Magdiretso sa kaundan

Magdiretso sa listahan sang kaundan

Si Jehova Nagasabat sang Hanuot nga Pangamuyo

Si Jehova Nagasabat sang Hanuot nga Pangamuyo

 Si Jehova Nagasabat sang Hanuot nga Pangamuyo

“Agod mahibaluan sang mga tawo nga ikaw, nga ang imo ngalan amo si Jehova, ikaw lamang ang Labing Mataas sa bug-os nga duta.”​—SAL. 83:18, NW.

1, 2. Ano ang naeksperiensiahan sang madamo, kag ano nga mga pamangkot ang binagbinagon naton sa sini nga artikulo?

SANG nagligad nga mga tinuig, natublag gid ang isa ka babayi sa trahedya nga natabo sa ila kaingod. Nagdaku sia nga Romano Katoliko, amo nga nangayo sia sing bulig sa pari sa ila lugar, apang indi luyag makigsugilanon ang pari sa iya. Gani, nangamuyo sia sa Dios: “Wala ako makakilala sa imo . . . , apang nakahibalo ako nga nagapamati ka. Kabay pa nga buligan mo ako nga makilala ka!” Wala magdugay pagkatapos sini, may nagbisita sa iya nga mga Saksi ni Jehova kag naghatag sa iya sing paumpaw kag ihibalo nga ginapangabay niya. Gintudlo pa gid nila sa iya nga ang personal nga ngalan sang Dios amo si Jehova. Natandog gid sia sa sini. Sia nagsiling: “Sia amo ang Dios nga ginahandum ko nga makilala halin sang bata pa ako!”

2 Madamo ang may kaanggid man sini nga eksperiensia. Masami nga una nila nga makita ang ngalan ni Jehova kon mabasahan nila ang Salmo 83:18. Sa Bag-ong Kalibutan nga Badbad, mabasa naton ina nga teksto: “Agod mahibaluan sang mga tawo nga ikaw, nga ang imo ngalan amo si Jehova, ikaw lamang ang Labing Mataas sa bug-os nga duta.” Apang, napamensaran mo na bala kon ngaa ginsulat ang Salmo 83? Ngaa napilitan ang tanan nga kilalahon si Jehova nga amo lamang ang matuod nga Dios? Ano ang matun-an naton sa sini nga salmo? Ini nga mga pamangkot binagbinagon naton sa sini nga artikulo. *

Ang Paghimbon Batok sa Katawhan ni Jehova

3, 4. Sin-o ang nagkomposo sang Salmo 83, kag ano nga katalagman ang iya ginlaragway?

3 Suno sa superskripsion sini, ang Salmo 83 ambahanon ni Asaf. Ang nagkomposo sini nga salmo mahimo nga kaliwat sang Levinhon nga si Asaf, ang kilala nga musikero sa panahon sang paghari ni David. Sa sini nga salmo, nakitluoy ang salmista kay Jehova nga maghulag agod bayawon ang Iya pagkasoberano kag ipakilala ang Iya ngalan. Mahimo nga ginkomposo ini nga salmo wala madugay sa tapos sang kamatayon ni Solomon. Ngaa? Bangod sang nagahari pa si David kag si Solomon, maayo ang kaangtanan sang hari sang Tiro sa Israel. Apang sang ginkomposo ang Salmo 83, ang mga pumuluyo sang Tiro akig na sa Israel kag nagdampig na sa ila mga kaaway.

4 Ginhinambitan sang salmista ang napulo ka pungsod nga naghimbon sa paglaglag sa katawhan sang Dios. Ini nga mga pungsod nga yara sa palibot sang Israel amo ang masunod: “Ang mga layanglayang sang Edom kag sang mga Ismaelnon, ang Moab kag ang mga Agarnon, ang Gebal  kag ang Amon kag ang Amalec, ang Filistia upud ang mga pumuluyo sang Tiro; ang Asiria man nasimpon sa ila.” (Sal. 83:6-8) Ano nga hitabo sa kasaysayan ang ginpatuhuyan sini nga salmo? Ang iban nagasiling nga ginapatuhuyan sang salmista ang pagsalakay sang Amon, Moab, kag mga pumuluyo sang Bukid Seir sa Israel sang panahon ni Josafat. (2 Cron. 20:1-26) Nagapati naman ang iban nga nagapatuhoy ini sa mga pagpamatok nga naeksperiensiahan sang Israel sa mga kaingod nga pungsod sa bug-os sini nga kasaysayan.

