtuo sa ginpatulo nga dugo ni Jesus. Dapat gid nga pasalamatan naton si Jehova adlaw-adlaw kay ginahigugma gid niya kita. (Juan 3:16) Kinahanglan man nga padayon naton nga tun-an ang Pulong sang Dios kag himuon ang aton bug-os nga masarangan nga sundon ini. Ang Salmo 112 nagaunod sing mga laygay para sa tanan nga luyag maghupot sing matinlo nga konsiensia sa atubangan sang Dios. Ini nga salmo naangot sa Salmo 111. Pareho ini nga nagasugod sa “Dayawa ninyo ang GINOO” ukon “Aleluya.” Ginasundan ini sang 22 ka dinalan. Sa orihinal nga Hebreo, ang kada dinalan nagasugod sa isa sa 22 ka letra sang Hebreo nga alpabeto. *

Basihan sang Kalipay

6. Paano ginpakamaayo ang mahinadlukon sa Dios nga “tawo” sa Salmo 112?

6 “Bulahan ang tawo nga nagakadluk sa GINOO, nga nagakalipay sing daku sa iya mga sogo! Ang iya mga kaliwatan magagamhanan sa duta; ang kaliwatan sang matadlong [“mga matarong,” NW] pakamaayohon.” (Sal. 112:1, 2) Talupangda nga una nga ginsambit sang salmista ang isa ka “tawo” kag dayon gin-islan ini sing “mga matarong” sa ulihi nga bahin sang bersikulo 2. Ginapakita sini nga ang Salmo 112 nagapatuhoy sa isa ka grupo sang mga indibiduwal. Gingamit man ni apostol Pablo ang Salmo 112:9 may kaangtanan sa mga Cristiano sang unang siglo. (Basaha ang 2 Corinto 9:8, 9.) Ginapakita gid sini nga salmo kon paano mangin malipayon ang mga sumulunod ni Cristo sa duta karon.

7. Ngaa kinahanglan sang mga alagad sang Dios ang mapuslanon nga kahadlok sa iya, kag paano mo dapat tamdon ang mga sugo sang Dios?

 7 Subong sang ginapakita sang Salmo 112:1, ining matuod nga mga Cristiano malipayon gid samtang nagalakat sa ‘kahadluk sa GINOO.’ Ining mapuslanon nga kahadlok nga indi mapahamut-an ang Dios, makabulig sa ila nga pamatukan ang espiritu sang kalibutan ni Satanas. ‘Nagakalipay sila sing daku’ sa pagtuon sa Pulong sang Dios kag sa pagtuman sa iya mga sugo. Nalakip sa sini nga sugo ang pagbantala sing maayong balita sang Ginharian sa bug-os nga duta. Nagapanikasog sila nga mangin mga disipulo ang mga tawo sa tanan nga pungsod kag nagapaandam sa mga malaut tuhoy sa nagapakari nga adlaw sang paghukom sang Dios.—Ezeq. 3:17, 18; Mat. 28:19, 20.

8. (a) Paano ginapadyaan ang makugi nga mga alagad sang Dios karon? (b) Ano ang mga pagpakamaayo sa palaabuton para sa may paglaum nga mabuhi sa duta?

8 Sa karon, ang mga alagad sang Dios sa duta nagadamo sing sobra sa pito ka milyon, bangod gintuman nila ini nga mga sugo. Sin-o ang makapanghiwala nga ang iya katawhan “magagamhanan sa duta”? (Juan 10:16; Bug. 7:9, 14) Kag “pakamaayohon” sila sa ulihi kon tumanon na sang Dios ang iya katuyuan. Subong isa grupo, ang may paglaum nga mabuhi sa duta maluwas sa nagapakari nga “dakung kapipit-an” agod mangin bahin sang “bag-ong duta” nga sa sini “magapuyo ang pagkamatarong.” Nian, ang mga makalampuwas sa Armagedon “pakamaayohon” sing dugang pa. Abiabihon nila ang minilyon nga mga ginbanhaw. Isa gid ka makalilipay nga palaabuton! Sa ulihi, ang mga “nagakalipay sing daku” sa mga sugo sang Dios amat-amat nga mangin himpit kag makaagom sing “mahimayaon nga kahilwayan sang mga anak sang Dios” sing dayon.—2 Ped. 3:13; Roma 8:21.

