Magdiretso sa kaundan

Magdiretso sa listahan sang kaundan

Mga Pamatan-on, Dumduma ang Inyo Dungganon nga Manunuga

Mga Pamatan-on, Dumduma ang Inyo Dungganon nga Manunuga

 Mga Pamatan-on, Dumduma ang Inyo Dungganon nga Manunuga

“Dumduma man ang imo Manunuga sa mga adlaw sang imo pagkapamatan-on.”​—MAN. 12:1.

1. Paano ginapakita ni Jehova ang iya pagsalig sa mga pamatan-on nga nagasimba sa iya?

GINATAMOD ni Jehova ang Cristianong mga pamatan-on nga hamili kag makaparepresko subong sang tun-og. Gintagna niya nga sa adlaw sang “gahum” sang iya Anak, ang mga pamatan-on nga lalaki kag babayi ‘magahalad sang ila kaugalingon sing kinabubut-on’ sa pag-alagad kay Cristo. (Sal. 110:3) Ini nga tagna matuman sa tion nga ang kalabanan nga tawo wala nagakilala sa Dios, mahigugmaon sing tuman sa kaugalingon kag sa kuarta, kag malinapason. Apang, nahibaluan ni Jehova nga tuhay ang mga pamatan-on nga nagasimba sa iya. May pagsalig gid sia sa inyo nga mga pamatan-on!

2. Ano ang kahulugan sang pagdumdom kay Jehova?

2 Hunahunaa lamang ang kalipay sang Dios kon makita niya ang mga pamatan-on nga nagadumdom sa iya subong ila Dungganon nga Manunuga. (Man. 12:1) Apang, ang pagdumdom kay Jehova wala lamang nagakahulugan sang paghunahuna sa iya. Nagakahulugan ini sang paghimo sing mga butang nga nagapahamuot sa iya, kag pagsunod sa iya mga kasuguan kag mga prinsipio sa aton pagkabuhi adlaw-adlaw. Nagakahulugan man ini sang pagsalig kay Jehova, bangod nahibaluan naton nga nagaulikid gid sia sa aton kaayuhan. (Sal. 37:3; Isa. 48:17, 18) Amo bala sini ang ginabatyag ninyo sa aton Dungganon nga Manunuga?

Magsalig kay Jehova sa Bug-os Ninyo nga Tagipusuon

3, 4. Paano ginpakita ni Jesus ang iya pagsalig kay Jehova, kag ngaa importante nga magsalig kay Jehova karon?

3 Si Jesucristo amo gid ang pinakamaayo nga halimbawa sang isa nga nagasalig sa Dios. Nagkabuhi sia nahisuno sa ginasiling sang Hulubaton 3:5, 6: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.” Wala magdugay pagkatapos sang bawtismo ni Jesus, gintinguhaan ni Satanas nga sulayon sia paagi sa pagtanyag sa iya sing kagamhanan kag himaya sa kalibutan. (Luc. 4:3-13) Apang, wala magpadala si Jesus sa pagsulay ni Satanas. Nahibaluan niya nga ang matuod nga “manggad kag dungug kag kabuhi” amo “ang balus sang pagpaubus kag sang kahadluk sa GINOO.”​—Hulu. 22:4.

4 Sa karon, madamo gid nga tawo ang makagod kag maiyaiyahon. Gani maalamon gid nga sundon naton ang halimbawa ni Jesus. Dumduma man nga ginahimo ni Satanas ang tanan nga paagi agod magsipak ang mga alagad ni Jehova gikan sa masipot nga dalan nga nagapadulong sa kabuhi. Luyag niya nga ang tanan mag-agi sa malapad nga dalan nga nagapadulong sa kalaglagan. Indi kamo magpadala sa iya! Sa baylo, mangin determinado kamo nga dumdumon ang inyo Dungganon nga Manunuga. Magsalig kamo sing bug-os sa iya, kag manguyapot sing malig-on “sa matuod nga kabuhi,” nga pat-od nga magaabot sa indi madugay.​—1 Tim. 6:19.

Mga Pamatan-on, Mangin Maalam Kamo!

