Magdiretso sa kaundan

Magdiretso sa listahan sang kaundan

Napahilayo Apang Wala Ginakalimtan

Napahilayo Apang Wala Ginakalimtan

 Napahilayo Apang Wala Ginakalimtan

SI apostol Pablo naglaygay sa mga masigka-Cristiano: “Maghimo kita kon ano ang maayo sa tanan, apang ilabi na sa mga may labot sa aton sa pagtuo.” (Gal. 6:10) Ginasunod gihapon naton karon ining inspirado nga sugo kag nagapangita kita sing mga paagi nga himuan sing maayo ang aton mga masigkatumuluo. Lakip sa mga nagakinahanglan kag nagakabagay nga hatagan sing mahigugmaon nga igtalupangod sang Cristianong kongregasyon amo ang aton pinalangga nga tigulang nga mga utod nga nagaistar sa mga balay-alaypan.

Sa pila ka pungsod, kinabatasan na sang mga pamilya nga atipanon ang ila tigulang nga mga ginikanan sa ila balay. Apang, sa iban nga mga pungsod, ang madamo nga tigulang masami nga ginapaatipan sa balay-alaypan. Ano ang kahimtangan sang tigulang nga mga Cristiano nga nagaistar sa mga balay-alaypan? Ano ang ila mga problema? Paano nila ini ginaatubang kon wala sila ginasuportahan sang ila pamilya? Paano sila mabuligan sang Cristianong kongregasyon? Kag ano ang aton mabenepisyo kon pirme naton sila ginaduaw?

Mga Problema sa mga Balay-Alaypan

Mahimo nga ang balay-alaypan nga ginaistaran sang tigulang nga mga Cristiano nahamtang sa teritoryo sang iban nga kongregasyon kag indi sila kilala sang mga Saksi sa sini nga kongregasyon, gani, indi sila pirme maduaw. Dugang pa, posible gid nga ang ila mga kaupdanan sa balay-alaypan indi mga Saksi. Gani, mabudlayan gid ang aton tigulang nga utod.

 Halimbawa, kahimusan sang mga balay-alaypan sa pila ka duog nga maghiwat sing relihioso nga mga serbisyo sa ila pasilidad. Ang isa ka manug-atipan nagsiling: “Ang pila ka tigulang nga mga Saksi nga haluson na makahambal ginatulod sa wheelchair kag ginapatambong sa mga serbisyo sang simbahan nga wala man lang ginapamangkot kon bala luyag nila.” Dugang pa, masami ginagamit sang talapuanan sang mga balay-alaypan ang pagsaulog sing kaadlawan, Krismas, ukon Paskua sang Pagkabanhaw agod lingawon ang mga residente. Ang iban nga mga Saksi sa mga balay-alaypan ginapakaon man sing mga pagkaon nga supak sa ila konsiensia. (Binu. 15:29) Kon pirme naton duawon ang aton tigulang nga mga utod, mabuligan naton sila sa sini nga mga problema.

Pagsakdag sang Kongregasyon

Gin-atipan anay sang una nga mga Cristiano ang mga tigulang nga wala sing pamilya ukon paryente nga maatipan sa ila. (1 Tim. 5:9) Ginaatipan man kag ginapat-od sang mga manugtatap nga ang mga tigulang nga yara sa mga balay-alaypan wala ginapatumbayaan. * Si Robert, nga isa ka gulang, nagsiling: “Maayo gid kon duawon mismo sang Cristianong mga manugtatap ang mga tigulang agod tan-awon ang ila kahimtangan kag agod mangamuyo upod sa ila. Daku gid ang mabulig sang kongregasyon agod maatipan ang ila mga kinahanglanon.” Kon mag-iskedyul kita sing tion agod duawon ang mga tigulang,  ginapakita naton nga nahangpan naton kon daw ano gid ka importante kay Jehova ang pag-atipan sa mga nagakinahanglan.​—Sant. 1:27.

Kon kinahanglanon, nagahimo ang mga gulang sing mga kahimusan agod buligan ang mga utod nga nagaistar sa mga balay-alaypan. Ginsambit ni Robert ang isa ka kinahanglanon, “Dapat naton palig-unon ang tigulang nga mga utod nga magtambong sa Cristianong mga miting kon masarangan nila.” Apang, para sa indi na makasarang sa pagkadto sa Kingdom Hall, makahimo ang mga gulang sing iban pa nga mga kahimusan. Si Jacqueline, nga mga otsentahon na ang edad kag may osteoarthritis, nagapamati sa mga miting paagi sa telepono. Nagsiling sia: “Makapalig-on gid nga nagapamati ako sa mga miting paagi sa telepono samtang ginahiwat ini sa Kingdom Hall. Bisan ano pa ang matabo, luyag ko gid makapamati sa sini.”

