Magdiretso sa kaundan

Magdiretso sa listahan sang kaundan

Sikwaya ang “Walay Pulus” nga mga Butang

Sikwaya ang “Walay Pulus” nga mga Butang

 Sikwaya ang “Walay Pulus” nga mga Butang

“Ang nagasonod sa walay pulus nawad-an sing paghangup.”​—HULU. 12:11.

1. Ano ang pila sang aton bilidhon nga mga butang, kag ano ang labing maayo nga paagi nga magamit naton ini?

SUBONG mga Cristiano, madamo kita sing bilidhon nga mga butang. Ang pila sini amo ang aton mapagros nga lawas kag kusog, duna nga kinaalam, ukon ang manggad. Bangod ginahigugma naton si Jehova, nalipay kita nga gamiton ini sa aton pag-alagad sa iya, sa amo ginasunod naton ang laygay sang Biblia: “Padunggi si Jehova paagi sa imo bilidhon nga mga butang.”​—Hulu. 3:9, NW.

2. Ano ang paandam sang Biblia tuhoy sa walay pulos nga mga butang, kag ano ang kahulugan sini nga paandam?

2 Nagahambal man ang Biblia tuhoy sa walay pulos nga mga butang kag nagapaandam ini nga indi naton pag-uyangan ang aton panikasog sa paghingamo sini. Tuhoy sini, binagbinaga ang ginasiling sang Hulubaton 12:11: “Ang nagauma sang iya duta may madamung kalan-on; apang ang nagasonod sa walay pulus nawad-an sing paghangup.” Mahapos mahangpan kon ano ang kahulugan sini nga hulubaton. Kon maghimakas gid ang isa ka tawo para sa iya pamilya, mahimo gid nga magmadinalag-on sia. (1 Tim. 5:8) Apang, kon panikasugan niya ang walay pulos nga mga butang, ‘mawad-an sia sing paghangup,’ buot silingon, indi balanse ang iya pagtamod kag indi husto ang iya motibo. Mahimo gid nga indi magmadinalag-on ini nga tawo.

3. Paano ang paandam sang Biblia tuhoy sa walay pulos nga mga butang naaplikar sa aton pagsimba?

3 Apang, ano kon iaplikar naton ang prinsipio sini nga hulubaton sa aton pagsimba? Nian, makita naton nga ang isa ka Cristiano nga maukod kag matutom nga nagaalagad kay Jehova amo ang makatigayon sing matuod nga kalig-unan. Makasalig sia sa pagpakamaayo sang Dios karon kag pat-od ang iya paglaum sa palaabuton. (Mat. 6:33; 1 Tim. 4:10) Apang, mahimo madula sang isa ka Cristiano ang iya kaangtanan kay Jehova kag ang iya ginalauman nga kabuhi nga walay katapusan kon mawili sia sa paghingamo sa walay pulos nga mga butang. Paano naton malikawan ini? Dapat mahantop naton kon ano ang “walay pulus” nga mga butang sa aton kabuhi kag sikwayon gid ini.​—Basaha ang Tito 2:11, 12.

4. Sa kabilugan, ano ang walay pulos nga mga butang?

4 Ano ang walay pulos nga mga butang? Sa kabilugan, amo ini ang mga butang nga nagaupang sa aton sa pag-alagad kay Jehova sing bug-os kalag. Halimbawa, mahimo nga malakip sa sini ang nanuhaytuhay nga sahi sang kalingawan. Matuod, mapuslanon ang paglingawlingaw kon haganhagan lamang. Apang, kon pasobrahan ini kag maapektuhan ang aton pagsimba sa Dios, ang paglingawlingaw mangin walay pulos, kag makahalit sa aton kaangtanan sa Dios. (Man. 2:24; 4:6) Agod malikawan ini, dapat mangin balanse ang isa ka Cristiano kag magbantay gid kon paano niya ginahinguyang ang iya mapuslanon nga tion. (Basaha ang Colosas 4:5.) Apang, may yara walay pulos nga mga butang nga mas makatalagam sangsa kalingawan. Ang isa sini amo ang butig nga mga dios.

