Magdiretso sa kaundan

Magdiretso sa listahan sang kaundan

Iluga ang Pinakamaayo nga Misyonero

Iluga ang Pinakamaayo nga Misyonero

 Iluga ang Pinakamaayo nga Misyonero

“Mangin manug-ilog kamo sa akon, subong nga ako man kay Cristo.”—1 COR. 11:1.

1. Ngaa dapat naton ilugon si Jesucristo?

GIN-ILOG ni apostol Pablo ang pinakamaayo nga Misyonero, si Jesucristo. Ginpalig-on man ni Pablo ang iya mga masigka-Cristiano: “Mangin manug-ilog kamo sa akon, subong nga ako man kay Cristo.” (1 Cor. 11:1) Sang ginpakita ni Jesus ang halimbawa sang pagkamapainubuson sa iya mga apostoles paagi sa paghinaw sang ila mga tiil, sia nagsiling sa ila: “Naghatag ako sa inyo sang sulundan, nga subong sang ginhimo ko sa inyo, dapat man ninyo himuon.” (Juan 13:12-15) Subong mga Cristiano, obligado kita karon nga ilugon si Jesucristo sa aton ginahambal kag ginahimo kag sa aton mga paggawi.

2. Bisan pa wala ka natangdo sang Nagadumala nga Hubon subong isa ka misyonero, ano nga panimuot ang dapat mo matigayon?

2 Sa nagligad nga artikulo, natun-an naton nga ang misyonero amo ang isa nga ginpadala subong ebanghelisador—ang isa nga nagabantala sing maayong balita sa iban. May kaangtanan sa sini, nagpautwas si Pablo sing makawiwili nga mga pamangkot. (Basaha ang Roma 10:11-15.) Talupangda ang pamangkot sang apostol: “Paano . . . sila makabati kon wala sing isa nga magbantala?” Nian ginkutlo niya ang tagna ni Isaias: “Daw ano katahom sang mga tiil sang mga nagapahayag sang maayong balita tuhoy sa maayo nga mga butang!” (Isa. 52:7) Bisan pa wala ka natangdo kag napadala subong misyonero sa iban nga pungsod, mahimo mo matigayon ang panimuot sang isa ka ebanghelisador, nga nagailog kay Jesus subong isa ka makugi nga manugbantala sing maayong balita. Sang nagligad nga tuig, 6,957,852 ka manugbantala sang Ginharian ang naghimo sang hilikuton sang mga ebanghelisador sa 236 ka kadutaan.—2 Tim. 4:5.

 “Ginbiyaan Namon ang Tanan nga Butang kag Nagsunod sa Imo”

3, 4. Ano ang ginbiyaan ni Jesus sa langit, kag ano ang dapat naton himuon agod mangin mga sumulunod niya?

3 Agod matuman ang ginsugo sa iya sa duta, ginbiyaan ni Jesus ang iya langitnon nga kabuhi kag himaya kag “nagsuklob sang dagway sang ulipon.” (Fil. 2:7) Ano man ang aton himuon bilang pag-ilog kay Cristo indi gid ini makatupong sa ginhimo ni Jesus sang yari sia sa duta. Apang makapabilin kita nga matutom subong iya mga sumulunod, kag wala nagalangot ang aton buot sa mga butang nga aton natigayon sadto sa kalibutan ni Satanas.—1 Juan 5:19.

4 Sang isa ka higayon, si apostol Pedro nagsiling kay Jesus: “Yari karon! Ginbiyaan namon ang tanan nga butang kag nagsunod sa imo.” (Mat. 19:27) Ginbiyaan gilayon nanday Pedro, Andres, Santiago, kag Juan ang ila mga pukot sang gin-agda sila ni Jesus nga magsunod sa iya. Ginbiyaan nila ang ila palangabuhian nga pagpangisda kag ginhimo ang ministeryo nga panguna nga hilikuton sa ila kabuhi. Suno sa Ebanghelyo sang Lucas, si Pedro nagsiling: “Yari karon! Ginbiyaan namon ang amon pagkabutang kag nagsunod sa imo.” (Luc. 18:28) Indi gid man kinahanglan sang kalabanan sa aton nga biyaan ang tanan naton nga “pagkabutang” agod makasunod kay Jesus. Apang, kinahanglan naton ‘ipanghiwala ang aton kaugalingon’ agod mangin mga sumulunod kita ni Cristo kag mangin bug-os tagipusuon nga mga alagad ni Jehova. (Mat. 16:24) Madamo gid sing pagpakamaayo kon himuon naton ini. (Basaha ang Mateo 19:29.) Ang kakugi sa ministeryo bilang pagsunod kay Cristo nagapahalipay sa aton, bisan pa kon kaisa diutay lamang ang aton nahimo sa pagbulig sa iban nga mangin suod sa Dios kag sa iya hinigugma nga Anak.