Maalamon nga Paggamit sang Manggad

9, 10. Paano gingamit sang matuod nga mga Cristiano ang ila espirituwal nga manggad, kag paano magapadayon sa gihapon ang ila pagkamatarong?

9 “Pagkabutang kag manggad yara sa iya balay; kag ang iya pagkamatarung nagapadayon sa gihapon.  Sa matadlong may nagasilak nga kapawa sa kadudulman; ang GINOO mainayohon, maloloy-on, kag matarung.” (Sal. 112:3, 4) Sang panahon sang Biblia, may manggaranon man nga mga alagad ang Dios. Nangin manggaranon man ang mga ginakahamut-an sang Dios bisan pa nga imol sila sa materyal. Ang matuod, ang kalabanan nga nagapaubos sang ila kaugalingon sa Dios mahimo nga imol kag ginapakanubo, kaangay man sadto sang panahon ni Jesus. (Luc. 4:18; 7:22; Juan 7:49) Apang, manggaranon man ukon imol ang isa, puede sia mangin manggaranon sa espirituwal.—Mat. 6:20; 1 Tim. 6:18, 19; basaha ang Santiago 2:5.

10 Wala ginadingot sang hinaplas nga mga Cristiano kag sang ila mga kaupod ang ila espirituwal nga manggad. Sa baylo, “nagasilak” sila sa matadlong subong “kapawa sa kadudulman” sa sining kalibutan ni Satanas. Ginahimo nila ini paagi sa pagbulig sa iban nga matigayon ang hamili nga kaalam kag ihibalo sang Dios. Gintinguhaan gid sang mga manugpamatok nga pauntaton ang pagbantala sing Ginharian, pero napaslawan sila. Sa baylo, ang mga bunga sining matarong nga hilikuton, “nagapadayon sa gihapon.” Kon ang mga alagad sang Dios magpabilin nga matarong bisan may mga pagtilaw, pat-od gid nga magakabuhi sila kag ‘magapadayon sa gihapon.’

11, 12. Sa ano nga mga paagi ginagamit sang katawhan sang Dios ang ila materyal nga pagkabutang?

11 Ang katawhan sang Dios nga hinaplas nga ulipon nga klase kag ang mga katapo sang “dakung kadam-an” maalwan sa ila materyal nga pagkabutang. Ang Salmo 112:9 nagsiling: “Nakasabwag sia, nakahatag sia sa nawad-an.” Ang matuod nga mga Cristiano karon pirme nagahatag sing materyal nga amot sa ila mga masigka-Cristiano kag bisan sa iban nga nagakinahanglan. Ginagamit man nila ini sa pagbulig sa mga biktima sang kalamidad. Subong sa ginsiling ni Jesus, nagapahalipay gid ini sa mga mahinatagon.—Basaha ang Binuhatan 20:35; 2 Corinto 9:7.

12 Dugang pa, hunahunaa ang ginagasto sa pagbalhag sini nga magasin sa 172 ka lenguahe, nga ang kalabanan ginahambal sang imol nga mga tawo. Ini nga magasin matigayon man sa lainlain nga sign language para sa mga apa, kag sa Braille para sa mga bulag.

