Magdiretso sa kaundan

Magdiretso sa listahan sang kaundan

Talalupangdon nga mga Punto Gikan sa mga Tulun-an sang Tesalonica kag Timoteo

Talalupangdon nga mga Punto Gikan sa mga Tulun-an sang Tesalonica kag Timoteo

 Ang Pulong ni Jehova Buhi

Talalupangdon nga mga Punto Gikan sa mga Tulun-an sang Tesalonica kag Timoteo

ANG bag-o nga kongregasyon sa Tesalonica nakaeksperiensia sang paghingabot sugod sang gintukod ini sang nagduaw si apostol Pablo didto. Mga 20 anyos sadto si Timoteo sang nagbalik sia gikan sa Tesalonica kag ginsugid niya ang maayong balita kay Pablo amo nga ginsulatan sila ni Pablo agod komendahan kag palig-unon. Amo ini ang nahauna nga inspirado nga sulat ni Pablo nga mahimo ginsulat sang talipuspusan nga bahin sang 50 C.E. Wala madugay pagkatapos sadto, ginsulatan niya ang mga taga-Tesalonica, kag amo ini ang ikaduha nga tulun-an. Sa sini nga tion, gintadlong niya ang tiko nga mga pagpati sang mga kauturan kag ginpalig-on ang ila pagtuo.

Mga pulo ka tuig sang ulihi, si Pablo yara sa Macedonia kag si Timoteo yara sa Efeso. Ginsulatan ni Pablo si Timoteo agod palig-unon nga magpabilin sia sa Efeso kag buligan ang mga kauturan nga mahuptan ang ila maayo nga kaangtanan kay Jehova bisan pa sang impluwensia sang butig nga mga manunudlo sa sulod sang kongregasyon. Sang ginhingabot ang mga Cristiano sa tapos nasunog ang Roma sang 64 C.E., naghimo si Pablo sang ikaduha nga sulat para kay Timoteo. Amo ini ang katapusan sang iya inspirado nga sinulatan. Makabenepisyo man kita karon sa mga pagpalig-on kag laygay nga masapwan sa apat ka sulat ni Pablo.​—Heb. 4:12.

“MAGPABILIN NGA NAGAMATA”

(1 Tes. 1:1–5:28)

Ginkomendahan ni Pablo ang mga taga-Tesalonica bangod sang ‘ila binuhatan tungod sa pagtuo, mahigugmaon nga pagpangabudlay kag pagbatas.’ Nagsiling sia nga sila ang iya ‘paglaum kag kalipay kag purongpurong sang paghugyaw.’​—1 Tes. 1:3; 2:19.

Sa tapos ginpalig-on ang mga Cristiano sa Tesalonica nga lugpayan ang isa kag isa sang paglaum sa pagkabanhaw, nagsiling si Pablo: “Ang adlaw ni Jehova magaabot subong sang kawatan sa kagab-ihon.” Ginlaygayan niya sila nga ‘magpabilin nga nagamata’ kag huptan ang ila kaligdong.​—1 Tes. 4:16-18; 5:2, 6.

Sabat sa mga Pamangkot sa Kasulatan:

4:15-17—Sin-o ang mga “sabniton . . . sa mga panganod agod sugataon ang Ginuo sa kahanginan,” kag paano ini matabo? Sila ang hinaplas nga mga Cristiano nga nagakabuhi sa tion sang presensia ni Cristo. Antes nila “sugataon” si Ginuong Jesus sa langit, kinahanglan anay nga mapatay sila kag banhawon subong mga espiritu nga tinuga. (Roma 6:3-5; 1 Cor. 15:35, 44) Nagsugod na ang presensia ni Cristo, gani ang hinaplas nga mga Cristiano nga mapatay karon “sabniton,” ukon banhawon gilayon.​—1 Cor. 15:51, 52.

5:23—Ano ang buot silingon ni Pablo sang nangamuyo sia nga “ang inyo bug-os nga espiritu kag kalag kag lawas matipigan”? Ginpatuhuyan ni Pablo ang espiritu, kalag kag lawas sang Cristiano nga kongregasyon, nga ginalakipan sang mga hinaplas nga mga Cristiano sa Tesalonica. Sa baylo nga ipangamuyo lamang nga matipigan ang kongregasyon, ginpangamuyo niya nga matipigan ang “espiritu,” ukon panghunahuna sini. Ginpangamuyo man niya ang “kalag,” ang kabuhi ukon pagluntad sini, kag ang “lawas” nga amo ang grupo sang hinaplas nga Cristiano. (1 Cor. 12:12, 13) Ginpakita sang pangamuyo ni Pablo nga nagaulikid gid sia sa kongregasyon sang hinaplas.

 Mga Leksion Para sa Aton:

1:3, 7; 2:13; 4:1-12; 5:15. Mangin epektibo ang laygay kon ginaupdan ini sing komendasyon kag pagpalig-on nga mag-uswag.

4:1, 9, 10. Dapat padayon nga pabakuron sang mga sumilimba ni Jehova ang ila kaangtanan sa iya.