5. Isaysay ang eksperiensia nga nagapakita kon ano ang mahimo himuon sang isa ka imigrante sa tion nga matun-an niya ang kamatuoran sa Biblia.

5 Si Valmir nga taga-Brazil, nagpuyo sa sentro sang Suriname. Nagatrabaho sia sa isa ka minahan sang bulawan didto. Palahubog sia kag imoral ang iya pagkabuhi. Isa ka bes, sang yara sia sa siudad, gintun-an sia sa Biblia sang mga Saksi ni Jehova. Adlaw-adlaw sia nga nagatuon, naghimo sing madamo nga pagbag-o, kag sang ulihi ginbawtismuhan. Sang nahantop niya nga ang iya daku sing kita nga palangabuhian nagabalabag sa iya agod masunod ang mga panudlo sang Biblia, gin-untatan niya ini kag nagpauli sa Brazil agod buligan ang iya pamilya nga makasapo sing espirituwal nga bahandi. Sang natun-an sang mga imigrante ang kamatuoran sa Biblia, madamo sa ila ang nagbiya sang ila trabaho sa manggaranon nga mga pungsod kag nagpauli sa ila duta nga natawhan agod buligan sa espirituwal ang ila mga paryente kag ang iban pa. Ining mga  manugbantala sang Ginharian may panimuot gid sang matuod nga ebanghelisador.

6. Ano ang aton himuon kon indi magtugot ang aton kahimtangan nga makasaylo sa mga duog nga diutay lamang ang mga manugbantala sing Ginharian?

6 Madamo nga mga Saksi ang nagsaylo sa mga lugar nga diutay lamang ang mga manugbantala sang Ginharian. Ang iban gani nagsaylo pa sa iban nga pungsod agod magbantala. Ayhan, ang aton kahimtangan indi magtugot nga makasaylo kita sa iban nga duog, apang mailog naton si Jesus paagi sa paghimo pirme sang aton bug-os nga masarangan sa ministeryo.

Si Jehova Nagahatag Sing Kinahanglanon nga Paghanas

7. Ano nga mga eskwelahan ang gindesinyo sa paghanas sa mga luyag nga magpauswag sang ila ikasarang subong manugbantala sing Ginharian?

7 Subong nga si Jesus nakabaton sing paghanas gikan sa iya Amay, makapanginpulos man kita sa paghanas nga ginahatag ni Jehova karon. Si Jesus nagsiling: “Nasulat na sa mga Manalagna, ‘Kag sila tanan pagatudluan ni Jehova.’” (Juan 6:45; Isa. 54:13) Sa karon, may mga eskwelahan nga gindesinyo agod magsangkap sa aton subong mga manugbantala sang Ginharian. Tanan kita pat-od gid nga nakabenepisyo sing daku sa Teokratikong Eskwelahan Para sa Ministeryo sa aton kongregasyon. Pribilehiyo sang mga payunir nga makaeskwela sa Pioneer Service School. Madamo sang madugay na nga mga payunir ang makaduha nga nakaeskwela sa sini. Ang mga gulang kag mga ministeryal nga alagad nagaeskwela sa Kingdom Ministry School agod mapauswag ang ila ikasarang sa pagpanudlo kag ang ila pag-alagad sa mga kauturan. Madamo nga di-minyo nga mga gulang kag mga ministeryal nga alagad ang nakaeskwela sa Ministerial Training School, nga naghanas sa ila agod buligan ang iban sa pagbantala. Kag madamo sa mga kauturan ang ginahanas anay sa Watchtower Bible School of Gilead antes ipadala subong mga misyonero sa iban nga pungsod.