Kon ang isa ka tigulang nga Cristiano indi makapamati sa mga miting paagi sa telepono, mahimo ini marekord sang mga gulang. Nian, magamit man sang utod nga magadul-ong sini ang kahigayunan nga masugilanon ini nga utod. “Mabatyagan sang tigulang nga mga utod nga bahin gihapon sila sang aton espirituwal nga pamilya kon balitaan naton sila tuhoy sa mga katapo sang aton kongregasyon,” siling sang isa ka manugtatap.

Padayon nga Makigkomunikar

Natural lang nga mabudlayan kag daw nagaliroliro ang madamo nga tigulang nga bag-o lang mag-istar sa balay-alaypan. Bangod sini, ang iban nangin maila. Apang, kon sa pagsaylo nila, duawon naton dayon sila kag pasaligon sila sang aton padayon nga pagsakdag, mabuligan gid naton sila nga indi na mahangawa kag gani, mapahalipay naton sila.​—Hulu. 17:22.

Kon ang tigulang nga mga utod daw nagaulianon na ukon haluson na nga makabati ukon indi na masugilanon sing maayo, mahimo magsiling ang iban nga wala na sing pulos nga duawon pa sila. Apang, kon padayon naton sila nga duawon, bisan pa daw mabudlay na nga makigsugilanon sa ila, ginapakita gihapon naton nga ‘nagapanguna kita sa pagpadungog’ sa aton mga masigkatumuluo. (Roma 12:10) Kon ang tigulang nga utod daw malipaton na, mahimo naton sia pa-istoryahon sang iya mga naeksperiensiahan, ayhan halin sang bata pa sia, ukon pasugiron sia kon paano niya natun-an ang kamatuoran sang Biblia. Ano ang himuon naton kon daw nagapanglaghap sia sing inughambal? Mamati sing mapailubon, kag kon nagakaigo, buligi sia sa daw ginalaghap niya nga mga tinaga, ukon sulita ang buot niya hambalon kag palig-una sia nga magpadayon sa pag-istorya. Kon daw nagaliroliro sia ukon nagapukol sa paghambal kag indi naton sia mahangpan, tinguhaan naton nga hangpon ang buot niya silingon paagi sa iya panghambal.

Kon indi na sia makahambal, maggamit sing iban nga mga paagi. Si Laurence, nga isa ka payunir, pirme nagaduaw sa Cristianong utod nga si Madeleine nga otsentahon ang edad kag indi na makahambal. Ginpaathag ni Laurence kon paano sia nagapakigkomunikar: “Ginauyatan ko ang kamot ni Madeleine samtang nagapangamuyo kami. Nian, ginapisga niya sing mahinay ang akon kamot kag nagapamisok bilang pagpasalamat sa sining bilidhon nga mga higayon.” Paagi sa pag-uyat sa kamot sang aton tigulang nga mga utod ukon paghakos sa ila sing hugot, ang ila mga kahangawa madula.

Importante Gid ang Imo Pagduaw

Ang imo regular nga pagduaw sa mga tigulang makabulig gid agod matigayon nila ang nagakaigo nga pag-atipan. Si Danièle, nga mga 20 ka tuig na nga nagaduaw sa mga utod sa balay-alaypan, nagsiling, “Kon makita sang talapuanan sang balay-alaypan nga ang isa ka tigulang pirme ginaduaw, atipanon nila sia sing mas maayo.” Si Robert, nga ginsambit kaina, nagsiling: “Mas ginapamatian sang mga empleyado sang balay-alaypan ang isa nga pirme nagaduaw. Wala nila ginapakita ini nga pagtahod sa talagsa lang nga nagaduaw.” Bangod masami nagapakig-angot ang mga nars sa mabudlay hambalon nga mga pamilya sang mga tigulang, ginaapresyar gid nila kon pasalamatan sila sang mga bisita. Isa pa, kon maayo ang aton relasyon sa mga nars, mas mahapos nila nga tahuron ang mga prinsipio kag mga pagtuluuhan sang ila pasyente nga tigulang nga mga Saksi.

 Mangin maayo man ang aton relasyon sa mga nars kon buligan naton sila sa simple nga mga buluhaton. Sa iban nga mga lugar, indi maatipan sing maayo ang mga tigulang bangod kulang sing tinawo ang balay-alaypan. Si Rébecca, nga isa ka nars, nagpanugyan: “Masako gid ang tion sa pagkaon. Gani amo ini ang maayo nga tion sa pagduaw sa isa ka abyan kag magbulig nga pakaunon sia.” Indi kita dapat mahuya mamangkot kon paano kita makabulig.

