Magdiretso sa kaundan

Magdiretso sa listahan sang kaundan

Kon Paano Makapahalipay ang mga Pinamulong ni Jesus

Kon Paano Makapahalipay ang mga Pinamulong ni Jesus

 Kon Paano Makapahalipay ang mga Pinamulong ni Jesus

“Nagtaklad [si Jesus] sa bukid; kag . . . nagpalapit sa iya ang iya mga disipulo; kag . . . nagpanudlo sa ila.”—MAT. 5:1, 2.

1, 2. (a) Sa ano nga mga kahimtangan ginpahayag ni Jesus ang iya Sermon sa Bukid? (b) Paano ginsugdan ni Jesus ang iya pamulongpulong?

TUIG 31 C.E. sadto. Gin-untatan anay ni Jesus ang iya pagbantala sa Galilea agod saulugon ang Paskua sa Jerusalem. (Juan 5:1) Sang nakabalik na sia sa Galilea, bug-os nga gab-i sia nga nangamuyo agod tuytuyan sa pagpili sang 12 ka apostoles. Pagkasunod nga adlaw, nagdugok ang kadam-an samtang nagapang-ayo si Jesus. Nagpungko sia sa higad sang bukid kag nagpanudlo sa iya mga disipulo kag sa iban pa nga yara didto.—Mat. 4:23–5:2; Luc. 6:12-19.

2 Ginsugdan ni Jesus ang iya pamulongpulong—ang Sermon sa Bukid—paagi sa pagpakita nga ang kalipay resulta sang maayo nga kaangtanan sa Dios. (Basaha ang Mateo 5:1-12.) Ang kalipay ‘isa ka balatyagon sang pagkakontento kag tudok nga kasadya.’ Ang siam ka rason sa pagkalipay nga ginpahayag ni Jesus nagapatalupangod kon ngaa malipayon ang mga Cristiano, kag kon ngaa mapuslanon gihapon sa aton panahon ini nga mga pinamulong kaangay sang nagligad nga halos 2,000 ka tuig. Binagbinagon naton karon ang kada isa sini.

“Ang mga Mahunahunaon sang Ila Espirituwal nga Kinahanglanon”

3. Ano ang buot silingon sang mangin mahunahunaon sa espirituwal nga kinahanglanon?

3 “Malipayon ang mga mahunahunaon sang ila espirituwal nga kinahanglanon, kay ila ang ginharian sang langit.” (Mat. 5:3) “Ang mga mahunahunaon sang ila espirituwal nga kinahanglanon” nakahangop nga kinahanglan nila ang panuytoy kag kaluoy sang Dios.

4, 5. (a) Ngaa malipayon ang mga mahunahunaon sa ila espirituwal nga kinahanglanon? (b) Paano mabusog ang aton espirituwal nga kinahanglanon?

4 Malipayon ang mga mahunahunaon sang ila espirituwal nga kinahanglanon, “kay ila ang ginharian sang langit.” Ang pagbaton kay Jesus subong Mesias nagbukas sing kahigayunan sa iya una nga mga disipulo nga mangin kaupod niya sa paggahom sa langitnon nga Ginharian sang Dios. (Luc. 22:28-30) May paglaum man kita nga mangin masigkamanunubli ni Cristo sa langit ukon kabuhi nga dayon sa paraiso nga pagagamhan sang Ginharian, mangin malipayon kita kon ginahunahuna gid naton ang aton espirituwal nga kinahanglanon.

5 Indi tanan mahunahunaon sa ila espirituwal nga kinahanglanon kay madamo ang wala nagatuo kag nagaapresyar sa sagrado nga mga butang. (2 Tes. 3:1, 2; Heb. 12:16) Agod mabusog ang aton espirituwal nga kinahanglanon dapat mangin maukod kita sa pagtuon sa Biblia, makugi sa hilikuton nga paghimo-disipulo, kag regular sa pagtambong sa mga miting.—Mat. 28:19, 20; Heb. 10:23-25.

