Magdiretso sa kaundan

Magdiretso sa listahan sang kaundan

Ngaa Dapat Mo Huptan ang Imo Integridad?

Ngaa Dapat Mo Huptan ang Imo Integridad?

 Ngaa Dapat Mo Huptan ang Imo Integridad?

“Hukmi ako, O GINOO, . . . sono sa akon kalubus [integridad, NW].”​—SAL. 7:8.

1, 2. Ano ang pila ka sitwasyon nga nagahangkat sa integridad sang isa ka Cristiano?

HUNAHUNAA ang tatlo ka sitwasyon: Ang isa ka pamatan-on nga lalaki ginasunlog sang iya mga kabutho. Ginagaritgarit nila sia agod maakig kag magbato. Mabalos bala sia, ukon punggan niya ang iya kaugalingon kag maghalin? Ang isa ka bana nagaisahanon lang sa ila puluy-an kag nagapanalawsaw sa Internet. Hinali lang naggua ang isa ka pangagda nga magkadto sa imoral nga Web site. Buksan bala niya ina nga site ukon likawan? Ang isa ka Cristianong babayi nagapakig-istorya sa pila ka utod nga babayi, nian nangin negatibo ang ila paghambalanay, ginakutsokutso na nila ang isa ka utod nga babayi sa kongregasyon. Maintra bala sia sa kutsokutso, ukon tinguhaan niya nga islan ang topiko?

2 Bisan magkatuhay ang tatlo ka sitwasyon, may butang nga magkaanggid sa ila. Tanan sila dapat magtinguha nga huptan ang ila integridad subong isa ka Cristiano. Ginahunahuna mo bala ang imo integridad samtang ginaatubang mo ang imo mga kabalaka, mga kinahanglanon, kag mga tulumuron sa kabuhi? Adlaw-adlaw, ginahunahuna sang mga tawo ang ila hitsura, ikaayong-lawas, mga hangkat sa palangabuhian, kasadya kag kasubo sang pag-abyanay, kag bisan pa gani ang romantiko nga relasyon. Mahimo hatagan naton sing daku nga importansia ining mga butang. Apang, ano bala ang importante kay Jehova samtang ginausisa niya ang aton tagipusuon? (Sal. 139:23, 24) Importante sa iya ang aton integridad.

3. Ano nga pribilehiyo ang ginhatag ni Jehova sa aton, kag ano ang binagbinagon naton sa sini nga artikulo?

3 Si Jehova, amo ang Manughatag sang “tagsa ka maayong dulot kag tagsa ka himpit nga regalo.” (Sant. 1:17) Nagapasalamat kita nga ginhatagan niya kita sing lawas, hunahuna, kag nanuhaytuhay nga ikasarang. (1 Cor. 4:7) Apang, wala kita ginapilit ni Jehova nga magpakita sing integridad. Kita ang ginapapili niya kon bala ipalambo naton ini nga kinaiya. (Deut. 30:19) Gani, kinahanglan naton usisaon kon ano ang integridad. Binagbinagon man naton ang tatlo ka rason kon ngaa importante gid ini nga kinaiya.

Ano ang Integridad?

4. Ano ang nadalahig sa integridad, kag ano ang matun-an naton sa kasuguan ni Jehova tuhoy sa halad nga mga sapat?

4 Madamo nga tawo ang indi makahangop kon ano ang integridad. Halimbawa, kon ginapabugal sang mga pulitiko ang ila integridad, masami nga ginapatuhuyan nila ang pagkabunayag. Importante ina nga kinaiya, apang bahin lamang ina sang integridad. Sa Biblia, ang integridad nagapatuhoy sa pagkakompleto ukon kalig-on sa moral. Ang Hebreong mga tinaga nga naangot sa “integridad” nagakahulugan sing kalig-on, kompleto, ukon walay kasawayan. Ang isa sining mga tinaga gingamit tuhoy sa mga halad kay Jehova. Ginakahamut-an lamang ni Jehova ang halad nga mga sapat nga wala sing diperensia, ukon kompleto. (Basaha ang Levitico 22:19, 20.) Naakig gid si Jehova sa sadtong hungod nga wala nagtuman sa iya sugo kag naghalad sing piang, masakiton, ukon bulag nga mga sapat.​—Mal. 1:6-8.

