Magdiretso sa kaundan

Magdiretso sa listahan sang kaundan

Ano nga Sahi sang Personalidad ang Luyag Mo?

Ano nga Sahi sang Personalidad ang Luyag Mo?

 Ano nga Sahi sang Personalidad ang Luyag Mo?

GINPAMANGKOT sang hepe sang pulis sa isa ka banwa diri sa Pilipinas ang isa ka payunir, “Ano ang ginhimo mo agod magbag-o ina nga tawo?” Dayon, gintudlo niya ang nagatangkas nga mga papel sa iya lamesa, kag nagsiling: “Kabalo ka bala nga tanan ini rekord sang iya mga kaso anay? Ginbuhinan mo ang sakit sa ulo sini nga banwa.” Ang ila ginaistoryahan amo ang tawo nga palahubog kag maoy anay kag pirme lang nagahimo sing gamo. Ano ang rason sang iya daku nga pagbag-o? Amo ang inspirado nga mensahe sang Pulong sang Dios, ang Biblia.

Madamo ang nagsunod sa laygay ni apostol Pablo nga ‘ubahon ang daan nga personalidad nga nahisuno sa ila paggawi anay kag isuklob ang bag-o nga personalidad nga gintuga suno sa kabubut-on sang Dios.’ (Efe. 4:22-24) Gamay man ukon daku ang pagbag-o nga dapat naton himuon, ang pagsuklob sang bag-o nga personalidad dapat himuon kon mangin Cristiano kita.

Apang, ang aton pagbag-o kag pag-uswag tubtob sa punto nga puede na kita bawtismuhan, panugod pa lang. Sang nagpabawtismo kita, kaangay kita sa isa ka ginkortehan nga kahoy. Mahibaluan na kon ano ini nga butang paagi sa korte sini, apang madamo pa ang dapat himuon. Dapat pa utihan sang manugtigib ang pila ka detalye agod mangin matahom pa gid ini. Sa tion sang bawtismo, yara na sa aton ang kinahanglanon nga mga kinaiya agod mangin alagad sang Dios. Apang, padayon pa naton ini nga patahumon paagi sa pagpalambo kag paghimo sing mga pagbag-o sa aton personalidad.

Bisan si Pablo nagsiling nga dapat naton pauswagon ang aton kaugalingon. Sia nagbaton: “Kon luyag ko himuon ang husto, ang malain yari sa akon.” (Roma 7:21) Nahibaluan ni Pablo kon ano sia nga sahi sang tawo kag kon ano nga sahi sang personalidad ang luyag niya. Kamusta sa aton bahin? Dapat man naton pamangkuton ang aton kaugalingon: ‘Ano ang yari sa akon? Ano ako nga sahi sang tawo? Kag ano nga sahi sang personalidad ang luyag ko?’

Ano ang “Yari sa Akon”?

Kon ginakay-o naton ang isa ka daan nga balay, wala naton ini ginapadag-an lang sing pintura sa gua kon may gabok pa nga mga bahin sa sulod.  Kay kon indi makay-o ang mga guba, madugangan pa gid ini sa ulihi. Sing kaanggid, bisan daw matarong kita kon tan-awon, madamo pa kita sing palauswagon. Dapat naton usisaon kon ano gid kita kag hibaluon ang mga problema nga dapat tadlungon. Kay kon indi, ang aton daan nga mga kinaiya magabalik liwat. Kon amo, kinahanglan gid nga usisaon naton sing maayo ang aton kaugalingon. (2 Cor. 13:5) Dapat naton hibaluon ang aton malain nga mga kinaiya kag tadlungon ini. Agod mahimo ini, may gin-aman nga bulig si Jehova.