Ang mga Nagalalaw nga “Malipayon”

6. Sin-o ang “mga nagalalaw,” kag ngaa “malipayon” sila?

6 “Malipayon ang mga nagalalaw, kay lugpayan sila.” (Mat. 5:4) “Ang mga nagalalaw” kaangay man sa “mga mahunahunaon sang ila espirituwal nga kinahanglanon.” Wala sila nagalalaw tuhoy sa ila kahimtangan sa kabuhi. Nagalalaw sila bangod sang ila pagkamakasasala kag sang ila kahimtangan nga resulta sang ila pagkadihimpit. Ngaa “malipayon” ining mga nagalalaw? Bangod nagatuo sila sa Dios kag kay Cristo, nalugpayan sila paagi sa pagtigayon sing maayo nga kaangtanan kay Jehova.—Juan 3:36.

7. Ano dapat ang aton pagtamod sa kalibutan ni Satanas?

7 Nagalalaw bala kita sa lapnag nga kalautan sa kalibutan ni Satanas? Ano gid bala ang aton pagtamod  sa ginatanyag sang kalibutan? Nagsulat si apostol Juan: “Ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa—indi gikan sa Amay.” (1 Juan 2:16) Apang, ano ang aton dapat himuon kon matalupangdan naton nga ang aton espirituwalidad amat-amat na nga naimpluwensiahan sang “espiritu sang kalibutan,” nga amo ang makusog nga puersa nga nagapangibabaw sa mga tawo nga nahamulag sa Dios? Nian, mangamuyo kita sing hanuot, tun-an ang Pulong sang Dios, kag mangayo sing bulig sa mga gulang. Samtang nagasuod kita kay Jehova, ‘ginalipay’ kita sini, bisan ano man ang rason sang aton kahuol.—1 Cor. 2:12; Sal. 119:52; Sant. 5:14, 15.

Malipayon ang “mga Malulo”!

8, 9. Ano ang buot silingon sang kalulo, kag ngaa malipayon ang mga malulo?

8 “Malipayon ang mga malulo, kay magapanubli sila sang duta.” (Mat. 5:5) Ang “kalulo” ukon kahagop, indi isa ka kaluyahon ukon pakitakita nga kaayo. (1 Tim. 6:11) Kon malulo kita, ginapakita naton ang kahagop paagi sa pagtuman sa kabubut-on ni Jehova kag pagsunod sang iya panuytoy. Makita man ang aton kalulo sa aton pagpakig-angot sa mga kauturan kag sa iban. Ini nga kahagop nahisanto sa laygay ni apostol Pablo.—Basaha ang Roma 12:17-19.

9 Ngaa malipayon ang mga malulo? Bangod “magapanubli sila sang duta,” siling sang malulo nga si Jesus. Sia amo ang panguna nga Manunubli sang duta. (Sal. 2:8; Mat. 11:29; Heb. 2:8, 9) Apang, ang malulo nga “kaupod nga mga manunubli ni Cristo” magapanubli man sang duta. (Roma 8:16, 17) Sa dutan-on nga bahin sang Ginharian ni Jesus, madamo nga mahagop ang makatigayon sing kabuhi nga dayon.—Sal. 37:10, 11.

10. Kon indi kita malulo, ano ang epekto sini sa aton mga pribilehiyo kag sa aton kaangtanan sa iban?

10 Kaangay ni Jesus, dapat man kita mangin malulo. Apang kamusta kon kilala kita nga palaaway? Mahimo kita palayuan sang mga tawo bangod sini nga batasan. Kon utod kita nga lalaki nga nagatinguha sing mga responsibilidad sa kongregasyon, indi kita mangin kalipikado kon amo sini ang aton batasan. (1 Tim. 3:1, 3) Ginsilingan ni Pablo si Tito nga pirme pahanumdumon ang mga Cristiano sa Creta nga “indi mangin palaaway, nga mangin makatarunganon, kag nagapakita sang bug-os nga kalulo sa tanan nga tawo.” (Tito 3:1, 2) Pagpakamaayo gid sa iban ang kalulo!