5. Ano ang kapuslanan sang Salmo 83 sa mga Cristiano karon?

5 Ano man ang kahimtangan, maathag nga gin-inspirar ni Jehova nga Dios ang pagsulat sini nga salmo sang yara sa katalagman ang iya katawhan. Nagapalig-on man ini nga salmo sa mga alagad sang Dios karon, kay sa bug-os nila nga kasaysayan nakaeksperiensia man sila sing inasud-asod nga paghingabot sang mga kaaway nga luyag magpapas sa ila. Kag pat-od nga magapalig-on ini sa aton sa palaabuton kon organisahon na ni Gog sang Magog ang iya mga kaupod sa ila katapusan nga paninguha sa pagpapas sang tanan nga nagasimba sa Dios sa espiritu kag kamatuoran.​—Basaha ang Ezequiel 38:2, 8, 9, 16.

Ang Pinakaimportante Para sa Salmista

6, 7. (a) Ano ang ginpangamuyo sang salmista sa panugod sang Salmo 83? (b) Ano ang pinakaimportante para sa salmista?

6 Pamatii samtang ginapabutyag sang salmista ang iya balatyagon sa pangamuyo: “O Dios, dili ka maghipus; dili ka maglinong ukon magpahimonong, O Dios! Kay yari karon, ang imo mga kaaway nagagahud; sila nga nagadumut sa imo nagtanga. Nagahimbon sila batok sa imo katawohan . . . Kay nagsapul sila sing tingub sa isa ka kasugtanan; batok sa imo nagapakigkatipan sila.”​—Sal. 83:1-3, 5.

7 Ano ang pinakaimportante para sa salmista? Siempre pa, mahimo nga ginakabalak-an gid niya ang iya kaluwasan kag sang iya pamilya. Apang, ginapakita sa iya pangamuyo nga nabalaka gid sia nga mapakahuy-an ang ngalan ni Jehova kag sa mga pamahog batok sa pungsod nga nagadala sini nga ngalan. Kabay nga huptan man naton ining balanse nga pagtamod samtang ginabatas naton ang mga kabudlayan sa sining katapusan nga mga adlaw sang daan nga sistema.​—Basaha ang Mateo 6:9, 10.

8. Ano ang tuyo sang mga pungsod sa paghimbon batok sa Israel?

8 Ginsambit sang salmista ang ginsiling sang mga kaaway sang Israel: “Kari, utdon ta sila sa pagkapungsud; agud nga ang ngalan sang Israel indi na madumduman!” (Sal. 83:4) Nagabalingaso gid sa kaakig ang mga pungsod batok sa pinili nga katawhan sang Dios! Apang may iban pa sila nga motibo sa paghimbon batok sa Israel. Tuyo nila nga agawon ang duta sang Israel kag nagpabugal: “Angkonon ta nga aton kaugalingon ang mga puluy-an sang Dios.” (Sal. 83:12) May kaanggid bala ini sa aton adlaw? Huo!

Ang “Imo Balaan nga Puluy-an”

9, 10. (a) Sang dumaan nga tion, ano ang balaan nga puluy-an sang Dios? (b) Ano nga mga pagpakamaayo ang natigayon karon sang nagkalabilin nga hinpalas kag sang “iban nga mga karnero”?

9 Sang dumaan nga tion, gintawag nga baalan nga puluy-an sang Dios ang Ginsaad nga Duta. Dumduma nga sang ginluwas ang mga Israelinhon gikan sa mga Egiptohanon, nag-amba sila sing kadalag-an nga nagasiling: “Ikaw sa imo malig-on nga paghigugma nagdumala sang katawohan nga gintubus mo, gintuytuyan mo sila sa imo kusug tubtub sa imo balaan nga puluy-an.” (Ex. 15:13) Sang ulihi, ina nga “puluy-an” naglakip sang templo kag mga saserdote sini, kag ang kapital nga siudad nga amo ang Jerusalem, kag ang mga hari nga kaliwat ni David nga naglingkod sa trono ni Jehova. (1 Cron. 29:23) Amo nga gintawag ni Jesus ang Jerusalem nga “siudad sang daku nga Hari.”​—Mat. 5:35.