5, 6. (a) Ano nga halimbawa ang nagapakita nga ginapabaloran naton kon ano ang maayo, ukon kompleto? (b) Kinahanglan bala mangin himpit ang isa ka tawo agod mahuptan ang iya integridad? Ipaathag.

5 Natural lamang nga ginapangita kag ginapabaloran naton ang mga butang nga maayo, ukon kompleto. Halimbawa, hunahunaa ang isa nga nagapangolekta sang mga libro. Sa tapos sang malawig nga pagpangita, nakakita gid man sia sing isa ka bilidhon nga libro. Apang natalupangdan niya nga kulang ini sing pila ka importante nga pahina. Nalugaw-an sia kag ginbalik na lang niya ini sa estante. Ukon halimbawa, hunahunaa ang isa ka babayi nga nagkadto sa merkado agod magbakal sing mga paho. Sang nakakita sia sing manami nga mga paho sa isa ka tiendahan, isaisa niya ini nga gin-usisa. Ano ang baklon niya? Siempre, yadtong maayo kag wala  sing samad. Sing kaanggid, ang Dios nagapangita sang katawhan nga may himpit, ukon kompleto, nga tagipusuon.​—2 Cron. 16:9.

6 Ayhan mamangkot ka kon bala kinahanglan mangin himpit agod mahuptan ang integridad. Bangod sang aton sala kag pagkadihimpit, mahimo kabigon naton ang aton kaugalingon nga kaangay sang di-kompleto nga libro ukon may samad nga paho. Amo bala sina ang imo ginabatyag kon kaisa? Makasalig ka nga si Jehova wala nagapaabot nga mangin himpit kita sa bug-os nga kahulugan. Wala sia nagapaabot sing labaw sangsa aton masarangan. * (Sal. 103:14; Sant. 3:2) Apang, nagapaabot sia nga huptan naton ang aton integridad. May kinatuhayan bala ang pagkahimpit kag ang integridad? Huo. Sa pag-ilustrar: Ang isa ka soltero nagahigugma sa isa ka dalaga, kag luyag niya ini pangasaw-on. Siempre, ang soltero wala nagapaabot nga mangin himpit ang iya palangasaw-on. Pero, nagapaabot sia nga higugmaon sia sing bug-os tagipusuon sang babayi kag sia lamang ang higugmaon sini. Sa kaanggid nga paagi, si Jehova “isa ka Dios nga nagapatuman sang eksklusibo nga debosyon.” (Ex. 20:5, NW) Wala sia nagapaabot nga mangin himpit kita, apang nagapaabot sia nga higugmaon naton sia sing bug-os tagipusuon kag sia lamang ang aton simbahon.

7, 8. (a) Ano nga halimbawa ang ginpahamtang ni Jesus tuhoy sa integridad? (b) Ano ang kahulugan sang integridad suno sa Kasulatan?

7 Mahimo mapahanumdom kita sang sabat ni Jesus sang ginpamangkot sia kon ano ang labing importante nga sugo. (Basaha ang Marcos 12:28-30.) Wala lamang si Jesus naghatag sing sabat; ginkabuhi niya ini. Nagpahamtang sia sing pinakamaayo nga huwaran sa paghigugma kay Jehova sing bug-os nga hunahuna, tagipusuon, kalag, kag kusog. Ginpakita niya nga ang integridad mapabutyag, indi lamang sa hambal, kundi sa positibo nga mga buhat nga may putli nga motibo. Agod mahuptan naton ang aton integridad, kinahanglan sundon naton ang mga tikang ni Jesus.​—1 Ped. 2:21.

8 Gani, ginapakita sang Kasulatan nga ang kahulugan sang integridad amo ang bug-os tagipusuon nga debosyon sa isa ka langitnon nga Persona, si Jehova nga Dios, kag sa iya ginpabutyag nga kabubut-on kag katuyuan. Ang paghupot sing integridad nagakahulugan nga sa aton adlaw-adlaw nga pagkabuhi, tinguhaan naton nga pahamut-an si Jehova nga Dios labaw sa tanan. Tamdon naton nga pinakaimportante sa aton kabuhi ang mga butang nga ginatamod niya nga pinakaimportante. Binagbinagon naton ang tatlo ka rason kon ngaa importante gid ini.