Ginagutom Sila “sa Pagkamatarong”

11-13. (a) Ano ang buot silingon sang kagutom kag kauhaw sa pagkamatarong? (b) Paano “busgon” ang mga ginagutom kag ginauhaw sa pagkamatarong?

11 “Malipayon ang mga ginagutom kag ginauhaw sa pagkamatarong, kay busgon sila.” (Mat. 5:6) Ang “pagkamatarong” nga ginpatuhuyan ni Jesus amo ang paghimo sing husto suno sa kabubut-on kag mga sugo sang Dios. Nagsiling ang salmista nga ‘nagakaboong ang iya kalag sa paghandum’ sa matarong nga hudisyal nga mga desisyon sang Dios. (Sal. 119:20) Ginapabaloran gid bala naton ang pagkamatarong nga daw subong bala nga ginagutom kag ginauhaw kita sa sini?

12 Nagsiling si Jesus nga malipayon ang mga  ginagutom kag ginauhaw sa pagkamatarong bangod “busgon” sila. Nangin posible ini pagligad sang Pentecostes 33 C.E. kay ang balaan nga espiritu ni Jehova ‘naghatag sa kalibutan sing makapakumbinsi nga pamatuod nahanungod sa pagkamatarong.’ (Juan 16:8) Paagi sa balaan nga espiritu, gin-inspirar sang Dios ang mga lalaki sa pagtipon sing Cristianong Griegong Kasulatan, nga mapuslanon gid “sa pagdisiplina sa pagkamatarong.” (2 Tim. 3:16) Ginabuligan man kita sang espiritu sang Dios nga ‘masuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong.’ (Efe. 4:24) Indi bala makalulugpay mahibaluan nga ang mga mahinulsulon nga nagapangayo sing kapatawaran sang ila mga sala pasad sa halad gawad ni Jesus makatigayon sing matarong nga tindog sa Dios?—Basaha ang Roma 3:23, 24.

13 Kon ang aton paglaum diri sa duta, mabusog gid ang aton kagutom kag kauhaw sa pagkamatarong kon magkabuhi na kita sing dayon sa matarong nga kahimtangan sa duta. Apang samtang wala pa ini, mangin determinado kita nga magkabuhi suno sa talaksan ni Jehova. Si Jesus nagsiling: ‘Padayon nga pangitaa anay ang ginharian kag ang pagkamatarong sang Dios.’ (Mat. 6:33) Sa paghimo sini, mangin masako na kita sa mga buluhaton sang Dios kag matigayon naton ang matuod nga kalipay.—1 Cor. 15:58.

Kon Ngaa “Malipayon ang mga Maluluy-on”

14, 15. Paano kita makapakita sing kaluoy, kag ngaa malipayon ang “mga maluluy-on”?

14 “Malipayon ang mga maluluy-on, kay pakitaan sila sing kaluoy.” (Mat. 5:7) “Ang mga maluluy-on” ginapahulag sang kahanuklog kag kaluoy sa iban. Milagruso nga ginpaumpawan ni Jesus ang pag-antos sang madamo bangod naluoy sia sa ila. (Mat. 14:14) Mapakita man ang kaluoy paagi sa pagpatawad sang mga tawo sa mga nakasala sa ila, kaangay sang maluluy-on nga pagpatawad ni Jehova sa mga mahinulsulon. (Ex. 34:6, 7; Sal. 103:10) Mapakita naton ang kaluoy sa sina nga paagi kag paagi man sa aton mainayuhon nga mga hambal kag mga buhat nga makahatag sing kaumpawan sa mga kubos. Ang isa ka maayo nga paagi agod mapakita ang kaluoy amo ang pagpaambit sing mga kamatuoran gikan sa Biblia. Bangod naluoy si Jesus sa kadam-an, “nagpanudlo sia sa ila sang madamo nga butang.”—Mar. 6:34.