Mainayuhon kag May Katarungan

13. Sin-o ang pinakamaayo nga mga halimbawa sang mainayuhon nga paghatag, kag paano naton sila mailog?

13 “Maayo sa tawo nga mainayohon kag nagapahulam.” (Sal. 112:5) Mahimo natalupangdan mo nga indi tanan nga mabinuligon sa iban, mainayuhon. Ang iban nagapakitakita lang ukon nagapasusung-ol kon maghatag. Indi makalilipay nga magbaton sing bulig halin sa sini nga mga tawo. Sa pihak nga bahin, makapaumpaw gid nga magbaton sing bulig halin sa isa nga mainayuhon. Si Jehova amo ang pinakamaayo nga halimbawa sang isa ka mainayuhon kag malipayon nga Manughatag. (1 Tim. 1:11; Sant. 1:5, 17) Himpit nga ginpadayag ni Jesucristo ang pagkamainayuhon sang iya Amay. (Mar. 1:40-42) Gani, agod tamdon sang Dios nga matarong, malipayon kag mainayuhon kita nga nagahatag, ilabi na gid kon nagahatag kita sing espirituwal nga bulig sa iban paagi sa aton pagbantala.

14. Sa ano nga mga paagi ‘nagakabuhi kita sa katarungan kag katutom’?

14 “Magaapin sia sang iya kasaba sa paghukom [“nagakabuhi sa katarungan kag katutom,” Biblia sang Katilingban sang mga Kristiano].” (Sal. 112:5) Subong gintagna, ang matutom nga tulugyanan nga klase nagaatipan sang mga intereses sang Agalon suno sa katarungan ni Jehova. (Basaha ang Lucas 12:42-44.) Makita ini sa panuytoy sang Biblia sa mga gulang, nga nagauyat sang mabug-at nga mga kaso sa kongregasyon kon kaisa. Ang may katarungan nga pamaagi sang ulipon nga klase makita man sa ila panuytoy nga halin sa Biblia para sa pagpanghikot sang tanan nga kongregasyon, puluy-an sang mga misyonero, kag puluy-an Bethel. Kinahanglan ang katarungan indi lamang sang mga gulang kundi sa pagtamdanay man sang mga Cristiano kag sa pagpakig-angot sa mga di-tumuluo, kag pati sa negosyo.—Basaha ang Miqueas 6:8, 11.

 Mga Pagpakamaayo sa Matarong

15, 16. (a) Ano ang epekto sang malain nga mga balita sa mga matarong? (b) Ano ang padayon nga himuon sang mga alagad sang Dios?

15 “Kay indi sia mationg; ang matarung dumdumon sing dayon. Indi sia mahadluk sa malaut nga balita; ang iya tagiposoon mapag-on, nga nagasalig sa GINOO. Ang iya tagiposoon malig-on, indi sia mahadluk, tubtub nga makita niya ang iya handum sa iya mga kasumpung.” (Sal. 112:6-8) Indi matupungan ang malain nga mga balita karon, subong sang inaway, terorismo, bag-o ukon nagabalikbalik nga mga balatian, krimen, kaimulon, kag polusyon. Apektado sini bisan ang mga tawo nga ginatamod sang Dios nga matarong, apang wala ini nagapahadlok sa ila. Sa baylo, ang ila tagipusuon “mapag-on” kag “malig-on” samtang may pagsalig nila nga ginahulat ang malapit na nga bag-ong kalibutan sang Dios sa palaabuton. Kon may mga kabudlayan, mahapos sila nga makabatas bangod nagasalig sila sa pagsakdag ni Jehova. Wala niya ginatugutan nga “mationg” ang matarong. Ginahatagan niya sila sing bulig kag kusog nga makabatas.—Fil. 4:13.