 Sikwaya ang Walay Pulos nga mga Dios

5. Sa kalabanan nga bersikulo sang Biblia, sa ano naaplikar ang tinaga nga “walay pulos”?

5 Talalupangdon nga sa kalabanan nga bersikulo sang Biblia diin mabasa ang tinaga nga “walay pulos,” naaplikar ini sa butig nga mga dios. Halimbawa, nagsiling si Jehova sa Israel: “Indi kamo maghimo sing walay pulos nga mga dios para sa inyo kaugalingon, kag indi kamo magpatindog sing larawan nga tinigban ukon sagrado nga haligi para sa inyo kaugalingon, kag indi kamo maghimo sing bato nga dinagwayan sa inyo duta agod yauban ini.” (Lev. 26:1, NW) Nagsulat si Hari David: “Dungganon si Jehova kag dalayawon gid, kag dapat sia kahadlukan sangsa tanan nga mga dios. Kay ang tanan nga mga dios sang mga tawo walay pulos nga mga dios. Tuhoy kay Jehova, sia ang naghimo sang mga langit.”​—1 Cron. 16:25, 26, NW.

6. Ngaa wala sing pulos ang butig nga mga dios?

6 Subong sang ginapakita ni David, ginapalibutan kita sang ebidensia nga dungganon si Jehova. (Sal. 139:14; 148:1-10) Isa gid ka kadungganan para sa mga Israelinhon sadto nga nakigkatipan sa ila si Jehova! Binuang gid ang ila ginhimo nga nagtalikod sila kay Jehova kag nagyaub sa mga larawan nga tinigban kag sa sagrado nga mga haligi! Sang may problema sila, wala sing nahimo ang ila butig nga mga dios sa pagluwas sa ila kaugalingon kag sa ila mga sumilimba.​—Huk. 10:14, 15; Isa. 46:5-7.

7, 8. Paano mangin dios ang “Manggad”?

7 Sa madamo nga kadutaan karon, nagayaub gihapon ang mga tawo sa hinimo sang tawo nga mga imahen, kag subong sang una, wala gihapon karon sing pulos ini nga sahi sang mga dios. (1 Juan 5:21) Apang, may mga dios pa nga ginalaragway sa Biblia luwas sa mga imahen. Binagbinaga, halimbawa, ining ginsiling ni Jesus: “Wala sing makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sa Dios kag sa Manggad.”​—Mat. 6:24.

8 Paano mangin dios ang “Manggad”? Subong isa ka halimbawa, hunahunaa ang isa ka bato didto anay sa isa ka latagon sa dumaan nga Israel. Magamit ini nga bato sa pagpatindog sing balay ukon pader. Apang, sang ginpatindog ini subong isa ka “sagrado nga haligi” ukon isa ka “bato nga dinagwayan,” nangin kasandaran ini sa katawhan ni Jehova. (Lev. 26:1) Amo man ang kuarta. Kinahanglanon ini kag magamit sing nagakaigo. Kinahanglan naton ang kuarta agod mabuhi kita, kag magamit man naton ini sa pag-alagad kay Jehova. (Man. 7:12; Luc. 16:9) Apang, mangin dios naton ang kuarta kon unahon naton ini sangsa aton pag-alagad sa Dios. (Basaha ang 1 Timoteo 6:9, 10.) Sa kalibutan karon, diin importante gid sa mga tawo ang pagpangita sing kuarta, dapat kita mangin balanse sa aton pagtamod sa sini.​—1 Tim. 6:17-19.

9, 10. (a) Paano ginatamod sang isa ka Cristiano ang edukasyon? (b) Ano ang katalagman sang pag-eskwela sa kolehiyo ukon unibersidad?