8. Ano ang handa isakripisyo sang iban tungod sa paghanas nga ginahatag ni Jehova?

8 Madamo nga mga Saksi ni Jehova ang naghimo sing mga pagbag-o agod makaeskwela sa sini nga mga eskwelahan. Agod makaeskwela sa Ministerial Training School sa Canada, si Yugu naghalin sa iya sekular nga trabaho bangod indi sia pagpasugtan sang iya amo nga magbakasyon. “Wala ako maghinulsol,” siling ni Yugu. “Ang matuod, kon ginpasugtan nila ako nga magbakasyon lang, mahimo nga magalaum sila nga indi gid ako maghalin sa kompanya bilang utang nga kabalaslan. Apang karon handa ako sa pagbaton sa bisan ano nga asaynment nga ihatag ni Jehova.” Agod makapanginpulos sa paghanas nga ginahatag sang Dios, madamo ang handa magsakripisyo sang mga butang nga ginapakabahandi nila sadto.—Luc. 5:28.

9. Maghatag sing halimbawa nga nagapakita nga makabulig gid ang paghanas gikan sa Kasulatan kag ang hanuot nga panikasog.

9 Ang paghanas gikan sa Kasulatan kag ang hanuot nga panikasog makabulig gid agod mag-uswag ang ikasarang sang isa. (2 Tim. 3:16, 17) Binagbinaga ang natabo kay Saulo nga taga-Guatemala. Natawo sia nga mapigaw ang ikasarang sa pagtuon, kag ginsilingan sang isa sa iya mga maestra ang iya iloy nga indi sia pagpiliton nga magtuon sa pagbasa, kay mahimo lamang nga matak-an ang bata. Gani nag-untat si Saulo sa pag-eskwela nga indi gani makahibalo magbasa. Apang, isa ka Saksi ang nagtudlo kay Saulo sa pagbasa, nga nagagamit sang brosyur nga Apply Yourself to Reading and Writing. Wala magdugay, masarangan na niya nga maghatag sing bahin sa Teokratikong Eskwelahan Para sa Ministeryo. Sang ulihi, nasugilanon sang iloy ni Saulo ang maestra sa iya pamalaybalay nga pagbantala. Sang ginsilingan sia nga makahibalo na magbasa si Saulo, ginpangabay sang maestra ang iloy nga updon niya si Saulo sa iya pagbalik sa masunod nga semana. Sang masunod nga semana, ginpamangkot sang maestra si Saulo, “Ano ang luyag mo itudlo sa akon?” Ginbasa ni Saulo ang isa ka parapo sa libro nga Ano Gid ang Ginatudlo Sang Biblia? “Daw indi ako magpati nga ikaw na karon ang nagatudlo sa akon,” siling sang maestra. Sa iya kalipay, naghibi ang maestra kag naghakos kay Saulo.

Ang Pagpanudlo nga Nagatandog sa Tagipusuon

10. Ano ang maayo gid nga galamiton sa pagtudlo sing kamatuoran sa Biblia ang aton matigayon?

10 Nagpanudlo si Jesus suno sa gintudlo sa iya ni Jehova kag pasad sa Pulong sang Dios. (Luc. 4:16-21; Juan 8:28) Ginailog naton si Jesus paagi sa pagtuman sang iya laygay kag sa pagpasad sang aton  panudlo sa Kasulatan. Gani nagahisantuanay ang aton ginatudlo kag ang aton pagpati, kag bangod sini may paghiusa kita. (1 Cor. 1:10) Mapinasalamaton gid kita nga ang “matutom kag mainandamon nga ulipon” nagaaman sing pasad sa Biblia nga mga publikasyon agod maghisantuanay ang aton panudlo kag agod matuman naton ang aton hilikuton subong mga ebanghelisador! (Mat. 24:45; 28:19, 20) Isa sa sini nga mga publikasyon amo ang Ginatudlo Sang Biblia nga libro, nga matigayon na karon sa 179 ka lenguahe.