5:1-3, 8, 20, 21. Samtang nagahilapit ang adlaw ni Jehova, dapat nga “huptan naton ang aton kaligdong kag isuklob ang pagtuo kag gugma subong panaming sa dughan kag ang paglaum nga kaluwasan subong helmet.” Dugang pa, dapat nga serioso naton nga tun-an ang matagnaon nga Pulong sang Dios, ang Biblia.

“MAGTINDOG SING MALIG-ON”

(2 Tes. 1:1–3:18)

Ginpatiko sang pila sa kongregasyon ang ginsiling ni Pablo sa iya una nga sulat. Mahimo gin-insister nila nga yara na ang ‘presensia sang Ginuo.’ Agod tadlungon ini, ginsugiran sila ni Pablo kon ano ‘anay ang magaabot.’​—2 Tes. 2:1-3.

Ginpalig-on sila ni Pablo: “Magtindog kamo sing malig-on kag hupti ang mga tradisyon nga gintudlo sa inyo.” Ginsugo niya sila ‘nga magpalayo sa tagsa ka utod nga nagalakat sing di-matinumanon.’​—2 Tes. 2:15; 3:6.

Sabat sa mga Pamangkot sa Kasulatan:

2:3, 8—Sin-o “ang tawo sang pagkamalinapason,” kag paano sia laglagon? Ang “tawo” amo ang klero nga klase sang Cristiandad. Ang gintangduan nga magapahibalo sang paghukom sang Dios sa mga malaut kag magamando sa paglaglag sa ila amo “ang Pulong”​—ang Panguna nga Humalambal sang Dios, si Jesucristo. (Juan 1:1) Busa, masiling nga si Jesus ang magalaglag sa tawo sang pagkamalinapason “paagi sa espiritu [buhi nga puersa] sang iya baba.”

2:13, 14—Paano ang hinaplas nga mga Cristiano ‘kutob sa ginsuguran ginpili para sa kaluwasan’? Ang hinaplas subong isa ka grupo ginpili na nga daan ni Jehova sang gintuyo Niya ang binhi sang babayi nga magadugmok sa ulo ni Satanas. (Gen. 3:15) Ginpahibalo man ni Jehova ang ginapatuman sa ila, ang hilikuton nga ila himuon, kag ang pagtilaw nga ila maeksperiensiahan. Busa ginpili sila ‘sa sini nga katuyuan.’

Mga Leksion Para sa Aton:

1:6-9. Ang mga malauton lamang ang laglagon ni Jehova sa iya paghukom.

3:8-12. Bisan pa malapit na ang adlaw ni Jehova indi ini balibad nga indi na kita mag-obra para sakdagon ang aton kaugalingon kag pagministeryo. Kon indi kita masako mahimo magtinamad kita kag mangin “mahilabtanon sa iban nga mga tawo.”​—1 Ped. 4:15.

“BANTAYI ANG GINTUGYAN SA IMO”

(1 Tim. 1:1–6:21)

Gintudluan ni Pablo si Timoteo nga ‘magpadayon sa maayo nga pagpakig-away; nga nagahupot sang pagtuo kag maayo nga konsiensia.’ Ginsambit sang apostol ang mga kalipikasyon para sa tinangdo nga mga lalaki sa kongregasyon. Gintudluan man ni Pablo si Timoteo: “Likawi ang butig nga mga sugilanon nga nagasikway sa kon ano ang balaan.”​—1 Tim. 1:18, 19; 3:1-10, 12, 13; 4:7.

“Indi pagmulaya ang isa ka tigulang nga lalaki,” sulat ni Pablo. Ginpalig-on niya si Timoteo: “Bantayi ang gintugyan sa imo, nga ginalikawan ang wala pulos nga mga halambalanon nga nagasikway sa kon ano ang balaan kag ang mga pagsumpakilay sang sayop nga ginatawag nga ‘ihibalo.’”​—1 Tim. 5:1; 6:20.

Sabat sa mga Pamangkot sa Kasulatan:

1:18; 4:14—Ano nga “mga panagna” ang ginsambit tuhoy kay Timoteo? Ini nga mga panagna mahimo nagapatuhoy sa palaabuton nga papel ni Timoteo sa Cristianong kongregasyon, nga ginsambit sang gin-inspirar si Pablo sang nagduaw sia sa Listra sang ikaduha niya nga paglakbay subong misyonero. (Binu. 16:1, 2) Base sa sining “mga panagna,” ang mga gulang sang kongregasyon ‘nagtungtong sang ila mga kamot’ sa pamatan-on nga si Timoteo, nga nagtangdo sa iya sa isa ka espesipiko nga pribilehiyo.

2:15—Paano ang isa ka babayi “pagaamligan paagi sa pagpanganak”? Ang pagpanganak ukon pag-atipan sa mga kabataan kag sa panimalay ‘makaamlig’ sa isa ka babayi nga mangin ‘kutsokutsera kag hilabtera sa mga hilikuton sang iban nga mga tawo.’​—1 Tim. 5:11-15.