Si Pablo nagsulat: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagadulot tubtob sa paghamulag sang kalag kag espiritu, kag sang mga lutalutahan kag utok sa tul-an sini, kag sarang makahantop sang mga panghunahuna kag mga tinutuyo sang tagipusuon.” (Heb. 4:12) Ang mensahe sang nasulat nga Pulong sang Dios, ang Biblia, makaimpluwensia gid sa aton kabuhi. Nagadulot ini sa aton pinakasulod nga bahin​—nga daw naglab-ot gid sa utok sang aton tul-an. Ginapadayag sini ang aton mga panghunahuna kag motibo, kag ginapakita sini kon ano gid kita, indi lamang kon ano kita sa panan-aw sang iban ukon kon ano ang aton pagtamod sa aton kaugalingon. Daku gid ang mabulig sang Pulong sang Dios agod mahibaluan naton ang aton mga kinaiya nga dapat bag-uhon.

Kon magkay-o kita sang daan nga balay, indi bastante nga islan lang naton ang guba, kundi ginausisa naton ang kabangdanan sang pagkaguba, agod makahimo kita sing mga paagi para indi na ini masulit. Sing kaanggid, agod makontrol naton ang aton mga kaluyahon, makabulig nga usisaon naton indi lamang ang aton mga kaluyahon kundi pati man ang mga kabangdanan sini. Madamo nga butang ang nagaimpluwensia sa aton personalidad. Lakip sa sini ang aton tindog sa komunidad, ikasarang sa pangabuhi, gindak-an nga palibot, kultura, ginikanan, kaupdanan, kag relihion anay. Makaimpluwensia man sa aton ang mga programa sa telebisyon, mga pelikula nga aton ginatan-aw, kag ang iban pa nga sahi sang kalingawan. Ang paghibalo kon ano ang ginabangdan sang aton kaluyahon makabulig agod makontrol naton ang impluwensia sini sa aton.

Sa tapos naton mausisa ang aton kaugalingon, ayhan nagasiling kita, ‘Anhon ko kay amo gid ko sini ’ya.’ Sayop gid ini nga pangatarungan. Talupangda ang ginsiling ni Pablo sa mga kauturan sa kongregasyon sa Corinto nga sang una mga makihilawason, homoseksuwal, palahubog, kag iban pa. Nagsiling sia: “Amo sina anay ang pila sa inyo. Apang ginhugasan na kamo . . . sang espiritu sang aton Dios.” (1 Cor. 6:9-11) Sa bulig sang balaan nga espiritu ni Jehova, magamadinalag-on man kita sa paghimo sing kinahanglanon nga mga pagbag-o.

Binagbinaga ang eksperiensia ni Marcos * diri sa Pilipinas. Sa pagsaysay sang iya nagligad, si Marcos nagsiling: “Pirme lang nagaaway sanday Nanay kag Tatay. Gani, nagrebelde ako sa ila sang 19 anyos ako.” Nangin kilala sia nga tahor, kawatan, kag holdaper. May plano pa tani sila sang iya mga kaupdanan nga mang-hijack sing eroplano ugaling wala madayon. Bisan nakapangasawa sia, padayon gihapon sia sa iya mga kalainan. Namigado sia bangod sa panahor. Sang ulihi, nagbuylog si Marcos sa pagtuon sing Biblia nga ginahiwat sang mga Saksi ni Jehova sa iya asawa. Sang primero, pamatyag niya indi sia puede nga mangin Saksi. Apang, sang gin-aplikar niya ang iya natun-an kag sang nagtambong na sia sa mga miting, ginbiyaan niya ang iya malain nga mga buhat. Subong, isa na sia ka bawtismado nga Cristiano kag regular nga nagapakigbahin sa pagtudlo sa iban agod mabuligan man sila nga magbag-o.

 Ano nga Sahi sang Personalidad ang Luyag Mo?

Ano nga mga pagbag-o ang dapat naton himuon agod mag-uswag ang aton Cristianong mga kinaiya? Ginlaygayan ni Pablo ang mga Cristiano: “Isikway gid ninyo ini tanan, kasingkal, kaakig, kalainan, nagapakalain nga hambal, kag ang malaw-ay nga hambal indi maggua sa inyo baba. Indi kamo magbutig sa isa kag isa. Ubaha ninyo ang daan nga personalidad upod ang mga buhat sini.” Nagpadayon ang apostol: “Magpanapot kamo sang bag-o nga personalidad, nga paagi sa sibu nga ihibalo ginabag-o suno sa larawan sang Isa nga nagtuga sini.”​—Col. 3:8-10.

