Magdiretso sa kaundan

Magdiretso sa listahan sang kaundan

Hupti ang “Lubid nga Tatlo ka Dupli” sa Pag-asawahay

Hupti ang “Lubid nga Tatlo ka Dupli” sa Pag-asawahay

 Hupti ang “Lubid nga Tatlo ka Dupli” sa Pag-asawahay

“Ang lubid nga tatlo ka dupli indi mabugto sing madali.”​—MAN. 4:12.

1. Sin-o ang nagtukod sang una nga pag-asawahay?

PAGKATAPOS gintuga ni Jehova nga Dios ang mga tanom kag kasapatan, ginhimo niya ang una nga tawo, si Adan. Sang ulihi, ginpatulog sang Dios sing mahamuok si Adan, ginkuha ang isa niya ka gusok kag ginhimo ini nga himpit nga kabulig. Sang makita ni Adan ang babayi nagsiling sia: “Ini karon tul-an sang akon katul-anan kag unud sang akon unud.” (Gen. 1:27; 2:18, 21-23) Nalipay gid si Jehova sang gintuga niya ang una nga babayi, si Eva. Nian, ginkasal sila sang Dios kag ginpakamaayo ang ila pag-asawahay.​—Gen. 1:28; 2:24.

2. Paano ginguba ni Satanas ang kaangtanan ni Adan kag ni Eva?

2 Apang wala magdugay, gintilawan ang ila pag-asawahay. Paano? Ginlimbungan si Eva sang malauton nga persona, nga nakilal-an nga Satanas. Gani, ginkaon niya ang bunga sang kahoy nga gindumili sa ila nga mag-asawa. Dayon, nagkaon man si Adan, sa amo nagrebelde sia sa paggahom sang Dios. (Gen. 3:1-7) Sang ginpamangkot sila ni Jehova tuhoy sa ila ginhimo, ginbasol ni Adan ang iya asawa nga nagasiling: “Ang babayi nga ginhatag mo nga manginkaupud ko, ginhatagan niya ako gikan sa kahoy, kag nagkaon ako.” (Gen. 3:11-13) Gani maathag nga may problema ang ila pag-asawahay.

3. Anong sayop nga pagtamod ang ginapatihan sang mga Judiyo?

3 Sa sulod sang malawig nga tion, naggamit si Satanas sing lainlain nga paagi agod gub-on ang pag-asawahay. Kon kaisa, ginagamit niya ang relihioso nga mga lider sa pagpalapta sing wala napasad sa Biblia nga pagtamod sa pag-asawahay. Ginapakadiutay sang pila ka Judiyong mga lider ang talaksan sang Dios kay ginatugutan nila ang mga bana nga bulagan ang ila mga asawa bisan sa di-salapakon nga mga rason, halimbawa kon natam-an ka asin ang ila linuto. Apang, si Jesus nagsiling: “Ang bisan sin-o nga magdiborsio sa iya asawa, luwas lamang kon nakighilawas ang iya asawa, kag magpangasawa sang iban nagapanghilahi.”​—Mat. 19:9.

4. Paano karon ginaguba ang pag-asawahay?

4 Masako gihapon si Satanas sa pagguba sang pag-asawahay. Nagmadinalag-on gid sia kay ginatugutan na karon sa pila ka duog ang pagpakasal sang mga homoseksuwal, pagpuyo-puyo kag ginpahapos pa ang pagbulagay. (Basaha ang Hebreo 13:4.) Subong mga Cristiano, ano ang himuon naton agod indi kita maimpluwensiahan sang sayop nga pagtamod karon sa pag-asawahay? Binagbinagon naton ang pila ka sekreto sang malipayon kag madinalag-on nga pag-asawahay.

