Magdiretso sa kaundan

Magdiretso sa listahan sang kaundan

“Kari Ka, Mangin Sumulunod Ko”

“Kari Ka, Mangin Sumulunod Ko”

 “Kari Ka, Mangin Sumulunod Ko”

‘Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos sa adlaw-adlaw kag magsunod sa akon.’—LUCAS 9:23.

1, 2. (a) Ano nga pangagda ang gintanyag ni Jesus? (b) Ano ang imo sabat sa pangagda ni Jesus?

SANG nagahingapos na ang ministeryo ni Jesus, nagpanaksi sia sa Perea, isa ka rehiyon sa tabok sang Jordan, sa aminhan-sidlangan sang Judea. Ginpalapitan sia sang pamatan-on nga lalaki kag ginpamangkot kon ano ang iya himuon agod matigayon ang kabuhi nga walay katapusan. Sang mahibaluan ni Jesus nga ginatuman gid sang pamatan-on ang Mosaikong Kasuguan, ginhatagan sia ni Jesus sing pinasahi nga imbitasyon: “Lakat ka, ibaligya ang imo mga pagkabutang kag ihatag ini sa mga imol, kag matigayon mo ang bahandi sa langit, kag kari ka, mangin sumulunod ko.” (Mar. 10:21) Hunahunaa lamang, gin-imbitar sia nga mangin sumulunod ni Jesus, ang bugtong nga anak sang Labing Mataas nga Dios!

2 Wala ginbaton sang pamatan-on ang pangagda, apang may iban nga nagbaton. Antes sini ginsilingan ni Jesus si Felipe: “Mangin sumulunod ko.” (Juan 1:43) Ginbaton ni Felipe ang pangagda kag sang ulihi nangin isa ka apostol ni Jesus. Gin-agda man ni Jesus si Mateo, kag ginbaton niya ini. (Mat. 9:9; 10:2-4) Ang matuod, ginaagda ni Jesus ang tanan nga mahigugmaon sa pagkamatarong: “Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos sa adlaw-adlaw kag padayon nga magsunod sa akon.” (Luc. 9:23) Gani bisan sin-o mahimo mangin sumulunod ni Jesus kon gustuhon gid sang isa. Luyag mo man bala nga mangin sumulunod niya? Madamo sa aton ang nagbaton na sa pangagda ni Jesus kag sa aton pagministeryo luyag man naton ipalab-ot ini nga pangagda sa iban.

3. Paano naton malikawan nga maanod palayo kay Jesus?

3 Apang, makapasubo nga may pila nga interesado anay sa kamatuoran sang Biblia nga wala na nagpadayon. Nagluya sila kag ‘naanod palayo’ kay Jesus. (Heb. 2:1) Paano naton malikawan nga maanod palayo? Mabuligan kita kon pamangkuton naton ang aton kaugalingon: ‘Ano gid bala ang rason kon ngaa ginasunod ko si Jesus? Ano ang nalakip sa pagsunod sa iya?’ Kon hunahunaon naton ang sabat sa sining duha ka pamangkot mangin determinado kita nga magpabilin sa husto nga dalan nga ginpili naton. Mabuligan man naton ang iban sa pagsunod kay Jesus.

Ngaa Dapat Naton Sundon si Jesus?

4, 5. Ngaa si Jesus ang kalipikado sa pagdumala sa aton?

4 Si manalagna Jeremias nagsiling: “O GINOO, nahibaloan ko nga ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.” (Jer. 10:23) Ginpamatud-an sang maragtas nga matuod ining mga pinamulong ni Jeremias. Maathag nga indi gid masarangan sang di-himpit nga mga tawo nga dumalahan sing nagakaigo ang ila kaugalingon. Ginbaton naton ang pangagda nga magsunod kay Jesus bangod nahibaluan naton nga magluwas sa iya wala na sing iban pa nga tawhanon nga lider nga sangkol sa pagdumala sa aton. Binagbinaga ang pila ka rason kon ngaa kalipikado gid si Jesus.