9 Ang isa pa ka mapuslanon nga butang nga mahimo mangin walay pulos amo ang edukasyon. Luyag naton nga makaeskwela ang aton mga anak agod may ipangabuhi sila sa ulihi. Kag mas importante pa, mabasa kag mahangpan sang isa ka Cristiano ang Biblia, matimbangtimbang niya kag malubad ang iya mga problema, kag matudlo niya ang kamatuoran sang Biblia sing maathag kag makapakumbinsi, kon may tinun-an sia. Ang maayo nga edukasyon nagakinahanglan sing tion, apang mapuslanon ini nga tion.

10 Kamusta naman ang pag-eskwela sa kolehiyo ukon unibersidad? Ginatamod ini nga importante sa kadalag-an. Apang, madamo sang nakaeskwela sa kolehiyo ang nakatuon man sang makahalalit nga kaalam sang kalibutan. Ang mapuslanon nga mga tinuig sang pagkapamatan-on nga magamit sa pag-alagad kay Jehova nauyang sa sini nga edukasyon. (Man. 12:1) Indi makapakibot nga sa mga kadutaan diin madamo ang nakabaton sini nga sahi sang edukasyon, pila na lamang ang nagatuo sa Dios. Sa baylo nga magsalig sa abanse nga sistema sang edukasyon sang kalibutan karon para sa kalig-unan, ang isa ka Cristiano nagasalig kay Jehova.​—Hulu. 3:5.

 Indi Paghimua nga Dios ang Undanon nga Handum

11, 12. Ngaa nagsiling si Pablo tuhoy sa pila: “Ang ila dios amo ang ila tiyan”?

11 Sa iya sulat sa mga taga-Filipos, may ginsambit pa si apostol Pablo nga mahimo mangin dios. Nagapatuhoy sa pila ka Cristiano anay, nagsiling sia: “Madamo ang nagalakat subong mga kaaway sang usok sang pag-antos sang Cristo, kag masami ko sila ginasambit anay apang ginasambit ko man sila karon nga nagahibi, kag ang ila katapusan amo ang kalaglagan, kag ang ila dios amo ang ila tiyan, . . . kag ang ila hunahuna yara sa mga butang sa duta.” (Fil. 3:18, 19) Paano mangin dios ang tiyan sang isa ka tawo?

12 Mahimo nga para sa pila ka kilala ni Pablo sadto, ang handum nga magpatuyang sa undanon nga mga kailigbon nangin mas importante pa sangsa pag-alagad kay Jehova upod kay Pablo. Mahimo nga ang iban nagpasobra sa pagkaon ukon sa pag-inom kag nangin hakugan ukon palahubog. (Hulu. 23:20, 21; ipaanggid ang Deuteronomio 21:18-21.) Mahimo nga ginkalitan gid sang iban anay nga nagkabuhi sang nahauna nga siglo ang mga kahigayunan nga nangin bukas sa ila, gani naupangan ang ila pag-alagad kay Jehova. Kabay nga indi gid naton pagtugutan ang handum para sa ginatawag nga maayo nga kabuhi nga maapektuhan ang aton bug-os kalag nga pag-alagad kay Jehova.​—Col. 3:23, 24.

13. (a) Ano ang pagkamahamkunon, kag paano ini ginlaragway ni Pablo? (b) Paano naton malikawan ang pagkamahamkunon?

13 May ginsambit pa si Pablo nga isa ka aspekto sang butig nga pagsimba. Nagsulat sia: “Busa, patya ninyo ang mga bahin sang inyo lawas nga yara sa duta may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya.” (Col. 3:5) Ang pagkamahamkunon amo ang kaila sa butang nga wala sa aton. Mahimo nga materyal nga mga butang ini. Malakip man ang ginadumilian nga sekso. (Ex. 20:17) Indi bala nga dapat lang mabalaka kita nga ini nga mga handum isa gali ka idolatriya, ang pagsimba sa butig nga dios? Naggamit si Jesus sing ilustrasyon agod ipakita nga importante gid nga kontrolon naton ining malain nga mga handum.​—Basaha ang Marcos 9:47; 1 Juan 2:16.

Mag-andam sa Walay Pulos nga mga Pulong

14, 15. (a) Sa anong “walay pulus” nga butang nasandad ang madamo sang adlaw ni Jeremias? (b) Ngaa mapuslanon ang mga pulong ni Moises?