11. Paano gin-atubang sang utod nga babayi sa Etiopia ang pagpamatok paagi sa Ginatudlo Sang Biblia nga libro?

11 Ang pagtuon sa Kasulatan paagi sa Ginatudlo Sang Biblia nga libro mahimo pa gani nga makapabag-o sang tagipusuon sang mga nagapamatok. Sang si Lula, isa ka payunir sa Etiopia, nagadumala sing pagtuon sa Biblia, hinali lang nga nag-ulhot ang isa ka himata sang iya ginatun-an kag nagsiling nga indi na sila dapat pagtudluan pa. Kalmado nga nangatarungan si Lula sa iya, nga nagagamit sang ilustrasyon tuhoy sa peke nga kuarta sa kapitulo 15 sang Ginatudlo Sang Biblia nga libro. Naghipos ang babayi kag ginpabay-an sila nga magtuon. Kag sa ila masunod nga pagtuon, nagbuylog sia kag nagpangabay nga tun-an sia sa Biblia, kag luyag pa niya magbayad! Wala magdugay, gintun-an sia sing tatlo ka beses sa isa ka semana kag nag-uswag gid sa kamatuoran.

12. Maghatag sing halimbawa nga nagapakita kon paano magmadinalag-on ang mga pamatan-on sa pagtudlo sing mga kamatuoran sa Biblia.

12 Ang mga pamatan-on makabulig man sa iban paagi sa Ginatudlo Sang Biblia nga libro. Sang ang 11-anyos nga si Keanu sa Hawaii nagbasa sini nga libro sa ila eskwelahan, nagpamangkot ang iya klasmeyt, “Ngaa wala kamo nagapakigbahin sa mga selebrasyon?” Ginbasa ni Keanu ang sabat sa apendise sa topiko nga “Dapat Bala Kita Magpakigbahin sa mga Selebrasyon?” Nian ginbuksan niya ang listahan sang kaundan sang libro kag ginpamangkot sia ni Keanu kon sa diin ang iya luyag binagbinagon. Nasugdan ang pagtuon sa Biblia. Sang nagligad nga tuig sang pag-alagad, ang mga Saksi ni Jehova naghiwat sing 6,561,426 ka pagtuon sa Biblia, nga ang kalabanan sini nagagamit sing Ginatudlo Sang Biblia nga libro. Ginagamit mo bala ini nga libro sa imo mga pagtuon sa Biblia?

13. Paano ang pagtuon sa Biblia makapahulag sa mga tawo?

13 Ang pagtuon sa Kasulatan paagi sa Ginatudlo Sang Biblia nga libro makapahulag gid sa mga luyag maghimo sang kabubut-on sang Dios. Ang mag-asawa nga espesyal payunir sa Norway nakasugod sing pagtuon sa Biblia sa isa ka pamilya gikan sa Zambia. Ining mag-asawa may tatlo ka bata nga babayi kag indi na nila luyag nga magbata pa. Gani sang nagbusong ang iloy, luyag nila ipahulog ini. Pila ka adlaw antes sila magkadto sa doktor agod ipahulog ang iya ginabusong, natun-an nila ang kapitulo nga natig-uluhan “Ang Diosnon nga Pagtamod sa Kabuhi.” Ang laragway sang wala pa mabun-ag nga bata sa sini nga kapitulo nagtandog gid sa balatyagon sang mag-asawa, gani nagdesisyon  sila nga indi na pag-ipahulog ang ila bata. Maayo ang ila pag-uswag sa espirituwal kag ginhingalanan nila ang ila bata nga lalaki sa ngalan sang utod nga nagadumala sa ila sa pagtuon.

14. Ipaathag kon paano ang pagkabuhi nahisuno sa aton ginatudlo makapatubas sing maayo nga mga resulta.

14 Ang isa ka importante nga bahin sa pamaagi sang pagpanudlo ni Jesus amo ang iya pagkabuhi nahisuno sa iya ginatudlo. Bangod ginailog sia sang mga Saksi ni Jehova sa sini nga bahin, madamo nga tawo ang nagdayaw sa maayo nila nga paggawi. Ang salakyan sang isa ka negosyante sa New Zealand ginbuksan kag ginkawat ang iya porpolyo. Ginreport niya ini sa pulis kag ang pulis nagsiling: “Mabalik lamang ang imo pagkabutang kon makita ini sang isa sa mga Saksi ni Jehova.” Ang nakakita sang iya porpolyo amo ang utod nga babayi nga nagapangdul-ong sang pamantalaan. Sang ginpahibalo ini sa negosyante, nagkadto sia sa puluy-an sang utod. Nalipay sia sang iya nakita nga wala sing buhin ang mga papeles nga unod sini. Ang utod nagsiling sa iya, “Dapat lamang nga ibalik ko ini, ilabi na kay Saksi ni Jehova ako.” Nagdayaw gid ang negosyante, bangod nadumduman niya ang ginsiling sang pulis sadto mismo nga aga. Maathag gid nga ang matuod nga mga Cristiano nagakabuhi nahisuno sa panudlo sang Biblia kag nagailog kay Jesus.—Heb. 13:18.