5 Una, si Jehova mismo ang nagpili sa iya nga mangin Mesias nga Lider. Sin-o pa bala ang mas nakahibalo kon sin-o ang maayo nga Lider para sa aton sangsa aton mismo Manunuga? Ikaduha, may dalayawon nga mga kinaiya si Jesus nga takus gid ilugon. (Basaha ang Isaias 11:2, 3.) Isa sia ka himpit nga huwaran para sa aton. (1 Ped. 2:21) Ikatlo, ginahigugma gid ni Jesus ang iya mga sumulunod, amo nga ginhatag niya ang iya kabuhi para sa ila. (Basaha ang Juan 10:14, 15.) Mapinalanggaon man sia nga manugbantay kay gintuytuyan niya kita sa kabuhi nga makapahalipay sa aton karon kag magadala sing dayon nga kalipay  sa palaabuton. (Juan 10:10, 11; Bug. 7:16, 17) Bangod sini kag sa iban pa nga mga rason, naghimo kita sing maalamon nga desisyon sang ginpili naton nga sundon sia. Apang ano ang nalakip sa pagsunod kay Jesus?

6. Ano ang nalakip sa pagsunod kay Jesus?

6 Agod mangin sumulunod ni Cristo, indi lamang bastante nga ginatawag kita nga mga Cristiano. Mga duha ka bilyon ka tawo karon ang nagapangangkon nga mga Cristiano, apang ang ila paggawi nagapakita nga sila “manugbuhat sang pagkamalinapason.” (Basaha ang Mateo 7:21-23.) Kon may magbaton sing imbitasyon nga magsunod kay Jesus, ginapaathag naton sa ila nga agod mangin matuod sila nga mga Cristiano kinahanglan nga ipahisuno nila kada adlaw ang ila bug-os nga pagkabuhi sa panudlo kag halimbawa ni Jesus. Agod ipakita kon ano ang kahulugan sini, binagbinaga ang pila ka butang nga nahibaluan naton tuhoy kay Jesus.

Iluga ang Kaalam ni Jesus

7, 8. (a) Ano ang kaalam, kag ngaa maalam gid si Jesus? (b) Paano ginpakita ni Jesus nga maalam gid sia, kag paano naton sia ilugon?

7 Madamo sing maayo nga kinaiya si Jesus, apang binagbinagon naton ang apat lang sa sini: ang iya kaalam, pagkamapainubuson, kakugi, kag gugma. Una, binagbinagon naton ang iya kaalam—ang ikasarang nga iaplikar ang ihibalo kag paghangop sa praktikal nga paagi. Si apostol Pablo nagsulat: “Natago sing maayo sa [kay Jesus] ang tanan nga bahandi sang kaalam kag ihibalo.” (Col. 2:3) Diin naghalin ang kaalam ni Jesus? Sia nagsiling: “Ginahambal ko ini nga mga butang suno gid sa gintudlo sa akon sang Amay.” (Juan 8:28) Ang iya kaalam naghalin kay Jehova, gani indi kita matingala kon ngaa maalam gid si Jesus.

8 Halimbawa, nangin maalam si Jesus sa pagpili sang iya dalanon sang pagkabuhi. Ginpasimple niya ang iya kabuhi agod makahinguyang sia sing mas madamo nga tion para sa isa lang ka hilikuton: ang paghimo sang kabubut-on sang Dios. Maalamon nga ginhugod niya ang iya tion kag kusog sa pagpasangkad sa intereses sang Ginharian. Ginasunod naton ang halimbawa ni Jesus paagi sa paghupot sing ‘simple nga mata,’ sa amo malikawan naton nga mapabug-atan ang aton kaugalingon sing di-kinahanglanon nga mga butang nga nagaubos sang aton kusog kag igtalupangod. (Mat. 6:22) Madamo nga Cristiano ang nagpasimple sang ila kabuhi agod makahinguyang sila sing mas madamo nga tion sa ministeryo. Ang iban sa ila nagpayunir. Kon ikaw isa ka payunir, takus ka gid sing komendasyon. Ang ‘padayon nga pagpangita anay sang ginharian’ nagahatag sing kalipay kag kaayawan.—Mat. 6:33.

Mangin Mapainubuson Kaangay ni Jesus

9, 10. Paano ginpakita ni Jesus ang pagkamapainubuson?