5. Ano ang ginabatyag ninyo tuhoy sa palaabuton sini nga kalibutan?

5 Ang mga pamatan-on nga nagadumdom sa ila Dungganon nga Manunuga mas maalam sangsa ila mga katubotubo. (Basaha ang Salmo 119:99, 100.) Bangod pareho ang ila pagtamod sang Dios, nahibaluan gid nila kon daw ano kadulom ang palaabuton sini nga kalibutan. Bisan bata pa kamo, wala duhaduha nga namutikan ninyo nga ang mga tawo karon mabinalak-on sa ila palaabuton. Kon nagaeskwela  pa kamo, mahimo nga nabatian ninyo ang tuhoy sa polusyon, pag-init sa bug-os nga kalibutan, pagkalbo sa mga kagulangan, kag iban pa nga mga problema kaangay sini. Nagakahangawa gid ang mga tawo tuhoy sini, apang mga Saksi ni Jehova lamang ang nakahangop nga mga bahin ini sang tanda sang katapusan sang kalibutan ni Satanas.​—Bug. 11:18.

6. Sa ano naganyat ang iban nga mga pamatan-on?

6 Makapasubo nga ang pila ka pamatan-on nga alagad sang Dios nag-untat sa pagbantay kag nalipatan nila nga malip-ot na lang ang nabilin nga tion sa sini nga kalibutan. (2 Ped. 3:3, 4) Ang iban naganyat sa paghimo sing mabug-at nga sala paagi sa malain nga mga kaupdanan kag pornograpiya. (Hulu. 13:20) Karon nga malapit na kita sa katapusan, masubo gid kon mawasi pa naton ang kahamuot sang Dios! Magtuon gikan sa natabo sa mga Israelinhon sang 1473 B.C.E. sang nagkampo sila sa Kapatagan sang Moab. Malapit na gid sila sadto sa Ginsaad nga Duta. Ano ang natabo?

Nakasala Sila

7, 8. (a) Ano nga paagi ang gingamit ni Satanas sa Kapatagan sang Moab? (b) Ano nga paagi ang ginagamit ni Satanas karon?

7 Maathag nga indi luyag sadto ni Satanas nga makadangat ang mga Israelinhon sa duta nga ginsaad sa ila. Sang napaslawan sia nga pakamalauton sila paagi kay manalagna Balaam, naggamit si Satanas sing mas malalangon nga paagi; gintinguhaan niya nga indi sila pagpakamaayuhon ni Jehova. Gingamit niya ang makabilihag nga mga babayi sang Moab agod ganyaton ang mga Israelinhon, kag sa sini nga higayon nagmadinalag-on ang Yawa. Imoral nga nagpakighirop ang mga Israelinhon sa mga anak nga babayi sang Moab kag nagyaub sila kay Baal sang Peor! Bisan pa malapit na gid ang ila hamili nga palanublion nga Ginsaad nga Duta, napatay pa ang 24,000 ka Israelinhon. Masubo gid yadto!—Num. 25:1-3, 9.

8 Sa karon, madasig nga nagahilapit kita sa mas maayo pa nga ginsaad nga duta​—ang bag-o nga sistema sang mga butang. Suno sa kinaandan nga ginahimo ni Satanas, ginagamit niya liwat ang seksuwal nga imoralidad agod palainon ang katawhan sang Dios. Nagnubo na gid ang talaksan sang moralidad sa kalibutan. Ang pagpakighilawas ginakabig nga kinaandan na lang kag ang homoseksuwalidad ginatamod subong personal nga desisyon sang isa. Ang isa ka Cristiano nga babayi nagsiling: “Sa balay lamang kag sa Kingdom Hall natun-an sang akon mga anak nga ang homoseksuwalidad kag pagpakigsekso sa indi tiayon malain sa panulok sang Dios.”

9. Ano ang mahimo nga matabo sa isa nga yara sa “hingurusgan sang pagkapamatan-on,” kag paano niya ini atubangon ?

9 Nahibaluan sang mga pamatan-on nga nagadumdom sa ila Dungganon nga Manunuga nga ang seksuwal nga paghirupay isa ka sagrado nga dulot may kaangtanan sa kabuhi kag pagpanganak. Gani, nahibaluan nila ang kahimusan sang Dios nga ang seksuwal nga paghirupay para lamang sa mag-asawa. (Heb. 13:4) Apang, kon ang isa yara sa “hingurusgan sang pagkapamatan-on” mabudlay gid  magpabilin nga putli. Amo ini ang tion nga ang seksuwal nga balatyagon mabaskog kag mahimo makapatiko sang panghunahuna sang isa. (1 Cor. 7:36) Ano ang himuon ninyo kon indi nagakaigo ang inyo ginahunahuna? Mangamuyo ka kay Jehova nga buligan ka nga isentro ang imo panghunahuna sa maayo nga mga butang. Ginapamatian pirme ni Jehova ang mga sinsero nga nagadangop sa iya. (Basaha ang Lucas 11:9-13.) Ang makapalig-on nga paghambalanay makabulig man agod masentro ang hunahuna sa maayo nga mga butang.