15 May rason kita sa pag-ugyon sa ginsiling ni Jesus: “Malipayon ang mga maluluy-on, kay pakitaan sila sing kaluoy.” Kon kaluy-an naton ang iban, mahimo nga kaluy-an man nila kita. Kon hukman kita sang Dios, mahimo nga indi niya kita pagsilutan kon nangin maluluy-on kita sa iban. (Sant. 2:13) Ang mga maluluy-on lamang ang patawaron sang ila mga sala kag makatigayon sing kabuhi nga dayon.—Mat. 6:15.

 Kon Ngaa “Malipayon ang mga Putli sing Tagipusuon”

16. Ano ang buot silingon sang mangin “putli sing tagipusuon,” kag paano nila ‘makita ang Dios’?

16 “Malipayon ang mga putli sing tagipusuon, kay makita nila ang Dios.” (Mat. 5:8) Kon ‘putli ang aton tagipusuon,’ makita ini sa kon ano ang aton prioridad, ang aton mga handum, kag ang aton mga motibo. Ipakita naton “ang gugma gikan sa matinlo nga tagipusuon.” (1 Tim. 1:5) Kon matinlo ang aton tagipusuon, ‘makita naton ang Dios.’ Wala ini nagapahangop nga literal naton nga makita si Jehova, “kay wala sing tawo nga makakita sa [Dios] kag mabuhi.” (Ex. 33:20) Apang, bangod himpit nga ginpadayag ni Jesus ang personalidad sang Dios, amo nga nakasiling sia: “Sia nga nakakita sa akon nakakita man sa Amay.” (Juan 14:7-9) Subong mga sumilimba ni Jehova diri sa duta, ‘makita naton ang Dios’ paagi sa pagtan-aw sa iya mga ginahimo para sa aton. (Job 42:5) Aktual nga makita sang hinaplas nga mga Cristiano ang ila langitnon nga Amay kon banhawon na sila sa espiritu nga kabuhi.—1 Juan 3:2.

17. Ano ang epekto sa aton kon putli ang aton tagipusuon?

17 Bangod matinlo sa moral kag sa espirituwal ang mga putli sing tagipusuon, wala sila nagahimo sing di-matinlo nga mga butang sa atubangan ni Jehova. (1 Cron. 28:9; Isa. 52:11) Kon putli ang aton tagipusuon, ang aton ginahambal kag ginahimo putli man, kag ang aton pag-alagad kay Jehova indi pakulahaw.

“Ang mga Makihidaiton” Mangin mga Anak sang Dios

18, 19. Ano ang ginahimo sang “mga makihidaiton”?

18 “Malipayon ang mga makihidaiton, kay tawgon sila nga ‘mga anak sang Dios.’” (Mat. 5:9) “Ang mga makihidaiton” makilal-an paagi sa ila ginahimo kag ginalikawan nga mga buhat. Kon kaangay kita sa mga tawo nga ginahunahuna ni Jesus, mga makihidaiton kita kag ‘wala nagabalos sang kahalitan sa kahalitan.’ Sa baylo, ‘ginatinguhaan naton pirme kon ano ang maayo para sa iban.’—1 Tes. 5:15.

19 Ang Griegong tinaga nga “makihidaiton” sa Mateo 5:9 literal nga nagakahulugan sing “manugpahidait.” Agod malakip kita sa mga makihidaiton, dapat nga ipasanyog naton ang paghidait. Ang mga manugpahidait “wala nagapabulag sa mahirup nga mga abyan.” (Hulu. 16:28) Subong mga makihidaiton ‘ginatinguhaan naton nga magpakighidait sa tanan nga tawo.’—Heb. 12:14.