Kon regular kita nga nagaduaw sa balay-alaypan, makita naton kon ano ang mga kinahanglanon sang aton tigulang nga utod kag kon itugot sang mga empleyado makahimo kita sing mga tikang agod maaman ini. Halimbawa, mapatahom naton ang iya hulot paagi sa pagbutang sing mga retrato sang iya pamilya ukon mga drowing sang mga bata. Madalhan naton sia sing panapton nga pangbalay ukon sing mga butang nga magamit gid sa iya subong sang pulbos ukon habon. Kon may hardin ang balay-alaypan, mahimo naton sia madayandayan. Si Laurence, nga ginsambit kaina, nagsiling: “Ginakalangkagan gid ni Madeleine ang akon pagduaw kada semana. Malipayon gid sia kon ginaupod ko ang mga bata!” May daku gid ini nga epekto sa mga nagaistar sa balay-alaypan.​—Hulu. 3:27.

Makabenepisyo ang Tanan

Ang regular nga pagduaw sa tigulang mahimo magtilaw “kon matuod gid ang [aton] gugma.” (2 Cor. 8:8) Sa ano nga paagi? Masakit gid para sa aton kon makita naton ang isa ka abyan nga amat-amat nga nagaluya. Si Laurence nagbaton: “Sang primero, bangod sang pagluya ni Madeleine, nagahibi ako kada maduaw ko sia. Apang natun-an ko nga paagi sa hugot nga pagpangamuyo, madaug naton ang aton mga kahangawa kag mas mapalig-on naton ang aton ginaduaw.” Sa sulod sang madamo nga tinuig, ginaduaw ni Robert ang Cristianong utod nga si Larry nga may Parkinson’s disease. Si Robert nagsiling: “Bangod sang iya balatian, halos indi ko na maintiendihan ang ginahambal ni Larry. Apang sa tion nga mangamuyo na kami, mabatyagan ko gihapon ang iya pagtuo.”

Sa aton pagduaw sa tigulang nga mga masigkatumuluo, indi lamang sila ang nagabenepisyo kundi pati man kita. Ang ila determinasyon nga magpabilin nga suod kay Jehova samtang nagaistar sila sa balay-alaypan upod sa mga tawo nga lain sing relihion nagatudlo sa aton nga magpakita sing pagtuo kag kaisog. Ang ila kalangkag nga magbaton sing espirituwal nga pagkaon walay sapayan nga haluson na sila makabati ukon makakita isa ka ebidensia nga “ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mat. 4:4) Ang kalipay sang mga tigulang sa simple nga mga butang, subong sang pagyuhum sang bata ukon pagsalo sa ila sa pagkaon, nagapahanumdom sa aton nga dapat kita mangin kontento sa kon ano ang yara sa aton. Ang ila pag-apresyar sa mga butang may kaangtanan sa ila pagsimba sa Dios makabulig sa aton nga unahon ang dapat unahon.

Sa pagkamatuod, ang bug-os nga kongregasyon nagabenepisyo sa aton pagsakdag sa mga tigulang. Paano? Sanglit ang mga maluya sing panglawason nagasandig gid sa gugma nga ginapakita sa ila sang mga utod, nagahatag ini sa kongregasyon sing kahigayunan nga labi pa nga magpakita sing kaluoy. Gani, dapat naton tanan tamdon ang pag-atipan sa mga tigulang, bisan sa mas malawig pa nga mga tion, subong bahin sang aton pag-alagad sa isa kag isa. (1 Ped. 4:10, 11) Kon pangunahan ini sang mga gulang, ginabuligan nila ang iban pa nga mga katapo sang kongregasyon nga pat-uron nga ini nga aspekto sang aton Cristianong hilikuton wala gid ginapatumbayaan. (Ezeq. 34:15, 16) Paagi sa aton kinabubut-on kag mahigugmaon nga pagsakdag, mabatyagan gid sang aton tigulang nga mga masigka-Cristiano nga wala sila ginakalimtan!

[Footnote]

^ par. 8 Sa tion nga mahibaluan sang sekretaryo sang kongregasyon nga ang isa ka utod didto na nagaistar sa balay-alaypan nga sakop sang teritoryo sang iban nga kongregasyon mahigugmaon kag makabulig gid kon pahibaluon niya dayon ang mga gulang sa sina nga kongregasyon.

[Blurb sa pahina 28]

“Kon makita sang mga empleyado sang balay-alaypan nga ang isa ka tigulang pirme ginaduaw, atipanon nila sia sing mas maayo”

[Piktyur sa pahina 26]

Ang aton tinagipusuon nga mga pangamuyo makabulig sa aton tigulang nga utod nga indi na mahangawa

[Piktyur sa pahina 26]

Mapalig-on gid ang tigulang na nga mga masigkatumuluo kon palanggaon naton sila