Magdiretso sa kaundan

Magdiretso sa listahan sang kaundan

Pamangkot sang Amon mga Bumalasa

Pamangkot sang Amon mga Bumalasa

 Pamangkot sang Amon mga Bumalasa

Sa Nehemias 8:10, ang mga Judiyo ginsilingan nga “[mag]kaon sang sapay,” bisan pa ang Kasuguan sa Levitico 3:17 nagsiling: “Indi kamo magkaon sing sapay.” Paano ining duha ka teksto nagahisantuanay?

Sa orihinal nga lenguahe, ang tinaga nga ginbadbad nga “sapay” sa Nehemias 8:10 kag Levitico 3:17 magkatuhay. Ang Hebreo nga tinaga nga cheʹlev, nga ginbadbad nga “sapay” sa Levitico 3:17, nagapatuhoy sa tambok sang sapat ukon tawo. (Lev. 3:3; Huk. 3:22) Ginapakita sang konteksto sang bersikulo 17 nga ang mga Israelinhon indi dapat magkaon sang sapay nga nagaputos sa mga kasudlan kag sa mga batobato sang mga sapat nga ginahalad ukon sang mga sapay nga yara sa mga balikawang kay “ang bug-os nga sapay iya sang GINOO.” (Lev. 3:14-16) Busa, ang sapay nga yara sa lawas sang mga sapat nga ginahalad kay Jehova indi dapat pagkaunon.

Sa pihak nga bahin, ang tinaga nga ginbadbad nga “sapay” sa Nehemias 8:10 amo ang mash·man·nimʹ, kag sa sini lamang nga teksto sa Hebreong Kasulatan ginpakita ini nga tinaga. Naghalin ini sa berbo nga sha·menʹ, nga nagakahulugan sing “mangin matambok, magpatambok.” Ang panguna nga ideya sang mga tinaga nga may kaangtanan sa sini nga berbo daw nagapahangop sing kahamungayaan kag kaayuhan. (Ipaanggid ang Isaias 25:6.) Ang isa sa kinaandan nga mga tinaga nga naghalin sa sini nga berbo amo ang nombre nga sheʹmen, nga masami ginabadbad nga “lana,” lakip ang ekspresyon nga “lana sang olibo.” (Deut. 8:8; Lev. 24:2) Suno sa paggamit sini sa Nehemias 8:10, ang mash·man·nimʹ  daw nagapatuhoy sa pagkaon nga ginluto sa madamo nga mantika kag mahimo nagalakip sing karne sang sapat nga wala sing puro nga tambok.

Bisan pa gindumilian ang mga Israelinhon sa pagkaon sing puro nga tambok, puede sila makakaon sing masustansia kag manamit nga pagkaon. Ang mga pagkaon subong sang mga tinapay nga halin sa uyas wala ginaluto sa mantika nga halin sa tambok sang sapat, kundi sa mantika nga halin sa utan nga masami amo ang lana sang olibo. (Lev. 2:7) Busa, ginapaathag sang Insight on the Scriptures nga ang “sapay” diri “nagapatuhoy sa matambok nga bahin, indi sa maniwang ukon mamala, kundi sa saboroso, lakip na ang manamit nga mga pagkaon nga may mantika halin sa utan.”

Siempre, dapat dumdumon sang mga Cristiano nga ang pagdumili batok sa pagkaon sang tambok bahin anay sang Kasuguan. Wala na sila karon sa idalom sang Kasuguan, lakip ang ginapatuman sini nga halad tuhoy sa mga sapat.​—Roma 3:20; 7:4, 6; 10:4; Col. 2:16, 17.