Maalamon nga Pilia ang Inyo mga Tulumuron!

10. Anong di-maayo nga panghunahuna ang dapat naton likawan, kag ano nga mga pamangkot ang mahimo naton ipamangkot sa aton kaugalingon?

10 Ang isa ka rason kon ngaa madamo nga pamatan-on sa kalibutan ang nagapagusto lang sa pagpangalipay amo nga wala sila sing “palanan-awon,” buot silingon wala sila ginatuytuyan sang Dios kag wala sila sing pat-od nga paglaum sa palaabuton. (Hulu. 29:18) Kaangay sila sa mga Israelinhon nga nagbiya sa Dios sang panahon ni Isaias nga nagkabuhi para sa “kalipay kag kasadya, . . . pagkaon sing unud kag pag-inum sing alak.” (Isa. 22:13) Sa baylo nga mahisa sa sini nga mga tawo, ngaa indi ninyo paghunahunaon ang hamili nga paglaum nga ginaaman ni Jehova sa mga matutom sa iya? Kon ikaw isa ka pamatan-on nga alagad sang Dios, ginakalangkagan mo gid bala ang bag-o nga kalibutan? Ginapanikasugan mo gid bala nga “magkabuhi nga may maligdong nga hunahuna . . . samtang ginahulat [mo] ang makalilipay nga paglaum” nga ginaaman ni Jehova sa imo? (Tito 2:12, 13) Ang imo sabat makaapektar sa imo mga tulumuron kag prioridad.

11. Ngaa ang nagaeskwela pa nga Cristianong mga pamatan-on dapat magtuon sing maayo?

11 Luyag sang kalibutan nga gamiton sang mga pamatan-on ang ila kusog sa sekular nga mga tulumuron. Natural lamang nga ang nagaeskwela pa sa inyo dapat maghimakas nga makatuon sing maayo. Kay man, ang inyo tulumuron indi lamang makakita sang maayo nga trabaho kundi makabulig man kag makapalig-on sa kongregasyon kag mangin mabungahon nga manugbantala sang Ginharian. Agod mahimo ini, dapat makakomunikar kamo sing maathag, makahunahuna sing makatarunganon, kag makapangatarungan sing kalmado kag matinahuron sa iban. Apang, ang mga pamatan-on nga nagatuon sa Biblia kag nagatinguha nga iaplikar ang mga prinsipio sini sa ila kabuhi amo ang nakatigayon sing labing maayo nga edukasyon kag nagapahamtang sila sing maayo nga sadsaran para sa madinalag-on kag dayon nga palaabuton.​—Basaha ang Salmo 1:1-3. *

12. Ano nga halimbawa ang dapat ilugon sang Cristianong mga pamilya?

12 Sa Israel, ang pagtudlo sang mga ginikanan sa ila kabataan importante gid. Ginatudluan sang mga ginikanan ang ila kabataan sa halos tanan nga aspekto sang kabuhi, ilabi na may kaangtanan sa ila pagsimba sa Dios. (Deut. 6:6, 7) Gani, ang pamatan-on nga mga Israelinhon nga nagapamati sa ila mga ginikanan kag sa iban pa nga mahinadlukon-sa-Dios nga mga may edad na nakatigayon indi lamang sang ihibalo kundi sang kaalam man, paghantop, paghangop kag ikasarang sa paghunahuna. Mapuslanon ini nga mga kinaiya nga matigayon lamang paagi sa pagtuon tuhoy sa Dios kag sa iya mga kasuguan. (Hulu. 1: 2-4; 2:1-5, 11-15) Dapat man tudluan sang Cristianong mga ginikanan karon ang ila mga kabataan.