10 Kamusta naman karon? Sang 33 C.E., nabun-ag ang bag-o nga pungsod nga amo “ang Israel sang Dios.” (Gal. 6:16) Ina nga pungsod, nga ginahuman sang hinaplas nga mga kauturan ni Jesucristo, nagtuman sang hilikuton nga wala ginhimo sang undanon nga Israel, nga amo ang mangin saksi sa ngalan sang Dios. (Isa. 43:10; 1 Ped. 2:9)  Ginsaad man ni Jehova sa ila ang iya ginsaad sa dumaan nga Israel: “Ako mangin ila Dios, kag sila mangin akon katawhan.” (2 Cor. 6:16; Lev. 26:12) Sang 1919, ginkahamut-an ni Jehova ang mga nagkalabilin sa “Israel sang Dios,” kag sadto nga tion, ginpanag-iyahan nila ang “duta.” Ini nga duta amo ang espirituwal nga hilikuton sa diin natigayon nila ang espirituwal nga paraiso. (Isa. 66:8) Sugod sang katuigan 1930, minilyon sa “iban nga mga karnero” ang nagdampig sa ila. (Juan 10:16) Ang kalipay kag ang espirituwal nga kabuganaan sining modernong adlaw nga mga Cristiano isa ka mabakod nga pamatuod nga matarong ang paggahom ni Jehova. (Basaha ang Salmo 91:1, 2.) Naakig gid sini si Satanas!

11. Ano sa gihapon ang panguna nga tulumuron sang mga kaaway sang Dios?

11 Sa sining katapusan nga mga adlaw, ginasugyot ni Satanas ang iya mga sumalakdag diri sa duta nga pamatukan ang nagkalabilin nga hinaplas kag ang ila kaupod nga iban nga mga karnero. Natabo ina sa Nakatundan nga Europa sa paggahom sang Nazi kag sa Nasidlangan nga Europa sa paggahom sang Komunista nga panguluhan sang Union Sobyet. Natabo man ini sa madamo nga kadutaan, kag matabo pa gid ini liwat, ilabi na sa tion sang katapusan nga pagsalakay ni Gog sang Magog. Sa sina nga pagsalakay, mahimo nga angkunon sang mga manugpamatok ang propiedad kag mga ginapanag-iyahan sang katawhan ni Jehova, subong sang natabo sang una. Apang, ang panguna nga tulumuron ni Satanas amo ang paggumon sa aton agod wala na sing may magdala sa ngalan sang Dios. Ano ang reaksion ni Jehova sa pagpakanubo sa iya pagkasoberano? Binagbinagon naton liwat ang ginpamulong sang salmista.

Ang Kadalag-an ni Jehova sang Una

12-14. Anong duha ka kadalag-an malapit sa siudad sang Megido ang nadumduman sang salmista?

12 Talupangda ang mabakod nga pagtuo sang salmista sa ikasarang ni Jehova sa pagpaslaw sa mga plano sang kaaway nga mga pungsod. Ginlakip niya sa iya salmo ang duha ka kadalag-an sang Israel batok sa ila mga kaaway malapit sa dumaan nga siudad sang Megido, nga ang malapad nga bahin sini amo ang Nalupyakan sang Megido. Kon tig-ilinit, makita ang nahubsan nga Suba Kison nga nagalikoliko sa sini nga nalupyakan. Pagkatapos sang tigtulugnaw, nagaawas ang suba sa nalupyakan. Ayhan amo ini ang rason kon ngaa gintawag man ining suba nga “mga tubig sang Meguido.”​—Huk. 4:13; 5:19.