9 Ang ikaduha nga kinaiya ni Jesus nga aton binagbinagon amo ang iya pagkamapainubuson. Sa masami nagapabugal ang di-himpit nga mga tawo kon may yara sila sing awtoridad. Apang tuhay gid si Jesus! Bisan pa may daku sia nga papel sa pagtuman sa katuyuan ni Jehova, wala gid sia magpabugal. Ginapalig-on kita nga ilugon sia. Si apostol Pablo nagsulat: “Hupti ninyo ining panimuot sang hunahuna nga yara man kay Cristo Jesus, nga bisan pa nagluntad sia sa dagway sang Dios, wala sia maghunahuna nga mang-agaw, buot silingon, nga mangin tupong sia sa Dios. Wala, kundi gin-uba niya ini nga dagway kag nagsuklob sang dagway sang ulipon kag nangin kaanggid sa mga tawo.” (Fil. 2:5-7) Ano ang nalakip sa sini?

10 Nahamut-an gid ni Jesus ang iya kabuhi  upod sa iya Amay, apang kinabubut-on niya nga ginbiyaan ini. Ginsaylo ang iya kabuhi sa taguangkan sang isa ka Judiyo nga ulay. Kag pagkatapos sang siam ka bulan nabun-ag sia sa panimalay sang imol nga panday. Sa puluy-an ni Jose, amat-amat nga nagdaku si Jesus halin sa pagtakangtakang tubtob nangin isa ka pamatan-on. Himpit sia, apang sa bug-os niya nga pagkapamatan-on nagpasakop sia sa di-himpit nga mga ginikanan. (Lucas 2:51, 52) Tumalagsahon gid ang pagkamapainubuson ni Jesus!

11. Sa ano nga mga paagi mailog naton ang pagkamapainubuson ni Jesus?

11 Mailog naton si Jesus kon kinabubut-on naton nga himuon bisan ang daw kubos nga mga hilikuton. Halimbawa, binagbinaga ang aton hilikuton nga pagbantala sing maayong balita. Ginakabig sang iban nga kubos ini nga hilikuton ilabi na kon ang mga tawo wala nagasapak, nagapangyaguta, kag nagapamatok sa aton. Apang kon magpadayon kita sa pagbantala mabuligan naton sila nga batunon ang pangagda ni Jesus nga sundon sia, sa amo, maluwas sila. (Basaha ang 2 Timoteo 4:1-5.) Ang isa pa ka halimbawa amo ang pag-atipan sa aton Kingdom Hall. Nalakip sa sini amo ang pag-ula sing basura, paglampaso sa salog, kag pagtinlo sa kasilyas—ini tanan kubos nga mga hilikuton. Apang, nahibaluan naton nga ang pag-atipan sa aton Kingdom Hall—ang sentro sang putli nga pagsimba sa aton lugar—bahin sang aton sagrado nga pag-alagad. Kon kinabubut-on naton nga himuon ining daw kubos nga mga hilikuton, nagapakita kita sing pagkamapainubuson kag ginasunod naton ang mga tikang ni Cristo.

Mangin Makugi Kaangay ni Jesus

12, 13. (a) Paano ginpakita ni Jesus ang kakugi, kag ano ang nagpahulag sa iya? (b) Ano ang magapahulag sa aton nga mangin makugi sa ministeryo?

12 Binagbinaga ang kakugi ni Jesus sa ministeryo. Madamo sia sing ginhimo sang yari sia sa duta. Sang lamharon pa sia, mahimo nga nagapamanday sia upod sa iya amay-amay nga si Jose. Naghimo man si Jesus sing mga milagro, lakip na ang pag-ayo sa masakiton kag pagbanhaw sa patay. Apang ang iya panguna gid nga hilikuton amo ang pagbantala sing maayong balita kag pagtudlo sa mga tawo nga luyag mamati sa iya. (Mat. 4:23) Subong mga sumulunod ni Jesus, amo man sini ang dapat naton himuon. Paano naton ilugon ang iya halimbawa? Agod masabat ini, dapat hibaluon naton kon ngaa ginhimo ini ni Jesus.