Ilakip Pirme si Jehova sa Inyo Pag-asawahay

5. Ano ang kahulugan sang “lubid nga tatlo ka dupli”?

5 Agod magmadinalag-on ang mag-asawa, dapat ilakip nila si Jehova sa ila pag-asawahay. Ang iya Pulong nagasiling: “Ang lubid nga tatlo ka dupli indi mabugto sing madali.” (Man. 4:12) Ang “lubid nga tatlo ka dupli” indi literal. Kon ipatuhoy ini sa pag-asawahay, ang duha ka dupli amo ang bana kag asawa, kag nagasambod ini sa tunga nga dupli, nga amo si Jehova nga Dios. Mangin malipayon gid ang mag-asawa kon kaupod nila ang Dios bangod hatagan Niya sila sing kusog sa pag-atubang sa mga problema.

6, 7. (a) Ano ang himuon sang mga Cristiano agod mapat-od nga kaupod nila ang Dios sa ila pag-asawahay? (b) Ano ang nanamian gid sang isa ka utod nga babayi sa iya bana?

6 Ano ang himuon sang mag-asawa agod ang ila pag-asawahay mangin kaangay sang lubid nga tatlo ka dupli? Ang salmista nga si David  nag-amba: “Nagakalipay ako sa paghimo sang imo kabubut-on, O Dios ko; ang imo kasogoan yari sa sulud sang akon tagiposoon.” (Sal. 40:8) Ang aton gugma sa Dios dapat magpahulag man sa aton nga alagaron sia sing bug-os tagipusuon. Gani, dapat palambuon gid sang bana kag asawa ang suod nga kaangtanan kay Jehova kag magkalipay sa paghimo sang iya kabubut-on. Dapat buligan man sang isa nga pabakuron ang gugma sang iya tiayon sa Dios.​—Hulu. 27:17.

7 Magabakod pa gid ang pag-asawahay kon ang kasuguan sang Dios yara sa aton tagipusuon, kay mapadayag naton ang mga kinaiya subong sang pagtuo, paglaum, kag gugma. (1 Cor. 13:13) Si Sandra, ang aton utod nga babayi nga minyo sa sulod na sing 50 ka tuig, nagsiling: “Ang nanamian ko gid sa akon bana kay ginalaygayan niya ako pasad sa Biblia kag ginahigugma gid niya si Jehova. Ini nga gugma mas mabakod sangsa gugma niya sa akon.” Mga bana, amo man bala sini ang masiling sang inyo asawa sa inyo?

8. Ano ang kinahanglan agod matigayon sang mag-asawa ang ‘maayo nga balus’?

8 Subong mag-asawa, ginauna bala ninyo ang espirituwal nga mga butang kag ang intereses sang Ginharian sa inyo kabuhi? Ang imo bala tiayon amo ang imo kaupod sa pag-alagad kay Jehova? (Gen. 2:24) Ang maalam nga si Hari Solomon nagsiling: “Ang duha maayo pa sa isa, bangud nga may maayo sila nga balus tungud sang ila pagpangabudlay.” (Man. 4:9) Gani, dapat tinguhaan gid sang bana kag asawa nga matigayon ang ‘maayo nga balus,’ nga amo, ang mahigugmaon kag mapag-on nga pag-asawahay nga ginapakamaayo sang Dios.

9. (a) Ano ang katungdanan sang mga bana? (b) Suno sa Colosas 3:19, paano dapat pakig-angutan sang bana ang iya asawa?

9 Kon ginatinguhaan gid sang bana kag asawa nga sundon ang mga ginapatuman ni Jehova, nian masiling nga ang Dios kaupod nila sa ila pag-asawahay. Ang bana amo ang may panguna nga obligasyon sa pag-aman sang materyal kag espirituwal nga kinahanglanon sang iya pamilya. (1 Tim. 5:8) Ginapalig-on man sila nga pun-an ang emosyonal nga kinahanglanon sang ila asawa. Sa Colosas 3:19, aton mabasa: “Kamo nga mga bana, padayon nga higugmaa ang inyo asawa kag indi kamo magbalingaso sa kaakig sa ila.” Ang isa ka iskolar sa Biblia nagpaathag nga ang ekspresyon nga “magbalingaso sa kaakig” nagalakip sa “maparas nga mga tinaga, kag pagsakit sa tiayon ukon pagdingot sa iya sing pagpalangga, pag-atipan, kag pag-amlig.” Maathag, nga ini nga sahi sang paggawi indi nagakabagay sa Cristianong panimalay. Kon ang bana mahigugmaon nga ulo, mahapos para sa iya asawa nga magpasakop sa iya.