1. Ang Aton Integridad kag ang Hulusayon sang Pagkasoberano

9. Paano ang aton integridad naangot sa hulusayon sang bug-os uniberso nga pagkasoberano?

9 Ang soberanya ni Jehova wala nasandig sa aton integridad. Ang iya soberanya makatarunganon, walay katapusan, kag bug-os uniberso. Ang iya soberanya magapabilin gid nga amo sina bisan ano pa ang isiling ukon himuon sang bisan ano man nga tinuga. Apang, ang pagkasoberano sang Dios ginpasipalahan sa langit kag sa duta. Busa, ang iya paggahom kinahanglan mabindikar sa tanan nga intelihente nga tinuga kag mapamatud-an nga husto, makatarunganon, kag mahigugmaon. Subong mga Saksi ni Jehova, ginasugid naton sa mga luyag mamati ang tuhoy sa bug-os uniberso nga pagkasoberano ni Jehova. Apang, paano naton mapakita sa aton mga desisyon kag mga buhat nga dampig kita sa soberanya ni Jehova? Mapakita naton ini paagi sa paghupot sang aton integridad.

10. Ano ang panumbungon ni Satanas tuhoy sa integridad sang mga tawo, kag ano ang himuon mo?

10 Binagbinaga kon paano nadalahig ang imo integridad. Ginapangangkon ni Satanas nga wala sing tawo nga magasakdag sa pagkasoberano sang Dios, nga wala sing isa nga magaalagad kay Jehova nga may masinakripisyuhon nga gugma. Samtang nagapamati ang tuman ka damo nga anghel, ang Yawa nagsiling kay Jehova: “Panit sa panit! Ang tanan nga iya sang tawo ihatag niya tungud sa iya kabuhi.” (Job 2:4) Talupangda nga ang panumbungon ni Satanas indi lamang para sa matarong nga tawo nga si Job kundi sa tanan nga katawhan. Bangod sina gintawag sang Biblia si Satanas nga “manugsumbong sang aton mga kauturan.” (Bug. 12:10) Ginayaguta niya si Jehova paagi sa pagsiling nga ang mga Cristiano, lakip ikaw, indi magapabilin  nga matutom. Nagsiling si Satanas nga luiban mo ang Dios kon mabutang sa katalagman ang imo kabuhi. Ano ang ginabatyag mo sa sini nga panumbungon batok sa imo? Luyag mo bala pamatud-an nga butigon si Satanas? Mapamatud-an mo nga butigon sia kon huptan mo ang imo integridad.

11, 12. (a) Ano nga mga halimbawa ang nagapakita nga nadalahig sa hulusayon sang integridad ang desisyon nga ginahimo naton adlaw-adlaw? (b) Ngaa isa gid ka pribilehiyo nga mahuptan ang aton integridad?

11 Bangod nadalahig ang imo integridad sa hulusayon, importante gid nga maghalong ka sa imo paggawi kag mga desisyon nga ginahimo sa adlaw-adlaw. Binagbinaga liwat ang tatlo ka sitwasyon nga ginsambit kaina. Paano nila mahuptan ang ila integridad? Ang pamatan-on nga lalaki nga ginasunlog sang iya mga kabutho daw mangutos na kuntani kag luyag magbalos, apang nadumduman niya ini nga laygay: “Indi kamo magtimalos, mga hinigugma, kundi pabay-i ini sa kasingkal sang Dios; kay nasulat na: ‘Akon ang pagtimalos; ako ang magabalos, siling ni Jehova.’” (Roma 12:19) Gani, naghalin na lang sia. Ang bana nga naga-Internet daw matentar nga maglantaw sa materyal nga makapukaw sa sekso, apang nadumduman niya ang prinsipio sa pinamulong ni Job: “Nagapakigkatipan ako sa akon mga mata; paano bala niyan ang pagtolok ko sa ulay?” (Job 31:1) Busa, wala gintan-aw sang tawo ang imoral nga materyal kag ginkabig niya ini kaangay sang hilo. Ang babayi nga nagapakig-istorya sa isa ka grupo nga nagakutsokutso nagpugong sang iya kaugalingon, kay nadumduman niya ini nga panuytoy: “Pahamut-an sang kada isa sa aton ang iya isigkatawo sa kon ano ang maayo sa pagpabakod sa iya.” (Roma 15:2) Indi gid makapabakod kon dugangan pa niya ang kutsokutso. Indi maayo ang mangin epekto sini sa iya Cristianong utod nga babayi kag indi ini makapahamuot sa iya langitnon nga Amay. Gani, ginpakamaayo na lang niya nga indi mag-intra sa kutsokutso kag gin-islan ang topiko.