Pamatii ang mga Nagahigugma sa Inyo

13. Ano nga laygay ang ginabaton sang pila ka pamatan-on, kag ngaa dapat gid sila mag-andam?

13 Ang mga pamatan-on nagabaton sang laygay gikan sa tanan nga sahi sang tawo, pati na sa manuglaygay sa eskwelahan, nga masami nagalaygay sa mga estudyante kon paano mangin madinalag-on sa ila trabaho sa palaabuton. Palihug magpangamuyo  sa Dios kag magpangabay sang iya panuytoy kon ginabinagbinag ninyo ini nga mga laygay paagi sa bulig sang Pulong sang Dios kag sang mga publikasyon nga ginaaman sang matutom kag mainandamon nga ulipon. Gikan sa inyo natun-an sa Biblia, nahibaluan ninyo nga ang mga lamharon kag wala sing eksperiensia amo ang panguna nga puntariya ni Satanas. Halimbawa, sa hardin sang Eden, ang wala eksperiensia nga si Eva nagpamati kay Satanas, nga indi niya kilala kag wala gid sing gugma sa iya. Tuhay gid kuntani ang resulta kon namati lang si Eva kay Jehova, ang Isa nga nagpamatuod sang Iya gugma sa iya sa madamo nga paagi!​—Gen. 3:1-6.

14. Ngaa dapat kita mamati kay Jehova kag sa aton tumuluo nga mga ginikanan?

14 Ginahigugma man kamo sang inyo Dungganon nga Manunuga, kag maayo gid ang iya motibo. Luyag niya nga mangin malipayon kamo sing dayon, indi lamang karon! Gani, kaangay sa mapinalanggaon kag matinatapon nga ginikanan, nagasiling sia sa inyo kag sa tanan nga nagasimba sa iya: “Ini amo ang dalan, lakat kamo sa sini.” (Isa. 30:21) Kon kamo may tumuluo nga mga ginikanan nga nagahigugma gid kay Jehova, dugang ini nga pagpakamaayo sa inyo. Matinahuron nga pamatii ang ila mga laygay kon ginabinagbinag ninyo ang inyo mga prioridad kag mga tulumuron. (Hulu. 1:8, 9) Kay man, luyag nila nga matigayon ninyo ang kabuhi nga walay katapusan, isa ka butang nga malahalon pa sa manggad kag kabantugan sa sini nga kalibutan.​—Mat. 16:26.

15, 16. (a) Ano ang masaligan naton kay Jehova? (b) Anong importante nga leksion ang matun-an naton gikan sa eksperiensia ni Baruc?

15 Ginapasimple sang mga nagadumdom sa ila Dungganon nga Manunuga ang ila kabuhi, kag nagasalig sila nga indi gid sila “pagbayaan ukon pagpatumbayaan” ni Jehova. (Basaha ang Hebreo 13:5.) Bangod ining maayo nga panimuot tuhay sa panghunahuna sang kalibutan, dapat kita maghalong agod indi kita maimpluwensiahan sang panimuot sang kalibutan. (Efe. 2:2) Nahanungod sini, binagbinaga ang halimbawa sang sekretaryo ni Jeremias nga si Baruc. Nagkabuhi sia sa mabudlay nga katapusan nga mga adlaw sang Jerusalem nga nagdangat sa kalaglagan sang siudad sang 607 B.C.E.

16 Ayhan luyag man ni Baruc nga mag-ayuhan sa kabuhi kag magmanggaranon. Natalupangdan ini ni Jehova kag mainayuhon nga ginpaandaman niya si Baruc nga untatan ang pagpangita sing “mga butang nga dalagku” para sa iya kaugalingon. Nangin mapainubuson kag maalamon si Baruc, bangod namati sia kay Jehova amo nga naluwas sia sang ginlaglag ang Jerusalem. (Jer. 45:2-5) Sa pihak nga bahin, ang materyal nga “mga butang nga dalagku” nga gin-una sang mga kadungan ni Baruc sa baylo sang pagsimba kay Jehova, nadula tanan sang magsalakay ang mga Caldeanhon (Babilonianhon). Madamo man ang napatay. (2 Cron. 36:15-18) Ginapakita sa aton sang eksperiensia ni Baruc nga ang maayo nga kaangtanan sa Dios labi pa ka importante sa manggad kag kabantugan sa sini nga kalibutan.