14 Ang walay pulos nga mga butang mahimo man maglakip sa mga pulong. Halimbawa, nagsiling si Jehova kay Jeremias: “Ang mga manalagna nagatagna sing kabutigan sa akon ngalan; wala ko pag-ipadala sila, ukon ginsogo sila ukon nagpamolong ako sa ila. Nagatagna sila sa inyo sing binutig nga palanan-awon, pagpamakot nga walay pulus, kag limbong sang ila tagiposoon.” (Jer. 14:14) Nagsiling yadtong butig nga mga manalagna nga nagahambal sila sa ngalan ni Jehova, apang mga ideya nila kag kaalam ang ila ginpasanyog. Gani, “walay pulus” ang ila mga pulong kag makatalagam sa katawhan sang Dios. Sang 607 B.C.E., madamo ang napatay sang Babilonianhon nga mga soldado bangod namati sila sa sining walay pulos nga mga pulong.

 15 Sa kabaliskaran, nagsiling si Moises sa mga Israelinhon: “Ituhoy ang inyo tagiposoon sa tanan nga polong nga ginapamatuud ko sa inyo sining adlaw . . . Kay ini indi butang nga walay pulus sa inyo, bangud nga kabuhi ninyo ini, kag paagi sining butang palawigon ninyo ang inyo mga adlaw sa duta diin nagatabok kamo sang Jordan sa pagtag-iya sini.” (Deut. 32:46, 47) Huo, ang mga pulong ni Moises naggikan sa Dios. Gani, mapuslanon ini kag kinahanglanon gid para sa kaayuhan sang pungsod. Malawig kag mahamungaya ang kabuhi sang mga Israelinhon nga nagpamati sa sini nga mga pulong. Kabay nga sikwayon naton pirme ang walay pulos nga mga pulong kag tumanon ang mapuslanon nga mga pulong sang kamatuoran.

16. Paano naton ginatamod ang ginasiling sang mga sientista nga nagasumpakil sa Pulong sang Dios?

16 Makabati bala kita karon sing walay pulos nga mga butang? Huo. Halimbawa, nagasiling ang pila ka sientista nga ginapakita sang teoriya sang ebolusyon kag sang mga natukiban sang siensia sa iban nga mga patag nga indi na kinahanglan magtuo ang tawo sa Dios, kay mapaathag sang kinaugali ang tanan nga butang. Dapat bala kita mabalaka sa sining matinaastaason nga mga komento? Indi gid! Ang kaalam sang tawo tuhay sa kaalam sang Dios. (1 Cor. 2:6, 7) Apang, nahibaluan naton nga kon ang panudlo sang tawo nagasumpakil sa ginsiling sang Dios, ang panudlo sang tawo amo pirme ang sayop. (Basaha ang Roma 3:4.) Walay sapayan sang pag-uswag sang siensia sa pila ka patag, matuod gihapon ang ginasiling sang Biblia tuhoy sa kaalam sang tawo: “Ang kaalam sini nga kalibutan kabuangan sa Dios.” Kon ipaanggid sa walay latid nga kaalam sang Dios, ang pangatarungan sang tawo walay pulos.​—1 Cor. 3:18-20.

17. Paano dapat tamdon ang mga pulong sang mga lider sang Cristiandad kag sang mga apostata?

17 Ang isa pa ka halimbawa sang walay pulos nga mga pulong makita sa tunga sang relihioso nga mga lider sang Cristiandad. Nagahambal kuno sila sa ngalan sang Dios, apang ang ila ginasiling wala napasad sa Kasulatan kag walay pulos. Ang mga apostata nagahambal man sing walay pulos nga mga pulong, kay suno sa ila, ang kaalam nila labaw pa sa kaalam sang gintangdo nga “matutom kag mainandamon nga ulipon.” (Mat. 24:45-47) Apang, ang ginahambal sang mga apostata amo ang ila kaugalingon nga kaalam, kag walay pulos ang ila mga pulong, nga makapasandad sa bisan sin-o nga mamati sa ila. (Luc. 17:1, 2) Paano naton malikawan nga mapatalang nila?