Kon amo, ang aton panguna nga tulumuron amo ang pag-uba sa daan nga personalidad kag pagsuklob sing bag-o. Ano nga mga kinaiya ang makabulig agod mahimo naton ini? Si Pablo nagsiling: “Panapti ang inyo kaugalingon sang mapinalanggaon nga balatyagon nga may kaawa, kaayo, pagpaubos sang hunahuna, kalulo, kag pagkamapinasensiahon. Padayon nga batasa ninyo ang isa kag isa kag patawaron sing kinabubut-on ang isa kag isa kon may reklamo ang isa batok sa isa. Subong nga si Jehova nagpatawad sing kinabubut-on sa inyo, amo man ang himuon ninyo. Apang, dugang pa sa sining tanan nga butang, panapti ninyo ang inyo kaugalingon sang gugma, kay amo ini ang himpit nga higot sang paghiusa.” (Col. 3:12-14) Ang pagpanikasog nga mapalambo ini nga mga kinaiya makabulig agod magdugang ang kahamuot ni Jehova kag sang mga tawo sa aton. (1 Sam. 2:26) Sang yari si Jesus sa duta, ginpakita niya ang diosnon nga mga kinaiya. Kon tun-an naton kag ilugon ang iya mga halimbawa, labi kita nga mangin kaangay ni Cristo subong mga ‘manug-ilog sa Dios.’​—Efe. 5:1, 2.

Ang isa pa ka paagi agod mahantop naton kon ano nga mga pagbag-o ang aton himuon amo ang pagtuon sa maayo kag malain nga mga kinaiya sang mga karakter sa Biblia. Halimbawa, binagbinaga si Jose, ang anak sang patriarka nga si Jacob. Bisan pa nga naagihan niya ang mga inhustisya, ginhuptan ni Jose ang positibo nga espiritu kag ang iya maayo nga mga kinaiya. (Gen. 45:1-15) Sa pihak nga bahin, ang anak ni Hari David nga si Absalom nagpakunokuno nga may kabalaka sa katawhan kag gindayaw bangod sa iya kaambong. Apang ang matuod, traidor sia kag manugpatay. (2 Sam. 13:28, 29; 14:25; 15:1-12) Ang pakunokuno nga kaayo kag ang pisikal nga katahom indi amo ang basihan sang maayo nga personalidad.

Mahimo Kita Magmadinalag-on

Agod mapauswag naton ang aton personalidad kag mangin matahom sa pagtamod sang Dios, dapat naton talupangdon ang aton tinago nga pagkatawo. (1 Ped. 3:3, 4) Agod mabag-o naton ang aton personalidad, dapat naton hibaluon ang aton malain nga mga kinaiya kag ang mga kabangdanan sini, kag palambuon ang diosnon nga mga kinaiya. Makasalig bala kita nga mangin madinalag-on ang aton panikasog nga mahimo ini nga mga pagbag-o?

Huo, sa bulig ni Jehova mahimo naton ang kinahanglanon nga mga pagbag-o. Kaangay sang salmista, makapangamuyo kita: “Tugaha sa akon, O Dios, ang kasingkasing nga matinlo, kag bag-oha ang matarung nga espiritu sa sulud nakon.” (Sal. 51:10) Mapangabay naton ang espiritu sang Dios nga manghikot kag magpalig-on sang aton handum nga ipahisuno ang aton kabuhi sa iya kabubut-on. Sa pagkamatuod, magamadinalag-on kita sa paghimo sang aton personalidad nga mas matahom sa pagtamod ni Jehova!

[Footnote]

^ par. 11 Indi niya matuod nga ngalan.

[Piktyur sa pahina 4]

Padag-an lang bala naton sing pintura ang gua sining balay nga ginguba sang bagyo?

[Piktyur sa pahina 5]

Ginailog mo bala ang personalidad ni Cristo?