12 Sa mga sitwasyon nga ginsambit, ang ginhimo sang kada isa ka Cristiano nagapakita nga daw nagasiling sia: ‘Si Jehova ang akon Manuggahom. Tinguhaan ko nga himuon kon ano ang  makapahamuot sa iya sa sini nga butang.’ Kon nagahimo ka sing desisyon, ginatinguhaan mo man bala nga pahamut-an si Jehova? Kon himuon mo ina, matuod gid nga ginatuman mo ang makapalig-on nga pinamulong nga narekord sa Hulubaton 27:11: “Anak ko, magmaalam ka, kag pasadyaha ang akon tagiposoon, agud nga masabat ko sia nga nagapakahuya sa akon.” Isa gid ka pribilehiyo nga mapahalipay naton ang tagipusuon sang Dios! Indi bala nga takus gid ang aton tagsa ka panikasog nga mahuptan ang aton integridad?

2. Ang Basihan sang Paghukom sang Dios

13. Paano ginapakita sang mga pinamulong nanday Job kag David nga ang integridad amo ang basihan sang paghukom ni Jehova sa aton?

13 Nakita naton nga ang aton integridad makabulig sa aton sa pagdampig sa soberanya ni Jehova. Amo ini ang mangin basihan sang paghukom sang Dios sa aton. Nahangpan gid ni Job ini nga kamatuoran. (Basaha ang Job 31:6.) Nahibaluan ni Job nga ginatimbang sang Dios ang tanan nga katawhan sa “nagakaangay [sibu, NW] nga timbangan,” nga nagagamit sang Iya himpit nga talaksan sang katarungan sa pagtimbang sang aton integridad. Nagsiling man si David: “Ang GINOO nagahikut sing paghukom sa mga katawohan; hukmi ako, O GINOO, sono sa akon pagkamatarung kag sono sa akon kalubus [integridad, NW] nga yari sa akon. . . . ikaw nga nagatungkad sang mga painoino kag mga tagiposoon, ikaw matarung nga Dios.” (Sal. 7:8, 9) Nahibaluan naton nga sarang makita sang Dios ang aton pinakasulod nga pagkatawo, ukon ang aton “painoino” kag malaragwayon nga “tagiposoon.” Apang, kinahanglan naton dumdumon kon ano ang ginapangita niya. Subong sang ginsiling ni David, pagahukman kita ni Jehova suno sa aton integridad.

14. Ngaa indi kita dapat maghunahuna nga bangod di-himpit kita kag makasasala, indi na naton mahuptan ang aton integridad?

14 Hunahunaa nga si Jehova nga Dios nagausisa sa tagipusuon sang binilyon ka katawhan sa karon. (1 Cron. 28:9) Pila ayhan ang nasapwan niya nga nagahupot sing Cristianong integridad? Halos diutay lang! Apang, indi kita maghunahuna nga bangod di-himpit kita indi na naton mahuptan ang aton integridad. Sa baylo, may rason kita nga magsalig, kaangay ni David kag ni Job, nga kabigon kita ni Jehova nga nagahupot sang integridad bisan pa di-himpit kita. Dumduma, ang pagkahimpit wala nagagarantiya nga mahuptan naton ang aton integridad. Tatlo lamang ka himpit nga tawo ang nagkabuhi diri sa duta, kag ang duha, sanday Adan kag Eva, napaslawan sa paghupot sang ila integridad. Pero, madamo sa minilyon nga di-himpit nga katawhan ang nagmadinalag-on sa paghupot sang ila integridad. Mahimo mo man ina.