10. Ano nga panimuot ang dapat panikasugan sang Cristianong mga asawa?

10 Agod si Jehova mangin bahin sang ila pag-asawahay, dapat tinguhaan man sang Cristianong mga asawa nga sundon ang mga ginapatuman sang Dios. Si apostol Pablo nagsulat: “Ang mga asawa magpasakop sa ila bana subong nga sa Ginuo, bangod ang bana amo ang ulo sang iya asawa subong nga si Cristo amo man ang ulo sang kongregasyon.” (Efe. 5:22, 23) Ginpapati ni Satanas si Eva nga kon indi sia magpasakop sa Dios mangin malipayon sia. Ini nga panimuot yara gid sa madamo nga mag-asawa karon. Apang, ang diosnon nga mga asawa kinabubut-on nga nagapasakop sa ila mahigugmaon nga ulo. Ginadumdom nila nga ginhimo ni Jehova si Eva nga mangin “kabulig” sang iya bana, kag para sa Dios isa gid ini ka dungganon nga papel. (Gen. 2:18) Ang Cristianong asawa nga malipayon nga nagapasakop sa sini nga kahimusan “purungpurung” gid sa iya bana.​—Hulu. 12:4.

11. Suno sa isa ka utod nga lalaki ano ang nakabulig sa ila pag-asawahay?

11 Daku man ang mabulig sang pagtuon sa Pulong sang Dios sing magkaupod agod mangin bahin ang Dios sang ila pag-asawahay. Si Gerald, malipayon nga bana sa sulod na sang 55 ka tuig, nagsiling, “Agod magmadinalag-on ang pag-asawahay dapat basahon nila kag tun-an ang Biblia sing magkaupod.” Sia nagsiling pa, “Kon ginahimo nila ang mga butang sing magkaupod ilabi na ang espirituwal nga mga hilikuton magasuod pa gid sila nga duha kag ang ila kaangtanan kay Jehova.” Kon tun-an naton ang Biblia subong pamilya labi nga magasuod kita kay Jehova,  kag padayon kita nga magauswag bangod pirme naton ginadumdom ang iya mga talaksan.

12, 13. (a) Ngaa ang pagpangamuyo nga magkaupod makabulig sa mag-asawa? (b) Ano pa nga espirituwal nga mga hilikuton ang makapabakod sang pag-asawahay?

12 Malipayon ang mag-asawa nga magkaupod nga nagapangamuyo. Kon ‘ibubo sang bana ang iya tagipusuon’ kay Jehova kag espesipiko nga mangayo sing bulig, magabakod pa gid ang ila pag-asawahay. (Sal. 62:8) Halimbawa, mas mahapos ninyo malimtan ang di-paghangpanay kon mangayo kamo sing panuytoy kay Jehova paagi sa pangamuyo! (Mat. 6:14, 15) Nahisanto sa ila pangamuyo, nagakaigo para sa mag-asawa nga magbuligay kag ‘padayon nga batason ang isa kag isa kag patawaron sing kinabubut-on ang isa kag isa.’ (Col. 3:13) Dumduma nga ang pagpangamuyo nagapakita sing pagsalig sa Dios. Si Hari David nagsiling: “Ang mga mata sang tanan [nagalaum, NW] sa imo.” (Sal. 145:15) Kon nagasalig kita kay Jehova, indi kita dapat mabalaka kay nakahibalo kita nga ‘nagaulikid sia sa aton.’​—1 Ped. 5:7.

13 Agod mangin kaupod si Jehova sa pag-asawahay makabulig man ang pagtambong sa mga miting kag ang pagpakigbahin sa ministeryo sing magkaupod. Paagi sa mga miting, matun-an sang mga mag-asawa kon paano batuan ang mga “pahito” nga ginagamit ni Satanas agod bungkagon ang mga pamilya. (Efe. 6:11) ‘Mangin mapag-on, kag di-mationg’ ang bana kag asawa nga magkaupod nga nagapakigbahin sing regular sa ministeryo.​—1 Cor. 15:58.