13 Mga 15 kilometros halin sa nalupyakan sang Megido nahamtang ang bakulod sang More. Sang panahon ni Hukom Gideon, nagtipon diri ang tropa sang mga Midianhon, Amaleknon, kag mga taga-Sidlangan agod makig-away sa ila. (Huk. 7:1, 12) Tatlo ka gatos lamang ang tinawo ni Gideon, apang sa bulig ni Jehova, nalutos nila ang madamo nga kaaway. Paano? Bilang pagsunod sa panuytoy sang Dios, pagkagab-i ginlikupan nila ang kampo sang mga kaaway nga nagauyat sing tibud nga may sulod nga mga sulo. Sang nagsenyas si Gideon, ginbuka sang iya mga tinawo ang tibud amo nga nagbanaag ang mga sulo. Sa amo man nga tion, ginhuyop nila ang ila mga budyong kag nagsinggit: “Ang espada sang GINOO kag ni Gideon!” Nagsalangisag ang mga kaaway, amo nga nagpinatyanay sila, kag ang mga nakalampuwas nalagyo patabok sa Suba Jordan. Sa sini man nga tion, madamo nga mga Israelinhon ang nagbuylog sa paglagas sa kaaway. Ang napatay nga mga kaaway naglambot sing 120,000.​—Huk. 7:19-25; 8:10.

14 Mga seis kilometros sa unhan sang bakulod sang More, sa tabok sang nalupyakan sang Megido,  nahamtang ang Bukid Tabor. Sa sini nga lugar, gintipon ni Hukom Barak ang 10,000 ka Israelinhon sa pagpakig-away sa hangaway sang Canaanhon nga hari sang Hazor nga si Jabin, nga ginadumalahan sang iya pangulo sang hangaway nga si Sisera. Ang mga Canaanhon may 900 ka kangga nga sa mga ruweda sini may naangot nga malaba kag matalom nga mga salsalon. Sang nagtipon sa Bukid Tabor ang mga Israelinhon nga kulang sing mga armas, ang mga hangaway ni Sisera nagtipon sa nalupyakan. Nian, “gindaug sang GINOO si Sisera kag ang tanan niyang kangga kag ang bug-os niyang kasoldadosan.” Mahimo nga bangod sa hinali nga pagbunok sang ulan, nag-awas ang Suba Kison amo nga nalubong sa lunang ang mga kangga. Nian, ginpatay sang mga Israelinhon ang tanan nga hangaway.​—Huk. 4:13-16; 5:19-21.

15. (a) Ano ang ginpangamuyo sang salmista kay Jehova? (b) Ano ang ginapahanumdom sa aton sang termino nga Armagedon?

15 Nagpakitluoy ang salmista kay Jehova nga laglagon man niya ang kaaway nga mga pungsod nga luyag magpapas sa ila. Nangamuyo sia: “Himoa sa ila subong sang sa Madian, subong kay Sisera kag kay Jabin sa suba sang Cison, nga nawala sa Endor, nga nangin-ipot sa duta.” (Sal. 83:9, 10) Talalupangdon man nga gintawag nga Armagedon (buot silingon “Bukid sang Megido”) ang katapusan nga pagpakig-away sang Dios sa kalibutan ni Satanas. Ginapahanumdom kita sini sa mga inaway nga natabo malapit sa Megido. Ginapasalig kita sang mga kadalag-an ni Jehova sang una nga mga inaway nga pat-od nga magadaug man sia sa inaway sa Armagedon.​—Bug.16:13-16.

Ipangamuyo nga Mabindikar si Jehova

16. Paano ‘nahuy-an’ ang mga manugpamatok karon?

16 Sa sining “katapusan nga mga adlaw,” ginapunggan ni Jehova ang tanan nga panikasog sa pagpapas sa iya katawhan. (2 Tim. 3:1) Subong resulta, nahuy-an ang mga manugpamatok. Ginlaragway ini sang Salmo 83:16 nga nagasiling: “Pun-a ang ila mga nawung sing kagumon [ukon ‘kahuya,’ NW], agud nga magpangita sila sang imo ngalan, O GINOO.” Sa madamo nga pungsod, napaslawan gid ang mga manugpamatok nga pahipuson ang mga Saksi ni Jehova. Sa sini nga mga kadutaan, ang kalig-on kag pagbatas sang mga sumilimba sang matuod nga Dios nangin isa ka panaksi sa mga matarong, amo nga madamo ang ‘nagpangita sa ngalan sang GINOO.’ Sa mga kadutaan nga mapintas nga ginhingabot anay ang mga Saksi ni Jehova, linibo ukon ginatos ka libo na karon ang malipayon nga nagadayaw kay Jehova. Kadalag-an gid ini ni Jehova, kag kahuy-anan sa iya mga kaaway!​—Basaha ang Jeremias 1:19.