20. Sin-o karon ang “mga anak sang Dios,” kag sin-o pa ang mangin mga anak sang Dios sa ulihi?

20 Malipayon ang mga makihidaiton bangod “tawgon sila nga ‘mga anak sang Dios.’” Gin-adoptar ni Jehova ang matutom nga hinaplas nga mga Cristiano, kag nangin ‘mga anak sila sang Dios.’ May suod na sila nga kaangtanan kay Jehova subong iya mga anak bangod nagtuo sila kay Cristo kag bug-os tagipusuon nga nagsimba sa “Dios sang gugma kag paghidait.” (2 Cor. 13:11; Juan 1:12) Kamusta naman ang mahidaiton nga “iban nga mga karnero” ni Jesus? Si Jesus amo ang ila “Amay nga Nagapadayon” sa iya Milenyo nga Paggahom, apang sa katapusan sini magapasakop sia kay Jehova kag sila tanan mangin mga anak sang Dios sa bug-os nga kahulugan.—Juan 10:16; Isa. 9:6; Roma 8:21; 1 Cor. 15:27, 28.

21. Paano kita nagapanghikot kon “nagakabuhi kita suno sa espiritu”?

21 Kon “nagakabuhi kita suno sa espiritu,” kinahanglan makita sa aton paggawi nga mahidaiton kita. Indi kita ‘magsugyot sang paindisanay sa isa kag isa’ ukon ‘maghangkatanay.’ (Gal. 5:22-26; PBS) Sa baylo, ginatinguhaan naton nga “magpakighidait sa tanan nga tawo.”—Roma 12:18.

 Malipayon Bisan Ginahingabot!

22-24. (a) Ngaa malipayon ang mga ginahingabot tungod sa pagkamatarong? (b) Ano ang binagbinagon naton sa masunod nga duha ka artikulo?

22 “Malipayon ang mga ginahingabot tungod sa pagkamatarong, kay ila ang ginharian sang langit.” (Mat. 5:10) Ginpaathag ini ni Jesus nga nagasiling: “Malipayon kamo kon ang mga tawo nagapakahuya kag nagahingabot sa inyo kag binutig nga nagahambal batok sa inyo sang tanan nga sahi sang kalautan tungod sa akon. Magkasadya kamo kag magtumbo sa kalipay, kay daku ang inyo padya sa langit; bangod ginhingabot man nila kaangay sini ang mga manalagna nga nauna sa inyo.”Mat. 5:11, 12.

23 Kaangay sang mga manalagna sang una, paabuton man sang mga Cristiano nga pakahuy-an, hingabuton, kag hambalan sila sing binutig “tungod sa pagkamatarong.” Apang, paagi sa matutom nga pagbatas sa sini nga mga pagtilaw, mangin malipayon kita bangod mapahamut-an kag mapadunggan naton si Jehova. (1 Ped. 2:19-21) Ang aton pag-antos indi makabuhin sang aton kalipay sa pag-alagad kay Jehova sa karon kag sa palaabuton. Indi man ini makabuhin sa kalipay sang mga makaupod ni Cristo sa paggahom ukon sa mga tawo nga magakabuhi sing dayon sa duta nga ila pagagamhan. Ini nga mga pagpakamaayo pamatuod sang kahamuot, kaayo, kag kaalwan sang Dios.

24 Madamo pa kita sing matun-an sa Sermon sa Bukid. Binagbinagon naton sa masunod nga duha ka artikulo ining nanuhaytuhay nga leksion. Tan-awon naton kon paano naton maaplikar ining mga pinamulong ni Jesucristo.

Ano ang Imo Sabat?

• Ngaa “malipayon ang mga mahunahunaon sa ila espirituwal nga kinahanglanon”?

• Ngaa malipayon ang “mga malulo”?

• Ngaa malipayon ang mga Cristiano bisan pa ginahingabot sila?

• Ano nga rason sa pagkalipay nga ginsambit ni Jesus ang nakapalig-on gid sa imo?

[Mga Pamangkot sa Pagtinuon]

[Retrato sa pahina 7]

Ang siam ka rason sa pagkalipay nga ginpadaku ni Jesus mapuslanon gihapon sa aton karon

[Retrato sa pahina 8]

Ang isa ka maayo nga paagi agod mapakita ang kaluoy amo ang pagpaambit sang mga kamatuoran sa Biblia