Iluga ang Pagtamod ni Jesus sa mga Tawo

15, 16. Paano naton mabuyok ang mga tawo sa mensahe nga aton ginabantala?

15 Namati ang mga tawo kay Jesus tungod sa iya panimuot sa ila. Halimbawa, bangod sang iya gugma kag pagkamapainubuson nabuyok sa iya ang mga kubos. Naluoy sia sa mga nagpalapit sa iya kag ginlugpayan sila paagi sa mainayuhon nga mga pulong kag gin-ayo niya ang mga may balatian. (Basaha ang Marcos 2:1-5.) Indi kita makahimo sing mga milagro, apang mapakita naton ang gugma, pagkamapainubuson kag kaluoy—mga kinaiya nga sarang makabuyok sa mga tawo sa kamatuoran.

16 Nakabulig gid ang kaluoy sang ang isa ka espesyal payunir nga si Tariua nagbantala sa puluy-an sang tigulang nga lalaki nga si Beere, nga nagapuyo sa isa sa nabaw-ing nga mga isla sa Kiribati sa Bagatnan nga Pasipiko. Bisan pa wala sing gana nga mamati ang tigulang, nasat-uman ni Tariua nga medyo paralisado si Beere kag naluoy sia sa iya. “Nabatian mo na bala kon ano ang ginsaad sang Dios sa mga may balatian kag mga tigulang?” pamangkot niya. Nian ginbasa niya ang pila ka bahin sang tagna ni Isaias. (Basaha ang Isaias 35:5, 6.) Bangod sini, ang tigulang nagsiling, “Tinuig na ako nga nagabasa sing Biblia kag ginaduaw sang isa ka misyonero sang amon relihion, apang wala ko pa ini mabasahi sa Biblia.” Nasugdan ang isa ka pagtuon sa Biblia kay Beere, kag nag-uswag gid sia sa espirituwal. Huo, bisan nagakimpangkimpang sia, apang bawtismado na sia karon kag sia ang nagapanguna sa pagtatap sa sining diutay nga grupo, kag nagalakat na sa bug-os nga isla agod magbantala sing maayong balita.

Padayon sa Pag-ilog kay Cristo

17, 18. (a) Paano ka mangin madinalag-on nga ebanghelisador? (b) Ano ang mabaton sang mga makugi sa ministeryo?

17 Subong sang masami nga ginapakita sang makalilipay nga mga eksperiensia sa ministeryo, mangin madinalag-on man kita nga mga ebanghelisador kon palambuon naton kag ipakita ang mga kinaiya nga ginpakita ni Jesus. Busa nagakaigo gid nga ilugon naton si Cristo subong makugi nga mga ebanghelisador!

18 Sang ang iban nangin mga disipulo ni Jesus sang una nga siglo, si Pedro nagsiling: “Ano gid ang mabaton namon?” Si Jesus nagsabat: “Ang tagsatagsa nga nagbiya sang mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga duta tungod sa akon ngalan magabaton sang mas madamo pa kag magapanubli sang kabuhi nga walay katapusan.” (Mat. 19:27-29) Amo gid sini ang mabaton naton kon padayon naton nga ginailog ang pinakamaayo nga Misyonero, si Jesucristo.

Ano ang Imo Sabat?

• Paano kita ginahanas ni Jehova agod mangin ebanghelisador?

• Ngaa ang Ginatudlo Sang Biblia nga libro epektibo gid nga galamiton sa aton ministeryo?

• Paano naton mailog ang pagtamod ni Jesus sa mga tawo?

[Mga Pamangkot sa Pagtinuon]

[Piktyur sa pahina 17]

Sang gin-agda ni Jesus sanday Pedro, Andres, Santiago, kag Juan nga magsunod sa iya, nagsunod sila gilayon

[Piktyur sa pahina 19]

Ang mga publikasyon kaangay sang “Ginatudlo Sang Biblia” nga libro nagabulig nga maghisantuanay ang aton ginatudlo