17. Ano nga kahimtangan ang ginaatubang sang katawhan karon, kag ano nga mga pinamulong ang aton madumduman sa indi madugay?

17 Nahibaluan naton nga wala pa matapos ang inaway. Kag padayon kita nga nagabantala sang maayong balita​—bisan sa mga manugpamatok. (Mat. 24:14, 21) Apang, sa indi madugay matapos na ang kahigayunan nga ginhatag sa mga manugpamatok nga maghinulsol agod makatigayon sing kaluwasan. Ang pagpakabalaan sa ngalan ni Jehova amo ang mas importante sangsa kaluwasan sang tawo. (Basaha ang Ezequiel 38:23.) Kon magtipon na ang mga pungsod suno sa gintagna, agod papason ang katawhan sang Dios, madumduman naton ang pangamuyo sang salmista: “Pakahuy-an sila kag  pahangaw-an sa gihapon; paliboga sila kag walaon.”​—Sal. 83:17.

18, 19. (a) Ano ang matabo sa mga nagapamatok gid sa paggahom ni Jehova? (b) Ano ang epekto sa imo sa nagahilapit nga pagbindikar sang pagkasoberano ni Jehova?

18 Isa ka makahuluya nga kalaglagan ang matabo sa mga nagapamatok gid sa pagkasoberano ni Jehova. Ginsiling sang Pulong sang Dios nga “ang mga wala nagatuman sa maayong balita,” pagalaglagon sing dayon sa Armagedon. (2 Tes. 1:7-9) Ang ila kalaglagan kag ang kaluwasan sang mga nagasimba kay Jehova sa kamatuoran mangin mabakod nga pamatuod nga Sia lamang ang matuod nga Dios. Sa bag-ong kalibutan, indi gid malimtan ining daku nga kadalag-an. Matun-an sang ‘banhawon nga mga matarong kag mga di-matarong’ ining dalagku nga buhat ni Jehova. (Binu. 24:15) Makita nila sa bag-ong kalibutan ang makapakumbinsi nga pamatuod nga maalamon ang pagpasakop sa paggahom ni Jehova. Kag ang mga mahagop makumbinsi gilayon nga si Jehova amo ang matuod nga Dios.

19 Dalayawon gid ang palaabuton nga iaman sang aton mahigugmaon kag langitnon nga Amay para sa iya matutom nga mga sumilimba! Mapahulag gid kita sa pagpangamuyo nga kabay pa nga sabton gilayon ni Jehova ang pangamuyo sang salmista: “Kabay nga magsalangisag [ang imo kaaway] kag mawala; agod mahibaluan sang mga tawo nga ikaw, nga ang imo ngalan amo si Jehova, ikaw lamang ang Labing Mataas sa bug-os nga duta.”​—Sal. 83:17, 18, NW.

[Footnote]

^ par. 2 Antes tun-an ini nga artikulo, mas maayo nga basahon mo anay ang Salmo 83 agod mangin pamilyar ka sa mga kaundan sini.

Mapaathag Mo Bala?

• Ano ang kahimtangan sang Israel sang ginkomposo ang Salmo 83?

• Ano ang pinakaimportante para sa manunulat sang Salmo 83?

• Sin-o ang sentro sang kaakig ni Satanas karon?

• Paano sabton ni Jehova ang pangamuyo nga ginpabutyag sa Salmo 83:18?

[Mga Pamangkot sa Pagtinuon]

[Mapa sa pahina 15]

(Para sa aktual nga format, tan-awa ang publikasyon)

Ano ang kaangtanan sa aton palaabuton sang mga inaway malapit sa dumaan nga Megido?

Suba Kison

Haroset

Bukid Carmel

Nalupyakan sang Jezreel

Megido

Taanac

Bukid Gilboa

Bubon sang Harod

More

Endor

Bukid Tabor

Dagat sang Galilea

Suba Jordan

[Piktyur sa pahina 12]

Ngaa nagkomposo ang salmista sang isa ka hanuot nga pangamuyo?