13 Ang panguna nga rason kon ngaa nagbantala kag nagpanudlo si Jesus amo ang gugma sa Dios. Ginahigugma man niya ang kamatuoran nga iya gintudlo. Para sa iya, hamili ini nga mga bahandi, amo nga nalangkag sia nga ipaambit ini sa iban.  Amo man sini ang ginabatyag naton subong mga manunudlo. Hunahunaa lamang ang pila sang hamili nga kamatuoran nga natun-an naton gikan sa Pulong sang Dios! Nahibaluan naton ang hulusayon tuhoy sa bug-os uniberso nga pagkasoberano kag kon paano ini lubaron. Nahangpan man naton kon ano ang ginasiling sang Kasulatan tuhoy sa kahimtangan sang patay kag ang mga pagpakamaayo nga dalhon sang bag-o nga kalibutan sang Dios. Bisan pa madugay na naton nga natun-an ining mga kamatuoran ukon sining karon lang, wala gid nagalubad ang balor sini. Hamili ini gihapon. (Basaha ang Mateo 13:52.) Paagi sa pagbantala sing makugi, ginapaalinton naton sa iban ang aton gugma sa kamatuoran nga gintudlo ni Jehova sa aton.

14. Paano naton mailog ang paagi ni Jesus sa pagtudlo?

14 Talupangda man kon paano si Jesus nagtudlo. Pirme niya ginagamit ang Kasulatan. Kon nagatudlo sia sing isa ka importante nga punto, sa masami nagasiling sia: “Nasulat na.” (Mat. 4:4; 21:13) Sa iya nasulat nga mga pinamulong, kapin sa katunga sang mga tulun-an sa Hebreo nga Kasulatan ang direkta niya nga ginkutlo ukon ginpatuhuyan. Kaangay ni Jesus, pirme naton ginagamit ang Biblia sa aton pagministeryo kag kon posible ginabasa gid naton ang Kasulatan. Paagi sini makita sang mga matarong sing tagipusuon nga ang aton ginatudlo wala naghalin sa aton kundi sa Dios. Nalipay gid kita kon ang aton ginapanaksihan magbasa sing teksto sa Biblia kag magpangusisa kon ano ang kahulugan kag kapuslanan sang Pulong sang Dios! Madugangan pa gid ang aton kalipay kon batunon niya sa ulihi ang pangagda nga mangin sumulunod ni Jesus.

Iluga ang Gugma ni Jesus sa Iban

15. Ano ang talalupangdon nga kinaiya ni Jesus, kag ano ang epekto sini sa aton kon pamalandungan naton ini?

15 Ang katapusan nga kinaiya ni Jesus nga aton binagbinagon amo ang talalupangdon sa tanan—ang iya gugma sa katawhan. Si apostol Pablo nagsulat: “Ang gugma ni Cristo nagapahulag sa amon.” (2 Cor. 5:14) Kon pamalandungan naton ang gugma ni Jesus para sa katawhan kag para sa aton bilang indibiduwal, matandog gid kita kag mapahulag nga sundon ang iya halimbawa.

16, 17. Sa ano nga mga paagi ginpakita ni Jesus ang iya gugma sa katawhan?

16 Paano ginpakita ni Jesus nga ginahigugma niya ang katawhan? Ang kinabubut-on nga paghatag sang iya kabuhi para sa katawhan amo ang labing daku nga ekspresyon sang iya gugma. (Juan 15:13) Apang, sang yari sia sa duta ginpakita ni Jesus ang iya gugma sa iban pa nga paagi. Halimbawa, naluoy sia sa mga nagaantos. Natandog gid sia sang makita niya nga nagahibi si Maria kag ang mga kaupod sini bangod napatay ni Lazaro. Bisan pa pagabanhawon na niya si Lazaro, “nagtulo ang luha ni Jesus.”—Juan 11:32-35.

17 Sang maaga nga bahin sang iya ministeryo, ginpalapitan sia sang isa ka aruon, nga nagasiling: “Kon luyag mo gid, matinluan mo ako.” Ano ang ginhimo ni Jesus? Ang rekord nagsiling: “Napahulag  sia sang kaluoy.” Nian, naghimo sia sing isa ka tumalagsahon nga buhat. “Gin-untay niya ang iya kamot kag gintandog sia, kag nagsiling sa iya: ‘Luyag ko. Mangin matinlo ka.’ Kag gilayon nga nadula ang iya aro, kag nangin matinlo sia.” Sa Mosaikong Kasuguan, ang mga aruon ginakabig nga di-matinlo, kag puede man ayuhon ni Jesus ang tawo nga indi sia pagtandugon. Apang ginpabatyag niya sa aruon ang pagtandog sang isa ka tawo nga mahimo wala sini mabatyagan sa sulod na sang mga tinuig. Daw ano ka maluluy-on si Jesus!—Mar. 1:40-42.