Kon Paano Sikwayon ang Walay Pulos nga mga Pulong

18. Sa ano nga mga paagi maaplikar naton ang laygay sang 1 Juan 4:1?

18 Naghatag ang tigulang na nga si apostol Juan sing maayo nga laygay bahin sini. (Basaha ang 1 Juan 4:1.) Nahisanto sa laygay ni Juan,  ginapalig-on naton pirme ang mga tawo nga masumalang naton sa aton pagbantala nga hilikuton nga ipaanggid ang gintudlo sa ila sa ginasiling sang Biblia. Maayo man nga amo sini ang himuon naton. Kon makabati kita sing mga pulong nga nagamulay sa kamatuoran ukon nagapakalain sa kongregasyon, sa mga gulang, ukon sa bisan sin-o sa kauturan naton, wala kita nagapati dayon. Sa baylo, nagapamangkot kita: “Nahisanto bala sa Biblia ang ginahimo sang isa nga nagapalapta sini nga sugilanon? Ginasakdag bala sini nga mga sugilanon ukon mga kunokuno ang katuyuan ni Jehova? Makabulig bala ini agod magluntad ang paghidait sa sulod sang kongregasyon?” Walay pulos ang bisan ano nga mabatian naton kon makahalit ini sa aton paghiliutod sa baylo nga mapabakod ini.​—2 Cor. 13:10, 11.

19. Paano ginapat-od sang mga gulang nga indi walay pulos ang ila ginasiling?

19 Kon tuhoy sa walay pulos nga mga pulong, makatuon man ang mga gulang sing isa ka importante nga leksion. Kon dapat sila maghatag sing laygay, ginadumdom nila nga may mga limitasyon sila kag wala nila ginabase sa ila natipon nga ihibalo ang ila ginalaygay. Biblia pirme ang dapat nila gamiton. Ang maayo nga prinsipio masapwan sa ginsiling ni apostol Pablo: “Indi magsobra sa mga butang nga nasulat na.” (1 Cor. 4:6) Biblia lamang kag pasad sa Biblia nga laygay nga nasulat sa mga publikasyon sang matutom kag mainandamon nga ulipon ang ginabasihan sang mga gulang.

20. Sa ano nga mga paagi ginabuligan kita nga sikwayon ang walay pulos nga mga butang?

20 Makahalit gid ang walay pulos nga mga butang, subong sang “mga dios,” mga pulong, ukon iban pa. Bangod sini, paagi sa pangamuyo, pirme kita nagapangayo sing bulig kay Jehova nga makilala ini, kag nagapatuytoy kita sa iya kon paano ini sikwayon. Kon himuon naton ini, daw subong nga ginasiling man naton ang ginsiling sang salmista: “Ipalayo ang akon mga mata sa pagtan-aw sa butang nga wala sing pulos; tipigi ako nga buhi sa imo dalanon.” (Sal. 119:37, NW) Binagbinagon naton sa masunod nga artikulo kon ngaa dapat kita magpatuytoy kay Jehova.

Mapaathag Mo Bala?

• Sa kabilugan, ano nga “walay pulus” nga mga butang ang dapat naton sikwayon?

• Paano naton malikawan nga himuon ang kuarta nga mangin dios naton?

• Paano mangin dios ang undanon nga mga handum?

• Paano naton sikwayon ang walay pulos nga mga pulong?

[Mga Pamangkot sa Pagtinuon]

[Piktyur sa pahina 3]

Ginpalig-on ang mga Israelinhon nga ‘pangumahon ang ila duta,’ kag indi pagtinguhaan ang walay pulos nga mga butang

[Piktyur sa pahina 5]

Indi naton pagtugutan nga maapektuhan ang aton pag-alagad kay Jehova bangod sa handum para sa materyal nga mga butang

[Piktyur sa pahina 6]

Mapuslanon gid ang ginasiling sang mga gulang