3. Importante sa Aton Paglaum

15. Paano ginpakita ni David nga importante ang aton integridad para sa aton paglaum sa palaabuton?

15 Bangod ang aton integridad amo ang basihan sang paghukom sang Dios sa aton, importante ini sa aton paglaum sa palaabuton. Ini nga butang nahibaluan gid ni David. (Basaha ang Salmo 41:12. *) Ginpabaloran gid ni David ang paglaum nga matigayon ang kahamuot sang Dios sing walay katapusan. Kaangay sang matuod nga mga Cristiano karon, naglaum si David nga mabuhi sing walay katapusan, amo nga padayon sia nga nangin suod kay Jehova nga Dios samtang nagaalagad sa iya. Nahibaluan ni David nga dapat niya huptan ang iya integridad agod matigayon ang kabuhi nga walay katapusan. Sing kaanggid, si Jehova nagasakdag, nagatudlo, nagagiya, kag nagapakamaayo sa aton samtang ginahuptan naton ang aton integridad.

16, 17. (a) Ngaa determinado ka nga huptan pirme ang imo integridad? (b) Ano nga mga pamangkot ang binagbinagon sa masunod nga artikulo?

16 Ang paglaum importante agod mangin malipayon kita sa karon. Nagahatag ini sa aton sing kalipay bisan pa nagaatubang kita sa mabudlay nga mga kahimtangan. Makaamlig man ang paglaum sa aton  panghunahuna. Dumduma nga ginpaanggid sang Biblia ang paglaum sa helmet. (1 Tes. 5:8) Subong nga ang helmet nagaamlig sa ulo sang isa ka soldado sa inaway, ang paglaum nagaamlig man sa aton hunahuna gikan sa negatibo kag wala paglaum nga panghunahuna nga ginapasanyog ni Satanas sa sining nagatagumatayon kag daan na nga kalibutan. Ang matuod, wala sing balor ang kabuhi kon wala kita sing paglaum. Kinahanglan usisaon naton sing bunayag ang aton kaugalingon, kag binagbinagon sing mahalungon ang aton integridad kag ang aton paglaum nga naangot sa sini. Indi pagkalimti nga paagi sa paghupot mo sang imo integridad, masakdag mo ang pagkasoberano ni Jehova kag maamligan mo ang imo hamili nga palaabuton. Kabay nga huptan mo pirme ang imo integridad!

17 Bangod importante ang integridad, kinahanglan binagbinagon naton ang dugang pa nga mga pamangkot. Paano naton matukod ang integridad? Paano naton ini mahuptan? Ano ang himuon sang isa kon wala niya nahuptan ang iya integridad? Sabton ini sa masunod nga artikulo.

[Mga footnote]

^ par. 6 Nagsiling si Jesus: “Gani dapat kamo magpakahimpit, subong nga ang inyo langitnon nga Amay himpit.” (Mat. 5:48) Nahangpan niya nga bisan ang di-himpit nga mga tawo mahimo mangin kompleto, ukon himpit, sa relatibo nga kahulugan. Sa amo, matuman naton ang sugo nga higugmaon ang iban, kag mapahamut-an ang Dios. Apang, si Jehova himpit sa bug-os nga kahulugan. Sa iya bahin, ang tinaga nga “integridad” nagakahulugan man sang pagkahimpit.​—Sal. 18:30.

^ par. 15 Salmo 41:12 (NW): “Ginasakdag mo ako bangod sang akon integridad, Kag ipahamtang mo ako sa atubangan sang imo nawong tubtob sa walay katubtuban.”

Paano Mo Sabton?

• Ano ang integridad?

• Paano ang integridad naangot sa hulusayon sang bug-os uniberso nga pagkasoberano?

• Ngaa importante ang integridad sa aton paglaum?

[Mga Pamangkot sa Pagtinuon]

[Mga piktyur sa pahina 5]

Nagaatubang kita sing mga hangkat sa aton integridad adlaw-adlaw