18. Paano naton mapakita ang “simpatiya”?

18 Subong mga sumulunod ni Cristo ginasugo kita nga ipabatyag ang gugma paagi sa pagpakita sing “simpatiya.” (1 Ped. 3:8) Indi mahapos nga mahangpan ang ginabatyag sang aton utod nga may malala nga balatian ukon grabe nga depresyon—ilabi na kon wala kita makaagi sini. Apang si Jesus nagpakita sing simpatiya sa mga nagabalatian bisan pa wala sia makaagi nga nagbalatian. Paano naton ini mapakita? Paagi sa pagpamati sing maayo sa ila kon nagapautwas sila sang ila ginabatyag sa aton. Mahimo man naton pamangkuton ang aton kaugalingon, ‘Kon yara ako sa ila kahimtangan, ano ayhan ang akon batyagon?’ Kon interesado kita sa balatyagon sang iban mahimo naton “lipayon ang mga kalag nga ginapung-awan.” (1 Tes. 5:14) Kon himuon naton ini ginailog naton si Jesus.

19. Ano ang epekto sa aton sang mga natun-an naton tuhoy kay Jesus?

19 Madamo gid kita sing natun-an sa mga ginhimo kag ginpamulong ni Jesucristo! Kon makilala naton sia sing maayo, labi nga luyag naton nga mangin kaangay niya—kag labi pa gid kita nga mapahulag sa pagbulig sa iban nga makilala man sia. Gani, mangin determinado kita nga ilugon ang aton Mesianiko nga Hari—karon kag sa walay katubtuban!

Mapaathag Mo Bala?

• Paano kita mangin maalam kaangay ni Jesus?

• Paano naton mapakita ang pagkamapainubuson?

• Paano naton mapalambo ang kakugi sa ministeryo?

• Paano naton ilugon si Jesus sa pagpakita sing gugma sa iban?

[Mga Pamangkot sa Pagtinuon]

[Kahon/Retrato sa pahina 5]

ISA KA LIBRO NGA NAGABULIG SA ATON NGA ILUGON SI CRISTO

Sang 2007 nga distrito nga kombension, ginpagua ang 192 ka pahina nga libro nga “Kari Ka Mangin Sumulunod Ko.” Ini nga libro gindesinyo agod buligan ang mga Cristiano nga ituon ang ila igtalupangod kay Jesus ilabi na sa iya mga kinaiya kag mga hinimuan. Pagkatapos sang una nga duha ka kapitulo, ang una nga seksion nagabinagbinag sang talalupangdon nga mga kinaiya ni Jesus—ang iya pagkamapainubuson, kaisog, kaalam, pagkamatinumanon, kag pagkamabinatason.

Masunod sini amo ang mga seksion nga nagabinagbinag sa mga hilikuton ni Jesus subong manunudlo kag manugbantala sang maayong balita kag ang pila ka paagi nga ginpakita niya ang iya daku nga gugma. Ginabinagbinag sang bug-os nga libro kon paano ilugon sang isa ka Cristiano si Jesus.

Wala sing duhaduha, ini nga libro magapahulag sa aton nga usisaon kag pamangkuton ang aton kaugalingon: ‘Ginasunod ko gid bala si Jesus? Paano ko sia masunod sing maayo?’ Ini nga libro makabulig man sa “tanan nga husto nga nahuyog para sa kabuhi nga walay katapusan” nga mangin sumulunod ni Cristo.—Binu. 13:48.

[Retrato sa pahina 4]

Kinabubut-on nga nagkari si Jesus sa duta agod mabun-ag subong isa ka lapsag. Ano nga kinaiya ang kinahanglan niya nga ipakita?

[Retrato sa pahina 6]

Ano ang magapahulag sa aton nga mangin makugi sa ministeryo?