16 Ang matarong nga mga alagad sang Dios nagaatubang man sing pagdumot kag mga kabutigan nga ginapalapta sang mga manugpamatok, pero wala sini mapauntat ang pagbantala sang matuod nga mga Cristiano kag indi gid ini mapauntat. Sa baylo, ang mga alagad sang Dios padayon nga malig-on kag indi mationg sa hilikuton nga ginhatag ni Jehova sa ila, nga ibantala ang maayong balita sang Ginharian kag himuon nga mga disipulo ang tanan nga magabaton. Pat-od nga magadugang pa gid ang pagpamatok samtang nagahilapit ang katapusan. Ang mga pagpamatok magadangat sa talipuspusan sini kon salakayon na ni Satanas nga Yawa ang bug-os nga kalibutan, subong Gog sang Magog. Sa katapusan, makita naton ang pagkalutos sang aton “mga kasumpung.” Makalilipay gid makita ang bug-os nga pagpakabalaan sa ngalan ni Jehova!—Ezeq. 38:18, 22, 23.

“Dayawon sing Mahimayaon”

17. Paano ang mga matarong “pataason nga may kadungganan”?

17 Makalilipay gid nga dayawon naton tanan si Jehova, nga wala sing pagpamatok sang Yawa kag sang iya kalibutan! Ang tanan nga may matinlo nga tindog sa atubangan sang Dios magakalipay sa pagdayaw kay Jehova sing dayon. Indi sila malutos kag mahuy-an, kay si Jehova mismo nagsaad nga ang “sungay” sang iya matarong “pataason nga may kadungganan.” (Sal. 112:9) Ang mga matarong magakalipay sa pagkalutos sang tanan nga nagapamatok sa pagkasoberano ni Jehova.

18. Paano matuman ang katapusan nga mga pinamulong sang Salmo 112?

18 “Ang malauton makakita sini kag magakalisud; magapabagrut sia sang iya mga ngipon kag matunaw; ang handum sang malauton madula.” (Sal. 112:10) Ang tanan nga nagapamatok sa katawhan sang Dios “matunaw” sa ila kahisa kag kaakig. Ang ila handum nga pauntaton ang aton hilikuton madula upod sa ila kon mag-abot na ang “dakung kapipit-an.”—Mat. 24:21.

19. Ano ang masaligan naton?

19 Isa ka bala sa mga malipayon nga maluwas sa sinang daku nga kadalag-an? Ukon kon mapatay ka bangod sa balatian ukon katigulangon antes laglagon ang kalibutan ni Satanas, isa ka bala sa mga “matarong” nga pagabanhawon? (Binu. 24:15) Ang sabat huo kon padayon ka nga magtuo sa halad gawad ni Jesus kag ilugon si Jehova, subong ginalaragway sang matarong nga “tawo” sa Salmo 112. (Basaha ang Efeso 5:1, 2.) Pat-uron ni Jehova nga ining mga matarong “dumdumon,” kag indi gid malipatan ang ila matarong nga mga binuhatan. Dumdumon sila ni Jehova kag higugmaon sa walay katubtuban.—Sal. 112:3, 6, 9.

[Nota]

^ par. 5 Ang pagplastar kag kaundan sining duha ka salmo nagapakita nga may kaangtanan ining duha ka kapitulo. Ang mga kinaiya sang Dios nga gindayaw sa Salmo 111, gin-ilog sang mahinadlukon sa Dios nga “tawo” sa Salmo 112. Makita ini kon ipaanggid naton ang Salmo 111:3, 4 sa Salmo 112:3, 4.

Mga Pamangkot Para Pamalandungan

• Ano ang pila ka rason sa pagsinggit sing “Aleluya”?

• Ano nga mga pag-uswag karon ang nagapalipay sa matuod nga mga Cristiano?

• Ano nga sahi sang manughatag ang ginahigugma ni Jehova?

[Mga Pamangkot sa Pagtinuon]

[Retrato sa pahina 25]

Agod mahuptan ang matarong nga tindog sa atubangan sang Dios, dapat kita magtuo sa ginpatulo nga dugo ni Jesus

[Retrato sa pahina 26]

Ang kinabubut-on nga mga amot makabulig sa mga biktima sang kalamidad kag sa pagpalapnag sing suno sa Biblia nga mga literatura