3:16—Ano ang sagrado nga likom sang diosnon  nga debosyon? Wala mahibaluan sa sulod sang malawig nga tion kon bala mangin himpit nga matinumanon ang mga tawo sa soberanya ni Jehova ukon indi. Ginsabat ini ni Jesus paagi sa paghupot sing himpit nga integridad sa Dios tubtob sa iya kamatayon.

6:15, 16—Ini bala nga mga pulong nagapatuhoy kay Jehova nga Dios ukon kay Jesucristo? Ining mga pulong nagapatuhoy sa pagpadayag sang isa nga ginlaragway, nga amo si Jesucristo. (1 Tim. 6:14) Kon ipaanggid sa mga tawo nga nagagahom subong mga hari kag mga ginuo, si Jesus ‘lamang ang Gamhanan nga Manuggahom,’ kag di-mamalatyon. (Dan. 7:14; Roma 6:9) Sang nagkayab na sia sa langit, wala na sang tawo nga “makakita” sa iya sang ila mismo mga mata.

Mga Leksion Para sa Aton:

4:15. Bisan pa bag-o lang kita nangin Cristiano ukon madugay na, dapat naton tinguhaan nga mag-uswag kag magbakod pa gid ang aton relasyon kay Jehova.

6:2. Kon nagatrabaho kita sa mga kauturan, sa baylo nga mamentaha, dapat kita mangin mapisan sangsa kon nagatrabaho kita sa tagagua.

“IBANTALA ANG PULONG, MANGIN MASAKO SA SINI”

(2 Tim. 1:1–4:22)

Agod ihanda si Timoteo sa mga kabudlayan, si Pablo nagsulat: “Ginhatagan kita sang Dios indi sing espiritu sang katalaw, kundi sang gahom kag sang gugma kag sang maligdong nga hunahuna.” Ginlaygayan niya si Timoteo: “Ang ulipon sang Ginuo indi kinahanglan makig-away, kundi kinahanglan mangin malulo sa tanan, kalipikado sa pagpanudlo.”​—2 Tim. 1:7; 2:24.

Dugang nga ginpalig-on ni Pablo si Timoteo: “Magpadayon ka sa mga butang nga imo natun-an kag nabuyok ka nga patihan.” Nagalapnag ang apostata nga mga panudlo sadto, amo nga ginlaygayan sang apostol ang bataon nga manugtatap: “Ibantala ang pulong, mangin masako sa sini . . . , magsabdong, magsaway, maglaygay.”​—2 Tim. 3:14; 4:2.

Sabat sa mga Pamangkot sa Kasulatan:

1:13—Ano “ang sulundan sang makapapagros nga mga pulong”? Ang “makapapagros nga mga pulong, nga iya sang aton Ginuong Jesucristo,” amo ang matuod nga Cristianong mga panudlo. (1 Tim. 6:3) Ang gintudlo kag ginhimo ni Jesus nahisanto sa Pulong sang Dios, busa ang ekspresyon nga “makapapagros nga mga pulong” mahimo man mapatuhoy sa tanan nga mga panudlo sang Biblia. Ining mga panudlo nagabulig sa aton nga mahibaluan kon ano ang mga ginapatuman ni Jehova. Padayon kita nga nagasunod sa sining sulundan kon ginaaplikar naton ang aton natun-an sa Biblia.

4:13—Ano ang “mga pergamino”? Ang “mga pergamino” nagapatuhoy sa sululatan nga human sa panit. Mahimo nga nagpangabay si Pablo sang pila ka linukot sang Hebreong Kasulatan agod matun-an niya ini samtang nabilanggo sia sa Roma. Ang pila sining linukot mahimo nga papiro apang ang iban pergamino.

Mga Leksion Para sa Aton:

1:5; 3:15. Ang daku gid nga rason kon ngaa si Timoteo may pagtuo kay Jesucristo, buot silingon, ang pagtuo nga nag-impluwensia sang tanan nga ginhimo ni Timoteo, amo ang Makasulatanhon nga pagtudlo nga natigayon niya kutob sa pagkalapsag. Gani, importante gid nga binagbinagon sing maayo sang mga katapo sang pamilya kon paano nila ginatuman ini nga responsibilidad sa Dios kag sa ila mga kabataan!

1:16-18. Kon ang aton mga kauturan nagaatubang sing mga pagtilaw, paghingabot, ukon pagkabilanggo, ipangamuyo naton sila kag himuon ang aton labi nga masarangan nga buligan sila.​—Hulu. 3:27; 1 Tes. 5:25.

2:22. Ang mga Cristiano, ilabi na ang mga pamatan-on, indi dapat mangin tuman kasako sa pag-ehersisyo, isport, musika, paglingawlingaw, paglagawlagaw, wala namunamo nga pag-istoryahanay kag ang kaanggid sini, amo nga wala na sila sing tion para sa Cristianong mga hilikuton.

[Piktyur sa pahina 31]

Ano ang katapusan nga inspirado nga tulun-an nga ginsulat ni apostol Pablo?