Iluga ang Maayo nga mga Halimbawa

17. Ngaa maayo gid nga mga huwaran si Jesus, si Pablo, kag si Timoteo para sa mga alagad sang Dios karon?

17 Agod buligan kita sa paglakat sa banas sang kabuhi, ang Pulong sang Dios nagahatag sa aton sing madamo kag maayo nga huwaran. Halimbawa, si Jesus amo ang pinakasampaton nga tawo nga nagkabuhi, apang ginhatagan niya sing labi nga igtalupangod ang butang nga makabulig sa mga tawo sing  dayon. Amo ini “ang maayong balita sang ginharian.” (Luc. 4:43) Agod mahatag ni apostol Pablo ang iya labi nga masarangan kay Jehova, gintalikdan niya ang madinalag-on nga karera kag gingamit ang iya tion kag kusog sa pagbantala sing maayong balita. Gin-ilog ni Timoteo, nga “isa ka matuod nga anak sa pagtuo,” ang maayo nga halimbawa ni Pablo. (1 Tim. 1:2) Ginhinulsulan bala ni Jesus, ni Pablo, kag ni Timoteo ang ila ginhimo? Wala gid! Sa katunayan, nagsiling si Pablo nga ginkabig niya ang ginatanyag sang kalibutan subong “mga basura” kon ipaanggid sa pribilehiyo nga alagdon ang Dios.​—Fil. 3:8-11.

18. Anong daku nga pagbag-o ang ginhimo sang isa ka utod, kag ngaa wala niya ini ginhinulsulan?

18 Ginailog sang madamo nga Cristianong pamatan-on karon ang pagtuo ni Jesus, ni Pablo, kag ni Timoteo. Halimbawa, isa ka pamatan-on nga utod nga lalaki nga may daku sing sueldo nga trabaho ang nagsulat: “Bangod ginasunod ko ang mga prinsipio sa Biblia, wala madugayi kag nagtaas ang akon posisyon sa trabaho. Bisan pa nagdaku ang akon kita, nabatyagan ko nga nagapanikasog lamang ako sa hangin. Sang nagpalapit ako sa tagdumalahan sang kompanya kag ginhambal ang akon handum nga magsulod sa bug-os tion nga ministeryo, gintanyagan nila dayon ako sing daku pa nga kita agod magpabilin ako sa trabaho. Apang nakadesisyon na ako. Madamo ang wala makahangop kon ngaa gintalikdan ko ang daku sing sueldo nga trabaho agod magsulod sa bug-os tion nga pag-alagad. Ang akon sabat amo nga luyag ko tumanon ang akon dedikasyon sa Dios. Bangod nasentro na karon ang akon kabuhi sa pag-alagad sa Dios, naagom ko ang kalipay kag pagkakontento nga indi mahatag sang kuarta ukon kabantugan.”

19. Anong maalamon nga desisyon ang ginapalig-on sa mga pamatan-on nga himuon?

19 Sa bug-os nga kalibutan, madamo nga pamatan-on ang naghimo man sing maalamon nga desisyon. Gani, mga pamatan-on, kon ginahunahuna ninyo ang inyo palaabuton, dumduma ninyo pirme ang adlaw ni Jehova. (2 Ped. 3:11, 12) Indi kamo magkahisa sa mga nagatin-ad sa sini nga kalibutan. Sa baylo, pamatii ninyo ang mga nagahigugma gid sa inyo. Ang pagtipon sing “mga bahandi sa langit” sigurado gid nga puhunan kag amo lamang ini ang may dayon nga kapuslanan. (Mat. 6:19, 20; basaha ang 1 Juan 2:15-17.) Huo, dumduma ninyo ang inyo Dungganon nga Manunuga. Kag pakamaayuhon gid kamo ni Jehova.

[Footnote]

^ par. 11 Tuhoy sa pag-eskwela sa kolehiyo ukon unibersidad kag tuhoy sa trabaho, tan-awa ang Oktubre 1, 2005, nga Ang Lalantawan, pahina 26-31.

Madumduman Mo Bala?

• Paano naton mapakita nga nagasalig kita sa Dios?

• Ano ang labing maayo nga edukasyon?

• Ano ang matun-an naton gikan kay Baruc?

• Sin-o ang maayo nga mga huwaran, kag ngaa?

[Mga Pamangkot sa Pagtinuon]

[Mga piktyur sa pahina 13]

Nagaaman si Jehova sang labing maayo nga edukasyon

[Piktyur sa pahina 15]

Nagpamati si Baruc kay Jehova amo nga naluwas sia sang ginlaglag ang Jerusalem. Ano ang matun-an ninyo gikan sa sini?