Kon May mga Problema

14. Ano ang kabangdanan sang mga problema sang mag-asawa?

14 Mahimo indi na gid man bag-o ang mga panugda nga nahinambitan na, apang ngaa indi ninyo ini paghambalan sang imo tiayon? Tan-awa kon ano pa ang dapat ninyo pauswagon. Ang Biblia nagabaton nga bisan ang diosnon nga mga mag-asawa “may kapipit-an sa ila unod.” (1 Cor. 7:28) Bisan ang matutom nga mga alagad sang Dios makaeksperiensia sing mga problema sa ila pag-asawahay bangod sa pagkadi-himpit, malain nga impluwensia sang malaut nga kalibutan, kag mga pahito sang Yawa. (2 Cor. 2:11) Apang, buligan kita ni Jehova nga malampuwasan ang aton mga problema. Kag makasalig gid kita sa iya. Nadula sang matutom  nga tawo nga si Job ang iya kasapatan, mga suluguon, kag mga kabataan. Apang ang Biblia nagsiling: “Sa sini tanan wala makasala si Job ukon nagpabangud sa Dios sing binuang.”​—Job 1:13-22.

15. Ano ang mahimo nga reaksion sang isa nga may problema, kag ano ang maayo nga himuon sang iya tiayon?

15 Sa pihak nga bahin, ang asawa ni Job nagsiling: “Ginahuptan pa bala nimo sing malig-on ang imo pagkatarung? Sikwaya ang Dios, kag panginmatay.” (Job 2:9) Sa pagkamatuod, mahimo maggawi sing di-maalamon ang isa kon may mabug-at sia nga problema. “Ang pagpamigos nagapabuang sa maalam,” siling sang isa ka maalam nga tawo. (Man. 7:7, NW) Kon nagawaldati ang imo tiayon bangod may mabug-at sia nga problema, kalma ka lang. Kon balusan mo sia, mahimo magalala lang ang kahimtangan. (Basaha ang Salmo 37:8.) Gani indi na pagsapaka ang “matabinason” nga hambal nga makapalain lang sing buot.​—Sal. 106:33.

16. (a) Paano ang pinamulong ni Jesus sa Mateo 7:1-5 makabulig sa mag-asawa? (b) Ngaa dapat mangin rasonable ang mag-asawa?

16 Dapat mangin realistiko ang mag-asawa sa ila mga ginapaabot sa ila tiayon. Mahimo may batasan ang imo tiayon nga indi mo nauyunan, kag ayhan maghunahuna ka, ‘Mabuligan ko sia nga magbag-o.’ Upod ang gugma kag pagpailob, mabuligan mo sia nga amat-amat ini nga mabag-o. Apang, indi pagkalimti nga ginpaanggid ni Jesus ang tawo nga nagapamantay sa sala sang iban sa isa nga nakatalupangod sang “dagami” sa mata sang iya utod apang wala niya makita ang “balayanon” sa iya mata. Gani ginapalig-on kita ni Jesus: “Untati ninyo ang paghukom agod indi kamo paghukman.” (Basaha ang Mateo 7:1-5.) Apang wala ini nagakahulugan nga pabay-an na lang ang serioso nga mga kaluyahon. Si Robert nga halos 40 ka tuig na nga minyo, nagsiling: “Ang mag-asawa dapat mangin tampad kag prangka sa isa kag isa. Kag kon may nakita ang ila tiayon sa ila nga indi maayo, dapat handa sila nga batunon kag tadlungon ini.” Gani mangin rasonable. Sa baylo nga pangitaon ang mga kinaiya nga wala sa imo tiayon, apresyaha ang maayo nga mga kinaiya nga yara sa iya.​—Man. 9:9.

17, 18. Kon daw indi na gid maagwanta ang mga pagtilaw, kay sin-o kita mangayo sing bulig?

17 Magaatubang sing mga pagtilaw ang mag-asawa sa tion nga magbag-o ang ila kahimtangan. Halimbawa, mahimo mangin hangkat sa ila kon may kabataan na sila, ukon kon magmasakit ini, kag magseparar sa ila kon hamtong na. Mahimo pagatilawan man sila kon magbalatian ang isa ka tiayon ukon ang ila ginikanan kag nagakinahanglan nga atipanon. Ayhan magabag-o pa gid ang kahimtangan kon may pribilehiyo sila sa kongregasyon nga dapat atipanon. Ini tanan nagapabudlay kag nagapahuol sa ila.

18 Kon bangod sa sining mga rason nagabatyag ka nga daw indi ka na makaagwanta, ano ang dapat mo himuon? (Hulu. 24:10) Indi ka mangampo! Luyag gid ni Satanas nga mag-untat ka sa pag-alagad kay Jehova. Kag mas malipay pa gid sia kon duha na gid kamo sang imo tiayon. Gani, himua ang imo bug-os nga masarangan nga ang inyo pag-asawahay mangin lubid nga tatlo ka dupli. Ang Biblia nagaunod sing madamo nga kasaysayan sang katawhan nga nangin matutom walay sapayan sang mabudlay nga mga pagtilaw. Halimbawa, sa isa ka okasyon, nangamuyo sing hanuot si David kay Jehova, nga nagasiling: “Malooy ka sa akon, O Dios, kay ang tawo . . . nagapigus sa akon.” (Sal. 56:1) Nakaagi ka na bala nga ginpigos sang mga “tawo”? Suod man sila sa imo ukon indi, dumduma nga kon nakabatas si David, makabatas ka man. “Ginpangita ko ang GINOO, kag ginsabat  niya ako,” siling ni David. “Ginluwas niya ako sa tanan ko nga kahadluk.”​—Sal. 34:4.

Dugang nga mga Pagpakamaayo

19. Paano naton mabatuan ang mga pag-atake ni Satanas?

19 Sa sining katapusan nga mga tion, dapat ‘padayon nga lugpayan sang mag-asawa ang isa kag isa kag palig-unon ang isa kag isa.’ (1 Tes. 5:11) Dumduma nga nagsiling si Satanas nga nagaalagad lamang kita kay Jehova bangod sa aton personal nga mga bentaha. Himuon niya ang tanan agod gub-on ang aton pag-asawahay kag patalikdon kita sa Dios. Agod mabatuan si Satanas, dapat magsalig kita sing bug-os kay Jehova. (Hulu. 3:5, 6) Si Pablo nagsiling: “Sa tanan nga butang may kusog ako paagi sa iya nga nagapabakod sa akon.”​—Fil. 4:13.

20. Ano ang mga pagpakamaayo kon ilakip naton ang Dios sa aton pag-asawahay?

20 Kon ilakip naton ang Dios sa aton pag-asawahay makabaton kita sing madamo nga pagpakamaayo. Amo gid sini ang naeksperiensiahan ni Joel kag sang iya asawa sa sulod na sing 51 ka tuig. Sia nagsiling: “Ginapasalamatan ko gid si Jehova sa akon asawa kag sa amon malipayon nga pag-updanay. Maayo gid sia nga kaupod.” Ano ang iya sekreto? “Ginatinguhaan gid namon nga mangin mainayuhon, mapailubon, kag mahigugmaon.” Sa karon, wala sing isa sa aton ang himpit nga makahimo sina. Apang, tinguhaan gid naton nga iaplikar ang mga prinsipio sa Biblia kag ilakip si Jehova sa aton pag-asawahay. Kon himuon naton ini, ang aton pag-asawahay mangin “lubid nga tatlo ka dupli [nga] indi mabugto sing madali.”​—Man. 4:12.

Madumduman mo Bala?

• Paano naton mahibaluan nga ang Dios yara sa aton pag-asawahay?

• Ano ang buot silingon nga si Jehova kaupod sa pag-asawahay?

• Ano ang dapat himuon sang mga mag-asawa kon may problema sila?

[Mga Pamangkot sa Pagtinuon]

[Mga piktyur sa pahina 18]

Ang pagpangamuyo nga magkaupod makabulig sa mag-asawa kon may mga problema sila